الثلاثاء، 18 أغسطس 2009

التشيز كيك



عدنا عدنا عدنا


حبيبى مطبخي الالكتروني الى وحشني جدا جدا جدا


والله يا جماعه غصب عني الايام دي انا مشغووووووووووله وهحاول جاهده انى استمر معاكم فى رمضان بس طبعا المطبخ الواقعي بيمسح الوقت معايا فى رمضان كل سنه وانتم طيبين


ويارب يكون رمضان كريم ومبارك عليكم وعلى اسركم جميعا وعلى المسلمين والعالم كله


هيا سريعا الى العمل بقى عشان المطبخ الواقعي ينادينى


اولا الصنف بتاع النهارده ولا فخر الانسه مريم والانسه رحمه هما الى جابوا المقادير من موقع زمرده كوكب للبنات فقط يا اخواتي عليهم


واصروا ينفذوه وعملناه سوا مع بعض التعديلات


المهم



المقادير :


هانحتاج بسكوت ساده حوالي عشرين بسكوته مثلا مفرومين (وممكن كمان بواقي كيك عندك تحمصيها فى الفرن وتفركيها او تفرميها )


3 معالق زبده (مش جامده يعنى فى درجة حرارة الغرفه )



وللحشو


وهانحتاج عشر قطع جبنه مثلثات او اي جبنه تانيه ناعمه كريم تشيز او اي حاجه شبه كده


كمان كيس كريم شانتيه


معلقتين كبار جيلاتين بودر او علبة جيلى بنكهه مناسبه لو كنا هانعمل التشيز كيك باي نوع فاكهه



أنا بقى احيانا مش بالاقي بسكوت ساده زي ما حصل كده فى اليوم ده

فبعمل انا عجينه فى البيت واسويها زي عجينة التارت كده شويه


الى هى ايه


كوباية دقيق عليها 3 معالق كبار زبده ونفركهم مع الدقيق كويس زي ما رحمه بتعمل كده




بعد كده اعجنها بنص كوباية حليب احط شويه شويه على اد ما تاخد يادوب الم العجينه وتبقى شكلها كده

كده بتطلع حلوه بس انا احيانا احب ازود كمان معلقة بكنج بودر علي الدقيق عشان تطلع مفروله زي البسكوت الى المفروض بنستعمله فى التشيز كيك



باخد العجينه وافردها فى قالب على اي شكل انا احبه وليكن القالب التقليدى للتشيز كيك زي الى مريم بتفرد فيه العجين ده




بعد كده بنظبطه ونساوي الحواف بالسكينه وبيبقى شكله كده




بعد كده بنغطي العجينه بالورق الفويل ونحط فوقيها حاجه تقيله ممكن شويه فاصوليا ناشفه او لوبيا ناشفه او لو عندك طاجن فخار اصغر من القالب بتاعك بهمسه كده ينفع برضه

المهم حاجه تمسك العجين ما يسيحش وينزل على جدران القالب وتفضل مرفوعه ونخبزها لحد ما تستوي وتاخد لون اصفر فاتح


وبنطلعها ونسيبها تبرد ونطلعها من القالب بتاعها لو حبينا


وميزه البسكوت الى بتعمليه فى البيت ده انه بيبقى ماسك نفسه مش زي القاعده الى بتعمليها من بسكوت مفرفرت وكده يعنى

وانا عن نفسي باحبه اكتر



ونيجى بقى للحشوه بتاعة التشيز كيك


احنا ممكن نعمل الحشوه بنكهات كتير اوي


ممكن بالفراوله وممكن بالمانجه وممكن بالشيكولاته وممكن باي حاجه تحبوا عادي جدا


انا النهارده عملته بالشيكولاته الى ولادي عندهم استعداد يستحموا فيها كل يوم 3 مرات


امعانا فى زيادة الشيكولاته فى الطبق انا دهنت طبقة البسكوت بصوص الشيكولاته زي ما انتم شايفين كده






تعالوا بقى نعمل الخلطه لحشو التشيز كيك


احنا قلنا هنحتاج حوالي 10 قطع جبنه مثلثات او ما يساويهم من اي جبنه كريميه الطعم والملمس


ويكون عندنا كوباية كريم شانتيه جاهزه


وكمان كوباية جيلى جاهز بنكهه مناسبه


لو عاملاها شيكولاته زيي كده انا بادوب معلقتين الجيلاتين الى انا قلت عليها فوق فى كوباية حليب سخن واسيبه لما يبرد شويه ويكون جاهز للوصفه دي


هانحط كل ده على بعضه ونضربه بالمضرب كويس اوي لما يبقى عامل زي الكريمه قدامنا كده

انا بافضل اعمل الحشو دي بدري واسيبها فى التلاجه ساعه قبل ما استخدمها فى التشيز كيك عشان تبقى ماسكه نفسها





بعد كده بافردها على قاعدة البسكوت الى عملناها سوا واغطيها بصوص الشيكولاته لو كنت عاملاها بالشيكولاته


او فراوله او مانجه او اي نكهه تانيه بتحبيها


وبازينها بكريمة الشيكولاته برررررضه

او كريم شانتيه ابيض لو حبيتى


وبيكون ده شكلها




والف هنا لكم


وحقيقى كانت طالعه حلوه اوي من ادين بناتي الحلوين الى قعدت بعدها ساعتين انضف فى المطبخ بعد الى عملوووووووه فيا


قصدي معايا



جربوا وقولووووووولي


وكل سنه وانتم طيبين






هناك 7 تعليقات:

نكهة مغربية يقول...

ألله ألله أول تعليق للحبايب أهو هههههههههههه
و الله وحشاني و حشانا كلنا كده بقى مدة تغيبي عننا
لا يا عسل لازم تكوني معانا في رمضان مفيش أعدار
نجي بقا للجد شكل التشيز كيك تحفة و خصوصا و هو طالع من ايد رحمة و مريم الله يخليهم ليكي و يفرحك بيهم يا رب

مممممووووحححح عليكي و على البنات الحلوين

صبرني يارب يقول...

نكهه مغربيه

يا حياتي والله انتى الى وحشاني

والله غصب عني الغياب يا جميل

وان شاء الله فى رمضان ربنا ييسر

وتسلمى يارب وربنا يكرمك ونورتي

فاتيما يقول...

ما شاء الله عليكى يا صبرنى
عاجبنى قوى إنك بتحبببى البنات فى الطبيخ
انا كمان كنت غاوية اتفرج على ماما
و انا قدهم
بس مش عارفة ليه طلعت ف الآخر من الحريم الشلت كدا
يمكن سدة النفس هيا السبب
و الكسل كمان
الكيكة تحفة و مشجعة الواحد يعملها
هجرب و ابقى اقولك
رمضان كريم عليكى يا حبيبتى إنتى و القمرات و أبوهم

صبرني يارب يقول...

فاتيما

اه والله انا باحاول اخليهم يشتغلوا معايا

بس بيجننووووووووني

وافضل اقول صبرني يارب
ههههههههههه


كل سنه وانتى طيبه يا جميل جربي يلا وقوليلى

دموع القمر يقول...

ماشاء الله عليكى

اكيد هجربها

ان طلعت حلوة واتظبطت يبقى تسلم اديكى

وان بقى طلعت مايعلم بيها اللا ربنا يبقى ايييييييييه
تسلم اديكى برضوووو هههههههههه

اصل الحاجات دى بتتنظر هههههه

مبسوطة انى زرت مدونتك الجميلة دى
يارب كدا تعلمينا كمان وكمان

صبرني يارب يقول...

دموع القمر

لا لا لا ماليش دعوه ياعم انا باجيب الصور اهو اثبااااات على ان الحاجه طالعه ميه ميه يا باشا

ومستعده اجيب لكم الى اكلوا الاكل ده يشهدوا انه كان حلو
ههههههههههههههههههه

لو طلعت مش حلوه بقى تاكليها انتى لواحده جزاءا ليكى
هههههههههههههه

وانا سعيده بزيارتك والله ونورتي يا جميل

المحبة في الله ندى يقول...

انا فعلا بموت في التشيز كيك هاجربها بالعجينة دي ان شاء الله