القلقاس

واخيرااااااااااااااا وبعد طوووووووووول انتظار القلقاااااااااااااااس يا واندا

يا سلام الواحد حاسس ان القلقاس حمض فى اديه

القلقاس ده يا جماعه من الطبخات الى بتتعمل بمليون طريقه وكل بلد لها طريقه شكل بل وكل عيله لها طريقه شكل لكن الحقيقه انا ما باحبش اي طريقه منهم الا الطريقه بتاعتنا والى علمتهالي كانت تيته الله يرحمها كانت استاذه الحقيقه فيها

المهم طبعا احنا المره الى فاتت قلنا ازاي نقشر القلقاس ونقطعه ونخزنه فى الفريزر وهكذا يبقى جاهز للطبخ فورااااااا

وممكن طبعا يبقى فريش عادي زي الى فى الصوره ده

الموضوع بقى المهم فى طبخ القلقاس هو تقلية القلقاس

مكونات التقليه دي يا اعزائي المطبخين الكرام

عباره عن كسبره خضراء وتوم

فى ناس بتحط ورق سلق وفي ناس بتحط بصل

لكن الحقيقه انا باحبها بكسبره خضراء وتوم

بنغسل الكسبره الخضراء ونقطعها صغير وتكون متصفيه كويسه من المايه

والتوم كذلك بنقطعه او نهرسه بالسكينه المهم نعمل اختراق للقشره الخارجيه

ونيجى فى طاسه كبيره ونحط كميه من السمنه مناسبه عشان نحمر فيها الكلام ده ولما السمنه تسخن نحط الكسبره والتوم زي الصوره دي كده بالظبط

وهانفضل بقى نقلب فيها على النار وبالتدريج كده هاتفضل تدبل الكسبره وتسرد مايتها واحنا بنقللللللللب برضه


وبعد كده المايه هاتنشف ونبدأ نحمر بقى الكسبره زي الصوره دي كده ولاحظوا معايا تدرج الالوان كده

لما نوصل بقى ان شاء الله للون البنى ده وساعتها واحنا بنقلب هاتلاقي الكسبره لها صوت خرفشه كده وده معناه انها نشفت وبقت تمام

معلش هى الصوره طبعا مش واضحه اوي لكن المهم اننا بنطلعها لونها بني غامق زي بصلة الكشري كده

وبعد كده بنسيبها تبرد شويه وبعدين بنحطها فى الكبه او المفرمه او وات ايفر ونفرمها فطلع عامله زي المعجون زي الصور دي كده

الحقيقه موال رخم جدا وبيبهدلي المطبخ عشان كده انا باجي فى الشتا وبتكون الكسبره كتيييييييره فى السوق اجيب عشره خماشر ربطه كده

واعمل بقى كميه كبيره من التقليه وبعدين اقسمها فى ورق سلفر كده الحته على اد الطبخه واطبقها واحفظها فى الفريزر بحيث ساعة الاستعمال اخدها كده جاهزه من الفريزر بتبقى حاجه جميله جدا

كده تقليتها جاهزه والحمد لله

ندخل على الطبيخ بقى

القلقاس يستحسن ويفضل انك تخزنيه فى شهر يناير او بالاحرى شهر طوبه لانه بعد كده بيبقى بينشى ورخم وقبل كده بيبقى سواه وحش اوي

طيب لو كان القلقاس من النوع الى بينشى او حتى مش بينشى اوي لكن انتى هاتطبخيه مثلا وهاتتغدوا بعد ساعتين ثلاثه

فى هاذوها الحاله لازم تاخدي القلقاس غلوه الاول فى شوية مايه وبعدين ترمي المايه ويا حبذا لو تحطي فى المايه معلقة طماطم او نقطتين لمون

الاول بنغلي المايه وبعدين نسقط فيها القلقاس ويادوب يغلي اربع خمس دقايق وبعدين نصبه فى مصفاه ونغسله بمايه بارده لحد ما المايه اللازجه دي تروح منه

بعد كده بقى نرجعه الحله تاني ونحط عليه شوربه ونص كوباية عصير طماطم او معلقة صلصه ونسيبه يغلي

ولحد ما يستوى بقى مش هياخد سوى كتير ان شاء الله يادوب ربع ساعه كده هايكون استوى تماما وطبعا نطلع قطعه نجربها مش عايزينه يتهري من فضلكم

بعد كده هناخد معلقه كبيره من التقليه الى احنا عملناها فوق دي ونحطها على القلقاس زي الصوره دي كده

ونقلب ويادوب يغلي ونظبط ملحه ونطفي عليه خلاص

ما نحطش التقليه من بدري عشان تفضل على لونها ما تبهتش

وبعد كده يكون القلقاس بهذا الشكل العظيم المريع وبالف هنا يا قوم

أي خدمه يا وندا مش عارفه من غيرى كنتم هاتكلوا قلقاس ازاي

الفتــة.. الفتـــة .. الفتـــــــــــــة .. كل سنه وانتم طيبين

السلاااااااااااام عليكم يا بشر

كل سنه وانتم طيبين

وعيد اضحى سعيد يارب عليكم وعلى كل حبايكم ويعوده عليكم وانتم بخير وصحه وسلامه ياااااااااااارب

طبعا طبعا ملاحظين تطنيشى العظيم لهذه المدونه الغاليه

كنت تعبانه يا وحشين وما حدش فيكم طبخلي حلة شوربة خضار وجه يزورني مع انى طابخالكم ومهنيااااااااااكم

يلا مش مهم طبيخكم وحش اصلا

النهارده بقى طبعا الشيء لزوم الشيء

العيد الكبير واللحمه بقى هاتبقى ماشيه فى عروقكم انا عارفه

وعليه قررنا نعمل فتتتتتتته بالخل والتوم استعدادا لليوم العظيم بتاع اللحمه

وقلت اعملهالكم من دلوقتي عشان تعملوا حسابكم عليها وعشان جايز ما افضاش بعد كده

المهم بلااااااش رغي

الى المطبخ

اولا الفته بتاعتنا المصري يا رجاله

بتتعمل المفروض بعيش رقيق زي العيش الفلاحي كده لكن يعنى الى ما عندوش عيش فلاحي يعمل ايه ينتحر

لا لا طبعا لسه عايزينه

يجيب رقاق ويشتغل معانا

هانعمل ايه بقى يا حلوين

اول حاجه هانجهز التقليه بتاعة الفته هى دي اهم حاجه فى المونطقه

هانقشر اربع خمس فصوص توم كده حلوين حسب الكميه بتاعتك بقى الى هاتعمليها

وبعدين نفرمهم او نهرسهم المهم نفتري عليهم يعنى

ونكون مجهزين عصير طماطم

ونروح على الحله نحطها على النار وفيها نص معلقة سمنه ولما تسخن نحط التوم ونحمره لما يااااااااادوب يصفر

ما تحمريهوش اوي عشان بيمرر بسرعه

وبعدين اول لما يصفر تحطي عليه حوالي اربع معالق كبيره خل ووراهم على طوووووووول عصير الطماطم قولي 3 كوبايات

بسرررررعه كل ده عشان ما يتحرقش التوم وابقى هدي النار وانتى بتحمري التوم

ونسيبها بقى تغلي كويس لحد ما تتسبك صح وتتقل كده وتبقى ميت فل واربعتاشر

ونسيبها بقى تتسبك ونروح نعمل الفته

هانجيب الرقاق او العيش سيان ويفضل ان العيش (الخبز ) يكون ناشف

هانكسر العيش ده او الرقاق لقطع صغيره يعنى زي الصوره دي كده

وبعدين نحمره فى سمنه لحد ما يبقى لونهم احمر زي الصوره الى فوق دي كده احمر وردي كده

وممكن نحمرها على البوتجاز من فوق بس نستمر فى التقليب ونحط سمنه كفايه عشان ما تبقاش واحده وواحده

اووووو وده الاسهل والاحلى والاخف

نقلب السمنه على الرقاق او العيش ونكون اصلا مولعين الفرن ونحطها فى الفرن تتحمص مع السمنه وطبعا كل خمس دقايقه كده نبص عليها ونقلبها برضه عشان ما تتلدعش

وبعدين لما تتحمر وتبقى تمام التمام

نكون مجهزين شوربة بقى متينه متينه اخر حاجه متينه اي سمينه

(وخلوا بالكم اموت انا واتجنن من الى بيملوا الاوضه مايه تبقى شوربه دي )

اللحوم لازم الاول تتحمر قبل ما تزوديها مايه وكمان توطي عليها لما تسرد مايتها كلها وبعدين تحطي مستكه وحبهان ولوري وبصله صغيره وتفضل تقلبي لحد ما تتحمر كويس ومايتها تنشف وبعدين تحطي مايه مغليه عليها

سيان فى ذلك الفراخ واللحمه مش تعملوا شويه ماية على اللحمه تبقى شوربه وبعدين تقولوا الفته بتاعة صبرني طلعت وحشه

المهم بقى نجيب الشوربه المتينه ونزود بها العيش الى حمرناه وهو على النار

هحاول احط مقدار عشان ما تبوشوش الدنيا ممكن لو محمره حوالي كوبايتيين عيش مكسر يعملوا طبق زي الى فى الصوره ده

تحطي عليهم كوبايتين شوربه ولو لقتيها لسه ناشفه شويه زودي حبه صغيرين المهم تبقى شكلها زي الى ف الصوره دي كده

طبعا يادوب هانزود الشربه وفى خلال 3 دقايق هاتكون اتشربها العيش تمام ونغرفها بقى فى طبق كده زي الصوره الى فوق

وبعدين نحط على وشها من فوق رز ابيض او بشعريه لو حبيتوا نو بروبليم

وتفردي عليها طبقة الرز

وبعدين نرش عليها من فوق التقليه بتاعتها الى عملناها فوق دي وتبقى شكلها كده زي الى فى الصوره دي

سامعه اصوات مغرضه بتقول اماااااال فين اللحمه ؟؟

اللحمه اختفت فى ظروف غامضه

نيهاهاهاها

لا مش فاكره بصراحه انا يومها ما صورتهاش باللحمه ليه اصل الصوره دي من زمان

بس اللحمه بقى يا اما تحطيها على وش الفته وتسقيها تقليه كمان زي الفته

او تحمريها وتحطيها على الوش بس

او تحمريها برضه وتقدميها معاها بره

اي حاجه بس هى تيجى اللحمه

بس خلااااااااااص والف هنا يا كتاكيت واي خدمه

وعلى الله اشوف واحده فيكم استسهلت وما عملتش الشوربه زي ما انا قولت

والله الله الله بقى

لو الشوربه دي تحطي معاها عضمه بنخاعها

وتطلعي النخاع وتحطيه على وش الفته

وتتاكل سخنننننه مووووووت

اؤكد لكم ان الى هياكل طبق الفته ده قدامه 3 ايام على ما يقدر يستوعب ايه الى حصله

ههههههههههههههههههههههههه

كل سنه وانتم طيبين يا حلوين ويارب عيد سعيد عليكم

والى هايعمل الفته بتاعتي وما يجيش يقولي طلعت ايه مش هسامحه طوووووول عمري قلبي ووش رجي غضبانين عليه

طاجن المسقعه

السلاااااااام عليكم

اهلا بكم فى مطبخنا السعيد

اه سعيد فى مانع ؟؟

المهم زي ما انتم شايفين وعنيكم مزغللين على طاجن المسقعه الى فوق ده

عزيزتى نوره الى ما نقدرش ناخرلها امنيه مصراويه ابدا

قالتلها انها سمعت عن المسقعه وعايزه تجربها وها هي المسقعه بشحمها ولحمها وبتنجانها

يلا الى العمل

البتنجان الايام دي فى السوق عادي مش عارفه المفروض يبدأ يختفي بس هو فى السوق وحلو كمان

يلا هو احنا نقدر نستغنى عن البتنجان

طبعا لو قولنا هانعمل كيلو بتنجان مثلا

هايكون حوالي الكميه الى قدامكم دي هانقشره (وفى ناس مش بتقشره مش مشكله ) ونقطعه

انا باقطعه بالطول زي ال في الصوره ده عشان بيقولوا كده بيشرب زيت اقل

بعد كده هانقلي الباذنجان فى زيت طبعا يكون سخن بس اول ما نحط الباذنجان نهدي النار عليه شويه عشان يستوي وفى نفس الوقت ما يتحرقش

ويطلع لونه اصفر وحلو كده بعد ما نخلص الباذنجان وقليته هانحطه على ورق كلينكس عشان يشرب الزيت

والحقيقه انا باعذبه شويه زياده واحطه فى مصفاه ومافيش مانع اكب عليه كوبايتين مايه سخنه بتغلي فينزل اكبر كميه ممكنه من الزيت

ونسيبه يصفى ونروح نعمل شغل تاني

هانجيب بصله ونقطها جوانح (نص دائره او ربع دائره) او حتى نفرمها فى المفرمه زي ما نحب

وندعك البصله بملح وفلفل

وبعدين هانقطع حبة فلفل رومي مكعبات اخضر أو الوان او الاثنين عادي زي الى فى الصوره ده

وكمان حبايتين طماطم ونقطعهم مكعبات

و3 قصوص ثوم مهروس

خلا ص كده جاهزه كل حاجه

نروح على الطاسه الجميله دي ونحط معلقة زيت واول حاجه نحطها البصل ونقلب لحد ما يدبل شويه بس

وبعدين نحط التوم

ويادوب ثواني تقليب عشان التومه ما تتحرقش ونزود بقى الفلفل وبعدها دقيقتين ونحط الطماطم ونقلب برضه

بعد كده بقى عندنا اختيارات كتيره

فى ناس تحب للمسقعه صلصه تقيله شويه فى الحاله دي هانحط حوالي كوبايتين عصير طماطم على الخليط الى فات ده

وممكن كمان نعمل المسقعه باللحمه المفرومه فنحط لحمه مفرومه برضه قبل ما نحط عصير الطماطم ونقلبها 3 دقايق ونسيبها شويه وبعدين نزود عصير الطماطم

المهم بعد ما نزود عصير الطماطم او الشوربه (مرقه ) او حتى مايه مش مشكله هانسيب الخليط ده يغلي شويه لحد ما يتسبك شويه

وبعد كده بقى نروح على الطاجن الجميل بتاعنا ده ( وممكن نعمله فى صنيه او قالب بايركس مافيش مشكله)

بس الطاجن ده بيبقى له طعم خاص مع الاكل

ونحط بقى شويه من الخلطه بتاعة الطماطم وطبقة بتنجان وبعدين خلطه الطماطم وبعدين باذنجااااان وهكذا لحد ما نخلص الليله كلها ويبقى شكلها كده

بعد كده بقى ندخلها الفرن و نسيبها بس حوالي نص ساعه وهاتطلع زي الطاجن الى فوق الى وشه احمر وشكله يجوع ده

وانا صايمه عيب كده والله

المهم ممكن بقى لو انتى عامله لحمه قطع مستويه جاهزه تحطيها على وش الطاجن قبل ما يدخل الفرن وبتطلع شكلها وطعمها جميل جدا

وممكن كمان يكون عندك عصاج جاهز فتحطيه على وش الطاجن قبل ما يدخل الفرن برضه بيعمل شغل ميه ميه

بس كده عايزين شغل بقى

والبنات المبتدئين عايزه تجارب بقى فى البشر

ههههههههههههههههه

تنظيم الفريزر والثلاجه

النهارده يا حلوين

هانتكلم عن تنظيم فريزر ا لتلاجه

والتنظيم ده موضوع سهل اوي وله فوايد كتير جدا

اولا : تقدري توصلي للحاجه بسهوله

ثانيا : الفريزر بياخد اكتر بكتيييييييير جدا

ثالثا : ما فيش حاجه تتركن لما تبوظ او تبقى منتهية الصلاحيه او تقدم اوي وتبقى مش صحيه

الترتيب بقى ازاي

شايفيين الصوره دي ؟؟

شوفي الاكياس معموله ازاي ؟؟

بتحطي الحاجه فى الكيس تكون لحد نص الكيس بس وبعدين تطبقي الكيس تطويه للجنب كده على مرتين وترصي الحاجه فوق بعضها كده

شايفين الصوره شكلها ازاي

دي اكياس خضار انا الى مجهزاهم فى البيت بسله وجزر وقلقاس

والصف التاني طعميه والىجنبها سبانخ

ان شاء الله هانعمل بوست عن تجهيز الخضار للحفظ فى الفريزر

شوفوا كمان الصوره دي

طبعا الفريزر بيبقى رفين فانا باعمل رف للحاجات الى بتبقى مفركشه شويه او اكياسها كبيره

زي مثلا الفراخ البط ايام ما كان فى بط يا ابو زيد دلوقتي خلاص راح

زي الصوره كده فى اكياس عيش والاصفر ده كيس كنافه بس برضه الواحد يفضل يعمل تباديل وتوافيق كده على اد ما يقدر الحاجه تترص تاخد اقل مكان ممكن

واكياس اللحمه برضه باعملها بنفس الطريقه الاكياس المبططه دي

وده كمان بيخليها لما تيجى تفككيها اسهل بكتير

كمان فى حاجه مهم

شايفين التلاجه فى الرف الى فوق فى فتحتات التبريد حاولي بقدر الامكان ما تقفليهاش باكياس طريه علشان التجميد فى الفريزر يفضل كويس

يعني من الاخر نبطل نربط الكيس ونزقله فى اي ركن فى التلاجه

انا مش باربط الا الاكياس الى بتكون سايله اوي

لبن مثلا صلصه طماطم كده يعنى

وبرضه باملا نص الكيس واقل وافرغ الكيس من الهوا واربطه من فوق خالص واحطه على مكان مسطح فى الفريزر عشان برضه يبقى مبطط ومفرود ما يعمليش ازمه

لوفى حاجات بقى رفيعه او ازايز او برطمانات بلاستك صغيره

باحطها فى باب الفريزر

ده بالنسبه للفريزر

بالنسبه للثلاجه نفسها بقى

دايما دايما ما تحطيش حاجه مكشوفه لانها اولا هاتنشف وتبوظ وثانيا لو لها ريحه هاتخليلك ريحة التلاجه مش تمام

وممكن تغير ريحة الاكل الى في التلاجه

على طول علب لها غطا او حطي الطب نفسه داخل كيس

والفاكهه الى لها ريحه برضه حطيها فى كيس زي الجوافه والموز

وفى حاجه كمان حلوه اوي ممكن تعمليها انك تجيبى قطعة فحم

فحم ايوه من الى بنولع فيه ده وتلفيها فى منديل ورق خفيف عشان بس ما تنزلش اسود فى التلاجه وتحطيها كده فى ركن في التلاجه دي بتمتص الروايح وممتازه فعلا

بس كده يا جودعان

اي خدمه يا بنات المتبدئين

الى عنده اي ملاحظات يقول كده ويفكرني لو نسيت حاجه

كفتة داوود باشا

السلاام عليكم يا حلوين

كيفكم ؟؟ انشاله طيبييييييين ؟؟

النهارده عاملاكم اكله انا باحبها اوي وهى كفتة داوود باشا

حد بقى يسألني ويقولي مين هو داوود باشا

اقولكم والله ما اعرفه ولا عمري شوفته

بس ممكن لو حبيتوا تسموها كفتة صبرني باشا مافيش مشكله

شوفوا بقى انا اول مره كلتها مش فاكره فين عجبتنى ولما جيت اعملها بقى طورتها وغيرتها تماما وعملت بالطريقه الى انا هاقولكم عليها

والى انا باحبها اوي

وطبعا تقدروا انتم كمان تغيريوا وتبدلوا فيها عادي جدا

يلا ندخل على الشغل

الاول لخلطة الكوفته نفسها زي ما انا باعملها برضه تقدروا تغيروا عادي المهم تطلع كوفته

نص كيلو لحمه مفرومه ناعم

بصله مفرومه ناعم

نص كوب فول صويا مطحون ناعم

بيضه

ملح وفلفل وتوابل

بيضه ليه ؟ عشان الفول الصويا بيخليها تطلع طريه شويه مش ماسكه نفسها

طيب بنحطه ليه الفول الصويا ؟؟ كده بقى هههههههههههههه

عشان انا ما باحبش الكوفته تكون لحمه بس كده بتبقى مكتومه شويه مش باعملها لحمه بس الا لو كانت هاتتشوي على فحم

مافيش فول صويا؟؟

نص كوباية برغل وننقعها الاول ربع ساعه

او نص كوباية فريك اخضر (باموت فيه انا فى كل حاجه )

او حتى نص كوباية رز ننقعها ونسيبها تنشف ونطحنها دى بتمسك الكوفته وتخليها جامده ومساميه فى نفس ذات الوقت

فى ناس بتحط بطاطس مسلوقه مش باحبها انا

فى ناس بتحط عيش فينو تنقعيه فى مايه او شوربه اربع دقايق وتعصريه وتخلطيه مع اللحمه

ده بيخليها مش مكتومه وماسكه نفسها فى نفس ذات الوقت

عايزه تعمليها لحمه ساده برضه مش هاتقول لا يعنى انا باقولكم الى انا باعمله

اكتر حاجه باحب احطها على الكوفته الفريك الاخضر عشان اناباموت فى طعمه

واسرع حاجه الفول الصويا المطحون ناعم بيبقى زي الدقيق كده عشان باكبه دوغري ولا نقع ولا حاجه بس لازم احط معاه بيضه عشان بيبقى يخليها طريه زياده لما تستوي البيضه بتخليه يمسك نفسه

طبعا انا باحط البصل فى الكبه يتفرد ووراه الفوق الصويا يتخلط مع البصل ويشرب ميته وبعدين البيضه والملح والفلفل

وبعد كده احط اللحمه بقى تتخلط مع الكل كويس دقايق وبتكون جاهزه خلطة الكوفته

بعد كده نشكلها تبقى كورات زي الصوره دي كده

طبعا هانحط فى الصنيه الاول زيت حوالي معلقتين او ثلاثه ونرص الكوفته زي ما شوفتم كده

بعد كده هانحطها على البوتجاز من فوق او لو كان الفرن عندك شغال حطيها يكون احسن من غير ما تغطيها ولا حاجه

احنا عايزنها تتحمر بس لاننا لسه هانسويها

وبعد ما تتحمر وتنشف هاتطلع كده

انا كنت الاول باقليها فى زيت بعد ما اغطسها فى دقيق لكن كانت بتبقى تقيله اوي وبتاخد دوشه كمان

المهم على ما الكوفته تتحمر نكون عملنا الاتي

نقطع فلفل الوان مكعبات وطماطم زي كده

نقطع بصله جوانح وفص توم صغيره كده ونهرسه

ولما الكوفته تتحمر نحط البصي الاول وبعد دقيقتين نحط التومه

وبعد كده بقى نحط الخضار الى قطعناه الفلف والطماكم على وش الصنيه زي كده

ممكن بقى نعمل طمطمايه فى الخلاط مع شويه مايه ونصبها على الكوفته وممكن نكتفي بنص كوباية مايه

وممكن ندوب معلقة صلصة علب فىنص كوبايه مايه ونصبها عليها

يعنى على حسب ذوقك انا ساعات اعملها من غير عصير طماطم اوصلصه تبقى هاديه كده ولطيفه

المهم هانسيبها على النار فوق لحد ما تغلي وممكن ندخلها الفرن

اون نسيبها على النار فوق لحد ما الخضار يبدا يدبل والمايه الى فى الصنيه تتقل شويه وبعدين ندخلها حتى للشوايه بس وشها يتحمر

مش بتاخد كتير على النار يعنى بالكتير 20 دقيقه بعد ما نضيف الخضار عليها

وبتطلع من الفرن شكلها كده

وطبعا ممكن نقدمها مع مكرونه زي الصوره دي بتبقى اشيك مع الاسباجيتى بس ما كانش عندي مش عايزين اماره بقى



وممكن مع ارز ابيض وممكه مع خبز
زي ما تحبوا

بالنسبه للاكل الدايت الطبخه دي حلوه اوي اربع خمس كوفتات مع نص رغيف سن او 3 معالق رز او اربع معالق مكرونه

وطبق سلطه تبقى فله جدا

بالنسبه للمبتدئين مافيش اكتر من كده تفاصيل يا بنات عايزين شغل

وبالنوسبه للعاملات الغلابه والمغتربين العزاب مافيش اسهل ولا اسرع من كده خصوصا لو جهزتوها من على بيات وبس على التسويه

واخيرا بقى لو ولادك رخمه زي ولادي ويقعدوا ينقوا الخضار الى حوالين الكوفته يرموه

ممكن تعملي الخضار مع البصل وكل كله فى الكبه وتحطيه مفروم هايبقى يعمل صوص بقى مش قطع خضار

بيبقى حلو اووووووي برضه


والف هنا والى يجرب يقووووووولي

طاجن الباميا باللحمه الضاني

السلام عليكم يا مطبخيينا الاعزاء

بعون الله تعالى وفضله هانفتتح النهارده سلسلة مطبخ المبتدئين الى هانطبخ فيها طبخات عاديه وسهله ان شاء الله ونراعي فيها ان الناس الى بتقرا يادوب بيعرفوا يعملوا شاي

سواء بنات صغنين او كبار بس شلت او رجاله يا عينى عذاب وغلابه وقاعدين من غير جواز زي الشبابيك الى من غير ازاز

وعموما انا كل البوستات بعد كده هراعي فيها الناس الغلابه دول وافصل شويه فى الكلام

هانبدأ النهارده نعمل اكله عتيقه من المطبخ المصري العظيم الشأن الى ماكلنا ومبوظلنا الدايت

هانعمل طاجن باميا باللحمه الضاني

سامعه حد بيقول يعععع ضاني مش باحبها

احب اقولك ياعمنا ما تبقاش تاكل انت اللحمه الا ان انا اكتشفت ان اللحمه الضاني دي موجوده عشان نعمل بها الباميا

والباميا برضه موجوده عشان تنطبخ مع اللحمه الضاني فقد خلقوا لبعضهم الاثنين الحلوين دول .

بجد الباميا باللحمه الضاني شكل تاني يا جودعان

ندخل على المطبخ وكفايه رغي

هانعمل نص كيلو باميا وده هايكون كافي لحوالي 3 اشخاص

وهانحتاج معاه واحد بصله متوسطه

اثنين فص توم

واحد قرن فلفل اخضر (يفضل يكون حامي او قرن شطيطه يعنى ) مش عايزين حامي عادي تمشي

نص كيلو طماطم

او يعنى اربعه أو خمس حبات

وطبعا لحمه ضاني برضه نقول نص كيلو

ابو زيد بلاش انت لحمه روح للجزار هات منه حته ليه كفايه عليك

ههههههههههههههه

الطريقه

هانفرم البصل والتوم

ونجهز الحله الى هانشتغل فيها تكون ناشفه

ولما تسخن نحط فيها نص معلقة سمنه

او ممكن لو عندنا ليَه بتاعة اللحمه الضاني نقطعها حتت صغيره ونحطها على طول فى الحله السخنه وهى بتسيح لو قلبناها دقيقتين

ونحط البصل اولا ونقلبه لمدة 3 دقايق يادوب يدبل وبعدين نضيف التوم المفروم برضه ونقلب دقيقتين

وبعدين الفلفل ونقلب كمان 3 دقايق لحد ما البصل يصفر

ونكون عملنا الطماطم فى الخلاط (هانقطعها اربعه ونحط معاها ربع كباية مايه فى الخلاط ونضربها )

ونطشها بقى مع البصله ونشهق واحنا بنطشها

هههههههههههههههههه

ونغطي عليها ونسيبها تغلي ولما تغلي نوطي عليها النار ونحط لها الملح زي ما نحب ونسيبها بتاع نص ساعه

الباميا بقى فى النص ساعه دي نجهزها

هانحط مايه تغلي على النار

وعلى ما تغلي نكون قمعنا الباميه

الى هو نشيل الحته فوق فى الباميه ونشك واحده الباميه شكه واحده بالسكينه من الجنب عشان تستوي من جوه

وطبعا ما نشيلش نص قرن الباميا واحنا بنشيل راسه من فوق

ونغسلها وبعدين نسقطها فى المايه الى غليت خلاص

ونسيبها على النار بالكتير ربع ساعه اول ما تبدأ تلين كده فى ايدينا

وبعدين نقلبها فى مصفاه فى الحوض ونصفيها من المايه اللزجه دي وانا باحب كمان اغسلها باسيب عليها شويه مايه خفيف كده

وبعدين كده تكون الطماطم اتسبكت نقوم مزودينها شوربه اللحمه الضاني

ابو زيد انت حطيت ليَه خلاص حط مايه انت بلاش شوربه (زعلان انت من اللحمه )

وبعدين نسقط الباميا بقى فى التقليه نسيبها لحد ما تغلي وبعدين نصبها بقى فى الطاجن ونرص اللحمه على وش الطاجن وندخلها الفرن لمدة ثلث ساعه تقريبا لحد ما تتشرب الصلصه ووش الطاجن يحمر

ممكن نسيبها تغلي على البوتجاز فوق ربع ساعه بس نوطي عليها عشان ما تلزقش

وبعدين نصبها فى الطاجن ونحط على وشها اللحمه ونولع لها الشوايه بقى خمس دقايق بس عشان وشها يحمر

وبتطلع من الفرن تزغرد وتقول كولوووووووووني بقى

طبعا هاتقولولي فين الطاجن يا نصابه انتى عاملاها فى قالب بايركس

هاقولكم والله يا جودعان الطواجن بتاعتي كانت طالعه دليفري لبن رايب يومها فقلت القالب بقى ما يقولش لا

دي الطريقه التقليديه لطاجن الباميا باللحمه الضاني

نيجى بقى للغلابه بتوع الدايت مش هانحرمهم من حاجه بتيتا

اي خدمه

انا كنت على فكره مش باكل الباميا فى الدايت على اساس انها لازم نعملها تقليه وفيها سمنه وكده يعنى

انما مره من ذات المرارير رضا فقعنى بمبه زين الزين وقالي هاجيبلك سمك وانا جاي وبعدين كلمته الساعه 3 فين يا بوي السمك قال اخخخخخخخخخخخخ نسييييت

جريت على التلاجه عشان كان بابا هايتغدى معانا مش طالبه تهزيء

كان عندي لحمه ضاني مشوحاها وقلت اسيبها لبكره طبعا جري كملت طبيخها

وطلعت الباميا من الفريزر (انا باجيبها واقمعها واسلقها واعينها فى اكياس فى التلاجه تبقى جاهزه على الطبيخ على طول )

وكذلك الطماطم دايما عندي صلصة طماطم مركزه جاهزه فى الفريزر برضه على طبيخ على طول (هانعمل بوست ان شاء الله عن حفظ الخضار فى التلاجه )

قووووووووم طلعت كيس الباميا وكيس الطماطم

وفى الكبه حطيت البصله والتومه والفلفل واخبط فى الكبه

وحطيت كله على بعضه وعليه الشوربه بتاعة اللحمه الضاني

وخلاص نصف ساعه كان الاكل جاهز

كانت تحفففففففه واتمسحت وطبعا انا كلت منها لان مافيهاش سمنه ولا ليه واللحمه الضاني كانت يومها موزه مافيش فيها دهن

بث كده

الى عنده سؤال يجوووووووووووولي يا بوي

والى يجرب يقولي كالعاده