طاجن السمان بالفريك

السلام عليكم

كانت طلبت مني مره شملوله حبيبتى صنف بالفريك بس يكون عشان يكون سهل

واخيرا جبته يا قوم

طاجن السمان بالفريك

السمان ده المفروض انه كان عندنا فى مصر من الطيور المهاجره وكان له مواسم

انما حاليا بقى موجود على طول وعملوا له مزارع

السمان صغير اوي ولما باعمله مش محشي بينشف ويبقى مش اد كده

كمان حشوه موال اوي خصوصا ان الجلد بتاعه خفيف وضعيف مش زي الحمام

المهم جربت اعمله الطاجن ده يلا نعمله بقى ونشوف هايطلع معاكم ايه

الاول طبعا باجيب السمان واغسله كويس بالملح وينضف ويبقى تمام

وبعدين باشق السمانه من ظهرها بالطول زي الصوره دي كده

نقول اننا هانستعمل خمس سمانات مثلا وبعدين بنتبله بقى باي توابل ولمون واي تتبيله نحبها

نيجى للفريك بقى هنحتاج حوالي كوبايه

الاول طبعا بنغسله كويس ولو كان عايز يتنقى ننقيه الاول وبعدين نغسله وننقعه ساعه مثلا وبعدين نصفيه كويس

وعلى النار نحط معلقة سمن بلدي ونكون محضرين بصله مفرومه ونحط البصله ونقلبها لحد ما تبقى شفافه

وممكن نحط الكبد والقوانص بتاعة السمان او لحم مفروم ونفضل نقلب ونحط بقى توابل وملح زي ما نحب

اي توابل لحمه تنفع

ونقلب لحد لما اللحمه لونها يتغير وتبدأ تستوي والميه الى نزلت منها تنشف وبعد كده نحط الفريك الاخضر ونفضل نقلب برضه لحد لما ميته تنشف وبعد كده نحط عليه ربع كوباية مايه ونسيبه على النار خمس دقايق بس

وبعد كده بقى نبدأ نرص الطاجن بتاعنا نحط شويه فريك وبعدين سمانه مفروده زي الصوره دي كده

وممكن نحط على وش كل سمانه حلقات بصل وفلفل وبعد كده نكمل فريك تاااااني وبعدين سمان تاااااني لحد ما تخلص الكميه

وبيكون الطاجن شكله كده

بعد كده نحط على الوش حلقات طماطم وفلفل ماشي برضه

وبعدين نغطيه بورق سيلفر ويدخل الفرن

بياخد فى الفرن حوالي ساعه

السمان مش بياخد سوي كتير والفريك اصلا احنا مسوينه

وبالنسبه للمايه الفريك بيتشرب المايه الى بتنزل من السمان وبيبقى تمام اوي

ولما بيطلع بيبقى شكله زي الصوره الى فوق دي وممكن نبقى نشيل الفويل فى اخر ربع ساعه عشان نحمر الوش

وممكن لو مش عندنا طاجن نعمل ده فى حله بايركس او حتى صنيه تمشي عادي

وعلى فكره الطريقه دي تنفع مع الحمام والفراخ كمان

لكن هايحتاجوا وقت اكبر فى الفرن طبعا

والف هنا يا حلوين والى يجرب يقووووووولي

كنافه عثمانلي

السلااااااام عليكم

الشغل اهو بقى هايشتغل ونوريكم شغل رمضان

انا قبل كده عملت كنافه بالقشطه للي عايز يدور عليها فى الماضي هايلاقيها

او هابقى اطلع لكم صورتها بره بوصله

المهم خلينا فى الكنافه العثمانلي الى مالهاش حل دي يا اخواتي

الكنافه العثمانلي يلا قدامي على المطبخ يا قوم

الاول هانجيب الكنافه ونفرمها كويس انا عشان تتفرم كويس بابيتها فى الفريزر وبعدين افركها تبقى فله اوي

اول حاجه هانجيب حله ونحط فيها كوباية سمن تقريبا وياريت شوية زيت صغيرين عشان السمنه لو بلدي هاتتحروق مننا

ولما تسخن نحط الكنافه خلينا نقول نص كيلو كنافه تقريبا

ونقلب الكنافه بقى كويس فيها ولو حسينا انها ناشفه شويه نزود شوية سمنه كمان

ونحمرها زي ما بنحمر الشعريه كده مثلا

اهو دي يادوب لما حطينها فى السمنه وقلبناها

ونفضل نقلب على طول عشان تاخد لون واحد ما تبقاش واحده وواحده وتبقى لونها دهبي كده وحلو زي الصوره دي كده


الكنافه دي بتاخد سمنه كتير اوي وانا قلبي مش بيطاوعني ناكل السمنه دي كلها ونتخن يا اخويا واحنا مش ناقصين باميل الحله كده واسيبها ربع ساعه تقريبا تلاقيها صفت شويه سمنه كده لا بأس بيهم على الجنب زي الصوره دي

باصفيه واشيهلم بقى واكمل شغل عادي

هانعمل ايه بقى بعد كده نكون مجهزين الشربات او الشيره او القطر بس يكون شربات تقيل

هاقولكم على حاجه اكتشفتها هى ان الحلوانيه بيستعملوا عسل البطاطس او عسل الجلوكوز وده بيكون تقيل جدا جدا ولونه فاتح اوي ومش مسكر اوي

سالت واحد حلواني قالي انهم بيستعملوه بخلطه مع شربات عادي بالسكر لحد ما يديكى القوام الى انتى محتجاه

المهم احنا هنا هانستعمل شربات او قطر تقيل او سميك هنحتاج للنص كيلو حوالي كوبايتين شربات هانسقي بهم الكنافه ونقلبها كويس

وبعد كده بقى نشوف حاجه نستعملها كقالب هانحط فى قلبها كيس ونحط فيها الكنافه ونضغط كده عليها لحد ما تتشكل على شكل القالب ونقلبها فى طبق وتبقى كده

هانحط عليها بقى من فوق الكاستر او المهلبيه او كرييم باتسيير ونزينها بالفواكهه زي الصوره بتاعتي الى فوق كده انا حاطه اناناس ومانجه

وطبعا ممكن نعملها بقى وحدات بعدد الناس الى هتاكل وتكون وحدات صغيره زي الى فى الصوره دي تكفي فرد واحد

وممكن كمان نعملها قالب كبير زي كده

وبرضه هانضغط عليها لحد ما تبقى قاعده الكنافه جاهزه كده وبعدين نزينها بقى وبيكون شكلها كده

ودي كانت تورتة عيد ميلاد رحمه الى كان عيد ميلادها موافق اول يوم رمضان

فعملنا تورتة بالكنافه عشان تليق على رمضان

انا هنا مستعمله مهلبيه بيضاء وكاستر اصفر ممكن انتم تعملوا اي لون تحبوه عادي وعملته بقمع الكريمه عشان يبقى شكله حلو والفاكهه برضه الانانس والمانجه برضه ممكن تلونوا انتم اكتر

والف هنا ليكم والى يجرب يقولي

وكل سنه وانتم طيبيييييين

كبدة الدجاج على طريقة جدتي

كل سنه وانتم طيبين يا حلوين

واول يوم اكتب فى رمضان وادعولي اعرف اكتب بعد كده

النهادره هانعمل حاجه خفيفه كده سريعه تنفع جنب الاكل خصوصا فى رمضان

احيانا باكون عامله اكل ناشف وعايزه جمبه نوع شوربه خصوصا فى الصيام

والشوربه دي كانت جدتى الله يرحمها الى معلمهالي وكانت بتعملها حلوووه اوي

انا باعملها زيها لكن برضه مش باحس انها زي بتاعة تيته

الله يرحمها يارب ويقابلنا فيها فى الجنه ان شاء الله

انا باحب اعمل الشوربه دي بالكبده وخصوصا كبدة الدجاج

لكن ممكن تتعمل طبعا بكبدة البقر او حتى تتعمل بلحمه مقطعه صغير اوي

او قلب برضه يمشي

انا هنا جبت كبد وقوانص الفراخ ونضفتهم كويس طبعا وبعدين فى حله تحطي معلقة سمنه ولما تسخن تحطي الكبده وتقلبيها وتحطي عليها فلفل اسمر ومستكه واي بهارات تحبيها للحوم عموما وممكن عصير بصل او حتى بصل مفروم

وتغطي عليها وتسبيها لحد ما تنزل مايتها وتبدأ مايتها تنشف وممكن نزودها نص كوباية مايه تستوي فيها ويبقى شكلها كده

معلش الصور مش حلوه اصل البرنامج الى بيظبط الصور عندي مش شغال على نبقى نشوف غيره

المهم لما تبدأ تستوي الكبده نبدا احنا نجهز الشوربه بقى

هانجيب حله ونحطها على النار ونحط فيها معلقتين سمن بلدي ولما تسخن نحط معلقتين دقيق ونحمرهم كويس لحد ما يبقى لونهم بنى فاتح زي كده

ولما يبقى لونه كده نحط عليه شوربه سخنه شويه شويه حوالي لتر شوربه ولو مافيش شوربه نحط مايه حتى عادي

ولما نقلبها كويس وما يبقاش فيها كرات دقيق ولا حاجه نزود عليها الكبده بالصوص الى نازل منها بكله كله ونقلب كويس

ونسيبها تغلي دقيقتين ثلاثه كده وطبعا نظبط ملحها وبس كده تبقى جاهزه

ساعة التقديم ممكن نزود عليها شويه كريمه لباني ونقلبها لكن انا مش باحب احط حاجه فى حليب مع الكبده واللحمه عشان الكالسيوم بيمنع امتصاص الجسم من امتصاص الحديد

وممكن نحط على الوش شوية بقدونس وبالهنا والشفا

وطبعا الى يجرب يقولي

والمناسبه السعيده دي ان احنا فى رمضان يعنى

الى عايز اي صنف يقوله وانا اعمله ان شاء الله لو كان هاينفع

التشيز كيك

عدنا عدنا عدنا

حبيبى مطبخي الالكتروني الى وحشني جدا جدا جدا

والله يا جماعه غصب عني الايام دي انا مشغووووووووووله وهحاول جاهده انى استمر معاكم فى رمضان بس طبعا المطبخ الواقعي بيمسح الوقت معايا فى رمضان كل سنه وانتم طيبين

ويارب يكون رمضان كريم ومبارك عليكم وعلى اسركم جميعا وعلى المسلمين والعالم كله

هيا سريعا الى العمل بقى عشان المطبخ الواقعي ينادينى

اولا الصنف بتاع النهارده ولا فخر الانسه مريم والانسه رحمه هما الى جابوا المقادير من موقع زمرده كوكب للبنات فقط يا اخواتي عليهم

واصروا ينفذوه وعملناه سوا مع بعض التعديلات

المهم

المقادير :

هانحتاج بسكوت ساده حوالي عشرين بسكوته مثلا مفرومين (وممكن كمان بواقي كيك عندك تحمصيها فى الفرن وتفركيها او تفرميها )

3 معالق زبده (مش جامده يعنى فى درجة حرارة الغرفه )

وللحشو

وهانحتاج عشر قطع جبنه مثلثات او اي جبنه تانيه ناعمه كريم تشيز او اي حاجه شبه كده

كمان كيس كريم شانتيه

معلقتين كبار جيلاتين بودر او علبة جيلى بنكهه مناسبه لو كنا هانعمل التشيز كيك باي نوع فاكهه

أنا بقى احيانا مش بالاقي بسكوت ساده زي ما حصل كده فى اليوم ده

فبعمل انا عجينه فى البيت واسويها زي عجينة التارت كده شويه

الى هى ايه

كوباية دقيق عليها 3 معالق كبار زبده ونفركهم مع الدقيق كويس زي ما رحمه بتعمل كده

بعد كده اعجنها بنص كوباية حليب احط شويه شويه على اد ما تاخد يادوب الم العجينه وتبقى شكلها كده

كده بتطلع حلوه بس انا احيانا احب ازود كمان معلقة بكنج بودر علي الدقيق عشان تطلع مفروله زي البسكوت الى المفروض بنستعمله فى التشيز كيك

باخد العجينه وافردها فى قالب على اي شكل انا احبه وليكن القالب التقليدى للتشيز كيك زي الى مريم بتفرد فيه العجين ده

بعد كده بنظبطه ونساوي الحواف بالسكينه وبيبقى شكله كده

بعد كده بنغطي العجينه بالورق الفويل ونحط فوقيها حاجه تقيله ممكن شويه فاصوليا ناشفه او لوبيا ناشفه او لو عندك طاجن فخار اصغر من القالب بتاعك بهمسه كده ينفع برضه

المهم حاجه تمسك العجين ما يسيحش وينزل على جدران القالب وتفضل مرفوعه ونخبزها لحد ما تستوي وتاخد لون اصفر فاتح

وبنطلعها ونسيبها تبرد ونطلعها من القالب بتاعها لو حبينا

وميزه البسكوت الى بتعمليه فى البيت ده انه بيبقى ماسك نفسه مش زي القاعده الى بتعمليها من بسكوت مفرفرت وكده يعنى

وانا عن نفسي باحبه اكتر

ونيجى بقى للحشوه بتاعة التشيز كيك

احنا ممكن نعمل الحشوه بنكهات كتير اوي

ممكن بالفراوله وممكن بالمانجه وممكن بالشيكولاته وممكن باي حاجه تحبوا عادي جدا

انا النهارده عملته بالشيكولاته الى ولادي عندهم استعداد يستحموا فيها كل يوم 3 مرات

امعانا فى زيادة الشيكولاته فى الطبق انا دهنت طبقة البسكوت بصوص الشيكولاته زي ما انتم شايفين كده

تعالوا بقى نعمل الخلطه لحشو التشيز كيك

احنا قلنا هنحتاج حوالي 10 قطع جبنه مثلثات او ما يساويهم من اي جبنه كريميه الطعم والملمس

ويكون عندنا كوباية كريم شانتيه جاهزه

وكمان كوباية جيلى جاهز بنكهه مناسبه

لو عاملاها شيكولاته زيي كده انا بادوب معلقتين الجيلاتين الى انا قلت عليها فوق فى كوباية حليب سخن واسيبه لما يبرد شويه ويكون جاهز للوصفه دي

هانحط كل ده على بعضه ونضربه بالمضرب كويس اوي لما يبقى عامل زي الكريمه قدامنا كده

انا بافضل اعمل الحشو دي بدري واسيبها فى التلاجه ساعه قبل ما استخدمها فى التشيز كيك عشان تبقى ماسكه نفسها

بعد كده بافردها على قاعدة البسكوت الى عملناها سوا واغطيها بصوص الشيكولاته لو كنت عاملاها بالشيكولاته

او فراوله او مانجه او اي نكهه تانيه بتحبيها

وبازينها بكريمة الشيكولاته برررررضه

او كريم شانتيه ابيض لو حبيتى

وبيكون ده شكلها

والف هنا لكم

وحقيقى كانت طالعه حلوه اوي من ادين بناتي الحلوين الى قعدت بعدها ساعتين انضف فى المطبخ بعد الى عملوووووووه فيا

قصدي معايا

جربوا وقولووووووولي

وكل سنه وانتم طيبين

تخزين الخضار (باميا وملوخيه وبتنجان )

السلام عليكم

واخيرا عدنا الى مطبخنا السعيد بعد الرحله المضنيه بتاعتي

وزي ما قلنا المره الى فاتت هانجهز النهارده الخضار عشان نخزنه فى الفريزر

الحقيقه هو طبعا الخضار الفريش مافيش احسن منه

لكن برضه ساعات الواحد فى الشتا كده نفسه تهفه يشرب شوية ملوخيه من الصح دول

وكمان بصراحه وجود الخضار متجهز فى الفريزر عندك دي بتنفع جدا جدا فى الزنقات

ما لقتيش خضار فريش ما عرفتيش تنزلي جالك ضيوف فجأه

وكمان لو الست بتشتغل وعايزه تطبخ طبعا بعد ما ترجع فى نص ساعه

هانعمل النهارده الباميا والملوخيه والبتنجان ان شاء الله

هما دول المتوفرين فى السوق الايام دي ودي ايام تخزينهم

اولا الباميا

شوفي يا ستى انا باحب اشتري الباميا الى حجمها وسط لا كبيره مجلده وشايخه ولا صغيره تفقعنى فى التقميع وما تصفيش حاجه

وكمان الباميا البيضاء احسن من الباميا الحمراء مش عارفه ليه بس بابا بيقولي كده

ههههههههههههههه

طبعا ده بالنوسبه للباميا المصري يا قوم

طبعا هاتقمعي الباميا (تشيلى الحته الى فوق فيها دي )

ودي شكل الباميا بعد ما قمعناها

وبعد كده نحطها فى مصفاه ونغسلها كويس اوي وتبقى شكلها كده

وبعدين نحط حلة مايه على النار ونسيبها لحد ما تغلي وبعد ما تغلي نسقط فيها الباميا

قالولي حطي شوية كربونات الصوديوم فى المايه عشان الباميه تبقى منعنه الحقيقه جربتها لقيت مافيش فرق

جايز تفرق معاكم ماليش دعوه

وممكن نحط نقطتين ليمون برضه مش كتير

المهم لما الباميه تغلي نهدي عليها النار ونسيبها تغلي حوالي عشر دقايق ربع ساعه كده

بس ما نزودش يعنى يادوب الباميا تدبل كده مش تستوى سوى كامل عشان ما تتهراش فى الفريزر وبيكون شكلها كده بعد ما تستوي

بعد كده بنصبها فى مصفاه ونسيبها تنزل المايه بتاعتها كلها وبعدين لما تبرد خالص نخطها فى اكياس وزي ما قلنا قبل كده فى بوست التلاجه نحاول نعمل الاكياس كلها مسطحه كده عشان تتفكك بسرعه وما تاخدش مكان فى الفريزر

وطبعا بتقسمي بقى الاكياس كل كيس طبخه مثلا على ادكم

ولما تيجى تستعمليها طلعيها من الفريزر على الحله دوغري لو سبتيها تفك الاول هاتسرد مايه وما تبقاش حلوه على طول تسقطيها فى التقليه بتاعة الباميه وتهدي عليها النار لحد لما تفك

نيجى بعد كده للبتنجان

انا هنا اقصد بتنجان المحشي الى هو البتنجان الابيض الطويل

انا باجيبه واقوره واقليه فى زيت غزير

ايوه فى ناس بتشوحه بس فى زيت قليل

لا ده لما بيتحط فى الفريزر بيلزق فى بعضه وموال رخم كده

انما انا باقليه فى زيت كتير وبالظبط بياخد 4 دقايق على النار يعنى يادوب يصفر كده

وبعدين اطلعه واحطه فى مصفى يصفي زيته وبعد ما يبرد برضه على الكيس ونوضبه ونحطه فى الفريزر

فى ناس بقى قالولي انه بيلزق فى بعضه معاهم مش عارفه ليه بصراحه لكن اغلب الظن عشان حكايه التشويح ده

المهم قالولي انهم بيدخلوا كل بتنجانا فى التاني يعنى يلبسوهم فى بعض ويرصوهم فى علبه بلاستك وبعدين يحطهوها بحالها فى الفريزر

الحقيقه ما جربتهاش بس يعنى ما تقولش لا طبعا

والبتنجان العادي الى هو بتاع المسقعه وما الى ذلك

انا مره كان عندي بتنجان كتير وشكله كده هايبوظ فقليته كله وحطيته فى التلاجه وقلت بكره اعمله مسقعه المهم ما عرفتش اعمله يومها الجدول كان انشغل

فحطيته فى الفريزر وقلت والله بقى يا صابت يا خابت

والحقيقه بعد كام يوم كده عملته مسقعه وكان ماشي الحال يعنى مافيش مشكله

لكن البتنجان الاسود ده دلوقتي مش حلو بالنسبه لي بيبقى حامي شويه ومتعب انما فى شهر خمسه وسته بيبقى حلو اوي عن دلوقتي

نيجى بقى للملوخيه

للاسف الشديد كل ما اشتري ملوخيه عشان اخزنها قوم نعملها وناكلها

ههههههههههههههههههه

فلسه ما صورتهاش لكن يعنى هى مش محتاجه صور

طبعا هانشتري الملوخيه ونقطف الورق بتاعها وبعدين نغسلها كويس ونفردها علىصنيه كبيره ويا حبذا لو كان تحتها حتة قماشه عشان تشرب المايه ونسيبها كده فى الهوا ساعتين ثلاثه لحد ما تنشف كويس

وبعدين ناخدها لما تنشف ونخرطها

طبعا فى ماكينات لخرط الملوخيه دلوقتي بس الحقيقه مافيش زي مخرطة امي تحديدا فى الملوخيه مش عارفه ليه

المهم هانخرطها باي طريقة ان كانت لحد ما تبقى ناعمه كويس

وبعدين هانغلي مايه او شوربه بس بلاش شوربة فراخ مش عارفه بتغير طعمها ليه فى الفريزر

المايه برضه مات قولش حاجه يعنى مثلا لو عندنا 4 كوبايات ملوخيه مخروطه نحط على النار 4 كوبايات مايه مثلا ولما تغلي نحط عليها ربع معلقة كربونات الصوديوم (برضه عشان تفضل خضرا )

وبعدين لما تغلي نسقط الملوخيه ونقلب دقيقه واحده بس لحد ما تغلي اول ما تغلي نطفي عليها

وما نغطيهاش ونسيبها تبرد

ولما تبرد بقى برضه نحطها فى اكياس بس المره دي نربط الاكياس او نقفلها حراري عشان هاتكون الملوخيه سايله

ولما نيجى نستعملها برضه من الفرزير على الحله عدل من غير ما تفككيها الاول

والمانجه ظهرت اهو بقى فى الطريق اليك نخزنها ونقولكم برضه

اي سؤالت انا تحت الامر

الكشري المصري

ايه رايكم بقى فى الاكله الجامده دي

الكشري المصري من الاكلات الى الواحد يضرب الطبق بالصلاه على النبي يقعد 24 ساعه على الاقل مش قادر يتكلم ولا يفكر ولا اي حاجه

متنح ايوه هى دي الحاله بالظبط

حيث انى رافعه شعار الايام دي ما حدش ياكل من بره

وحيث ا ننا شعب رمرام وبنعز اكل الشارع اوي

فانا مضطره تحت التهديد وبعد ما نزلت البوست ده انى اقول الى هايكل كشري تاني بره هاجيب المطوه واخده واحده زواقه كده تفكره انه ما ياكلش بره

المهم بعد جلسة البلطجه بقى ندخل على المطبخ

هنحتاج علشان نعمل حوالي 3 اطباق من الكشري زي الى فوق ده الآتي

كوباية عدس بجبه ( الى لونه بنى يعنى )

وكوباية رز

وحوالي ربع كيلوا مكرونه صغيره

وكوباية حمص مسلوق

ولو كان الحمص مش مسلوق نحطه على النار اول حاجه لانه بياخد سوي كتير عن باقي الحاجات

اول حاجه نعملها نغسل العدس وننقعه حوالي ساعه

وبعدين نرمي ماية النقع ونحط بدالها كوبايتين مايه ونحط العدس على النار

فى ناس بتعمل العدس مع الرز

الحقيقه انا مش باعمله كده لكن هاقولكم الطريقتين هاعمل طريقتى الاول

انا دلوقتي العدس على النار

تعالوا نعمل بقى التقليه بتاعة الكشري على ما العدس يستوي

هانجيب عصير طماطم يعنى هنحتاج نص كيلو طماطم ولو كانت لونها مش ا حمر اوي زودي معلقتين صلصة علب

وبصله كبيره مفرومه

و3 فصوص توم مفرومين

3 فلفل احمر مفرومين

اول حاجه بقى هانحط معلقتين زيت على النار او سمنه مش مهم

ونحط البصله ونشوحها لحد ما تصفر كده وبعدين التومه ودقيقه واحده وحط الفلفل ودقيقه كمان ونحط عصير الطماطم

ونسيبه بقى تتسبك ونحطلها ملح وتوابل ( انا باحط كمون وفلفل وجنزبيل )

على ما تتسبك يكون الكشري تقريبا استوى او اقترب من ذلك

فى انواع عدس بتاخد سوى كتير يعنى ساعه واكتر (زي العدس البلدي الى حبايته غامقه ورفيعه )

وفى انواع بيستوى فى اقل من نص ساعه

ظبطي انى بقى السوى بتاعه حسب النوع اول ما تمسكي الحبايه تلاقيها ببتقشر والى جواها ناعم يبقى خلاص كده استوت

قبل ما يتم السوى واول ما التقليه تتسبك باحب احط عليه شوية من التقليه بتخليه طعمه تحفه يعنى نص كبايه كده

وبعدين نسيبه يغلى مع التقليه خمس دقايق بس ونطفي ونكون مظبطين ملحه طبعا

نكون بقى فى هذه الاثناء سلقنا المكرونه

وسوينا الرز باي طريقه تعجبنا وممكن نعمله رز بالشعريه لو حبينا

لو حبينا بقى نعمل الرز مع العدس فى نفس الحله

هانحط على كوباية العدس حوالي 3 كوبايات مايه ( لو ما كناش ناقعينه كتير اوي يعنى خمس ست ساعات )

وهانحط العدس على النار وبعد ربع ساعه كده تقريبا نسقط الرز فى الحله وطبعا يكون مغسول وتمام

ونقلبه مع العدس الى نكون زودنا عليه التقليه والملح وكله تمام ونسيبه بقى يتشرب مايته ولما الميه تنشف نهدي النار ونسيبه يستوى على مهله حوالي ربع ساعه كمان

وكمان نكون فرمنا بصله كبيره او بصلتين مش مشكله وحمرناهم كويس فى الزيت لحد ما بقى لونهم بنى زي الصوره دي

بس الحقيقه صوره مش واضحه مطلعاه غامق ا كتر من حقيقته

مواااااااال صح بس والله مش صعب

ندخل بقى ترتيب الطبق وغرفه بعد ما كل حاجه استوت

اول حاجه الرز بنحط 4 معالق ارز تقريبا ونفردهم فى الطبق

وبعدين العدس بالكميه الى نحبها

بعد كده المكرونه ونفردها على وش العدس كويس

وبعدين الحمص

زي الصوره دي كده

وبعدين نحط شويه من الصلصه الى عاملناها فوق ونفردها كويس برضه

وبعد كده نرش البصل المحمر على الوش ويبقى الطبق شكله كده

اخر تمام

نيجى بقى للصلصه الى بتبقى جمب الكشري

انا باريح نفسي يا جماعه واخد شويه من التقليه الى انا عملتها دي وازود عليها شويه خل وشطه وتوابل واضربها فى الخلاط

بس لونها بيفتح شويه من الخلاط بارجعها تاني على النار يادوب تغلي وتبقى كده تمام

فى بقى دقة التوم

فى الحقيقه انا ما باعملهاش لواحدها لان ما لهاش طلب عندنا اوي بس ساعات ازود الخلطه الى فاتت دي خل وتوم وتبقى ميكس يعنى

بس اقولكم بتتعمل ازاي برضه

هانجيب 3 فصوص توم كبار واربع معالق خل وعصير لمونتين ونص كوباية مايه وفى الخلاط مع بعضه وتبقى كده جاهزه

فى ناس بتحب تحطها على النار يادوب تغلي عشان طعم التوم الني ما يبقاش صاااارخ

ويتقدم الكشري بقى مع الصلصه والدقه وحبذا لو حبة مخلل وطبق سلطه

وبعد الكورس ده هاتقعد 3 ايام ما تفكرش فى الاكل تاني

ههههههههههههههههههههههههههههه

الى يجرب يقولي

واي واحده من الحريم الشلت هاتقولي ده صعب هاضربها

هو حاجات كتير اه بس والله مش بياخد وقت بالكتير ساعه والواحد يكون مخلص الليله كلها

حتى لو كانت ضعفين الكميه دي

والف هنا لكم

تورته بالفواكه والشيكولاته

السلاااااااام عليكم يا حلوين

انا قلت بقى نعملكم تورته لطيفه جميله كده بما ان احنا فى الصيف والمناسبات كتير

وبما انى مريضه حاليا وملازمه الفراش قلت اطبخ بقى وانا نايمه ما دام مافيش طبيخ فى المطبخ

هيا الى المطبخ

طبعا علشان نعمل التورته لازما ولا بد يكون عندنا كيك

هانحتاج لمقدار لكيكتين من الى فى الصوره ده

انا فى الحقيقه ما باحبش الكيك الاسفنجي

بينى وبينه طار بايت لا باحب اعمله ولا باحب اكله

انا باعمل دااااايما كيكه عاديه زي الى انا عملتها معاكم قبل كده هنـــــــــا

طبعا انا بافضل اعمل اكيك رقيق شويه يعنى بعد ما يستوي يبقى سمكه لا يتعدى الخمسه سم

وباقسم كل واحده اثنين

وكده هايبقى عندي اربع طبقات باحشي بقى الطبقات دي كريمه

اي نوع كريمه تحبيه كريم شانتيه

كريم باتسيير مخلوط على كريم شانتيه ممكن برضه ما يقولش لا

انا بافضل الكريم شانتيه دايما فى التورتات عشان عندي العيال مدمنين

بعد كده بقى يا حلوين هانعمل الاتي

بالسكينه وانقسم الكيك الى حشيناه ده الى نصفين متساويين بالتمام زي الصوره دي كده

ونغطي نص منه بالكريم شانتيه بس والنص التاني بصوص الشيكولاته زي الصور هالى فوق دي تماما

وانا باتعمد اقسمها كده عشان اخد راحتي اثناء التغطيه وما يتخلطوش على بعض وتبقى حوسه سعيده

وبعد كده باحطها فى التلاجه عشر دقايق بس عشان اعرف احركها

وبعدين اضمهم على بعض بقى يرجعوا دايره كامله زي ا لصوره كده

وبنعمل خط بالكريم شانتيه تزيين طبعا زي الصوره دي كده علشان نغطي الفاصل

وكمان نعمل حرف للنص الى بالكريمه عشان الفاكهه ما تتزحلقش من عليه

وتبقى ساعتها تمام زي الصوره دي

بعد كده بقى نجيب فاكهه اي فاكهه المتوفر عندك بس يفضل كده تكون لها الوان حلوه

انا هنا الى لقيته كان فراوله وكنتلوب وبرتقال

المهم

عشان نجهز الفاكهه ونحطها على التورته نعمل الاتي

نقطعها بالشكل الى نحبه بحث نقدر نرصها على التورته بشكل حلو

وبعدين نكون مجهزين شويه شربات صغيرين (قطر _شيره ) ونسخنه شويه مش لدرجه انه يغلي

ونحط فيه الفاكه ونقلبها شويه ونسيبها خمس دقايق وبعدين نصفي من عليها الشربات ونسيبها لحد ما تبرد خالص قبل ما نستعملها

والاحسن من كل ده الجيلاتين طبعا جيلاتين خام شفاف وندوبه فى مايه سخنه ولما يبرد نقلب فيه الفاكهه او حتى جيلى

بس انا بافضل استخدم جيلي لونه فاتح اناناس مثلا عشان ما يغيرش لون الفاكهه

وده كله عشان الفاكهه تفضل على لونها وما تدبلش وما تسردش مايه على التورته وتكون لامعه وشكلها حلوه

بعد كده بقى نرص الفاكهه على النص الى بالكريمه زي الصوره دي وبالشكل الى نشوفه حلو

والنص التاني ممكن تسبيه شكيولاته ساده كده او تكتبي عليه اسم

او تحطي بشر شيكولاته او فى شكيولاته تزيين بتكون على شكر ورق شجر او وردات او حيوانات للاطفال

او اي حاجه تحبيها

ويطلع فى الاخر الشكل ده

وممكن تعمليها فى كيكه مربعه بتقسميها نصين بحيث كل نص مثلث وتعملي نفس الى عملناه بيبقى تحفه برضه

وممكن بنفس الطريقه تعملي نكهات مختلفه

ان شاء الله كل ما اعمل افتكاسه من دول هاصورها واوريهالكم ازاي

يلا بقى قوموا اشتغلوا كفايه انا نايمه

والى يجرب يقولي