جبن ابيض طازه

السلااااااااام عليكم

مطبخيينا الاعزاء

انتم عارفين انا باحب منتجات الالبان اد ايه وباحب اوي اعملها فى البيت اقد ما اقدر

ده لان الحاجات الجاهزه ما بتكونش طبيعيه ميه فى الميه

ولان الضمير والحمد لله فى ازمه

بقى فى بلاوي فيها

النهارده هانعمل جبنه بيضاء طازه

جميله اوي وسهله اوي

والعيال والكبار بيحبوها جدا

قبل ما نبدأ شغل عايزه اتكلم معاكم عن المنفحه

المنفحه دي المفروض انها بتكون سائله بيعملوها من الاثنى عشر بتاعة البقر والجاموس

وهى المسؤله عن عملية التخثر (الى هى تحويل اللبن الى جبنه )

اكتشفوها ازاي ؟؟

يقال ان الانسان البدائي بالصدفه اضطر الى حفظ اللبن فى معدة حيوان دبحه فلقى اللبن بقى جبنه

أنا باستعمل المنفحه الطبيعيه السائله ودي موجوده عن بتوع الالبان والاجبان

اعرف ان فى منفحه بودر جافه لكن ما شوفتهاش وما استعملتهاش وما اعرفش ان كانت طبيعيه مجففه ولا ايه الموضوع

لكن قريت انها بتنفع بس ما بتكونش فى نفس الجوده بتاعة المنفحه الطبيعيه

المنفحه السائله المفروض ان المحل الى بيدهالك بيبعها مخففه بمايه بنسبه معينه بحيث كيلو الحليب بياخد من المحلول بتاع المنفحه معلقه واحده

طبعا ممكن يغشوكوا ويخففوها اوي فنعمل حسابنا لو لقينا الجبنه ما بتربطش نبقى نزود المنفحه شويه

المنفحه السائله دي ممكن تقعد شهر فى التلاجه العاديه ولكن حطيها فى برطمان محكم وكمان يكون مكان ضلمه طبيعى التلاجه بتبقى ضلمه لكن ممكن كمان تحجيها فى كيسه سوداء.

يلا على الشغل بسرعه عشان مش فاضيالكم باعمل مسقعه

المقادير

2 كيلو حليب طازه بقري او جموس مش مشكله

2 معلقه كبيره ملح ( لو كنا بنحبها ملح خفيف ونزود بقى لو حبينا )

2 ملعقه منفحه سائله

بس كده

الطريقه

الاول هانجيب الحليب مش هانغليه (لو عملتوا فالحين وقلتوا نغليه عشان الميكروبات مش هايبقى جبنه بيضا ابدا ) هايطلع زي الجبنه القريش شويه

هانحط الحليب على النار يدفى بس يبقى زي درجة حرارة ايدك كده

وبعدين نرفعه من على النار

الافضل انكم تصبوه فى وعاء بلاستيك لان الالمونيا والاواني المعدنيه ممكن تتفاعل مع الحاجات وتاثر على جودة الجبنه

المهم هانغطيها ونسيبها فى مكان دافيء نسبيا يعنى لو كان الجو برد اوي نبقى ندفي لها الفرن شويه

انما لو الدنيا صيف سبيها بره عادي

بالكتير ساعتين وهاتكون ربطت وبقت تمام التمام وجايز قبل كده فى الصيف

المهم هاتربط تبقى عامله زي الزبادي كده

هانجيب السكينه ونقطعها مربعات زي الصوره دي كده

ونسيبها نص ساعه تقريبا هانلاقيها سردت مايه كده

( هنا ممكن بقى نعملها بنكهات مختلفه هاقولكم فى اخر البوست )

نجيب بقى حتى قماش شاش ( او اي قماشه رقيقه شويه ممكن شيفون خفيف او تل )

وبعدين نفردها على مصفاه ونحط تحت المصفاه حله ونصب فيها الجبنه زي الصوره دي كده

بعد كده هانقفل الشاشه دي نلفها حوالين الجبنه وبعدين نحط فوقها حاجه تقيله شويه زي الطاجن ده مثلا الى فى الصوره

او اي حاجه مش مشكله

وهانسيبها كده حوالي ساعتين

هاينزل مايه كتير فى الحله الى تحت المصفاه ده اسمه مصل اللبن المصانع بيعملوا منه حاجات كتير اوي بس انا بصراحه مش باعرف اعمله منه حاجات كتير لو عرفت حاجه هاقولكم

لكن باديه لاي حد عنده مش يزود به المش

وساعات اعجن به بسكوت مملح لانه بيكون فيه ملح اصلا عشان انا باستحرم ارميه

نبص على الجبنه لو لقيناها لسه طريه اوي ومش عامله خرط ز ي الصوره الي فوق دي

نقطعها اربع او ست اجزاء ونلفها تاني ونحط فوقها حاجه تقيله ونسيبها كما نص ساعه

بعد كده نشوفها ونقطعها لو كانت لحمت فى بعضها تاني

ونحفظها بقى فى علبه فى التلاجه ونحط ما بين كل قطعه والتانيه كيس بلاستك عشان مايلزقوش فى بعض

ال2 كيلو بيعملوا حوالي كيلو الا ربع جبنه

الجبنه ممكن تقعد فى التلاجه ثلاث او اربع ايام

اه فى حاجه بقى مهم اوي

لو عايزين نعمل جبنه بنكهات

زتون . فلفل اخضر. بسطرمه . لنشون . شطه . زعتر

اي حاجه بنحبها تنفع

نعمل ايه

نرجع للخطوه بتاعة تقطيع الجبنه مربعات بعد ما ربطت

ونجيب الزتون او الفلفل او وات ايفر (حلوه وات ايفر دي ) ونقطعها حتت صغيره

وبعد ما الجبنه نقطعها اول ما تربط ونسيبها نص ساعه تسرد مايه

نجيب بقى الحاجات المقطعه ونقلبها فيها بس نقلب بالراااااااااحه من غير ما نخلي الجبنه تتفرفت اوي

وبعدين نصبها بقى على المصفاه ونصفيها عادي ونعمل كل الى عملناه عادي

كده ممكن مثلا تعملي نصها بنكهه ونصها ساده بس تكون مجهزه بقى مصفتين وشاشتين وكده يعنى

بس الى بنكهات دي انا بامووووووووت فيها

وبالنسبه لبتوع الدايت الجبنه دي ما تنفعش مع الدايت لانها كاملة الدسم عندكم الجبنه القريش

لكن فاتيما انتى ممكن تاخدي حته زي بعضه

هههههههههههههههههههههههههههههه

والف هنا والى يجرب يقووووووووووولي

الـــلـٍبــــــه

ازيكم يا اعزائي ا لمطبخيين

انا النهارده عاملاكم حاجه اكيد هاتضربوني عشان يمكن اغلبكم مش هايعرف يوفرها

بس انا الامانه تحتم عليا انى برضه اقولكم يمكن حد فيكم يستفيد

اولا انتم عارفين انا باحب اعمل الحاجه فىموسمها

معلش الموضوع ده كان لازم ينزل من شهر على الاقل

لكن يلا بقى احفظوه يمكن ينفعكم

انتم عارفين لبن السرسوب ؟؟

بتاع البنى ادمين

ايوه

الى هو بينزل للبيبى فى اول 3 ايام بعد الولاده

ده بيبقى فيه طبعا فوايد جمه

حلوه جمه دي

بجد حاجه طبعا سبحان الله فوق الوصف ولو قعدنا نتكلم عن لبن السرسوب ده محتاجين ساعتين

كمان الجاموس والبقر عندهم نفس القصه

لبن السرسوب

سبحان الله على راي واحده فلاحه

تقولي هو ده الى بيصلب العيال

ده العجل بيشربه وبعد ساعه يقوم يقف على حيله

هههههههههههههههههههههههههههه

المهم لبن السرسوب ده بقى اسمه الحركي الفلاحي لــــبه (بتشديد الام وكسرها )

ودي طبعا لازم تيجى من حد بيربي بقر او جاموس او حتى غنم بس انا ما جربتش الغنم

وطبعا لازم تكون الجاموسه والده

ماليش دعوه بقى تجبوها منين اتصرفوا

هههههههههههههههههههههههههههههههههههه

انا قلت لام محمد واول ما الجموسه بتاعتها ولدت جابتلي يا اخويا وانا مااااااالي

وعلى فكره موسم الولاده بتاعهم بيبقى فى اواخر الشتا

ايوه زي اغنية اليسا

ندخل على المطبخ بقى

الطريقه سهله جدا جدا جدا

اللبه الى بنجيبها من الجموسه بتبقى عامله زي اللبن الحليب بالظبط

بس تقيله ولونها اصفر ( زي اللبن المكثف كده فى شكلها بس )

دي ممكن تحفظيها في التلاجه اسبوع مثلا وتفضل سليمه

نعملها ازاااااااي بقى

تاخدي كوبايه من اللبه

ومعاها خمس كوبايات حليب عادي (مغلي طبعا وبارد )

والسكر بقى زي ما تحبي (أنا باحط حوالي 3 معالق كبيره انا باحب الحاجه سكرها قليل )

وتقلبي كله فى بعضه

وفى طاجن فخار مطلي او بيركس او حتى صنيه عاديه

وتحطيها فى الفرن وهو سخن

بسسسسسسسسسسس

هى بتغيب شويه يعنى ممكن تقعد نص ساعه او ساعه الا ربع على ما تحمر كده زي الصوره الى فوق دي

هاتلاقيها بقى ربطت ووشها بدأ يحمر كده بس خدي بالك بتحمر فجأه عشان كده طلعت حته وحته كده

المهم تطلعيها وتسبيها تبرد شويه بقى

وتقطعيها بقى بالظبط بتبقى عامله زي الكريم كراميل

بس احلى بكتيييييييير

حقد عشان احنا عندنا ام محمد وانتم لا مش عاااااااايزين

السمن البلدي الفلاحي .... وتحدي

احباااااااائي اعزاااااااائي حبايبي وحبايب مطبخي الى هو برضه حبيبى

هانعمل النهارده يا حلوين السمن البلدي

الي هو بلدي بلدي يعنى مش اوانطه من الى فى العلب الى مالهاش اي علاقه بالبلدي من وجهة نظري المطبخيه الفلاحيه خالص بتاتاا لبته وعمري عمري ما دخلته بيتى هاهنا بتاتا البته

المهم عارفه يا اليس يا بتاعة بلاد العجائب انتى طالبه باتيهات وحوادق عييييييييييييني المره الجايه ان شاء الله

هاعملك حاجه تحفه اوي والله

بس سالي حاجات جوايا حوشت القشطه وزمانها عاملالها ازمه فى الفريزر

رغي رغي رغي وبلاش نشتغل النهارده قداااااااااامي

يا صفايح الزبده السايحه يا براميل القشطه النايحه (وش بيلعب حواجبه )

نيهااااااهاهاهاها

شوفوا يا بنات احنا طبعا عندنا قشطه فلاحي نشتريها نقشطها من على اللبن ماليش دعوه

الجاموسي ينفع والبقري ينفع الاثنين حلوين والاثنين طعمين

بس البقري بيكون لونها اصفرررر فاقع لونها تسر الناظرين

والجاموسي بيبقى لونها ابيض عاجي كده

وممكن نعمل خليط منهم برضه هايمشي

بس الجاموسي الصافي سعرها اعلى جدا فى السوق

والى انا مستعملاه هنا الجاموسي

احنا طبعا بالنسبه لكى يا سالي وليا انا كمان بنبقى محوشين القشطه فى الفريزر فلازم نطلعها تفك خاااااالص

وكمان ما تبقاش بارده اوي تكون درجة حرارة الغرفه كده

لان لو بدأنا شغل فيها وهى بارده اوي مش هاتتحول لزبده بتاتا وايدينا هاتتكسر ضرب ولا حياة لمن تنادي

هانحط القشطه فى حاجه واسعه ونزودها شويه ملح صغيرين قولي مثلاااا لو انتى محوشه حوالي 3 كيلو قشطه حطلهم كبدايه كده معلقه كبيره ملح

رشيها عليهم وبعد كده تنزلي ضرب فى القشطه لما تموتيها( دي اسمها مرحلة خض القشطه لتحويلها الى زبده )

ماما العزيزه رايها انه ما ينفعش بالمضرب لازم ايدك لكن انا ساعات بتتحوش معايا كتير وماا قدرش اعملها بايدى خالص مالص باعملها بالمضرب

طبعا كلكم حريم شلت زيي كده يبقى على طول نعمرها بمضرب الكهربا ونفضل نضرب فيها ونبقى نريح المضرب فى النص عشان ما يتحرقش

والمهم هانفضل نضرب لحد لما نلاقيها عملت تكتلات وفصلت الزبده عن المايه زي الصوره دي بالظبط

معلش الصوره مش واضحه كان عندي برنامج باظبط به الصور مش راضي يشتغل شكله كان ترايل اعذروني يا حلوين على ما نظبط نفسنا

المهم بعد كده نضربها برضه شويه كده بادينها بقى ونحاول نجمع بادينا التكتلات بتاعتها على بعضها وبعدين نعمل منها كور ونعجنها كده بادينا لحد ما تتخلص من الميه الى فيها

والكور الى هاتتطلع دي هى الزببببببببببده

ايوه صفايح الزبده بس لسه ما ساحتش

وبيكون شكلها كده

(الميه الى هاتطع ما ترميهاش خساره دي بتبقى كلها لبن وفرافيت زبده . ممكن تعملي منها بشاميل او تزوديها لبن وتعمليها منها طاجن معمر زي الفل )

بعد ما نخلص الخطوه الرخمه المتعبه دي نرفعها بقى على النار انا بافضل تعمليها فى تيفال لانها احيانا بتلزق وتبقى رخمه اوي

المهم هاتحطي الكميه الى هى نقول 3 كيلو ونزودها ملح بقى عشان المرته تطلع نحط قولي معلقتين ملح كبيره ونرفعه على النار ولما تسيح نهدي عليها النار اوووووي ونقلبها كل ربع ساعه كده عشان نشوف المرته ما تتحرقش والسمنه كمان

بتاخد على النار من ساعه لساعتين حسب الكميه وجوودة الزبده وحاجات كتير

(ملحوظه مهمه لو هاتعملي كميه كبيره من السمنه وناويه تخزنيها مثلا يبقى الزبده الى تطلع دي اعمليه كور ورشي عليها ملح وسبيها في مصفى لحد تاني يوم هاتلاقيها نزلت مايه كتير وبعد كده تحطيها على النار بقى )

ولما تبدا المرته ترسى فى الحله كده ويبقى شكلها سمنه يعنى السمنه تفصل عن المرته وطبعا كان فى مايه فى الزبده اتبخرت

وبيبقى شكلها كده

بناءا على تذكير ستيته ستوته شايفين الريم الابيض الى على الوش ده ده بقى تشلوه كده بالراحه بالمعقله وتسبوه فى طبق كده وده انا باسميه المورته البيضاء وطعمها رااائع وانا بموت فيها على فكره

اساسا هى ما بتلحقش توصل للطبق من الحله على اللقمه على بؤي على طول هههههههههههههههههههههه

هانسيبها على النار لحد لما المورته بتاعتها تبقى لونها بني فاتح خااااالص زي كده

وبعدين نطفي عليها ونسيبها تستهدى شويه وبعدين نصفيها بمصفى سلك وتطلع فى المصفى المورته الي فوق دي باحبها اوي اوي ههههههههههههههه

وبعدين نعبي السمنه فى برطمانات وتفضل البرطمانات الازاز خصوصا لو هاتخزنيها فتره كبيره

ولو هاتخزنيها كتير اوي زودي الملح الى بتحطيه ساعة ما تيجى تسيحيها على النار وحطي فيها حبوب فلفل اسود مش مطحونه وانتى بتعبيها ويا حبذا لو كنا فى الصيف اوي حطيها فى التلاجه

وده شكلها بالظبط اول ما اتعبت


ولما بتبرد بيبقى شكلها زي الى فى الطبق الى فوق ده بالظببببببببط



ملحوظه مهمه جدا خصوصا للحريم الشلت جدا برضه :

بالنسبه لخطوة ضرب القشطه لتحويلها لسمنه . ممكن تستغني عن هذه الخطوه

اه والله زغرتي بقى لوووووووووووووولي

ممكن تحطي ملح على القشطه زي ما هى كده وتحطيها على النار تحطي مثلا معلقه كبيره لكل كيلو وتحطيها على النار

بس بقى الطريقه دي لها مشكلتين قابلوني

اولا : انا بتغيب جدا على النار ممكن تقعد بتاع 3 او اربع ساعات وكمان لازم تقلبيها كتير اوي عشان القشطه بتلزق وتاخدي بالك كمان تهدي النار عليها جدا وتحطيلها شياطه عشان ما تفورش

ثانيا : انك ما تعرفيش تطلعي زبده وانا باحب اطلع حته زبده كده من غير ما احولها لسمنه عشان باستخدمها فى الحلويات

وطبعا لها برضه ميزتين :

انك هانتفضي لمرحلة خض القشطه ده لانه رخم شويه

وان كمية المورته الى بتتطلع بتكون اكتر كتير من الطريقه الاولى



اه ملحوظه بالسمنه البلدي : المورته الناتجه عن القشطه الى انتى محوشاها من على اللبن الحليب المغلي بتكون مخرزه شويه وما بتكونش شبه المورته الى طالعه من السمنه المعموله بالقشطه الي طالعه بالفراز او من على اللبن الرايب
بس بيبقى طعمها حلو انا باحبها


بس خلاص انا مش فاكره حاجه تانيه
ياريت الى عنده استفسار يقولي

مش عارفه حاسه انكم مش فاهمين سالي فهمتي ؟؟؟

فضفضه تعالى قوليلي بقى زي ما بتعمليها ولا ايه

يلا منتظراكم

يا طريه يا جبنه قريش

الجبنه القريش

زي ما انا قلتلكم قبل كده انا باحب اعمل دايما منتجات الالبان فى البيت

الجبنه القريش من الحاجات الى انا باحبها لكن المعلبه منها او الى فى السوبر ماركت بتبقى مش نفس الطعم الفلاحي الى انا باحبه

والى من الفلاحين بتبقى ساعات شكلها يغم النفس والواحد بيقرف منها

كمان هى مفيده اوي عموما دول حوض البحر المتوسط مشهورين بالجبنه خصوصا الجبنه القائمه على طريقة التخثر البكتيري .وهى فعلا من افيد الانواع وكمان الجبنه القريش بالذات تعتبر اقل انواع الجبنه سعرات حراريه مع احتفاظها برضه بالفايده العامه للجبنه .

الطريقه سهله جدا بس نركزززززززز

أولا :الحليب لازم يكون طبيعى ميه الميه مش عليه اي مواد حافظه . لكن مش لازم يكون طازه لاننا اصلا هانسيبه لما يروب

بس يكون احسن كتير لو كان ما اتحطتش فى التلاجه خالص

بناخد الحليب ونحطه فى حله او طاجن كبير ونغطيه ونسيبه فى مكان دافي نسبيا لو فى البرد اوي ممكن نعمل زي ما عملنا فى الزبادي ندفي الفرن ونسيبه فيه لحد ما يربط ويعمل وش .

فى البرد ممكن لو دفيتى الفرن يقعد حوالي 48 ساعه

فى الحر الجامد ساعات يربط بعد 12 ساعه مثلا .

اول لما يربط تشيلى القشطه من عليه وممكن تحطيه فى التلاجه نص ساعه مكشوف عشان القشطه تجمد شويه تعرفي تشيلها بسهوله .

والقشطه الى طالعه دي بتبقى قشطه فلاحي زي الى بتتباع فى السوق وممكن تسبيها للاكل لو بتحبوها اوتحوشيها زي ما عملنا فى القشطه بتاعة الزبادي .

بعد كده لازم نسخن اللبن الرايب ده لحد ما يبقى تقريبا درجة حرارته 90 درجه مئويه او يعنى قبل ما يغلي على طول

ممكن بقى ب3 طرق

اولا تحطيه فى فرن البوتجاز

بس تكون شقتيه بالسكينه الى اربع اجزاء مثلا عشان الميه السخنه تتخلله وده فى جميع الحالات يكون احسن

ثانيا تغليه ميه وتصبيها عليها

ثالثا انك تحطيه على البوتجاز من فوق بس تحتيه صاجه (شياطة الرز ) ونار هاديه اوي وتخدي بالك منه عشان ما يغليش

لو غلي بتبقى الجبنه فيها حتت جامده كتير تخليها مش متجانسه .

بعد كده بتسبيه من غير نار لحد ما يبرد

وبعدين تصبيه فى مصفه جوها شاشه او اي قماشه تكون رقيقه اوي

وتسبيه بقى بتاع نص ساعه كده لما ينزل اغلب ميته

وبعدين تشيلى الميه الى تحته ما ترميهاش بتبقى من غير ملح وهى فكره مفيده اوي هانخليها على جنب هانعمل بها حاجات تانيه كتير بعدين

وبعدين تحطي الملح على حسب ما تحبيه

وتقفلي الشاشه ويا اما تحطي فوقيها حاجه تقيله شويه وهى في المصفاه او تعليفها فى اي حاجه لفوق

وتسبيها لحد ما تصفي ميتا وتجمد كويس

طبعا الفلاحين والمحلات عندهم حاجه اسمها حصيرة الجبن القريش وده الى بيخليها تطلع زي ما هى فى الصوره كده لكن انا ما عنديش بقى باعملها ومش مهم تطلع خرط يعنى

الجبنه الى هاتطلع ممكن تقعد فى التلاجه كويسه 3 ايام

لو هاتحطيها اكتر من كده فى التلاجه حاولي تحافظي على شكلها كوره او قالب مربع وحطيها فى ميه وملح او حتى شويه ميه من الى طلعوا من تصفية الجبنه تحطي فيها ملح خفيف وتحطيها في التلاجه

وبس كده تبقى أحلى جبنه قريش

وال 3 كيلوا حليب يعملوا حوالي كيلو جبنه قريش او اقل شويه حسب نوع الحليب

وجربي الاول فى كيلو وما تيأسيش والى تجرب تقولي والى تغلط تقولي عملت ايه بالظبط

أه وعلى فكره لو اشتريتى حليب وجيتى تغليه راب منك ممكن تلحقيه قبل ما يغلي او وتسبيه يكمل روب يوم كمان وتعمليه زي ما عملنا كده فى الى فات

او حتى لو عندك زبادي كتير باقي وطعمه غير وما حدش هايكله برضه ينفع تعمليه كده تسخنيه وتعمليه جبنه قريش

وعندي برد حد يعملى ينسون

الزبـــــادي

بصراحه يا جماعه انا فى الاونه الاخيره مع الغلى وقلة الضمير الى عند الناس منتجات الالبان الى فى السوق بقت وحشه جدا جدا . وغاليه كمان . تلاقي علبة الزبادي فاضيه اصلا وبجنيه . وتلاقي الجبنه طعمها لبن بودره صاااارخ والكيلو بعشرين جنيه والواحد يجى ياكلها يلاقي فى دهن كده غريب شكلهم بيعملوها بزيت عربيات .

عشان كده بقيت الى اقدر اعمله فى البيت اعمله وان شاء الله اقولكم خلاصة ا لتجارب بتاعتي يمكن تنفعكم

ونبدأ النهارده بالزبادي

اولا: نغلي اللبن الحليب كويس اوي طبعا باي كميه ونسيبه لما يبرد يبقى زي ايدك تقريبا

ثانيا: تيجبي علبة زبادي من النوع الى بتفضليه بس تتأكدي انه زبادي معمول بخماير طبيعيه لان فى زبادي فى السوق دلوقتي معمول بمواد جيلاتين وكده .ماتسألنيش تتأكدي ازاي . أنا عن نفسي عرفت الانواع الى فى السوق بالتجربه والخطأ

نجيب علبة الزبادي الجاهز ونضيف عليها نص كوباية حليب دافي ونقلبها كويس عشان تتجانس بسهوله مع باقي اللبن

وبعدين نضيفها بقى للكميه كلها

وعلبة الزبادي مثلا زي اكتفيا دي ممكن تعمل لحد 6 كيلوا

ما جربتش اكتر من كده بس بتهيئلي تجيب عادي

ثالثا: تصبي بقى الخليط الى فات ده فى كوبايات او طواجن زي ما تحبي وتغطي عليه وتسبيه فى مكان دافي لحد ما يربط تمام ويعمل وش ويبقى شكله زبادي يعنى

بعد كده حطيه فى التلاجه شويه قبل الاكل

هاقولكم شوية ملاحظات بقى مهمه :

ممكن تضيفى نكهات للزبادي _ مربات او فاكهه كمبود او عسل ابيض_ لكن ما تقليبهاش فىالحليب جربت اعملها لقيته مش بيربط كويس حطيها فى اخر الكوبايه وصبي عليها الحليب

لو كان الجو برد ابقى ولعي الفرن عشر دقايق كده وبعدين اطفيه وحطي الزبادي بعدها وسبيه يربط

لو لقتيه بعد خمس ساعات لسه ما ربطش وكان الجو برد برضه دفي الفرن تاني

اذا لقيتى الزبادي طالع فيه كتل من تحت يعنى مخرز او مجبن ده لان الحليب كان سخن شويه أو الفرن كان سخن اوي

خلي بالك لو حطيتى الزبادي الجاهز على الحليب وهو سخن اوي الخميره الى فى الزبادي هاتموت والزبادي بتاعك مش هايربط ابدا .

خليى بالك اللبن الى هانستخدمه لازم يكون سليم يعنى لا مضاف له مواد حافظه ولا مبستر لان المواد الحافظه بتمنعه من التخمر

والمبستر ممكن يربط حسب طريقة بسترته لكن فى الغالب مش بيربط وحتى على فكره لو حطتيى الحليب فى الفريزر بيكون مش حلو فى الزبادي .

طبعا ممكن لو بتعملي رجيم أو حتى عندك بيبي صغير اوي يكون الحليب سمين عليه خصوصا فى الشتا

اغلي الحليب ولما يبرد حطيه فى التلاجه لتاني يوم وتطلعيه هاتلاقيه عامل وش تشيلى القشطه من عليها ما ترمهااااااش

لو ماكالتوهاش حطيها فى الفريزر عايزنها بعد كده هابقى اقولك .

المهم تاني يوم طلعي الحليب حطيه على النار يدفى شويه وبعدين اعمليه زبادي عادي

بس كده الف هنا والى تجرب تقولي

اه والبوست ده مهدي خصيصا لمدام خالد همس الاحباب عشان هي هاطبق فكرتي ومشروعي الى جاي وهاتعمل زبادي وتبيعه لجوزها هههههههههههه

وانا من موقعي ده باقولكم كلكم يا ستات اقل علبة زبادي فى السوق دلوقتي بجنيه وكيلوا الحليب بقى باربعه جنيه عندنا مش عارفه فى البلاد

التانيه ايه والكيلوا يعملك بتاع 8 كوبايات من ام جنيه يلاااااااا عيشي بقى وابقى اعمليلهم تخفيض مالكيش بركه الا هما