الأربعاء، 13 مايو، 2009

كفتة داوود باشا





السلاام عليكم يا حلوين

كيفكم ؟؟ انشاله طيبييييييين ؟؟

النهارده عاملاكم اكله انا باحبها اوي وهى كفتة داوود باشا


حد بقى يسألني ويقولي مين هو داوود باشا


اقولكم والله ما اعرفه ولا عمري شوفته

بس ممكن لو حبيتوا تسموها كفتة صبرني باشا مافيش مشكله


شوفوا بقى انا اول مره كلتها مش فاكره فين عجبتنى ولما جيت اعملها بقى طورتها وغيرتها تماما وعملت بالطريقه الى انا هاقولكم عليها

والى انا باحبها اوي


وطبعا تقدروا انتم كمان تغيريوا وتبدلوا فيها عادي جدا


يلا ندخل على الشغل


الاول لخلطة الكوفته نفسها زي ما انا باعملها برضه تقدروا تغيروا عادي المهم تطلع كوفته
نص كيلو لحمه مفرومه ناعم


بصله مفرومه ناعم


نص كوب فول صويا مطحون ناعم


بيضه



ملح وفلفل وتوابل


بيضه ليه ؟ عشان الفول الصويا بيخليها تطلع طريه شويه مش ماسكه نفسها

طيب بنحطه ليه الفول الصويا ؟؟ كده بقى هههههههههههههه

عشان انا ما باحبش الكوفته تكون لحمه بس كده بتبقى مكتومه شويه مش باعملها لحمه بس الا لو كانت هاتتشوي على فحم

مافيش فول صويا؟؟


نص كوباية برغل وننقعها الاول ربع ساعه



او نص كوباية فريك اخضر (باموت فيه انا فى كل حاجه )



او حتى نص كوباية رز ننقعها ونسيبها تنشف ونطحنها دى بتمسك الكوفته وتخليها جامده ومساميه فى نفس ذات الوقت


فى ناس بتحط بطاطس مسلوقه مش باحبها انا



فى ناس بتحط عيش فينو تنقعيه فى مايه او شوربه اربع دقايق وتعصريه وتخلطيه مع اللحمه



ده بيخليها مش مكتومه وماسكه نفسها فى نفس ذات الوقت


عايزه تعمليها لحمه ساده برضه مش هاتقول لا يعنى انا باقولكم الى انا باعمله

اكتر حاجه باحب احطها على الكوفته الفريك الاخضر عشان اناباموت فى طعمه

واسرع حاجه الفول الصويا المطحون ناعم بيبقى زي الدقيق كده عشان باكبه دوغري ولا نقع ولا حاجه بس لازم احط معاه بيضه عشان بيبقى يخليها طريه زياده لما تستوي البيضه بتخليه يمسك نفسه

طبعا انا باحط البصل فى الكبه يتفرد ووراه الفوق الصويا يتخلط مع البصل ويشرب ميته وبعدين البيضه والملح والفلفل


وبعد كده احط اللحمه بقى تتخلط مع الكل كويس دقايق وبتكون جاهزه خلطة الكوفته



بعد كده نشكلها تبقى كورات زي الصوره دي كده

طبعا هانحط فى الصنيه الاول زيت حوالي معلقتين او ثلاثه ونرص الكوفته زي ما شوفتم كده

بعد كده هانحطها على البوتجاز من فوق او لو كان الفرن عندك شغال حطيها يكون احسن من غير ما تغطيها ولا حاجه

احنا عايزنها تتحمر بس لاننا لسه هانسويها
وبعد ما تتحمر وتنشف هاتطلع كده


انا كنت الاول باقليها فى زيت بعد ما اغطسها فى دقيق لكن كانت بتبقى تقيله اوي وبتاخد دوشه كمان


المهم على ما الكوفته تتحمر نكون عملنا الاتي


نقطع فلفل الوان مكعبات وطماطم زي كده

نقطع بصله جوانح وفص توم صغيره كده ونهرسه
ولما الكوفته تتحمر نحط البصي الاول وبعد دقيقتين نحط التومه

وبعد كده بقى نحط الخضار الى قطعناه الفلف والطماكم على وش الصنيه زي كده


ممكن بقى نعمل طمطمايه فى الخلاط مع شويه مايه ونصبها على الكوفته وممكن نكتفي بنص كوباية مايه

وممكن ندوب معلقة صلصة علب فىنص كوبايه مايه ونصبها عليها

يعنى على حسب ذوقك انا ساعات اعملها من غير عصير طماطم اوصلصه تبقى هاديه كده ولطيفه


المهم هانسيبها على النار فوق لحد ما تغلي وممكن ندخلها الفرن


اون نسيبها على النار فوق لحد ما الخضار يبدا يدبل والمايه الى فى الصنيه تتقل شويه وبعدين ندخلها حتى للشوايه بس وشها يتحمر

مش بتاخد كتير على النار يعنى بالكتير 20 دقيقه بعد ما نضيف الخضار عليها

وبتطلع من الفرن شكلها كده





وطبعا ممكن نقدمها مع مكرونه زي الصوره دي بتبقى اشيك مع الاسباجيتى بس ما كانش عندي مش عايزين اماره بقى



وممكن مع ارز ابيض وممكه مع خبز
زي ما تحبوا

بالنسبه للاكل الدايت الطبخه دي حلوه اوي اربع خمس كوفتات مع نص رغيف سن او 3 معالق رز او اربع معالق مكرونه

وطبق سلطه تبقى فله جدا

بالنسبه للمبتدئين مافيش اكتر من كده تفاصيل يا بنات عايزين شغل

وبالنوسبه للعاملات الغلابه والمغتربين العزاب مافيش اسهل ولا اسرع من كده خصوصا لو جهزتوها من على بيات وبس على التسويه

واخيرا بقى لو ولادك رخمه زي ولادي ويقعدوا ينقوا الخضار الى حوالين الكوفته يرموه

ممكن تعملي الخضار مع البصل وكل كله فى الكبه وتحطيه مفروم هايبقى يعمل صوص بقى مش قطع خضار

بيبقى حلو اووووووي برضه


والف هنا والى يجرب يقووووووولي




هناك 17 تعليقًا:

ঔღঔ نـــوارة ঔღঔ يقول...

انا بحب الاكلة دي جداااا

بس بشتري كفتة جاهزة مش بعملها بنفسي وبالنسبة للباقي بعملها زيك تقريبا

واحيانا بعملها بالطحينية بيكون طعمها الذ بكتيررر

على فكرة مفيش الا صورة واحدة الا ظاهرة كدا صح ؟؟

تسلم ايدك ياجميل

صبرني يارب يقول...

معلش يا جماعه عندي مشكله انا فى البلوج

مش عارفه انزل الصور

شويه كده ونشوف الموضوع ايه




نواره ميرسي يا حياتي هاظبط البلوج واجيلكم

خمسة فضفضة يقول...

السلام عليكم ورحمة الله وبركاته

تسلم الايادي يا صبصب

الريحه واصله لحد هنا عندي

هاتي حته هههههههههههههههه


ادعيلي يا صبصب انهارده عامله باميه ربنا يقدرني علي اكلها ههههههههههههههههه

صبرني يارب يقول...

فضفضه

تسلمى يارب

يااااااااارب تاكلي الباميا
هههههههههههههههههه

نورتي يا جميل

لوما كنتيش شوفتي الصور للموضوع تعالى شوفيها يا جميل نزلتها خلاص

اصل كان فى مشكله فى البلوج عندي

نكهة مغربية يقول...

طب قولي لي يا صبرني أنا سألتك المرة لي فاتت في موضوع المحشي و مجوبتنيش بس مش مهم
الكفتة هي اللحمة المفرومة و لا لاء؟؟؟؟؟؟؟؟؟؟

نهارك عسل يا قمورة و الله انا ديما بتسنا الجديد في مدونتك

صبرني يارب يقول...

نكهه مغربيه

يا حياتي انا ما اقدرش ما اجاوبكيش

عنيه حاضر والله صورتلك المحشي خلاص

بس لسه هاكتب الموضوع ده كان موضوع مكتوب عندي جاز


ادينى بس يومين وانا انزله ليكى ان شاء الله بالصور



الكفته يا جميل هى الكبه

اللحمه المفرومه هى الى بنعمل منها الكبه او الكفته

مفهوم كده يا بطه ولا ايه

معلش انا اصلي فى اللغه المغربي خايبه اوي

دعاء يقول...

شكرا على الأكلة الجميلة
شكلها كدة بتبقى أخف من اللي بتبقى بصلصة تقيلة صح؟
بزورك كتير بس أول مرة أعلق بس إن شاء الله تتكرر.
دعاء

نكهة مغربية يقول...

و الله يا روح قلبي أنا لي خيبة أوي أصلي تلخبت هو السؤال كان في موضوع نوارة هي حطت المحشي بالرز و سألتها عن الخلطة اللي فيها كفتة و قالت لي لي دي بتتحشي لحمة مفرومة لو عايزة
و لخبطتني علاشان أنا كنت فاهمة أن الكفتة هي اللحمة المفرومة و سألتها بس الضاهر مشفتش السؤال
و نا تلخبطت و تهيألي اني حطيت السؤال عندك بس هو عند نوارة
أسفة يا حبيبتي انا تلخبطت معلش دنا حووووللللة و عنية صغيرين ههههههههههههه
خد راحتك يا عسل بس متنسيش محشي كروم أصل مش حلاقي ورق عنب و ححشي كروم بس قصدي ملفوف
مووووووووووووووووحححححححح

ELMASRYA - SHAMLOOLA HANEM يقول...

صبرني باشا

شرحك جميل ودقيق

والصنف سريع ولذيذ

بس أنا مافهمتش حكاية فول الصويا دي

يعني بتضيفيه ازاي؟ انتي بتقولي مش بتنقعيه يبقى ازاي بيتضرب في الكبة وهو ناشف؟

أفيدونا أفادكم الله

يسلكوا إيديكي على الشرح المستفيض وفي انتظار موضوع تنظيم الثلاجة

تحياتي

صبرني يارب يقول...

دعاء

وانا باقول فى نور كده بيبقى مستخبي فى المدونه
هههههههههههههه

ايوه طبعا بتبقى اخف من الصلصه العاديه الى هى تقليه وكده

نورتي يا قمر

صبرني يارب يقول...

نكهه مغربيه

ولا يهمك يا قمر انا ونواره واحد

وبالنسبه للمحشي عينى حاضر

بعد الثلاجه بقى

صبرني يارب يقول...

شملوله

بصي يا جميل بالنوسبه للفول الصويا

ده موجود فى السوق على 3 اشكال

الاول حصى زي الفول المدمس كده بالظبط بس صغير ومدور

ده مش باجيبه خالص مش عارفه بيعملوا به ايه


والنوع التاني بيبقى مطحون بس ما تعرفيش بيبقى عباره عن كتل كده كبيره زي الى اتطحن وبعدين لزق فى بعضه

ده بقى لو جبتيه لازم مثلا تاخدي منه كوبايه وعليها نص كوبايه مايه وتنقيه فيها ربع ساعه الاول


النوع الثالث بقى

هو بودره ناعمه خالص
زي الدقيق كده

شبه دقيق الدره اوي

ده مش بيحتاج نقع ولا حاجه
على طول باقلبه على البصله المفرومه وبيشرب ميتها


انا بافضل طبعا النوع الثالث


اي خودعه يا قمر

عاشقه الرومانسيه يقول...

انا هاركب اول قطار
واجى اعيش معاكم
اقامه كاااااامله
(:
جوعتينى
طيب مش تيجى عندى تحلى بقى؟
الحفله ممتده ليوم الجمعه

ابوزيد يقول...

تقريبا كل اللى علق هنا انسات فاضيلات وستات فاضيلات بردو بس انا هنا انا والمودام فى غربه جالنا زهق كده من كل الاكل ومعرفش ليه يمكن عشان احساس اللمه والعيله ولا بطر بعيد عنك ولا ايه بالظبط مع انى فى ناس مش لاقيه تمن العيشه دى يارب اهدى نفسى وفقنى للصلاح وشوفى لنا حل بقى يا جميل حتى لو كيس فوارهههههه ويجعله عامر

صبرني يارب يقول...

ابو زيد

كل الناس بتزهق من الطبيخ والاكل

ده عادي

غيروا بقى وصفات جديده

تصدقوا من طعامكم

مش فلوس بس


وبعدين انا من زهقي من الطبيخ

امبارح مغدياهم فول وطعميه والله

ايووووووه

فول وطعميه وبتنجان مقلي وبطاطس مقليه

اكله تودي فى داهيه من ساعتها عندي عسر هضم
ههههههههههههههههههههه

بس كله بيتى الفول والطعميه صنعة اديا وحياة عنيا


ولسه البطيخ طالع اهو هاناكلهم جبنه وبطيخ

Zeinab يقول...

7agatek tefta7 elnefs wallahy
ana lasah magarabtesh 7agh menhom bas habda2 be elta3meyah we law 3agabet goozy ,ana 7a7,aliky ablah nazerah beta3ty,haaaaaaaaa
gazaky allah kol al7'eer.

صبرني يارب يقول...

زينب مرسي يا حبيبتى متشكره ليكى خالص

بس انا غيرت مكان المدونه

لو عايزه تتابعي الجديد راسلينى على الاميل ده
sbarnyyarab@gmail.com

وانا هابعتلك وصلة المدونه الجديده

بس من فضلك تشرفينى وتقوليلى حضرتك مين