الأحد، 21 ديسمبر، 2008

المايونيز

النهارده يا بنات هانعمل حاجه مهمه اوي وحلوه اوي
وهي المايونيز
المايونيز داخل في سلطات كتيره ا وي واغلب الناس بتحبها زي الكولسلو مثلا
وكمان عمايله فى البيت أمن بكتير لان بيدخل فى صناعته البيض وطبعا ده كان مشكله فى ايام الانفلوزا والكلام ده
وكمان اوفر برضه كتير لان البرطمان دلوقتي بقى ب 11 جنيه ويادوب لحستين ويخلص يعنى هههههههههههههههه
المهم يلا نبدأ شغل ورايا على  المطبخ
المقادير
بيضيتين
ثلاثة ملاعق خل ابيض او عصير لمونتين
معلقة صغيره مسطرده او خردل مطحون
بشر لمونه  أو فلفل ابيض ولو اسود ما يقولش لا بس هايبقى باين
ملعقتين  صغيرين سكر
نص ملعقه صغيره ملح
كوب ونصف زيت (ذره او زتون او عباد شمس اوخليط منهم )
أنا عن نفسي بافضل زيت الذره
الطريقه 
الاول هانجيب الخلاط ونحط فيه كل المكونات  الى فاتت ما عادا الزيت
بصوا هو فى ناس بتعمله بالصفار بس بس انا جربته بالبياض اشتغل ما قالش لا 
تحطوا البيض والخل والملح والسكر وبشر اللمون والخردل على بعض فى الخلاط
وتضربوه كويس لحد ما يتخلط يبقى تمام
وبعدين نجيب الزيت ونحطه فى حاجه ينفع نصب منها خيط رفيع للخلاط 
زي الشكل الى فى الصوره دي كده
على فكره طلع عينى على ما عرفت اصور الصوره دي عشان كنت لوحدي وباعمل وماسكه الموبايل فى نفس ذات الوقت احمدوا ربنا بقى ومش عايزه حد يقولي مش واضحه
المهم نفضل نحط الزيت تدريجيا جدااااااا خيط رفيع اوي اوي وعلى مهلنا اووووووي
لحد ما يبدأ الخليط كله يبقى سميك شويه ولونه فاتح زي  الى فى الصوره دي بالظبط 
الصوره دي من جوه الخلاط يعنى عشان تبقوا فاهمين الصوره ولو مش واضحه اعملوا مش واخدين بالكم
وبعد ما نخلص مقدار الزيت كله يبقى كده المايونيز جاهز 
هايبقى دافي علشان الخفق بيرفع درجة الحراره 
بنشيله بقى ونحطه فى علبه  مقفوله فى التلاجه لمده ساعه على ما يبرد يعنى قبل التقديم 
وبيكون شكله زي الصوره الى فوق دي بالظبط ان شاء الله
وداليا بنت الغربه تعملي المايونيز وتحطيه فى التلاجه وتجيبى كرنب وجزر وتستنينى
بكره ان شاء الله نقول الكول سلو

هناك 8 تعليقات:

حاجات جوايا يقول...

تسلم ايدك يا جميل
انا بدخل مدونتك ومدونة مدام سلامونى بجوع وابقى عايزة اجيب عيش واغمس بالصور ههههههههههههه
حرام عليكوووا
احلى حاجة اننا مش فى رمضان
ههههههههه

هجرب ان شاء الله واعرفك يا جميل

وبالهنا والشفا

خمسة فضفضة يقول...

السلام عليكم ورحمة الله وبركاته

تسلم اديك يا صب صب

حلو لمايونيز باين في الصوره بس اول مره اعرف انه بيتحط عليه بشر ليمون او فلفل ، انت بتحطهم عشان ريحة البيض يعني ولا ايه
بس وعه ايه المايونيز ابو 11 جنيه ده

انا بجيب هاينز ب 7 او 7 ونص مش فاكره اصلي فين وفين علي ما اشتريهلان استهلاكنه فيه بسيط جدا عشان كده مش باعمله في البيت
بس عموما تسلم اديك يا قمر

صبرني يارب يقول...

حاجات جوايا

لا انا فى رمضان هاعذبكوا على الاخر ههههههههههههههههههه

تحياتي ليكى يا جميل ومستنيه تجربتك

صبرني يارب يقول...

خمسه فضفضه

اه طبعا يا جميل عشان ريحة البيض لو بتحبيها بلاش لمون ههههههههههههه


وبعدين السعر ده انا والله سمعته من اختي انما انا مش باشتريه بتيتا بقالي بتاع سنتين كده من يوم ما بدات اعمله فى البيت

يمكن البت دي بتأفلم عليا عشان تصعب عليا واعملها ؟؟
لا مش هاعملها برضه ههههههههههههههههههههه

نورتي يا جميل

خمسة فضفضة يقول...

السلام عليكم ورحمة الله وبركاته

خدي بالك يا صب صب ان اصلا الخل بيضيع ريحة البيض

دا حتي في ناس بتحط نقطتين خل علي البيض لما يجوا يعملوا حلويات عشان الريحه

صبرني يارب يقول...

فضفضه

طيب ماشي وماله يعنى بشر اللمون

حلو مفيد اوي ههههههههههههههه

غير معرف يقول...

福~
「朵
語‧,最一件事,就。好,你西...............................................................................................................................-...相互
,以讓>它使...................

نوسه يقول...

اكلاتك جميله ماشاءالله يا ست صبرني
انا عملت المايونيز وكان جميل جدا بس مش عارفه ليه طلع لونه اصفر مش ابيض مع انى عملتو زيك تمام
وحاجه كمان كنت عايزه اسالك عليها وهيا الاكلير عملتو بردو ونفش فى الفرن وكان طالعو منفوش وزي الفل ومفيش نص دقيقه وكان متفطس على بعضو
ايه الغلط عندي فى المايونيز والكلير؟ معلش بقا اصل انا لسا على ادي فى عالم الطبخ