الجمعة، 16 يناير، 2009

كريم باتسيير

كريم الباتسيير يا جماعه من الكريمات المهمه اوي والى بنستعملها فى حاجات كتير اوي وخصوصا الحشو سواء حشو الاكلير او الملفي او التورتات كمان
شوفوا هى قريبه من الكاستر اوي يعنى ساعات باطنش واعمل مكانها كاستر انما هى احلى من الكاستر بكتير
المقادير
2 كوب حليب
ربع كوب سكر
4 بيضات
فانيليا
3 ملاعق كبيره دقيق
ممكن نزود معلقه كبيره نشا كمان
الطريقه
اول حاجه نحط على النار الحليب وعليه الفانليا يسخن
بعدين نروح بقى على البيض نضربه كويس اوي بالمضرب ومعاه السكر ونخفق كويس اوي لحد ما يتقل وبعدين نضيف الدقيق
زي كده
بعد كده نروح على الحليب قبل ما يغلي على طول وبعدين نصب عليه الخليط بتاع البيض والسكر والدقيق مره واحده ونقلب جامد اوي اوي
وبعدين نهدي النار اوووووي ونقلب على طول
وبيبقى شكلها كده
وناخد بالنا عشان ما تتحرقش ونفضل نقلب لحد ما تتخن كتير وتبقى شكلها كده





وطبعا ممكن نعملها بالشيكولاته يعنى نحط شيكولاته او كاكاو مع الحليب
وممكن فراوله لو حطينا عليها بعد ما تبرد صوص فراوله هانبقى نعمله مع بعض بعدين
اما الى احنا عاملينها فوق دي بالفانليا بس
وطبعا انا منزلاها عشان هانعمل بها كنااااااافه ان شاء ا لله


‏هناك 4 تعليقات:

حاجات جوايا يقول...

ازيك يا جميل
وحشتنى اطباقك بس منها لله اسرائيل سدت نفسى عن الدنيا كلها م اللى بيحصل فى غزة .. ربنا ينصرهم

جميل الباتسيير بتاعك
انا بعمله بس مش كده

شوفى يا ستى
==========
4 كوب لبن ( كيلو لبن )
4 ملعقة كبيرة لبن بارد
4 م كبيرة دقيق
2 بيضة
8 ملعقة سكر كبيرة
ربع م ص فانيليا

الطريقة
=======
نضع (4 كوب لبن) على النار حتى الغليان
فى اناء اخر نضع البيض والسكر والدقيق واللبن البارد ويضربا معا بقوة حتى تمام التماسك
ثم يضافا الى اللبن المغلى على النار ونقلب جيدا لمنع التكتل ونضيف الفانيليا اثناء التقليب ونستمر فى التقليب مع خفض النار حتى النضج .. ثم يفرغ فى صينية بيركس او استانلس ونستمر فى التقليب لفترة ليبرد بسرعة لاستخدامه فى الحشو

-------------
هى شبه طريقتك شوية بس مش اوى يعنى .. ودى طبعا ضعف الكمية مش زيها


انا بستعمله فى اصابع الجلاش
مستنية الكنافة بقى
متتأخريش عليا

سالى

صبرني يارب يقول...

حاجات جوايا
وانتى كمان وحشاني والله يا جميل

بس الطريقه بتاعتك هيا هيا بتاعتي بس البيض كده يبقى قليل اوي وهتاخد وقت كتير على النار وكمان مش هاتبقى ماسكه نفسها وهاتبقى ناعمه اكتر من اللازم

بس عموما أنا باحب اعملها بيض زياده شويه عشان تنفع فى كل حاجه فى حاجات بتبقى عايزه الكريمه ماسكه نفسها شويه

بس كل الطرق تؤدي الى روما ههههههههههههه

تسلم اديكى يا جميل

Arwa يقول...

تسلم ايديكي والله

انا من زمان ادور طريقتها

الله يعطيك الف عافيه

بس بسألك سؤال هي نفسها الي يحطونها على التارت قبل مايحطون الفواكه ؟

صبرني يارب يقول...

اروى اهلا بيكى

بصي يا اروى هو الباتسيير ده كريمه تنفع حشو وتنفع زواق

وينفع تدخل الفرن وينفع من غير فرن

بالنسبه للتارت هى تنفع معاها الباتسيير طبعا

بس انا هاقولك بقى اخلطي عليها كمان شوية كريم شانتيه واعمليها بالمضرب واحشي بيها التارت
هاتطلع جميله اوي وكمان ممكن تضيفى عليها نكهات

يعنى ممكن بالشيكولاته وترجنشي فوق بالشيكولاته

او بصوص الفراوله بس ما تحطيش كتير عشان ما تخليش الكريمه معسله

المهم زي ما تحبي


فى ناس كمان بتحط مع حشو التارت علبة جيل محلول فى مايه بس الحقيقه انا مش باحب اعمل كده

وطبعا ممكن تحطي الباتسيير العاديه بس قبل الفواكهه برضه عادي جدا


ملحوظه يا اروى انا غيرت مكان المدونه بتاعتي لو حبيتى تتابعي الاصناف الجديده

راسلينى على الميل ده ابعتلك وصله من المدونه الجديده

sbarnyyarb@gmail.com