الخميس، 30 أكتوبر، 2008

الفراخ بالزبادي


الفراخ بالزبادي


احبائي المطبخيات والمطبخيين برضه عادي

النهارده هانعمل اكله سهله جدا جدا وبتتجهز فى خمس دقايق وتستوي فى نص ساعه

وبتخلص كل البواقي الى في التلاجه احيانا

ههههههههههههههه


المقادير

اولا طبعا فرخه مغسوله كويس ومنقوعه فى ملح ولمون وما الى ذلك ومقطعه زي ما تحبوا وانا عن نفسي باقطعها ل8 قطع عشان تستوي بسرعه

وكمان انا باشيل الجلد عشان تبقى مش سمينه اوي واقدر استعمل الصوص بتاعها من غير قلق


ثانيا : كل الى عندك فى التلاجه ودولاب المطبخ بقى حطيه عليها

هههههههههههههههه

لا شوفي يا ستى


كوباية زبادي ــ بصله صغيره ــ 6 فصوص ثوم كبار ــ توابل زي ما تقولي قولي (حبهان ‘ فلفل اسمر ، قرفه، جنزبيل، خردل ، ورق لوري )

واي توابل لحوم تمشي برضه

ــ وممكن واحده فلفل اخضر ــ ومعلقه مايونيزــ ونص كوب خل ــ وعصير لمونه ــ ومعلقة سكر او عسل ابيض (عشان تحمر فى الفرن ) .



الطريقه

تجيبى الخلاط وتحطي فيه كل الكلام الى فات ده

لاااااااااا الفراخ لا حطي كله ما عادا الفراخ طبعا


وتضربي كل المكونات مع بعضها فى الخلاط

ولو حبيتى لون قوي حطي معلقة صلصة علب وحبذا لو معلقة فابركا او سماق يدي لون احمر

او معلقة كركم يدي لون اصفر


لا اخضر مافيش بقى ما تطمعيش بقى


المهم تصبي الخليط ده كله على الفراخ وهى فى الصنيه وتغطيها بسيلفر وتحطيها فى الفرن

وبعد نص ساعه تقريبا تشيلى الفويل وتسيبها كمان نص ساعه وتابعيها لو نشفت اوي زوديها نص كوباية ميه ولما تستوي وتحمر طلعيها


لو مش عايزه تحطيها فى الفرن ممكن تعمليها على البوتجاز من فوق ولما تغلي توطي عليها لحد ما تستوي وتنشيفها شويه وتقلبيها مرتين ولا حاجه اثناء السوي


بس وترصيها فى طبق التقديم وتصبيها عليها الصوص الى طالع منها

وممكن كمان تصبيها فوق مكرونه وتصبي برضه عليها الصوص بتبقى حلوه اوي

وممكن تشيلى الفراخ وتحطي مكانها خضار مشكله وتشويحه فيه شويه لحد ما يستوي ويتقدم مع الفراخ بيبقى راااائع.

ملحوظه هااااااامه جدا
كل المكونات الى فوق دي ممكن الاستغناء عنها فى الوصفه عااااادي وهاطلع حلوه
لا ما عادا الفراخ طبعا مش هانهرج بقى
هههههههههههههههههههه



وكفايه رغي بقى على فكره
قوموا اطبخوها وقولولي رايكم

هناك 12 تعليقًا:

mony يقول...

الوصفة ديه بتاعة الفراخ اللي ما اتاكليتش بتاعة المرة اللي فاتت


ههههههههههه


انا بهرج طبعا

انا عارفة انك استاذة يا صبرني



ممكن نجرب برضه مايضرش


بس المايونيز اكيد بعد السوا

علشان بيسيح مع النار و يرجع زيت تاني


الا لو كان قصدك بشاميل


عموما تسلم ايدك مسبقا يا ام مريم

صبرني يارب يقول...

ههههههههههههههههههه
لا والله يامنى تقدري تقولي انى بقالي يجي سبع سنين هاريااااااهم من الفراخ دي

وكل ما حد يا كلها عندي يقولي ايه الى على ا لفراخ ده الصوص بيبقى شكله غريب شويه
خصوصا انى باعمله ملون
مره فى عزومه عملت الفراخ لونين اصفر واحمر تصوري كانت حلوه اوي الحركه كأنواع يعنى

والمايونيز يا ستى انا باحطه عادي فى الاول لان اساسا انا باحطه عشان البيض والزيت والحركات الى فيه بتخلي الفراخ تحمر بس بلون وردي كده
وعموما عادي ممكن تطنشي عااااااااادي

تحياتي ليكى يا موني ونورتي

خمسة فضفضة يقول...

السلام عليكم ورحمة الله وبركاته

حلوه اوي يا صبصب
هي دي تطبيق عملي للتدونه اللي فاتت
:))


باعملها زيك وساعات باحط تحتها بطاطس

ساعات كمان مش باحط زبادي وباحط بقيت الحاجات

جربيها بريش بتلو بدل الفراخ بتبقي روعه


سلام يا قمر

صبرني يارب يقول...

فضفضه حبيبتى

اه بمناسبة اننا عملنا زبادي بقى
وانا برضه زي ما قلت فىاخ الكلام ممكن استغنى عن اي مكون

وانا برضه باحط تحتها بطاطس فعلا بتبقىتحفه

وريش البتلو اه طبعا هى اصلا تتبيله تنفع لاي لحوم على فكره عادي

وريش البتلو فى الفريزر سمعاكي
هههههههههههههههه
نورتي يا فضفضه

عمرو يقول...

أنا كتبت المقادير و الطريقه و أديتها للمودام تعملها لنا بكره
بس و الله لو طلعت وحشه حاتشوفى أنا حأعمل أيه
فى المودام طبعا ههههه

صبرني يارب يقول...

أستاذ عمرو

ههههههههههههههههههههههه
لا والله ما تخافش هاطلع حلوه اصلها كمان سهله يعنى

بس لو طلعت وحشه يبقى حضرتك نقلتها غلط
ههههههههههههههههههههههههههههه
تحياتي لحضرتك ونورت

احمد عز يقول...

ليه الخنقه دي طيب المدونه كلها اكل وتجويع و كده والله تعملي اكل تدوقيهولنا
مش تفرجيهولنا
شكلك كده هتخسريني
وربنا ع الظااااااااالم

صبرني يارب يقول...

احمد عز

ايه ده طب اعمل ايه طيب صورته اهو اجيبه حي ازاي
هههههههههههههههه
نورت

Dr . Rosa يقول...

عملتها النهارده
طلعت جميله جدا ما شاء الله
تسلم ايدك بجد
المدونه روعه على فكره

غير معرف يقول...

福~
「朵
語‧,最一件事,就。好,你西...............................................................................................................................-...相互
,以讓>它使...................

ام مريم موسى يقول...

تسلم ايدك ياام مريم انا هعملها كالعاده واقولك رايى بس باين عليها قبل مااجربها انها تحفه

ام مريم موسى يقول...

للاسف انا جربتها بس مانجحتش معايا مع انى كنت ظابطه المقادير ومن ساعتها وانا حزينه ومحبطه على الفرخه اللى رميتها