الجمعة، 3 يوليو 2009

الكشري المصري


ايه رايكم بقى فى الاكله الجامده دي


الكشري المصري من الاكلات الى الواحد يضرب الطبق بالصلاه على النبي يقعد 24 ساعه على الاقل مش قادر يتكلم ولا يفكر ولا اي حاجه

متنح ايوه هى دي الحاله بالظبط


حيث انى رافعه شعار الايام دي ما حدش ياكل من بره

وحيث ا ننا شعب رمرام وبنعز اكل الشارع اوي


فانا مضطره تحت التهديد وبعد ما نزلت البوست ده انى اقول الى هايكل كشري تاني بره هاجيب المطوه واخده واحده زواقه كده تفكره انه ما ياكلش بره


المهم بعد جلسة البلطجه بقى ندخل على المطبخ


هنحتاج علشان نعمل حوالي 3 اطباق من الكشري زي الى فوق ده الآتي

كوباية عدس بجبه ( الى لونه بنى يعنى )


وكوباية رز


وحوالي ربع كيلوا مكرونه صغيره


وكوباية حمص مسلوق


ولو كان الحمص مش مسلوق نحطه على النار اول حاجه لانه بياخد سوي كتير عن باقي الحاجات



اول حاجه نعملها نغسل العدس وننقعه حوالي ساعه

وبعدين نرمي ماية النقع ونحط بدالها كوبايتين مايه ونحط العدس على النار


فى ناس بتعمل العدس مع الرز


الحقيقه انا مش باعمله كده لكن هاقولكم الطريقتين هاعمل طريقتى الاول


انا دلوقتي العدس على النار


تعالوا نعمل بقى التقليه بتاعة الكشري على ما العدس يستوي


هانجيب عصير طماطم يعنى هنحتاج نص كيلو طماطم ولو كانت لونها مش ا حمر اوي زودي معلقتين صلصة علب


وبصله كبيره مفرومه


و3 فصوص توم مفرومين


3 فلفل احمر مفرومين


اول حاجه بقى هانحط معلقتين زيت على النار او سمنه مش مهم


ونحط البصله ونشوحها لحد ما تصفر كده وبعدين التومه ودقيقه واحده وحط الفلفل ودقيقه كمان ونحط عصير الطماطم


ونسيبه بقى تتسبك ونحطلها ملح وتوابل ( انا باحط كمون وفلفل وجنزبيل )


على ما تتسبك يكون الكشري تقريبا استوى او اقترب من ذلك


فى انواع عدس بتاخد سوى كتير يعنى ساعه واكتر (زي العدس البلدي الى حبايته غامقه ورفيعه )


وفى انواع بيستوى فى اقل من نص ساعه


ظبطي انى بقى السوى بتاعه حسب النوع اول ما تمسكي الحبايه تلاقيها ببتقشر والى جواها ناعم يبقى خلاص كده استوت


قبل ما يتم السوى واول ما التقليه تتسبك باحب احط عليه شوية من التقليه بتخليه طعمه تحفه يعنى نص كبايه كده


وبعدين نسيبه يغلى مع التقليه خمس دقايق بس ونطفي ونكون مظبطين ملحه طبعا


نكون بقى فى هذه الاثناء سلقنا المكرونه


وسوينا الرز باي طريقه تعجبنا وممكن نعمله رز بالشعريه لو حبينا


لو حبينا بقى نعمل الرز مع العدس فى نفس الحله


هانحط على كوباية العدس حوالي 3 كوبايات مايه ( لو ما كناش ناقعينه كتير اوي يعنى خمس ست ساعات )

وهانحط العدس على النار وبعد ربع ساعه كده تقريبا نسقط الرز فى الحله وطبعا يكون مغسول وتمام


ونقلبه مع العدس الى نكون زودنا عليه التقليه والملح وكله تمام ونسيبه بقى يتشرب مايته ولما الميه تنشف نهدي النار ونسيبه يستوى على مهله حوالي ربع ساعه كمان


وكمان نكون فرمنا بصله كبيره او بصلتين مش مشكله وحمرناهم كويس فى الزيت لحد ما بقى لونهم بنى زي الصوره دي

بس الحقيقه صوره مش واضحه مطلعاه غامق ا كتر من حقيقته





مواااااااال صح بس والله مش صعب


ندخل بقى ترتيب الطبق وغرفه بعد ما كل حاجه استوت


اول حاجه الرز بنحط 4 معالق ارز تقريبا ونفردهم فى الطبق

وبعدين العدس بالكميه الى نحبها




بعد كده المكرونه ونفردها على وش العدس كويس

وبعدين الحمص

زي الصوره دي كده



وبعدين نحط شويه من الصلصه الى عاملناها فوق ونفردها كويس برضه



وبعد كده نرش البصل المحمر على الوش ويبقى الطبق شكله كده



اخر تمام



نيجى بقى للصلصه الى بتبقى جمب الكشري


انا باريح نفسي يا جماعه واخد شويه من التقليه الى انا عملتها دي وازود عليها شويه خل وشطه وتوابل واضربها فى الخلاط

بس لونها بيفتح شويه من الخلاط بارجعها تاني على النار يادوب تغلي وتبقى كده تمام


فى بقى دقة التوم

فى الحقيقه انا ما باعملهاش لواحدها لان ما لهاش طلب عندنا اوي بس ساعات ازود الخلطه الى فاتت دي خل وتوم وتبقى ميكس يعنى



بس اقولكم بتتعمل ازاي برضه


هانجيب 3 فصوص توم كبار واربع معالق خل وعصير لمونتين ونص كوباية مايه وفى الخلاط مع بعضه وتبقى كده جاهزه


فى ناس بتحب تحطها على النار يادوب تغلي عشان طعم التوم الني ما يبقاش صاااارخ



ويتقدم الكشري بقى مع الصلصه والدقه وحبذا لو حبة مخلل وطبق سلطه


وبعد الكورس ده هاتقعد 3 ايام ما تفكرش فى الاكل تاني


ههههههههههههههههههههههههههههه


الى يجرب يقولي


واي واحده من الحريم الشلت هاتقولي ده صعب هاضربها


هو حاجات كتير اه بس والله مش بياخد وقت بالكتير ساعه والواحد يكون مخلص الليله كلها


حتى لو كانت ضعفين الكميه دي


والف هنا لكم


هناك 14 تعليقًا:

عاشقه الرومانسيه يقول...

طبيعى جدااااااااااااا
انى اكون اول تعليق على البوست ده
لانى باموووووووووت فى الكشرى ده
دى اتلريحه واصله لحد الريدر بتاع مدونتى
تسلم ايدك ياصبصب

بس بلاش الحركات دى
اه
يعنى تحرقى البصله وترجعى تقولى الصوره غامقه
فهماكى انا هه
(;

خمسة فضفضة يقول...

السلام عليكم ورحمة الله وبركاته

ازيك يا صبصب يا اختي اخبارك ايه ان شاء الله بخير :)

زي ما تكوني بتقري افكاري لسه شاريه الحمص وباجهز عشان اعمل الكشري اول الاسبوع علي الاحد كده ان شاء الله
ايوه يا ستي ماهي الاكله دي الواحد لازم يجهزلها ويظبط نفسه
اصلي باعمل كميه عشان ابعت لماما وحماتي وساعات اخويا كمان هههههههه

اول حاجه عشان الحمص ماياخدش منك سوا كتير علي النار انقعيه من قبلها مثلا خمس ساعات او من بليل للصبح
مش هاياخد عشر دقايق علي البوتاجاز

العدس بقي مش بنقعه ولا حاجه باغسله واسلقه علي طول بيقعد حوالي ساعه ساعه الا ربع ومش بوصله لدرجة انه يتهري عشان بيبقي طعمه مش حلوه
ودايما علي بيات اكون عامله الصلصله والبصل وسلقه العدس
والبصل عشان يبقي مقرمش لازم يتفرد شويه في طبق واسع عشان يبرد براحته ومايعجنش
وعشان ما يغلبكيش في التحمير قطعيه دواير مش قطع مش هاياخد وقت خالص وكتري الزيت بتاعه شويه وكده كده باستخدم الزيت ده لاخر نقطه

تاني يوم بقي اطبخ الرز بشوية من الزيت بتاع تحمير البصل واسلق الكرونه واعمل الدقه وباحط عليه شعريه شعر باحمرها لوحدهابرضو في شويه من زيت البصل زي لسان العصفور كده وبعدين اسلقها واصفيها
وساعة التقدم في صينيه تيفال احط شويه الزيت اللي فاضلين واحط العدس واقلبه علي النار شويه لحد ما يسخن
وبعديه احط الشعريه برضو قلبتين تسخن
وبعدها المكرونه
الزيت اللي فيه نكهة البصل بيدي طعم جميل لكل الحاجات دي

الدقه باعملها زيك بس بازود عليها كمون كتير وفلفل وملح وساعات شطه

التقديم بقي باعمله عكسك خالص :
افي صينيه مناسبه :
المكرونه الاول وبعدها الرز وبعدين العدس وبعدين الشعريه وفوق خالص الحمص
اما الدقه والصلصله والبصل فادول في اطباق خارجيه وكل واحد ياخد اللي يعجبه
ولو فاض حاجه باسخنه زي ما هوه في الصينيه بتاعه بنقطة ميه في الفرن


وخليكي فاكره كلمة نور الشريف لعبلة كامل :

الرز هويه و العدس ماتسويهوش علي الاخر




انا محتاسه بقالي اسبوع قاعده اعمل في الملوخيه والباذنجان والطماطم عشان الفريزر
مش باقولك بتقري افكاري هههههه


سلام يا قمر

امووووووووووووة

نكهة مغربية يقول...

اييييييييييييييييييييييه الشغل الجامد ده و الله بعد الشرح اللي حطتيه ميقدرش حد يقول صعب أبدا و الله أنا اللي عمري دقت الكشري فهمتو كويس امال مهي صبرني حبيبتي اللي شرحاه فمالك اللي عرفو كويس على العموم ده حيكون ليه تجربة قريبة ان شاء الله و حط الصورة طبعا
أنا كنت مأجل كل التجارب لبعد الفريك بس الضاهر الفريك في المغرب عملة نادرة ان مكنتش منعدمة خالص
علشان كده حستأنف نشاطي و هرضى بالواقع و انسى الدجاج بالفريك اليومين دول و مشيها كرشي و مالو الكشري مها بردو كنت حموت و اعرف هو ايه
و الله يا صبرني انت كده مش حتخلي في نفسي حاجة غي التداكر اللي قلتلك عليهم في رد السردين

ههههه

ممممووووحححح جامد قوي

صبرني يارب يقول...

عاشقه

طيب قومي فزي اعملي حلتين كده واشتغلي واعزمي المدونين عندك
ههههههههههههههه

نورتي يا جميل

صبرني يارب يقول...

فضفضه

ايوه فعلا انا حد قالي ا لترتيب بتاعك ده قبل كده انا فى طبقى بقى باحط عدس مرتين مره بعد الرز ومره فوق خالص باحبه كتير شويه


والخضار انا بقى ما باعملش كده ما باجيبش كميات عشان مااتهبل

انا كل ما انزل السوق اجيب شويه يعنى قولي ضعف استعمالي العادي

اطبخ منه عادي والباقي اوضبه وعلى الفريزر

كده كل مره عشان ماا طقش
من الباميا والملوخيه وكل ده

دوووووووشه

اصل باكره توضيب الخضار جدا

وساعات باتغالس علىماما واقولها وضبليى الخضار وانا اعملك اي شغلانه كنتى هاتعمليها

ما باحبش الشغل الممل ده


منوره يا جميل

صبرني يارب يقول...

نكهه يا حياتي

طب اعمل ايه يا اخواتي اخد الفريح واروح لها فى المغرب ولا ايه
ههههههههه


طب جربي نفس الطريقه برز حتى هايمشي

وان شاء الله تعملي الكشري يا قمر ونشوف الحلاوه

وهاروح اشوف ا يه الى نفسك فيه ده

غير معرف يقول...

سهل جداااا

مع اني بستغرب وجود الحجات دي كلها مع بعض ^ـ^

انا نفسي اذوقه اكيد اكيد هجربه ان شاء الله

بتاع اسبوع كدا واعمله ويارب يطلع جامد والحمد لله عندي كل المكونات

وهبقى اقوووولك ^ـ*

تسلم ايدك ياقمراية

شكولاتة يقول...

ايه ده كشرررري وانا اقرا الموضوع علي الصبح كمان طيب انا اجيب كشري منين بقا دلوقتي

ابعتيه ديفليري :)


بجد طريقته تجنن بس انا استغنا عن الحمص :)

تسلم ايديك

صبرني يارب يقول...

نواره

اه شوفتي ماهو بعد ما تاكليه 3 ايام بقى مافيش اكل
ههههههههههههه

هاستنى اشوف التجارب بتاعتك يا جميل

صبرني يارب يقول...

شكولاته

والله ما عندي مانع

ما انا يوم ما باعمل كشري اصلا بتبقى كده باوصل دليفري للشعب كله

اه ماهو فى عندي ناس بتاكله من غير حمص برضه

اشتغلي اشتغلي
ههههههههههههههه

المحبة في الله ندى يقول...

حلو قوي انا اصلا بحب الكري البيتي قوييييييييييييي

أحــوال الهـوي يقول...

قوللي يا مستشار

ليه البصل لما نحمره ما بيبقاش ناشف زي المحلات
لما باحمره بيطلع طري و مش حلو


تحياتي

صبرني يارب يقول...

المحبه فى الله تسلمى ونورتي

صبرني يارب يقول...

الحقيقه انا معايا بيطلع عادي

لكن جايز انت المفرمه بتاعتك السلاح بتاعها تلم فبيعصر البصر

هات مفرمه جديده وحمر فى زيت كتير شويه وابقى صفيه من عليه


وبلاش هذا وذاك

قطع البصل حلقات وقلبه فى الدقيق قبل ما تحمره فى زيت غزير

هايطلع زي الفل

اي خدمه يا باشا