الخميس، 27 أغسطس 2009

كنافه عثمانلي

السلااااااام عليكم
الشغل اهو بقى هايشتغل ونوريكم شغل رمضان
انا قبل كده عملت كنافه بالقشطه للي عايز يدور عليها فى الماضي هايلاقيها
او هابقى اطلع لكم صورتها بره بوصله
المهم خلينا فى الكنافه العثمانلي الى مالهاش حل دي يا اخواتي
الكنافه العثمانلي يلا قدامي على المطبخ يا قوم
الاول هانجيب الكنافه ونفرمها كويس انا عشان تتفرم كويس بابيتها فى الفريزر وبعدين افركها تبقى فله اوي
اول حاجه هانجيب حله ونحط فيها كوباية سمن تقريبا وياريت شوية زيت صغيرين عشان السمنه لو بلدي هاتتحروق مننا
ولما تسخن نحط الكنافه خلينا نقول نص كيلو كنافه تقريبا
ونقلب الكنافه بقى كويس فيها ولو حسينا انها ناشفه شويه نزود شوية سمنه كمان
ونحمرها زي ما بنحمر الشعريه كده مثلا
اهو دي يادوب لما حطينها فى السمنه وقلبناها

ونفضل نقلب على طول عشان تاخد لون واحد ما تبقاش واحده وواحده وتبقى لونها دهبي كده وحلو زي الصوره دي كده


الكنافه دي بتاخد سمنه كتير اوي وانا قلبي مش بيطاوعني ناكل السمنه دي كلها ونتخن يا اخويا واحنا مش ناقصين باميل الحله كده واسيبها ربع ساعه تقريبا تلاقيها صفت شويه سمنه كده لا بأس بيهم على الجنب زي الصوره دي


باصفيه واشيهلم بقى واكمل شغل عادي
هانعمل ايه بقى بعد كده نكون مجهزين الشربات او الشيره او القطر بس يكون شربات تقيل
هاقولكم على حاجه اكتشفتها هى ان الحلوانيه بيستعملوا عسل البطاطس او عسل الجلوكوز وده بيكون تقيل جدا جدا ولونه فاتح اوي ومش مسكر اوي
سالت واحد حلواني قالي انهم بيستعملوه بخلطه مع شربات عادي بالسكر لحد ما يديكى القوام الى انتى محتجاه
المهم احنا هنا هانستعمل شربات او قطر تقيل او سميك هنحتاج للنص كيلو حوالي كوبايتين شربات هانسقي بهم الكنافه ونقلبها كويس
وبعد كده بقى نشوف حاجه نستعملها كقالب هانحط فى قلبها كيس ونحط فيها الكنافه ونضغط كده عليها لحد ما تتشكل على شكل القالب ونقلبها فى طبق وتبقى كده



هانحط عليها بقى من فوق الكاستر او المهلبيه او كرييم باتسيير ونزينها بالفواكهه زي الصوره بتاعتي الى فوق كده انا حاطه اناناس ومانجه
وطبعا ممكن نعملها بقى وحدات بعدد الناس الى هتاكل وتكون وحدات صغيره زي الى فى الصوره دي تكفي فرد واحد
وممكن كمان نعملها قالب كبير زي كده



وبرضه هانضغط عليها لحد ما تبقى قاعده الكنافه جاهزه كده وبعدين نزينها بقى وبيكون شكلها كده




ودي كانت تورتة عيد ميلاد رحمه الى كان عيد ميلادها موافق اول يوم رمضان
فعملنا تورتة بالكنافه عشان تليق على رمضان
انا هنا مستعمله مهلبيه بيضاء وكاستر اصفر ممكن انتم تعملوا اي لون تحبوه عادي وعملته بقمع الكريمه عشان يبقى شكله حلو والفاكهه برضه الانانس والمانجه برضه ممكن تلونوا انتم اكتر
والف هنا ليكم والى يجرب يقولي
وكل سنه وانتم طيبيييييين






هناك 17 تعليقًا:

إنـســـانـة يقول...

انا عندى كنافة وشايلاها فى الفريزر وان شاء الله حعملها بس بالطريقة العادية وححاول - وربنا يستر - احشيها كريمة .. ادعيلي بقا تطلع عدلة

انا بس داخلة اشكرك بجد جدااااااااااا عشان انا فعلا بستفاد منك ولو حتى فى الأفكار

جزاكى الله خيرا بجد وربنا يباركلك فى أولادك وحياتك يارب اللهم آمين

إنـســـانـة يقول...
أزال المؤلف هذا التعليق.
ستيته حسب الله الحمش يقول...

كل سنة ورحمة طيبة ويارب تكبر وتحلو كمان وكمان
الكنافة تحفة
يممممممممممممممممممم
كوباية سمنة ويزيد؟
بيني وبينك الكنافة بكل انواعها بتاخد سمنة غير طبيعية
بس حلوة برضه
امال ها نخس امتى يا اوختشي؟؟؟؟؟؟؟
عاااااااااااااااااااااااااا

مي يقول...

كل سنة ورحمة طيبة وعقبال ما تفرحى بيها وتعملى لها تورتة نجاحها وفرحها يارب
تسلم ايديكى يا جميلة بجد جميلة وشكلها حلو اوى
هجربها واقولك يا حبييتى
اموووووواه لرحمة

ঔღঔ نـــوارة ঔღঔ يقول...

يمممممممممممم

خطيررررررررة يا قمر

تسلم ايدك كتير سهلة

رمضان كريم

شمس النهار يقول...

صبررررني
انا فاشله فشل زريع في موضوع الكنافه ده
بس هجرب اللي انت عملاه ده ولو قام انقلاب في اليت انت حره

بس نفرمها ازاي مش بنقطعها بالسكينه والا ايه

المهم هجرب ورزقي علي الله
بس مش دلوقتي لما اخف وادخل المطبخ
اديني عماله الم في وصفات

شمس النهار يقول...

صحيح
كل سنه ورحمه طيبه وبخير وسعاده
وتشوفيها في اعلي المناصب وعروسه جميله كمان

أحــوال الهـوي يقول...

تسلم ايديك
وصبرنا يارب نكمل اليوم صيام بعد الكنافه الرهيبه دي

تسلم ايديك فعلا لان شرحك خللي ريحة المدونه طالعة

كل سنه و انت طيبه
يا شيف صبرني

تحياتي

أحــوال الهـوي يقول...

كل سنة و رحمة طيبه و عيد ميلادها كمان في شهر الرحمة و المغفرة

تحياتي

صبرني يارب يقول...

انسانه

الله يكرمك ويخريكى يا انسانه

ومتشكره انا ليكى لكلامك الذوق ده

وبصي هاطلع لكم وصلات على الجنب بصور الحلويات الى تنفع فى رمضان وان شاء الله على اد ما اقدر هانزل اصناف حلويات رمضانيه ان شاء الله

نورتي

صبرني يارب يقول...

ستيته

يا ستيته لا لا بصي لما تفكري فى الكنافه ما تفكريش خالص فى الخسسان فكري فى حاجه تانيه خالص فكري مثل ان الفيل عمره ما بيخس فما نتعبش نفسنا بقى
ههههههههههههههههه

نورتي يا جميل

صبرني يارب يقول...

شموووووسه

لا لا اوعى تقولي اجي انا اعملها والله

او ابعتلك انا الكنافه يا باشا جاهزه والله

ودي سهله ما تقلقيش

وبالنسبه لفرم الكنافه اه ممكن تقطعيها بالسكينه

بس انا باجيب الكنافه الشعر الناعمه اوي واحطها فى الفريزر لحد ما تتجمد واطلعها افركها بايدي كده فتتفتت خالص وبتكون ناعمه جدا زي الى فى الصوره دي

وحشااااااني يا جميل مالك سلامتك


وكل سنه وانتى طيبه وبخير يارب

صبرني يارب يقول...

احوال الهوى

تسلم يارب ايه رايك فى الريحه والله سمنه بلدي اصلي اصلي اصلي
ههههههههههههه

كل سنه وحضرتك طيب وبخير وسلام يارب نورت

صبرني يارب يقول...

مي

وانتى طيبه يارب مستنيه النتيجه بقى تقوليلي حصل ايه

صبرني يارب يقول...

نواره

تسلمى وتعيشي يارب

الله اكرم

nody يقول...

كل سنه وانتى طيبه
وتعيشى وتبدعى فى المطبخ

بس انا شفت فى التلفزيون ماقلوش الكنافه فى النار كده
هو حط عليه كام معلقه سمنه
ودخلها الفرن احمرت
مش كده احسن علشان الكنافه ما تشربش سمنه كتير

صبرني يارب يقول...

نودي

ايه وينفع كده برضه انا عملتها كده مره
بس شبكت فى بعضها وقرفتنى كان لازم كل شويه اطلعها من الفرن اقلبها تبقى هي هي بقى

نورتي يا جميل