الأحد، 7 يونيو، 2009

الكيـــــــــــك





السلام عليكم



وبعد كام يوم من البهدله العامه اخيرا هانزل بوست يا قوم


اليكم الكيك باسهل طريقه ممكن تعملي بها الكيك ويطلع تحفه ان شاء الله



طبعا انا معلش الصور لماها من كل حته شويه يارب تكون معقوله


انا هاعمل كيك بس كده ساده وبعد كده هانعمل عليه ادخالات بقى ومواضيع كتير


دي الطريقه الاساسيه للكيك بالنوسبه ليا يعنى




انا عارفه ان فى طرق كتير وحاجات كتير اوي بس زي ما بيقولوا كل شيخ وله طريقته



هيا بنا نعمل



المقاديــــــــــــــــــــر:

3كوب دقيق ( خاص بالحلويات)

2كوب زيت دره او عباد شمس( يمكن استعمال الزبد او السمن بدلا من الزيت)





2كوب سكر مش لازم مطحون بس يكون ناعم افضل





ملعقه سمن بلدي( للنكهه يعنى) وممكن نص كوباية قشطه بس فلاحي يا معلم وده في حالة استخدام الزيت



3 ملعقه كبيره بكنج بودر ( كيسين )

1كوب زبادي او حليب


6بيضات /فانيلياّّّّّّّّّّّّّّّّّّّّّّّّّّّّّّّ



******************* *******


الطريقــــــه:

اولا : يخفق البيض باضافه الفانيليا ,


وينخل الدقيق ويضاف اليه البكنج بودر



ثانيا: نحضر اناء عميق نضيف السكر + الماده الدهنيه ويخفق بالمضرب الكهربي لمده 3 دقائق تقريبا حتى يصبح متجانس





ثالثا: يضاف اليه البيض المخفوق مع الفانيليا ونعاود الخفق بالمضرب الكهربي لمده 3 دقائق حتى يتجانس مره اخرى ثم يضاف الزبادي او اللبن الحليب ونخفق ايضا حتى يتجانس تماما





رابعا: يضاف الدقيق بالتدريج مع التقليب بالملعقه في اتجاه واحد على طريقة دائره ونصف قطر


( يعنى نعمل دايره ونقطعها بنصف قطر بعدين نشيل المعلقه ونبدأ تاني دايره من نفس المكان والاتجاه ونعمل نص قطر وهكذا)



الى ان يختفي الدقيق ونضع غيره وهكذا حتى ينتهى المقدار



وبيبقى شكل العجين كده زي الصوره دي


وطبعا النكهات بقى براااااااحتكم ممكن نحط شيكولاته انا باحبها تقيله زي كده


يا اما تجيبى كاكاو وتحليه فى مايه او شيكولاته وتسيحها فى حمام مايه سخنه كده يعنى


وممكن تحطي قرفه او نسكافيه بيبقى يجننننننن وممكن جوز هند مع العجين واي نكهه تحبيها ان شاء الله تمشي





وممكن تعملي خليط من نكهتين زي كده مثلا

وبتطلع زي طبق الكيك الى فوق خالص ده



الكميه الى احنا عاملاناها فوق دي تعمل صنيتين متوسطتين



خامسا: نحضر صنيتين متوسطتين ويبطنوا جيدا( بدهنها السمن ثم رش الدقيق عليها) ونصب العجين فيها وندخلها الفرن على درجة حراره 170 مئويه وتنضج بعد حوالي 20 دقيقه



وبتطلع شكلها كده يا حلوين









ما تفتحوش الفرن كل شويه عشان ما تهبطش على الاقل فى اول عشر دقائق ما تفتحهوش خالص






*لمعرفة اذا كانت نضجت من الداخل يمكن غرس سكين جاف فى منتصفها لو طلع نظيف لا يحمل عجين تبقى استوت:d




وبالهنا والشفا يارب


وادعولي بقى لما تجربوها بس مش تبوظوها بقى


بس كده يا حلوين

هناك 11 تعليقًا:

نكهة مغربية يقول...

مممممممممممممممممممممم
ريحة الكيك طالعة جنان
و الله مالي شغلانة غيرك وراكي وراكي
هههههههههههههههه
كيك رائع و سهل جدا غير متعب
ان شاء الله أجرب بس بعد الفراخ طبعا
و الطعمية و الكشري أه علاشان النضام
ههههههه
موووووووحح و الله الشرح عندك جميل جدا و كأنك بتتكلمي مع حد قدامك
ما شاء الله عليك

دعاء يقول...

بالنسبة ليا الكيك ميبقاش كيك بجد الا اذا كان بالشوكولاتة وبعض الناس مش بيحبوها يبقى فكرة خلط الابيض مع الشوكولاتة هترضى كل الازواق مممممممممم.
بجد انتى فتحتى نفسى اقوم اعمل كيكة

مى يقول...

تسلم ايدك يا حبيبتى ايه الكيكة الحلوة دى هتبوظ الريجيم بس يلا هتتعمل يعنى هتتعمل
انا بعملها وبتطلع حلوة برضه اسمها الكيكة الرخامية
كمان بيبقى شكلها حلو وجديد
تسلم ايديكى يا عسل

نكهة مغربية يقول...

صبرني الجميلة
يا ريت تخشي لمدونتي عندي ليكي
blog award
يا ريت يعجبك

صبرني يارب يقول...

نكهه

يا جميل والله انا باحبك خالص ومستنيه ابداعاتك الجميله

وعنيه اروح البلوج حالا

صبرني يارب يقول...

دعاء

اه يا دعاء فعلا انا باعمله عشان كده

انا هابقى اقولكم على طريقة الرخاميه دي كمان تطلعوا منها اشكال حلوه ازاي

تحياتي

صبرني يارب يقول...

مي

تسلمى يا عسل

ايوه فعلا اسمها الكيكه الرخاميه

نورتي

ابتسامة حزن يقول...

شكلها كده هتكون جميله
انا كتبت المقادير
وان شاء الله هجربها وارد عليكى

ARWA يقول...

السلام عليكم ورحمتة وبركاتة انا كنت بشوف المنتدى بتاعك اول مرة بس عجبنى جدا وقومت عملت الكيك الرخامى طلعت فى منتهى الروعة بس فى مشكلة رائحة البيض ظهرة اوى اعمل اية علشان تروح

صبرني يارب يقول...

ابتسامه حزن

نورتي

صبرني يارب يقول...

اروى

مرسي يا جميل ومتشكره

بس ريحة البيض دي ابقى زودي الفانيليا شويه

اوقات البيض نفسه بيكون زي ما بنقول زفر زياده

زودي الفانيليا وحطي نص معلقة عصير لمون على البيض وانتى بتضربيه

وبالهنا يا جميل