الاثنين، 3 نوفمبر، 2008

بسبوسه على طريقتى




النهارده هاعملكم بسبوسه بطريقه حلوه اوي هما بيقولوا عليها اردنيه بس انا اكتشفت ان الاردنين مش بيعملوها كده برضه بس قريبه من كده بس ان شاء الله ها تعجبكم وهى سهله جدا جداوهى على فكره بتطلع فى النص كده بين الكيك والبسبوسه
يعنى تقدروا تقولوا انها بسبوسه مكيكه
ههههههههههههههه




المقادير:




كوبايتين دقيق سميد دقيق بسبوسه يعنى + كوبايه دقيق ابيض للحلويات + 2 ملعقه كبيره بكنج بودر + كوب واحد جوز هند

ثلاث بيضات + فانيليا
واحد كوب زيت+ ملعقة سمن بلدي
واحد كوب زبادي او لبن حلين مش مشكله
كوبايتين شربات حلويات مش تقيل اوي


******************************




الطريقه:

يخفق البيض مع الفانيليا اولا ثم يضاف الزبادي او الحليب والزيت


ويخفق الخليط جيدا



ينخل الدقيق الابيض ويضاف اليه السميد والبكنج بودر وجوز الهند (كل المكونات الجافه ) ويخلط جيدا
يضاف خليط الدقيق للخليط الاول على دفعات حتى يختفي الدقيق ويعطى عجينه لينه مثل الكيك



مع التقليب بطريقة دايره ونصف قطر
يعنى نعمل بالمعلقه دايره فى العجين ونقطعها بنص قطر
ونكرر ده بس بنفس الاتجاهات
وده عشان نحافظ على الهوا الى دخل العجين انه مايطلعش تاني


وان كان الخليط غليظ


يمكن اضافه بعض الحليب .



ثم نضع الخليط فى صنيه فرن مقاس متوسط بعد تبطين الصنيه بالسمن والدقيق وتوضع فى فرن درجه حراره متوسطه170




وتترك لمده حوالي 20 دقيقه وحين تنضج وتأخذ اللون الذهبي




نتأكد من انها تامة النضج بغرس سكين نظيفه فى منتصفها فان خرجت بلا عجين تكون البسبوسه ناضجه.




وتسقى بالشربات ويمكن اضافة شربات اكثر حسب الرغبه




ملحوظات :

السميد الى هو دقيق البسبوسه اهم حاجه فى الموضوع لو كان وحش هايبوظ الدنيا كلها
لان فى منه مغشوش كتير الايام دي فى السوق بيزودوه عيش مطحون وبلاوي كده
لان دقيق البسبوسه الى هو فى الاصل جنين القمح من اغلى انواع الدقيق
الغش فيه شغال جدا جدا لو ما بتعرفيش فيه بقى يبقى اشتري عبوات مقفوله من السوبر ماركت وتكون ياريت بعلامه مشهوره او على الاقل ما تجبيش ارخص


المقدار ده يعمل صنيه كبيره
بس بتكون طخينه شويه زي الكيك كده
انما لو حبيتيها تطلع رقيقه شويه اعمليها على صنيتين صغيرين احسن
تطلع زي الى في الصوره كده




والى فيكم هايجرب وياكلها من سكات هاعررررررفه

الى يجرب يجى يقولي عمل ايييييييييه


طبعا الصوره الى فوق دي انا لطشاها من على النت لكن هى بتبقى شكلها كده
يااااااارب رضا يصلحلي الكاميرا بقى




هناك 29 تعليقًا:

خمسة فضفضة يقول...

السلام عليكم ورحمة الله وبركاته


شوفي يا صبصب يا بنتي البسوبوسه دي عقدة حياتي وجربت معاها كافة الطرق واشكال وانواع البسبوسات اللي في السوق لحد دقيق السميد اللي عند الحلواني

يا اما تطلع مكيكة زي ما انت بتقولي كده يا تطلع ميه ميه ولا اكنك جايباها من اجدع حلواني بس ما ترضاش تطلع من الصينية وبالتالي ناكلها بالمعلقه :)))))))

عشان كده اما يهفنا الشوق اوي للبسبوسه بنشتريها جاهزه


سلام يا قمر

صبرني يارب يقول...

بصي يا فضفضه
حكاية الدقيق دي مهمه اوي
انا ياما خدت فيها مقاااالب زي الفل
لحد ما دلوقتي عرفت افرق بين الدقيق المغشوش من الى مش مغشوش وساعات باتسك برضه عادي
هههههههههههههههههههههههه
اناحتى كنت ناسيه التنبيه بتاع الدقيق ده
زودته لما افتكرت من كلامك
ابقي بصي عليه

وجربي بس الطريقه دي وهاتدعيلى

biberss222 يقول...

ماشاء الله كمان استاذه طبيخ و حلويات كمان
بس مشكله مش فاهمها
ايه دايره و نصف قطر
لخبطينا يا شيخه
يعنى اجيب برجل ومنقله؟؟؟؟
ولا دي بسبوسه للمهندسين فقط
ده حتى شكلها فالصوره مربعات
يعنى نجيب مسطره و نقيس بالسنتى عموما
الف شكر على الزبادى اسهل برضه من البسبوسه

mony يقول...

تسلم ايدك يا صبرني

بس بصراحة اول مرة اسمع عن بسبوية بالدقيق الابيض و البيض


بس زي ماقلتي

بسبوسة مكيكة

هههههه

نحاول نجرب

صبرني يارب يقول...

استاذ بيبرس

حضرتك الى جاي المطبخ اهو كمان مالناش دعوه بقى
ههههههههههههههههههههههههه
تنور يا فندم
والدايره والنص قطر بلاش منهم خلاص اعبترهم مش موجودين
اشتغل فىالمربعات انت
والف هنا الزبادي

صبرني يارب يقول...

موني

انا كمان اول ما عرفتها من يجي عشر سنين كده
كنت باقول زيك كده وفضلت خايفه اجربها

بس حاليا ما عدتش باعمل بسوبسه عادي هى دي وبس
وكمان مش عايزه اقولك انى بقيت متعاقده مع البقال الى قدمنا باخلصله علب البسبوسه اول باول
وكل من يتزنق فى العيله الرخمه دي يقولي اعمللنا بسبوسه
كأني واخده توكيل البسبوسه فى الشرق الاوسط
تحياتي ليكى موني

أنا حر يقول...

ايه الجمال ده والاكلات الجامده دي مش ممكن بصراحة
انا عايز اقلك اني بحب البسبوسة قوي قوي وبتضايق جدا علشان مش بعرف اعملها بس هجرب دلوقتي في معملي قصدي في مطبخي الصغير بس ربنا يستر من النتيجة
:)
تحياتي

صبرني يارب يقول...

أنا حر
اوك بس اكتب الطريقه بقى ولا اطبعها وخدها معاك المطبخ وتنفذ بالكلمه مش عايزين افتكاسات وكده
والف هنا ان شاء الله تعجبك

عمرو يقول...

دى بسبوسه على الطريقه الجزائرى و بيسموها هناك قلب اللوز
البسبوسه العاديه بقى بتاعتنا فيها سر بيعملوه الحلوانيه و علشان كده بتطلع غير اللى بتعملوها فى البيت خااااالص .. أيه بقى ؟
بيضيفوا للشربات البارد مقدار مناسب من الزبده قبل ما يسقوا بيه الصينيه جربيها و قولى لى رأيك

بنت الغربة يقول...

حبيبتى ياصبرنى انا اول مرة اسمع عن البسبوسه دى مع انى طول عمرى فى الغربه وجربت اكلات كتييييييير - بس اوعدك انى اجربها لان البسبوسه من الاكلات المفضله عند ولادى -وانا كنت على طول فاشله فيها لغاية لما واحده لبنانيه قالت لى على طريقه سهله وعمليه ومضمونه وعمرها ماخيبت معايا بعد كده الا طبعا لما اعملها فى مصر لان الخامات هناك زى ماقلت سيئه -وهى
1.5كوب دقيق سميد
1/2 كوب جوز هند
1 معلقه كبيرة بيكينج بودر
1 كوب سكر
1 علبه كبيرة قشطه
وتعجنى كل الحاجات دى مع بعض من غير سمن ولازيت
وبعد كده تطيها فى صينيه مدهونه زيت خفيف
وتحطيها فى نص فرن سخن لمدة نص ساعه لغاية ماتستوى من تحت
وبعدين ولعى الفرن من فوق شويه لغاية لما تحمر
على فكرة الشربات لازم يبقى بيغلى وتحطى عليه فانيليا بدل الليمون (معلقه صغيرة)
وبعد كده تخرجيها من الفرن وتقطعيها الاول وبعديت تسقيها الشربات يعنى (سخن مع سخن)
جربيها ومش هتندمى وبالهنا والشفى
بس انا ماعرفش نوع قشطه كويسه فى مصر جربى قشطة الحليب البلدى اضمن
وتحياتى ليك -داليا من دبى-

biberss222 يقول...

ادى الوصفات ولا بلاش برافو يا داليا
مش تقولى دقيق و بتاع
و بسبوسه مكيكه!!!!!!!!!!

بنت الغربة يقول...

حبيبتى ياصبرنى انا باكتب لك وانا قاعده اكل البسبوسه بطريقتك-حلوة قوى بس اخدت وقت كبير فى عاميلها-المهم انها عجبت الاولاد بس معجبتش ابوهم-ومصر انها كيكه مش بسبوسه-والاولاد برضه بيقولوا انها كيكه حلوة قوى- قلتلهم طيب خلاص مش مهم هى ايه (بسبوسه مكيكه او كيكه مبسبسه)-المهم انها حلوةوخلاص -جربى طريقتى وقوليلى رايك .
بالنسبه للاخ بيبرس ياريت تجرب تعمل البسبوسه باى طريقه منهم وتعملها مفاجاه حلوة لمراتك-صدقنى هتفرح قوى وهتاكلها حتى لو وحشه
تحياتى ليك ياصبرنى -داليا-

صبرني يارب يقول...

عمرو
منكم نستفيد يااستاذ عمرو وهانجرب حكايةالزبده ده ان شاء الله

صبرني يارب يقول...

بنت الغربه

انا والله باحب البسبوسه دي لانها مش بتكون واخده شربات اوي وسكر جامد اوي
وانا مش باحب الحاجات الى سكرها شديد

وجربيها وقوليلى

والطريقه بتاعتك فعلا حلوه والقشطه البلدي فيها بتكون جميله جدا
والمقدار ده يادوب ياخد كوباية قشطه كبيره
لكن الشربات السخن ده اول مره اعرفه وهاجربه برضه واقولك

صبرني يارب يقول...

بيبرس

اهو داليا تحت اهو لقيتها بتقول عملتها
هههههههههههههههههههههه
ماشي ياعم حضرتك بالذات مش هتاكل منها
عموما المدونين الى كانوا معانا فى التبرع بالدم دقوها يقوللنا رايهم
ولو انها برضه مش زي ما بتطلع معايا كل مره .

صبرني يارب يقول...

بنت الغربه

يا داليا لو عملتيها رقيقه على صنيتين وشربتيها كويس هاتبقى اقرب للبسبوسه

هههههههههههههههه
بس اوعى يكون جوزك دعي ليا بقى ههههههههههههههه

وان شاء الله هاجرب الوصفه
وبيبرس محروم من كل البسبوسات الى هنا ههههههههههههههههه
ولا هايعمل حاجه ولا مفاجاءات ولا كلام من ده هو بيشتكي بس
هههههههههههههه
تحياتي ليكى يا جميل

biberss222 يقول...

الكيكه المبسبسه اتحرقت ليه مش عارف
و طلعت كأنها مرتفعات وزرينج
طالعه نازله
نص مرتفع و النص التانى واطى ومحرووق
والشربات بيتعمل ازاى يا جدعان؟؟؟
بس لذيذه قوى مع الشاى انصح الجميع يكلوها و بالهنا و الشفا

و الف شكر للاخوات داليا و ام مريم .
البواب بعد ما ادتهالوه اعد يشكر فيه للصبح
الف شكر يا بيه ربنا يخليك
و هو مش عارف ان انا بتخلص منها
و الزبادى زى ما هى لبن برضه لم تتحول لزبادى حتى الان

صبرني يارب يقول...

ايه ده

انت بتجرب بصحيح يا استاذ بيبرس ولا بتشتغلنا
هههههههههههههه

الزبادي ما ربطش يبقى حضرتك يمكن مستخدم لبن مبستر ؟؟!!
او حطيت الزبادي الخميره على الحليب والحليب ساخن اوي

او الجو عندكم برد اوي

او الحليب الى حضرته استعملته مضاف اليه مواد حافظه

لو بجد جربت قولي

والبسبوسه طالعه كده لانها كانت محتاجه شوية حليب زياده تبقى العجينه اكتر سيوله
وحضرتك حطيتها مايله فى الفرن فطلعت حته وحته

والشربات
كوباية سكر وكوباية مايه ونص لمونه
وتحطها على النار يغلوا حوالي نص ساعه وتوطي عليه طبعا عشان ما يفورش
ولا يبقى تقيل شويه تطفي عليه وتسيبه يبرد شويه

تحياتي لك يا استاذنا

biberss222 يقول...

any thing from your hands is good

صبرني يارب يقول...

تعيش يارب

وبالانجليزى كمان

ده انجليزي ده يا مرسي ؟؟

رئـــــيسـة حزب الأحلام يقول...

الله طعمها حلو اوى
الله يخليكى
حرام عليكى جريتى ريقى

صبرني يارب يقول...

هههههههههههههههه

طب يلا اعمليها بقى وورينا الشطاره

غير معرف يقول...

福~
「朵
語‧,最一件事,就。好,你西...............................................................................................................................-...相互
,以讓>它使...................

المحبة في الله ندى يقول...

ما شاء الله انا عنلتها و طلعت تحفة

صبرني يارب يقول...

الغير معرف انت زعلان مننا ولا ايه يعم

صبرني يارب يقول...

المحبه فى الله


الله يكرمك ايوه كده طمنوني

وصفات طبخ يقول...

قوملا بتحضير اشهى الحلويات فى منزلك مع موقع باتيه وانتريه الذى يقدم اليكى طريقة عمل الدونات بالصور فى اسرع وقت
تابعى المقادير عبر
http://www.pntre.com/how-amel-donuts/

Unknown يقول...

تسلم ايدك تحفه انا جربتها وطعمها تحفه

Shimaa Ali يقول...

تسلم ايدك تحفه انا جربتها وطعمها تحفه