الأربعاء، 12 نوفمبر، 2008

يا طريه يا جبنه قريش



الجبنه القريش

زي ما انا قلتلكم قبل كده انا باحب اعمل دايما منتجات الالبان فى البيت

الجبنه القريش من الحاجات الى انا باحبها لكن المعلبه منها او الى فى السوبر ماركت بتبقى مش نفس الطعم الفلاحي الى انا باحبه

والى من الفلاحين بتبقى ساعات شكلها يغم النفس والواحد بيقرف منها

كمان هى مفيده اوي عموما دول حوض البحر المتوسط مشهورين بالجبنه خصوصا الجبنه القائمه على طريقة التخثر البكتيري .وهى فعلا من افيد الانواع وكمان الجبنه القريش بالذات تعتبر اقل انواع الجبنه سعرات حراريه مع احتفاظها برضه بالفايده العامه للجبنه .

الطريقه سهله جدا بس نركزززززززز

أولا :الحليب لازم يكون طبيعى ميه الميه مش عليه اي مواد حافظه . لكن مش لازم يكون طازه لاننا اصلا هانسيبه لما يروب

بس يكون احسن كتير لو كان ما اتحطتش فى التلاجه خالص

بناخد الحليب ونحطه فى حله او طاجن كبير ونغطيه ونسيبه فى مكان دافي نسبيا لو فى البرد اوي ممكن نعمل زي ما عملنا فى الزبادي ندفي الفرن ونسيبه فيه لحد ما يربط ويعمل وش .

فى البرد ممكن لو دفيتى الفرن يقعد حوالي 48 ساعه

فى الحر الجامد ساعات يربط بعد 12 ساعه مثلا .

اول لما يربط تشيلى القشطه من عليه وممكن تحطيه فى التلاجه نص ساعه مكشوف عشان القشطه تجمد شويه تعرفي تشيلها بسهوله .

والقشطه الى طالعه دي بتبقى قشطه فلاحي زي الى بتتباع فى السوق وممكن تسبيها للاكل لو بتحبوها اوتحوشيها زي ما عملنا فى القشطه بتاعة الزبادي .

بعد كده لازم نسخن اللبن الرايب ده لحد ما يبقى تقريبا درجة حرارته 90 درجه مئويه او يعنى قبل ما يغلي على طول

ممكن بقى ب3 طرق

اولا تحطيه فى فرن البوتجاز

بس تكون شقتيه بالسكينه الى اربع اجزاء مثلا عشان الميه السخنه تتخلله وده فى جميع الحالات يكون احسن

ثانيا تغليه ميه وتصبيها عليها

ثالثا انك تحطيه على البوتجاز من فوق بس تحتيه صاجه (شياطة الرز ) ونار هاديه اوي وتخدي بالك منه عشان ما يغليش

لو غلي بتبقى الجبنه فيها حتت جامده كتير تخليها مش متجانسه .

بعد كده بتسبيه من غير نار لحد ما يبرد

وبعدين تصبيه فى مصفه جوها شاشه او اي قماشه تكون رقيقه اوي

وتسبيه بقى بتاع نص ساعه كده لما ينزل اغلب ميته

وبعدين تشيلى الميه الى تحته ما ترميهاش بتبقى من غير ملح وهى فكره مفيده اوي هانخليها على جنب هانعمل بها حاجات تانيه كتير بعدين

وبعدين تحطي الملح على حسب ما تحبيه

وتقفلي الشاشه ويا اما تحطي فوقيها حاجه تقيله شويه وهى في المصفاه او تعليفها فى اي حاجه لفوق

وتسبيها لحد ما تصفي ميتا وتجمد كويس

طبعا الفلاحين والمحلات عندهم حاجه اسمها حصيرة الجبن القريش وده الى بيخليها تطلع زي ما هى فى الصوره كده لكن انا ما عنديش بقى باعملها ومش مهم تطلع خرط يعنى

الجبنه الى هاتطلع ممكن تقعد فى التلاجه كويسه 3 ايام

لو هاتحطيها اكتر من كده فى التلاجه حاولي تحافظي على شكلها كوره او قالب مربع وحطيها فى ميه وملح او حتى شويه ميه من الى طلعوا من تصفية الجبنه تحطي فيها ملح خفيف وتحطيها في التلاجه

وبس كده تبقى أحلى جبنه قريش

وال 3 كيلوا حليب يعملوا حوالي كيلو جبنه قريش او اقل شويه حسب نوع الحليب

وجربي الاول فى كيلو وما تيأسيش والى تجرب تقولي والى تغلط تقولي عملت ايه بالظبط

أه وعلى فكره لو اشتريتى حليب وجيتى تغليه راب منك ممكن تلحقيه قبل ما يغلي او وتسبيه يكمل روب يوم كمان وتعمليه زي ما عملنا كده فى الى فات

او حتى لو عندك زبادي كتير باقي وطعمه غير وما حدش هايكله برضه ينفع تعمليه كده تسخنيه وتعمليه جبنه قريش

وعندي برد حد يعملى ينسون

هناك 20 تعليقًا:

واحدة مفروسة يقول...

حلوة حكاية الجبنه القريش ديه
بس هوه انا لوسبت اللبن بره و مش دخلته التلاجه يقطع يعنى يروب
انا نفسي اجربها
بس شكلها شغلانه يا صبرني
بس ربنا يأذن و اجربها و اقولك

صبرني يارب يقول...

اها يروب
لحد ما يبقى عامل زي الزبادي يا مفروسه

شغلانه ايه
ياكسلاااااااااانه
قومي يا بت فزي اعمليها

شللللللللت ههههههههههههههههههه

biberss222 يقول...

انتي اعمليها و ابعتيهالي

mony يقول...

حلوة و الله فكرة

دا ماما بتحبها اوي
مرة تامر جابهالي و كانت اكنها زبده كده و كان طعمها رائع

علي فكرة الي ساكن جنب اي سوبر ماركت كبير ممكن يشتري الحصيرة ديه

لان بينعمل بيها الاكل الصيني

و في اشكال تانيه بتتحط تحت الصينية السخنة علي السفرة ممكن برضه

مش كده يا ام مريم ولا انا غلطانه


اكيد هعملها ان شاء الله بس لما تامر يسافر و اروح لماما

saragebaly يقول...

لاقيت نفسي جعانة قولت آجي مدونة صبرني واشوف عاملة اكل ايه

لاقتها جبنة وانا مش بحبها اطلاقا بتاتا
بس اهو نتعلم حاجة للزمن برضو

ولاقيتك كاتبه في الاخر انك عايزة ينسون قولت لازم ادخل واعزم عليكِ

تشربي نسكافيه؟؟!!

biberss222 يقول...

دى عاشر مره اقرا الوصفه و ايه حكايه منتجات الابان معاكو
مش عارف اركز خالص ف الطريقه
و اه الف سلامه عليكى من البرد
كل ده من القاهره

صبرني يارب يقول...

بيبرس

عنيه حاضر معايا سندوتش اهو تاخد ؟؟؟

صبرني يارب يقول...

موني

والله يا موني انا ما اعرفش حكاية الحصيره دي
بس رضا كان قالي ان شافها عند واحد بتاع لوازم منتجات البان اصلا
انما انا مااعرفش بصراحه
لو جبتيها قوليلى عشان اسأل عليها برضه

صبرني يارب يقول...

ساره الجبالي

لو دوقتي الجبنه بتاعتي هتاكلها
مش زي الى فى السوق والله

وميرسي على النسكافيه يا جميل

صبرني يارب يقول...

بيبرس

اه والله تعبانه خالص من يوم ما رجعت من القاهره

ومنتجات الالبان مالها دي سهله اوي والله

شوف بس ايه مش واضح وانا اوضح

نورت يا استاذنا

بنت الغربة يقول...

حبيبتى ياصبرنى انت عرفتى منين انى نفسى فى الجبنه القريش انا بحبها قوى وتقريبا باكلها كل يوم على الفطار - بس هنا فى دبى صعب الاقى حليب طبيعى ميه فى الميه ومش مبستر لانه ببساطه مفيش حليب غير فى السوبر ماركت - وبالنسبه للجبنه القريش انا دايما باوصى عليها - وبتكون كويسه يعنى مش زى مصر بس كويسه- واوعدك لما انزل مصر هاحاول اعملها-عايزين طبيخ جديد لان انا زهقت من الخضار العادى -لو عندك طريقه جديده للخضار او نوع خضار جديد احنا مابتعملهوش ياريت تقوليلى - وهابقى شاكرة جدا - تحياتى ليك - داليا-

بنت الغربة يقول...

والف سلامه عليك من البرد - وابقى اشربى شاى اخضر احسن من الينسون وحطى عليه نعناع- وسلامتك ياقمر-

صبرني يارب يقول...

بنت الغربه

اه فعلا فى دبي مافيش حليب طبيعى من غير بستره

عارفه ممكن لو ليكى حد فى العين يجيبلك
او الشارقه برضه عندهم ناس بتربي
لانه ينفع تعمليها من لبن الغنم وكده
او اشتريلك معزه بقى ههههههههههههههههه

وبالنسبه للخضار حاضر هاشوف كده واقولك

تحياتي ليكى يا قمر ونورتي
والله يسلمك الحمد لله انا بقيت احسن كتير

أحــوال الهـوي يقول...

لا .... انا باعرف اطبخ صحيح بس لحد هنا ستوب
ياما راميت زبادي و دلقت لبن رايب و حتي الميه بتاعة التصفيه بتعمللي بيها حاجات
انا كده اسلم انك جدبرة بعمل مطبخ شمس
و الرايات البيضا كلها رفعتها
يعني اخد الوصفة و اعملها من غير لماضه

تسلم ايديك يا ست الكل

تحياتي

nody_1987 يقول...

ياعينى ياعينى على بنات المنصوره الجامدين

اوعى تكونى عامله الجبنه الجريشعلشان الدايت
هههههههههههههه
انا شخصيا زهقانه منها


واعى تعملى بعد كده عيش سن
تبقى كملت

بس بجد الطريقه حلوه
هاحاول اجربها
ولو ان طنط ام محمد بتجبها لنا حلوه
وشكلها جميل والله
بس لازم الواحد يشجع بنات بلده

صبرني يارب يقول...

نودي

اه والله فعلا باعملها عشان الدايت ههههههههههههههههههههههه

وام محمد برضه بجيب لنا لبن
هى نفسها ولا ايه
هههههههههههههههههههه

نورتي يا جميل

صبرني يارب يقول...

احوال الهوى

لا طيب جرب الشروط الى انا قلت عليها فى الزبادي كده وقولي

وخلي بالك من مصدر اللبن لانه ممكن يكون حد بيحط عليه مواد حافظه وده يخليه ما ينفعش خالص
وبعدين ما ترميش ابدا اي حاجه فيها لبن

بص الزبادي لو مش ربط
ممكن تعمل به اي حاجه

بسبوسه كيك قرص اي حاجه

بس ماترميهوش


واحنا تحت امرك يااستاذنا

نورتنا

غير معرف يقول...

福~
「朵
語‧,最一件事,就。好,你西...............................................................................................................................-...相互
,以讓>它使...................

asmaabhr@yahoo.com يقول...

ماشاء الله عليكى بجد استاذة
ياريت نكون اصحاب انا من السويس

ام مريم موسى يقول...

ياحبيبتى يامونى انتى حسيتى بينا لان كيلو الجبنه القريش فى السعوديه ب16 ريال وكمان لو انا حبيت اعملها فى البيت 2 لتر الحليب ب8 ريال بردو يعنى كده كده العمليه بايزه عندى ومكلفه جدا فانا باخدها من قصيرها واقول لنفسى شرا العبد ولا تربيته