السبت، 18 يوليو، 2009

تخزين الخضار (باميا وملوخيه وبتنجان )


السلام عليكم


واخيرا عدنا الى مطبخنا السعيد بعد الرحله المضنيه بتاعتي


وزي ما قلنا المره الى فاتت هانجهز النهارده الخضار عشان نخزنه فى الفريزر


الحقيقه هو طبعا الخضار الفريش مافيش احسن منه


لكن برضه ساعات الواحد فى الشتا كده نفسه تهفه يشرب شوية ملوخيه من الصح دول


وكمان بصراحه وجود الخضار متجهز فى الفريزر عندك دي بتنفع جدا جدا فى الزنقات


ما لقتيش خضار فريش ما عرفتيش تنزلي جالك ضيوف فجأه


وكمان لو الست بتشتغل وعايزه تطبخ طبعا بعد ما ترجع فى نص ساعه



هانعمل النهارده الباميا والملوخيه والبتنجان ان شاء الله


هما دول المتوفرين فى السوق الايام دي ودي ايام تخزينهم


اولا الباميا


شوفي يا ستى انا باحب اشتري الباميا الى حجمها وسط لا كبيره مجلده وشايخه ولا صغيره تفقعنى فى التقميع وما تصفيش حاجه

وكمان الباميا البيضاء احسن من الباميا الحمراء مش عارفه ليه بس بابا بيقولي كده

ههههههههههههههه

طبعا ده بالنوسبه للباميا المصري يا قوم


طبعا هاتقمعي الباميا (تشيلى الحته الى فوق فيها دي )


ودي شكل الباميا بعد ما قمعناها






وبعد كده نحطها فى مصفاه ونغسلها كويس اوي وتبقى شكلها كده



وبعدين نحط حلة مايه على النار ونسيبها لحد ما تغلي وبعد ما تغلي نسقط فيها الباميا

قالولي حطي شوية كربونات الصوديوم فى المايه عشان الباميه تبقى منعنه الحقيقه جربتها لقيت مافيش فرق


جايز تفرق معاكم ماليش دعوه


وممكن نحط نقطتين ليمون برضه مش كتير


المهم لما الباميه تغلي نهدي عليها النار ونسيبها تغلي حوالي عشر دقايق ربع ساعه كده



بس ما نزودش يعنى يادوب الباميا تدبل كده مش تستوى سوى كامل عشان ما تتهراش فى الفريزر وبيكون شكلها كده بعد ما تستوي



بعد كده بنصبها فى مصفاه ونسيبها تنزل المايه بتاعتها كلها وبعدين لما تبرد خالص نخطها فى اكياس وزي ما قلنا قبل كده فى بوست التلاجه نحاول نعمل الاكياس كلها مسطحه كده عشان تتفكك بسرعه وما تاخدش مكان فى الفريزر





وطبعا بتقسمي بقى الاكياس كل كيس طبخه مثلا على ادكم

ولما تيجى تستعمليها طلعيها من الفريزر على الحله دوغري لو سبتيها تفك الاول هاتسرد مايه وما تبقاش حلوه على طول تسقطيها فى التقليه بتاعة الباميه وتهدي عليها النار لحد لما تفك



نيجى بعد كده للبتنجان


انا هنا اقصد بتنجان المحشي الى هو البتنجان الابيض الطويل


انا باجيبه واقوره واقليه فى زيت غزير


ايوه فى ناس بتشوحه بس فى زيت قليل


لا ده لما بيتحط فى الفريزر بيلزق فى بعضه وموال رخم كده


انما انا باقليه فى زيت كتير وبالظبط بياخد 4 دقايق على النار يعنى يادوب يصفر كده


وبعدين اطلعه واحطه فى مصفى يصفي زيته وبعد ما يبرد برضه على الكيس ونوضبه ونحطه فى الفريزر







فى ناس بقى قالولي انه بيلزق فى بعضه معاهم مش عارفه ليه بصراحه لكن اغلب الظن عشان حكايه التشويح ده


المهم قالولي انهم بيدخلوا كل بتنجانا فى التاني يعنى يلبسوهم فى بعض ويرصوهم فى علبه بلاستك وبعدين يحطهوها بحالها فى الفريزر


الحقيقه ما جربتهاش بس يعنى ما تقولش لا طبعا



والبتنجان العادي الى هو بتاع المسقعه وما الى ذلك


انا مره كان عندي بتنجان كتير وشكله كده هايبوظ فقليته كله وحطيته فى التلاجه وقلت بكره اعمله مسقعه المهم ما عرفتش اعمله يومها الجدول كان انشغل

فحطيته فى الفريزر وقلت والله بقى يا صابت يا خابت


والحقيقه بعد كام يوم كده عملته مسقعه وكان ماشي الحال يعنى مافيش مشكله


لكن البتنجان الاسود ده دلوقتي مش حلو بالنسبه لي بيبقى حامي شويه ومتعب انما فى شهر خمسه وسته بيبقى حلو اوي عن دلوقتي




نيجى بقى للملوخيه


للاسف الشديد كل ما اشتري ملوخيه عشان اخزنها قوم نعملها وناكلها

ههههههههههههههههههه


فلسه ما صورتهاش لكن يعنى هى مش محتاجه صور


طبعا هانشتري الملوخيه ونقطف الورق بتاعها وبعدين نغسلها كويس ونفردها علىصنيه كبيره ويا حبذا لو كان تحتها حتة قماشه عشان تشرب المايه ونسيبها كده فى الهوا ساعتين ثلاثه لحد ما تنشف كويس


وبعدين ناخدها لما تنشف ونخرطها


طبعا فى ماكينات لخرط الملوخيه دلوقتي بس الحقيقه مافيش زي مخرطة امي تحديدا فى الملوخيه مش عارفه ليه


المهم هانخرطها باي طريقة ان كانت لحد ما تبقى ناعمه كويس


وبعدين هانغلي مايه او شوربه بس بلاش شوربة فراخ مش عارفه بتغير طعمها ليه فى الفريزر


المايه برضه مات قولش حاجه يعنى مثلا لو عندنا 4 كوبايات ملوخيه مخروطه نحط على النار 4 كوبايات مايه مثلا ولما تغلي نحط عليها ربع معلقة كربونات الصوديوم (برضه عشان تفضل خضرا )


وبعدين لما تغلي نسقط الملوخيه ونقلب دقيقه واحده بس لحد ما تغلي اول ما تغلي نطفي عليها


وما نغطيهاش ونسيبها تبرد


ولما تبرد بقى برضه نحطها فى اكياس بس المره دي نربط الاكياس او نقفلها حراري عشان هاتكون الملوخيه سايله


ولما نيجى نستعملها برضه من الفرزير على الحله عدل من غير ما تفككيها الاول



والمانجه ظهرت اهو بقى فى الطريق اليك نخزنها ونقولكم برضه


اي سؤالت انا تحت الامر



‏هناك 10 تعليقات:

خمسة فضفضة يقول...

السلام عليكم ورحمة الله وبركاته

ازيك يا صبصب
حمد الله علي السلامه

الحمد لله خلصت موال التخزين ده الاسبوع اللي فات
بس لسه الباميه شكلي كده مش هاخزنها السنه دي ما انت عارفه بيني وبينها ما صنع الحداد ههههههه

بالنسبه للباميه لازم لما نصفيها نحطها تحت الحنفيه لحد ماتبرد بسرعه وفيه ناس بتحطها في ميه ساقعه وده عشان نوقف عمليه الطبخ وتفضل محتفظه بلونها الاخضر الجميل
بس انتي بتسبيها كتير اوي في مية السلق انا يادوب اصقتها ومجرد ما الميه تقلب اقوم مطلعاها

ولا ليمون ولا كربوناتوا ولا اي حاجه كل ده مالوش لازمه خالص

الباذنجان باعمله زيك بس مش في زيت غزير اوي شويه يعن
ولا بيلزق ولا اي حاجه

الباذنجان الرومي يا بنتي ده هو اليومن دول الموسم بتاعه ومالي السوق دا انا جبته مره ال 3 كيلو بجنيه
واول مره السنه دي اعمله من الفريزر تخيلي حصلي نفس الموقف كان هايبوظ قمت قالياه وحطاه في الفريزر وعارفه فيه ميزه فظيعه الزيت بينزل منه ويتركز علي طبقات البلاستك اللي بين الحلقات والمسقعه والله كانت خفييييييييييييفه جدا ومافيهاش زيت زياده خالص
بصراحه عجبني اوي وقررت اعمل طبقين واشيلهم
دا انا حتي شويت منه في الفرن البلدي اللي بالقش ده عشان بيديله ريحه حلوه وشيلته في الفريزر عشان رمضان لانه بياخد موال دا غير ان الطعم بيبقي مش حلو زي الفرن البلدي

الملوخيه:
مش باغليها
هي تتخرط وبعدين احط عليها شوية ميه صغيرين يادوب تبقي طريه كده عشان تنفع تتبطط في الاكياس وبعدين علي الفريزر

هو انت ماعملتيش طماطم دي كانت من اسبوعين بنص جنيه الكيلو وروعه

ربنا يعينا هههههههه

سلام يا قمر

خمسة فضفضة يقول...

بس عارفه نسيت اقولك ان كل التعب ده بيروح لما فيوم تبقي جايه من الشغل ومش قادره تعملي حاجه
ويادوب تطلعي الحاجات من الفيزر ومافيش ساعه يكون الاكل كله جاهز

صبرني يارب يقول...

ايووووووه انا جربت البتنجان المشوي

بس مش عارفه يا فضفضه الايام دي بيجى على شهر سبعه ويبقى حامي بيعملي حموضه

وفعلا موضوع الزيت ده انا برضه قلت الزيت كله طلع وكانت فعلا مسقعه خفيفه وحلوه

والباميا يمكن انا سبتها زياده شويه عشان كانوا كتير

والملوخيه جربتها زي ما بتقولي كده بس كانت بتسود شويه عن الى بتكون اتسقطت فى مايه سخنه لكن بتمشي برضه

والطماطم يا اختي جايباها اخر مره الكيلو ب 2 جنيه والله

انا اصلا مش باعمل كميات عشان مش باقدر اقعد فترات طويله من العيال

انا كل ما انزل السوق اجيب حبات كده

وفعلا فعلا الواحد كأنه بيبقى لاقي الحاجه
خصوصااااااا فى رمضان

انتم لسه عندكم يا اختي فرن بلدي بالقش
ده انقرض من عندنا من زمان

هييييييه دنيا انا باشوفه فى الفرن عندي وبيطلع جميل اوي اصل انا فرني حامي شويتين

بذمتك مش المفروض ناخد مقابل وجع القلب ده
طب بذمتك بتتعبي فى الشغل زي ما بتتعبي فى البيت

اه يا مامااااااايا

كان ماله وأد البنات يعنى اهو كان راحه
هههههههههههههههههه

نورتي يا جميل

نكهة مغربية يقول...

يا عسلاية انت ياقمر و الله وحشانا موت
انت كنت مسافرة و لا ايه؟؟؟؟
على العموم الحمد الله على سلامتك
الحلقة دي مفيدة و جميلة يا سكر ان شاء الله أطبقها
على فكرة في المغرب الباميا اسمها مولوخية
و المولوخية عندكم هي السبانخ عندنا

شفتي بقا

صبرني يارب يقول...

نكهه

ايوه يا جميله كنت مسافره انا قلت انى مسافره بس فى المدونه التانيه

المدونه الرئيسيه


وبعدين ايه لخبطة الاسامي دي
هههههههههههههههه

عموما المهم بتاكلوها يعنى

نورتي يا قمر

القطقوطة الصغيرة يقول...

لابجد مدونتك جميلة جداً جداً و عجبتنى اوى
مع انى يعنى مليش فى الطبخ لسة بتعلم بس هقول لماما على الوصفات اللى لاقتها هنا تحفة
و بالنسبة لتخزين الباميه فده من اختصاص ماما اما بالنسبة للباذنجان فتقريباً احنا اول اما بنجيبه بنعمله على طول و مبنعنوش لكن هبقى اقول لماما على طريقت التخزين
و ميرسى اوى على البوست الجميل

نبض الكلمات يقول...

طرق حلوة وجميلة .أستفدت منها جدااااا .تسلمى

نبض الكلمات يقول...

طرق جميلة جدااا.أستفدت منها كثيرررر.تسلمى

صبرني يارب يقول...

نبض الكلمات

متشكره ليكى جدا يا حبيبتى ربنا يكرمك

غير معرف يقول...

والله ما فى اجمل من خفة دم المصريين وشطارتهم بجد تسلم الايادى على المدونة الجميلة