الجمعة، 29 مايو، 2009

فراخ محشيه بالفريك


السلااااااااااااام عليكم


واخيرا وبعد طول انتظار يجى يومين يا نكهه


الفراخ المحشيه بالفريك

شايفين شكلها امووووووووور ازاي


الى العمل



اول حاجه هانعملها طبعا الفراخ مغسوله كويس وانا بادعكها بملح طبعا قبل ما اعينها فى الفريزر اصلا وانقعها كمان فى لمون وخل وملح باموتها يعنى من الاخر


هاتكون كده نضيفه وجاهزه وتمام اه الفراخ المحشيه يفضل تكون صغيره شويه يعنى قولي وزن كيلو ونص كده ما تزيدش عن كده

كيلو ونص بريشها ااااه مش صافي

صافي تعملها 750 جرام


نتبلها بقى عصير بصل ليمون خل توابل زي ما نحب انا يومها تبلتها بالبرتقال كمان انتم عارفين باحب استخدم البرتقال فى التتبيله لما نكون فى موسم البرتقال البلدي بيبقى تحفه وطبعا ملح وفلفل تتبيله عاديه جدا وممكن نضيف لها معلقة عسل ابيض او اسود حتى سكر


وندخل التبيله جوه الفراخ ويستحسن نتبلها من على بيات وممكن مثلا قبلها بساعتين ولا ثلاثه


بس ونروح بقى نعمل الحشوه

الفريك


ماهو الفريك اولا ده صورته



وهو عباره عن حبوب قمح خضرا ناشفه ومكسره شويه اسمه فريك اخضر

طبعا هانكون ناقعينه لمده نص ساعه على الاقل ولازم يتنقى كويس اوي وبعدين تغسليه فى المصفاه ساعات بيبقى فيه رمل


وبعد ما تصفيه كويس


المفروض انك تحطي معلقة سمنه بلدي كده محترمه وتحمري فيها الفريك تحطي الفريك وتفضلي تقلبي


وفى طاسه تانيه تكوني برضه شوحتي البصل وضفتي عليه التوابل والملح الازم لحد ما يبقى لونه اصفر كده وعليه لحمه مفرومه بالكميه الى تفضليها

يعنى مثلا الفرخه الواحده هاتحتاج كوباية فريك ناشف ومعاها بقى بتاع 100 جرام بس لحمه


وبعدين لما الفريك يتحمر كده وينشف وريحته تفحفح تضيفى البصل والتوابل واللحمه وتقلبي تاني لمدة دقيقتين


وبعدين تحطي عليها نص كوباية مايه وتوطي عليه النار خالص وتسبيه ربع ساعه بس انا ساعات احب اقطع فلفل الوان كده صغير على الخلطه زي الى فى الصوره دي

وده شكلها بعد ما خلصت الحشوه





وبعد كده نمسك الفراخ ونصفيها من التتبيله ونحشيها بقى على اد ما نقدر فريك ونقفل عليها من بره بخلة اسنان وبعدين نحطها فى صنيه مع التتبيله بتاعتها ونغطي الصنيه بورق فويل وندخلها الفرن


ها بتغيب شويه فى الفرن يعنى بعد ساعه الا ربع تقريبا كده نفتح بقى عليها عشان تتحمل وعشان تطلع محمره اوي ومش ناشفه


نعمل ايه بقى

لما نفتح عليها هانلاقيها سردت ميه مع التتبيله صح يب ناخد المايه دي ونزودها شوربه ونحطها على جنب


ونفضل كل عشر دقايق نطلع الفراخ وبالمعلقه كده نسقي الفرخه ونحاول التتبيله دي تتوزع على سطح الفرخه كووووووويس


يعنى 3 اربع مرات كده هاتكون اتحمرت بقى وبقت فله اوي ولو لقينا الصنيه هاتتحرق من تحت نبقى نحط فيها نص كوباية مايه حتى البخار الى طالع بيطري الفرخه


شغلانه صح اه ان كان عاجبكم ههههههههههههه


يعنى فى الاجمالي بتحتاج بتاع ساعتين فى الفرن علشان تستوي كويس اصل انا باحب الحاجه مستويه اوي .



طبعا حشوة الفريك دي ممكن اوي نعملها مع الحمام او السمان


وممكن كمان بدل الفريك نستخدم الرز العادي او الرز البسمتي او لسان العصفور كله بيمشي





يلا يا نكهه ورينا الشطاره يا جميل
الى يجرب يقووووووووولي


والف هنا يا حلوين

هناك 23 تعليقًا:

نكهة مغربية يقول...

اده اده هما عشاق الفراخ ليسه غيبين و لا لسه مصدومين من الحلاوة و الطعامة و الريحة اللي تاخد العقل
أأأأأأأأههههههههههههه فهمت هما سبولي أول تعليق عرفيني عيني طلعة على الفراخ
هههههههههههههههههه

نكهة مغربية يقول...

يا صبرني شرحك ممتاز جداا
و الله أنا بفهم كل حاجة زي منكون معاك في المطبخ أو زي مكون بشوف فيديو و الله أنت ديما تبهريني بطريقة شرحك
أنا حسافر الاسبوع ده ان شاء الله مع جوزي و أول محرجع هعمل تفتيش علي الفريك ده في كل أرجاء المدينة و انشاء الله هجبلك شوية صور تحفة للفراخخ مع الفريك
مش حتنازل على الفراخ بالفريك و الطعمية
ده أكيييد

مممممممموووووحححححححح

خمسة فضفضة يقول...

السلام عليكم ورحمة الله وبركاته

ماشاء الله

تسلم الايادي يا صبصب

عمري ما عملتها بالفريك باعملها بالرز
بس انتي كده شجعتيني اني اعملها بالفريك

هاجربها وابقي اقولك علي النتيجه

سلام

مى حبيبة ابوها يقول...

تسسسسسسسلم ايدك يا احلى صبرنى
بابا بيشكرك اوىىىىىىىىىىىى
جربت فيه الفلافل حبها اوى اكتر منى ههههههههههههههههههيلا معلش بحبك اوىىىىىىىىىىىومنتظرين الابداع
اه من حق عايزة طرق المخلل والليمون بيمرر منى مع انى بنقعه غى ماء

صبرني يارب يقول...

نكهه مغربيه

اهم كلهم جم على الريحه يا جميل

طيب ترجعي بالسلامه يا قمر ونشوف الشغل بقى

على فكره الامارتيه كانوا بيجيبوا الفريك ده وبيعملوا به الهريس حقهم ابقى اسألي عليه بقى

امووووووووووح يا قمر

صبرني يارب يقول...

فضفضه

اوووووووك يلا بقى جو اون انا باموت فى الفريك اصلي


نورتي يا قمر

صبرني يارب يقول...

مي حبيبة ابوها


قولي لبابا اي خدمه يا باشا


بالنسبه للمخلل بصي انا ماليش فى المخللات اوي

اصل مش غاوينها عندنا بس ماما بتعمله هابقى اسألهالك كده على حكايه المراره دي

نورتي يا جميل

نكهة مغربية يقول...

ان شاء الله لما أرجع أدور عليه كويس دنا نفسي قوي في الفراخ دي
أنا حشتاق لكم كتير يارب ألقيكم بألف خير للاسف مش حقدر أدخل للنت علاشان أدردش معاكم بس حوشولي كل الكلام لما أرجع و الله بحبكم جدااااا في الله

صبرني يارب يقول...

نكهه

اووووووك يا جميل والله وانتى هاتوحشينى

تحبيى اعمل اعتصام هنا لحد ما تيجى
هههههههههههههه

هاتوحشينى يا قمر

اموووووووووه يلا تعالي بسرعه

ELMASRYA - SHAMLOOLA HANEM يقول...

طبعا جميلة وتحفة

بس غلبه

ماينفعش طريقة أسهل

بصي يا صابرينا أنا حضرت فرح سوري كانوا عاملين صواني كبيرة زي بتاعة الكبسة وكانوا عاملين الفريك ده مفلفل بالتوابل طبعا والحركات والمكسرات ومن جواه قطع لحم وفيه صواني كان فيها فراخ من داخل الفريك

ماتتخيلي لينا الطريقة وتقوليها

أنا ماليش صبر على اللي قلتيه ده

في انتظار الإفادة يا حبيبتي ربنل يصبرك عليا وعلى طلباتي الغلسة

صبرني يارب يقول...

شملوووووله

غالي يا بطه والطلب رخيص

وحياتك ومتصور


قريبا ان شاء الله

طاجن سمان بالفريك وطبعا ينفع تعمليه فراخ ما يقولش لا

وحاجه ايه بقى اسهله من السهوله يا اختي

وبعدين والله الفراخ مش غلبه الا فى حكاية الفرن

وانتى ممكن تطنيش
وتسبيها من غيرما تسقيها كتير بس تغطيها بالفويل بقى عشان ما تنشفش وفى الاخر تكشفيها ربع ساعه وخلاص مش لازم تبقى متحمره اوي زي بتاعتي كده

اصل انا كان عندي عزومه بقى اختي والكميه كانت كبيره وكده كده الفرن شغال وبافتحه ابص على الحاجات كده يعنى

بس عنينا يا بطه

نورتي

mony يقول...

تسلم ايدك يا صبصب

بس بيني و بينك انا بحبها بالرز اكتر
مش عارفة ايه السبب

بس الخلطة اللي في الفريك ممكن تشجعني اعمله بيه
بس من الاخر تسلم ايدك

ELMASRYA - SHAMLOOLA HANEM يقول...

تسلميلي يا ملظلظاني

لعلمك معاكي ومع وصفاتك مش هقدر أعمل أي ريجيم وماتقوليليش نقلل الزيت

ياختي بلا أكل ماسخ خلينا ناكل كل الأصناف الفظيعه على أصولها وبعدين نبقى نعمل ريجيم ( أحلام يقظة )

في انتظار الفريك المفلفل

موااااااااااااااااه

صبرني يارب يقول...

موني

والله يا جميل وبالرز ما بتقولش لا عادي بتمشي

بس انا باحب الفريك اساسا

تسلمى يا جميل

صبرني يارب يقول...

ِشملوووووله


لا والنبى يا اختي انا عامله دايت

والفطار بتاعي النهارده كوباية شاي باللبن وتفاحه

اهيء اهيء اهيء

ঔღঔ نـــوارة ঔღঔ يقول...

ممممممممممممممم

طعمها يجنن طبعا

انا بحب الفراخ جداااااا وبعملها كتيرر :)

وطريقتك سهلة جدا ومجرباها

تسلم ايدك حبيبتي

اكلاتك دياما تووووحفة

دمت بالف خير

صبرني يارب يقول...

نواره

ده انت الى جميل يا جميل والله نورتي يا قمر

جاجور ليدر يقول...

لا حول الله يارب انتى بتقتلى فى الفراخ لية ارحمى الفراخ
نصيحة متبقيش
تحمرى قوى

صبرني يارب يقول...

جاجور

الله انت نقرك من نقر الفراخ بتاعتنا ليه ياعم
هههههههههههههه




بليز يا تقول يا حول الله يارب

يااماتقول لا حول ولا قوة الا بالله


لا حول الله يارب تركيبة الجمله كده غلط فى نفي لمقدرة الله

قشطه يا باشا

نكهة مغربية يقول...

أهلا يا روح قلبي أنا رجعت بالسلامة
و أتمنا انك تكوني بخير يا قمر و الله و حشتوني

صبرني يارب يقول...

نكهه يا حياتي

الف حمد الله بالسلامه يا جميل

نورتي البلوج ونورتي بيتك


هيا الى العمل انا مستنياكي اهو

نكهة مغربية يقول...

ماشي يا جميل أمال ايه ؟؟؟؟ ده فيه فراخ مستنياني
على بركة الله أنا حأباشر حملة البحت عن الفريك و ربنا يسهل و حط أحلى فراخ

غير معرف يقول...

والله انا جعت علي الكلام تسلمي يا برنسيسه