الأحد، 23 أغسطس 2009

كبدة الدجاج على طريقة جدتي


كل سنه وانتم طيبين يا حلوين
واول يوم اكتب فى رمضان وادعولي اعرف اكتب بعد كده
النهادره هانعمل حاجه خفيفه كده سريعه تنفع جنب الاكل خصوصا فى رمضان
احيانا باكون عامله اكل ناشف وعايزه جمبه نوع شوربه خصوصا فى الصيام
والشوربه دي كانت جدتى الله يرحمها الى معلمهالي وكانت بتعملها حلوووه اوي
انا باعملها زيها لكن برضه مش باحس انها زي بتاعة تيته
الله يرحمها يارب ويقابلنا فيها فى الجنه ان شاء الله
انا باحب اعمل الشوربه دي بالكبده وخصوصا كبدة الدجاج
لكن ممكن تتعمل طبعا بكبدة البقر او حتى تتعمل بلحمه مقطعه صغير اوي
او قلب برضه يمشي
انا هنا جبت كبد وقوانص الفراخ ونضفتهم كويس طبعا وبعدين فى حله تحطي معلقة سمنه ولما تسخن تحطي الكبده وتقلبيها وتحطي عليها فلفل اسمر ومستكه واي بهارات تحبيها للحوم عموما وممكن عصير بصل او حتى بصل مفروم
وتغطي عليها وتسبيها لحد ما تنزل مايتها وتبدأ مايتها تنشف وممكن نزودها نص كوباية مايه تستوي فيها ويبقى شكلها كده


معلش الصور مش حلوه اصل البرنامج الى بيظبط الصور عندي مش شغال على نبقى نشوف غيره
المهم لما تبدأ تستوي الكبده نبدا احنا نجهز الشوربه بقى
هانجيب حله ونحطها على النار ونحط فيها معلقتين سمن بلدي ولما تسخن نحط معلقتين دقيق ونحمرهم كويس لحد ما يبقى لونهم بنى فاتح زي كده

ولما يبقى لونه كده نحط عليه شوربه سخنه شويه شويه حوالي لتر شوربه ولو مافيش شوربه نحط مايه حتى عادي

ولما نقلبها كويس وما يبقاش فيها كرات دقيق ولا حاجه نزود عليها الكبده بالصوص الى نازل منها بكله كله ونقلب كويس
ونسيبها تغلي دقيقتين ثلاثه كده وطبعا نظبط ملحها وبس كده تبقى جاهزه
ساعة التقديم ممكن نزود عليها شويه كريمه لباني ونقلبها لكن انا مش باحب احط حاجه فى حليب مع الكبده واللحمه عشان الكالسيوم بيمنع امتصاص الجسم من امتصاص الحديد
وممكن نحط على الوش شوية بقدونس وبالهنا والشفا
وطبعا الى يجرب يقولي
والمناسبه السعيده دي ان احنا فى رمضان يعنى
الى عايز اي صنف يقوله وانا اعمله ان شاء الله لو كان هاينفع

هناك 6 تعليقات:

غير معرف يقول...

شوربة جديدة وغريبة عليي

تسلم ايدك ياحبيبتي

رمضان كريم عليكي

وربنا يديكي الصحة

نكهة مغربية يقول...

أهلا يا قمر
حبيبتي شوربتك دي باين انها لديدة موت
أنا أول مرة أشوف شوربة بالكبد و القناصي كده
بس باين أنها تحفة شكرا جداااا على الحجات الحلوة دي
مممووووححح

صبرني يارب يقول...

نواره

جربيها بس يا جميل هاتعجبك ان شاء الله انا بحبها اوووي


كل سنه وانتى طيبه

صبرني يارب يقول...

نكهه

تسلمي يا جميل جربيها بس وقوليل عملتي ايه

منوره

مي يقول...

تسلم ايديكى يا قمر اول مرة اسمع بيها بس اجربها ان شاء الله
تحياتى

صبرني يارب يقول...

مي

تسلمى يارب ونورتي يا جميل