الجمعة، 24 أكتوبر، 2008

الزبـــــادي


بصراحه يا جماعه انا فى الاونه الاخيره مع الغلى وقلة الضمير الى عند الناس منتجات الالبان الى فى السوق بقت وحشه جدا جدا . وغاليه كمان . تلاقي علبة الزبادي فاضيه اصلا وبجنيه . وتلاقي الجبنه طعمها لبن بودره صاااارخ والكيلو بعشرين جنيه والواحد يجى ياكلها يلاقي فى دهن كده غريب شكلهم بيعملوها بزيت عربيات .

عشان كده بقيت الى اقدر اعمله فى البيت اعمله وان شاء الله اقولكم خلاصة ا لتجارب بتاعتي يمكن تنفعكم


ونبدأ النهارده بالزبادي


اولا: نغلي اللبن الحليب كويس اوي طبعا باي كميه ونسيبه لما يبرد يبقى زي ايدك تقريبا


ثانيا: تيجبي علبة زبادي من النوع الى بتفضليه بس تتأكدي انه زبادي معمول بخماير طبيعيه لان فى زبادي فى السوق دلوقتي معمول بمواد جيلاتين وكده .ماتسألنيش تتأكدي ازاي . أنا عن نفسي عرفت الانواع الى فى السوق بالتجربه والخطأ

نجيب علبة الزبادي الجاهز ونضيف عليها نص كوباية حليب دافي ونقلبها كويس عشان تتجانس بسهوله مع باقي اللبن

وبعدين نضيفها بقى للكميه كلها

وعلبة الزبادي مثلا زي اكتفيا دي ممكن تعمل لحد 6 كيلوا

ما جربتش اكتر من كده بس بتهيئلي تجيب عادي


ثالثا: تصبي بقى الخليط الى فات ده فى كوبايات او طواجن زي ما تحبي وتغطي عليه وتسبيه فى مكان دافي لحد ما يربط تمام ويعمل وش ويبقى شكله زبادي يعنى

بعد كده حطيه فى التلاجه شويه قبل الاكل




هاقولكم شوية ملاحظات بقى مهمه :


ممكن تضيفى نكهات للزبادي _ مربات او فاكهه كمبود او عسل ابيض_ لكن ما تقليبهاش فىالحليب جربت اعملها لقيته مش بيربط كويس حطيها فى اخر الكوبايه وصبي عليها الحليب


لو كان الجو برد ابقى ولعي الفرن عشر دقايق كده وبعدين اطفيه وحطي الزبادي بعدها وسبيه يربط

لو لقتيه بعد خمس ساعات لسه ما ربطش وكان الجو برد برضه دفي الفرن تاني


اذا لقيتى الزبادي طالع فيه كتل من تحت يعنى مخرز او مجبن ده لان الحليب كان سخن شويه أو الفرن كان سخن اوي

خلي بالك لو حطيتى الزبادي الجاهز على الحليب وهو سخن اوي الخميره الى فى الزبادي هاتموت والزبادي بتاعك مش هايربط ابدا .



خليى بالك اللبن الى هانستخدمه لازم يكون سليم يعنى لا مضاف له مواد حافظه ولا مبستر لان المواد الحافظه بتمنعه من التخمر

والمبستر ممكن يربط حسب طريقة بسترته لكن فى الغالب مش بيربط وحتى على فكره لو حطتيى الحليب فى الفريزر بيكون مش حلو فى الزبادي .


طبعا ممكن لو بتعملي رجيم أو حتى عندك بيبي صغير اوي يكون الحليب سمين عليه خصوصا فى الشتا

اغلي الحليب ولما يبرد حطيه فى التلاجه لتاني يوم وتطلعيه هاتلاقيه عامل وش تشيلى القشطه من عليها ما ترمهااااااش

لو ماكالتوهاش حطيها فى الفريزر عايزنها بعد كده هابقى اقولك .

المهم تاني يوم طلعي الحليب حطيه على النار يدفى شويه وبعدين اعمليه زبادي عادي

بس كده الف هنا والى تجرب تقولي
اه والبوست ده مهدي خصيصا لمدام خالد همس الاحباب عشان هي هاطبق فكرتي ومشروعي الى جاي وهاتعمل زبادي وتبيعه لجوزها هههههههههههه
وانا من موقعي ده باقولكم كلكم يا ستات اقل علبة زبادي فى السوق دلوقتي بجنيه وكيلوا الحليب بقى باربعه جنيه عندنا مش عارفه فى البلاد
التانيه ايه والكيلوا يعملك بتاع 8 كوبايات من ام جنيه يلاااااااا عيشي بقى وابقى اعمليلهم تخفيض مالكيش بركه الا هما

هناك 14 تعليقًا:

حاجات جوايا يقول...

تسلم ايدك يا جميل
أوعدك هجربها ان شاء الله
وهجرب السمنة كمان بإذن الله بس لما اكون شوية قشطة كتير

اه بقولك من حق
مينفعش نعمل قشطة لبن بسرعة وبكمية كبيرة
لو تعرفى قوليلى اصل معنديش صبر بصراحة فى كل يوم حتة دى

سلام يا جميل

صبرني يارب يقول...

اهلا يا جميل نورتي

هو طبعا انا باحوشها واصدع نفسي فيها لان ما حدش بياكلها عندي وحرام ارميها بقى

وكمان لانى باعمل زبادي كميات كبيره شويه بالتالي بتتحوش بسرعه عندي خصوصا فى الشتاء

وفصل القشطه عن الحليب يا ستى تحطي على الحليب ملح لمون وتقلبي كويس هاتلاقي القشطه فصلت عن الحليب

بصراحه انا ما جربتهاش لكن قريتها كتير قبل كده

تقدري تجربي فى كيلوا الاول مثلا وشوفي هاينفع ولا لا
كان معلقه ملح لمون صغيره على الكيلو
وملح اللمون موجود عند العطارين

تحياتي ليكى يا قمر ومستنيه بقى تقوليلي عملتي ايه

همس الاحباب يقول...

هههههههههه
ههههههههه
بجد الفكرة تحفة
بس اللى ضحكنى انها مهداة للمدام
وعلشان كده انتهز الفرصة ومش اقولها على الطريقة واعملها بنفسى
بس يا ترى هبيعه لمين لهمس ولا مامتها
المشروع كده خسران
ولو هى عملته مضطر اجيب انا كل حاجة وادفع التمن مرتين
مرة مواد خام ومرة منتج جاهز
برده كده خسارة بالثلث
طب اقولك يا صبرنى يا اختى
ما تفتحى منفذ بيع للجمهور
واجى اشترى منك ونريح الدنيا
هى اسعارك اتبقى احسن برده
هههههههه
تحياتى وشكرا جزيلا على الاهتمام
ربنا يكرمك ويبارك فى حضرتك

canary يقول...

أحنا هنا فى الصعيد يا جميل الكيلو ب 2.5 بس
ولبن حليب مش مخلوط يعنى تقدرى تقولى اننا لسه الاحوال عندنا مبقتش صعبه زى عندكو وكمان علبه الزبادى بنص جنيه بس لكن انا حاولت فعلا اعمله قبل كدة فى زبديات او طواجن فخار صغيرة واخد وقت طويل شويه عشان كان فى الشتا ..شكرا لتعبتك معانا فى المطبخ يا قمر

صبرني يارب يقول...

همس الاحباب

والله ياريت نفسي اعمل وابيع اي حاجه كانت بقت بفايده بدل ما احنا بننفخ فى اربه مقطوعه حضرتك

ولوا ن على راي رضا لما قلتله بافكر اعمل مطعم اهو نطبخ بفلوس بدل ما بنطبخ ببلاش قالي هايجوا برضه يكلوا عندك ببلاش

ههههههههههه

تحياتي لك وللمدام يا فندم اي خدمه

صبرني يارب يقول...

كناري حبيبتى

ايوه فى الشتا لاازم تتدفي الفرن

عارفه فى البرد الجامد لازم ادفي الفرن مرتين او حتى 3 مرات لو مستعجله عليه

والاحسن بقى لو بتعملي كميات صغيره ممكن تستخدمي ماكينة الزبادي بس ما بتنفعش معايا

وتعبكم راحه يا جميل
وممكن بقى تبعتيلى شوية لبن يا اختي
ههههههههههههههه

ايه ده ايه الرخص ده 2 ونص
ده انا من كتر ما باستخدم اللبن بافكر اجيب جموسه
هههههههههههههههه
بس مش عارفه اعينها فين
ولا مين هايحلبها ههههههههههه

خمسة فضفضة يقول...

السلام عليكم ورحمة الله وبركاته

ماشاء الله تسلم ايديك يا صبرني
وخدي بقي يا ستي ملاحظاتي في عمل الزبادي من خلال خبرتي الطويله في المجال ده
هههههههههههههههه

اول حاجه عشان الزبادي يطلع ناعم ومتجانس باخد الخميره مع شوية لبن صغيرين واضربها في الخلاط وبعد كده احطها علي اللبن واقلب
2- مش باسيبه يتخمر اكتر من 3 ساعات لانه كل ما بيقد يتخمر كل ما الحموضه بتاعه بتزيد فابشيلبه بعد 3 ساعات 3.5 بالكتير اوي
3- مش باحطه في الفرن بس باتحكم في الحراره اني باحطه في صينيه تيفال فيها ميه سخنه ودرجة الحراره بتتفاوت من الشتا والصيف مثلا في الشتا بتبقي الميه خلاص هاتدخل تغلي اما الصيف فبتبقي دافية وبس
درجة حرارة اللبن برضو في الشتا اسخن من الصيف
بعد كده اغطيه بصينيه والفه في فوطه ومافتحش عليه الا بعد 3 ساعات
لو مربطش وده ممكن يحصل في الشتا بس نادر باحط الصينيه علي النار دقيقتين وارجع الفها تاني
4- المفروض انه يستخدم في خلال 3 ايام عشان بعدها بيبقي مش كويس ، ويفضل وهو في التلاجه تغطيه باي حاجه وياسلام لو الكوبايات ليها غطا ( زي بتاعالجبنع السايله اللي ليها غطا دي انا عامله منهم طقم للزبادي )

5- ممكن تعملي منه اللبنه اللبناني بانك تعملي كمية الزبادي كلها في حله مش كوبايات وبعد ما يربط تحطيه في شاشه اللي المفروض تتعلق عشان تصفي ميتها انا بحطها فوق مصفي وفوقها حاجه تقيله و علي رف التلاجه وخدي احلي لبنه بعد يومين

ويلا بقي قولينا طريقة السمنه ام اشوفك بتعمليها زي ولا لا

سلام يا قمر

خمسة فضفضة يقول...

ايه جه كناري عندهم اللبن الحليب ب 2.5
عاااااااااااااااااا

احنا عندنا باربعه جنيه
عاااااااااااااا

هاروح اجيب طلبيه من الصعيد بس يارب ما تروبش في السكه

صبرني يارب يقول...

اه يا فضفضه ماما بتعمل الميه فى الصنيه برضه والليله دي

بس انا بالاقي الفرن اسهل من الموال ده
يمكن عشان باعمل كميه يعنى بادخلي فى عشرين كوبايه كده

والسمنه عنيه حاضر
نعمل بس صنف اكل وبعدين نرجع للالبان تاني

وكناري انا حقدت عليها معاكي عادي
ههههههههههههههه

أليس في بلاد العجائب يقول...

فكرتيني بالذي مضي

كان زمان عندنا حلة بتاعت الزبادي دي و كانت في وسطها لمبة .. كان معدن و فيها مكان تحطي الكوبايات و تحطيها في الكهربا تديها الدفء المطلوب علشان التخمر .

بس بعدين ماما بقت بتستسهل تعملهم برة و تحطهم في مكان دافيء :) و تتحايل علي الفالحة دي علشان تاكل منه بس ان طول عمري من ذوات الاكل الخارجي انتي عارفة :)

و اعتقد باين سيف بردة بيعرف يعمله مهم عندهم اللبن دا بدل المية :)

a7wal el Hawa يقول...

سيدتي الفاضلة
تسلم ايديك

بس ممكن تقولي لنا ازاي نعمل اللبن لان المشكلة ان اللبن نفسه مغشوش

تحياتي

صبرني يارب يقول...

اليس

ايوه عارفه الحله دي سمعت عليها
دي النظام القديم بتاع اللمبه وكده
انما الجديده ما فيهاش لمبه

وايه سيف بيعرف يعمله ده يا شاطره ؟؟؟؟
احنا هانجوز الراجل عشان هو الى يعمل الزبادي كمان
يا حظك الواقع يا اخوياااااااااا
شغل عماااااات بقى
ههههههههههههههههههه

صبرني يارب يقول...

أحوال الهوى
ههههههههههههههههههههه
والله مش عارفه يا استاذنا
بس ممكن ندورلكم على جموسه بنت حلال ونجيبها هنا ا لمدونه ونبقى نحلبهالكم

غير معرف يقول...

福~
「朵
語‧,最一件事,就。好,你西...............................................................................................................................-...相互
,以讓>它使...................