الأربعاء، 27 مايو، 2009

الطعميه المصري






النهارده بقى عاملاكم مفجأه عجب


طعميه اه والله هى الطعميه بعينها



طبعا انا باموت فى الطعميه





بس الطعميه الجاهزه دي بالنسبه ليا عذااااب وحموضه وعسر هضم وحاجه جاز اوي ما تعرفش تقريبا بيقلوها فى زيت عربيات





المهم قررت نحن صبرني يارب انى ما اشتريش الطعميه الجاهزه ولا سيما ان العيال بيحبوها فى السندوتشات وطبعا الصبح بدري كده اجيب منين طعميه ولا مين يجبهالي






اليكم الطريقه بقى


المقادير





نصف كيلوا فول مدشوش الى هو فول تدميس عادي بس متقشر زي ده كده


و2 ربطه كسبره و2 ربطه كرات اخضر بلدي (زي البصل الاخضر كده بس رفيع ومن غير راس )


وممكن مش كرات نحط كسبره واي خضره تانيه عااااااااادي ما بتفرقش اوي


3 بصله كبيره مفرومه


خمس فصوص توم كبيره مفرومه


ملح وفلفل وكمون كتير وشطه ( انا عن نفسي باروح لعمو العطار اقوله ادينى توابل للطعميه وبيعملى خلطه كده على بعضها )



وبث على كده



نشتغل بقى يا حلوين


اول حاجه لازم تنقعي الفول خمس ست ساعات ويستحسن من على بيات


والخضره كمان تقطعيها حتت صغيره الكسبره والكرات يعنى


الطعميه محتاجه بقى مفرمه محترمه يعنى شديده


واحسن مفرمه لها الى هى مفرمة اللحمه دى مثاليه لها


لكن تنفع في كبه شديده او فود بروسرر قويه


المهم انا عادة باحب افرم كل حاجه لواحدها الاول وبعدين الخبطهم بقى واعيد فرمهم على بعض فى مفرمة اللحمه


شغلانه جاز لان المفرمه بتاعتي صغيره شويه بتعلنى لو حطيت الحاجات مصححه


المهم بعد ما بتتفرم بيبقى شكلها كده





ماما كانت زمان بتعمل الخلطه كلها على بعضها من غير فرم


الفول والخضره مقطعه والبصل مقطع والتوم والتوابل وكله على كله وتبعته لواحد بتاع طعميه وعنده ماكينه بقى بتاعة فرم قويه وفى خمس دقايق كان بيهف الاثنين كيلوا ولا نقعد نناحي من قلبنا


ممكن تعملوا كده برضه



الطعميه بقى بعد ما تبقى عجينه كده وحطيتى الملح والفلفل وكله تمام حطي على الكميه دي حوالي ربع معلقه بي كربونات الصوديوم


ولو مافيش لما تيجى تقليها ابقى قلبي فى الحته الى هاتقليها بيضه هاتبقى ميه ميه



كمان انا باحب ازود عليها حمص بتبقى حلوه اوي طبعا بيتنقع مع الفول وتكملي الخطوات عادي


لو طلعت الطعميه طريه زياده يعنى سايبه لو كانت الخضره كتير وكده


ممكن بقى تزوديها شويه بقسماط او شوية فول صويا ناعم الى زي البودره مش التاني ده نص كوبايه منه تخليها تمام


او حتى شوية دقيق


عارفين بتوع المطاعم بيزودوها دقيق كتير حتى ان بابا قالي ان فى ناس منهم بيطبخوا رز ويفروموه معاها عشان تزيد الكميه وتبقى سهله فى التشكيل


المهم الطعميه ممكن تحفظيها فى الفريزر عادي شهور بتقسميها فى اكياس على اد استعمالك للمره وزي ما اتفقنا تملي نص الكيس او ثلثه حتى وتخليها مبططه فيه عشان تفك معاكي بسرعه


تحمير الطعميه بقى


طبعا زيت عميق وبتعملي الطعميه كوره وبعدين تحطي طرف صوابعك فى السمسم وبالراحه هى لمسه واحده على الكوره تبططيها وتنزليه فى الزيت


طبعا النار تكون حاميه ولما تملي الطاس بسرررررعه تهدي النار شويه وتبدأ تقلبي



طبعا ممكن تعمليها اقراص زي الي فى الصوره الى فوق دي


وممكن تعمليها صوابع زي ما تحبي


وممكن تعملي بقى منها اصناف كتير هانبقى نبدع سوا ان شاء الله



وبالنسبه للرجيم بقى


انا مره جربت اعمل الطعميه من غير زيت خالص


فى طاسه تيفال اه والله


حطيتها كده لقيتها اتحروقت شويه فبقيت يادوووب ادهن الطاسه زيت خفيف اوي


وبعدين احط الطعميه وبمقصوصه بلاستك باشيلها بالراحه واقلبها واوطي عليها بقى


هى يعنى ما بتبقاش زي المقليه


بس حيث ان الواحد بيبقى عامل دايت وهايموت على طعميايه بتكون كده رضا اوي


اي خدمه يا فاتيما


فى حد عنده اي سؤال يتفضل يقووولي



واي حد يجرب يقولي برضه

هناك 34 تعليقًا:

نكهة مغربية يقول...

و الله يا صبرني من ناحية المفجأة دي فعلا مفجأة أنا كان نفسي من زمان أتعلمها و الله برافو عليكي دنتي تحفة أنا كنت بتكلم مع شملولة عليها
تسلميلي يا قمر انشاء الله أجربها بعد الكشري علاشان في المخطط الكشري بعدين الطعمية علماتحط شملولة وصفات كده وعداني بيهم
و الله بحبك موت
و فين الصور بقي علشان أغيز بيهم ناس


مممووووووووووووححححح
بس قليلي هو صعب جدا طحن الفول بتاع الطعمية في البيت؟

صبرني يارب يقول...

نكهه

يا جميل انا عينى ليكى

والفول لا هو لما بيتنقع بيبقى طري عادي ما تقلقيش
وعموما جربي الاول فى نص الكميه دي يعنى ربع كيلو

ولو ما نفعش معاكي ابقى قوليلى وانا اقولك تحوليها الى بصاااااااااره

ههههههههههههه

اكله مصري برضه
والصور حااااااضر يا بطه

نكهة مغربية يقول...

و الله ضحكت من قلبي اخنا كمان بنعمل البصارة بالنوع ده من الفول و الله اما طلعتش الطعمية حلمها و جبهالك قال بصارة قال
ههههههههههههه

صبرني يارب يقول...

مااااااشي يا جميل امال نرميها ولا ايه

هههههههههههههههه

احنا مانرميش حاجه بتيتاااااا

نكهة مغربية يقول...

يا قمر أنا حطيت الصورة في الموضوع و الله انت ست بيت محصلتش
تسلمس يا فمر على الصورة
بالهنا و الشفا

ঔღঔ نـــوارة ঔღঔ يقول...

مممممممممممم

انا بحب الطعمية والفول والحمص جداااااااا

انا الصراحة عمري ما عملت الخلطة بشتري طعمية جاهزة لاني بحس انه مش مستاهلة اعمل خلطة واقعد اقلي واعمل قصة على قرصين طعمية

ومرت عمي (حماتي ) تعملها كتير بالبيت وبتبعتلي شوية

لكن استغربت انك ماحطيتي بقدونس خالص ؟؟؟
انا بشوف مرت عمي بتحط بقدونس وبكثرة

على فكرة احنا بنسميها فلافل :)

تسلم ايدك ياجميل

دمتي بالف خير

صبرني يارب يقول...

نكهه

الله يخليكى يا رب هاروح اشوفها حالا

هاتي بووووووووسه
امووووووه

صبرني يارب يقول...

نواره

اها عارفه انا موضوع الفلافل وعارفه برضه مرت عمك انها حماتك يعنى

اصل كان ليا صديقه اردنيه فلسطنيه
هههههههههههه


والبقدونس ما انا قلتلكم بقى حطوا اي خضره
وحياتك باحط الى الاقيه ولا بتفرق معايا


وبعدين انا برضه كنت باقول فى الاول زيك كده

بعدين لما بقى عندي قبيله بقيت ياحلوه اعمل الكيلو ما يكملش اسبوع

خصوصا بقى انى انا عندي العكس

انا الى بادي لحماتي وامي واي حد رخم يعرف ان عندي طعميه عااااااااتي

تحياتي ليكى يا قمر

خمسة فضفضة يقول...

السلام عليكم ورحمة الله وبركاته

ازيك يا صبصب

انا جايه علي الريحه الحلوه اللي ماليه بلوجسبوت والفضاء السيبري المحيط ههههههههههههههههههههه

حلوه الطعميه احنا بنعملها كده برضو وبنحط حمص ني برضو
دلوقتي بنعملها في الفوود بروسيسور بس زمان فاكره الماكنه بتاعه البسكوت وفرم اللحمه اليدوي دي بتاع زمان
ايوه هي دي اللي بتتركب علي الطبليه الخشب بتاع زمان دي وتقعدي بقي تلفي بايدك لحد ما الواحد دراعه يخدل من كتر اللف وكل واحد ياخدله دور هههههههههههه
ايوه كنا بنعملها في دي بس والله كانت بتبقي اطعم بكتير
تعرفي ان واحده من خالاتي رجعت تعملها فيها تاني اه والله

بالنسبه لي دلوقتي انا برضو زي نواره ماعدتش باعملها في البيت ماهو مش هاعمل الحوسه دي كلها عشان طعميتين تلاته وكل فين وفين فابشتريها وبريح نفسي او لو ماما عاملاها بتديني حته وخلاص

سلام يا قمر

صبرني يارب يقول...

خمسه فضفضه

والله يا اختي انا لو الاقي حد يدينى برضه مش هاعمل

طب اقولك ابقى خلي مامتك تبعتلي كيس وخلاص
هههههههههههههههههه

على فكره انا عندي بقى مفرمه زي الى انتى بتقولي عليها دي بس كهربا مش يدوي

وفعلا فعلا هى بطلع الطعميه احسن من الفود بروسيسور


ما انا قلت احسن حاجه لها مفرمة اللحمه


تعرفي واحده مره قالتلى ان المفرمه الى بتكون عند بتاع الطعميه دى وكمان الى عند الجزار
بتتعمل عموله عند واحد فى منية سندوب باين حاجه كده

ورضا قالي اه فعلا انهم بيجيبوا ماكينه يدوي عاديه ويركبوا عليها موتور ويقفلوها من بره استانلس ممكن تعملي بقى المقاس الى تحبيه


حتى انا فكرت اعملها والله عشان الطعميه وفرم اللحمه كمان اصل انا كل ما اروح افرم لحمه اتخانق مع الجزار
هههههههههههههه
عشان بيلملي الدهن بقى والحركات القرعه دي

فنفسي اجيب اللحمه قطع وافرمها احسن

ما علينا بافكر افتح مطعم تشاركينى ؟
هههههههههههههههه

عمرو يقول...

حأقولك بقى على سر صنعة الطعميه و أجرى على الله :)
مع بهارات الطعميه ضيفى شوية كبابه صينى مطحونه ناعمه و أدعى لى ..

صبرني يارب يقول...

عمرو

يا رااااجل فى الطعميه ؟؟

انا باحطها على الكوفته


طيب نجرب على الطعميه يا باشا ونبعتلك قرطاس طعميه
ههههههههههه

نووووورت وبادور عليك

خمسة فضفضة يقول...

السلام عليكم ورحمة الله وبركاته

طيب ماتشوفيلنا حكاية الراجل بتاع منية سندوب ده يا اختي
يمكن اروح انفعه انا كمان واعملي واحده

اصلي برضو بقعد اتشاكل مع الجزار عشان اللحمه بيبقي قاطعها حمره وزي الفل ولما يحطها في المفرمه بتاعه دي مش عارفه ليه بتطلع مليانه دهن
اخر مره خدتها وقلت افرمها في الفوود برسيسور وخلاص

ايوه ماانا عارفه المفرمه اللي بتقولي عليهاوعاوزه اشتري واحده من زمان بس بيني وبينك مستحرمه اصلي مش هاستخدمها كتير بالظبط زي الكيتشن ماشين اللي مركونه وكل فين وفين علي ما اطلعها
كل اعتمادي علي البراون ملتي كويك اسهل في الاستخدام والتنضيف خصوصا الخلاط اليدوي اللي فيها

بس انتي شوفيلنا موضوع المكنه العموله ده ويلا نروح نعملها احنا الاتنين ههههههههه

خمسة فضفضة يقول...

بس انت عارفه ماكنة الطعميه مختلفه عن بتاع الجزار
بتبقي عامله زي الحله الويطه كده وفيه حاجه شبه الايد قاعده تلف
بتفرم كمية بيره في وقت صغير

بس احنا مش بنحبها لما تتعمل بره لانها بتتهري وتبقي عامله زي الميه
البيتي احلي بكتير

اما ماما تعمل هابعتلك شويه ههههههههه

نكهة مغربية يقول...

و الله و الله و الله و الله و الله و الله و الله و الله و الله و الله و الله و الله و اللهو الله و الله
و الله انتي تحفة تجنني و الله عضيم انت خلاص ملكت روحي و عقلي بببببببااااااااااااسسسسسسسسسس
ماهو كلو الا الفراخ باالفريك
و الله يا صبرني أنا كنت عملة زي القطط على وصفة الفريك دي و الله أنا كنت لأموت و أعرف الزاي الوصفة دي
بس و الله العضيم انت خلاص جبتيلي الضربة القاضية

أنا كنت يأسة من وصفة الفراخ دي علاشان مقدرش أطلبها منك و لا من الحبيبة شملولة علاشان مكلفة فمقدرتش أطلبها بس انت ايييه و الله عضيمة يا قمر بس و لو تسمحي يا بطة قوليلي الفريك ده حكايتو ايه بالتفصيل الممل و كمان لو ممكن تحطي صورتو لوحدو علاشان أدور عليه في المغرب و متنسيش يا بط المقادير بالضبط و الطريقة المصرية الصحيحة في تحمير الفراخ

و الله مفاجأتك يا عسل كنوززززز

مممممممموووووووووححححححححح

صبرني يارب يقول...

خمسه فضفضه

بصي كان فى واحد بيشتغل فى المحل عندنا من منية سندوب بس مشي بس انا هادور برضه واسال ولو عرفت تفاصيل هاقوووولك ونعمل سوا والله

اصل انا كمان باعمل حاجه تايه ان شاء الله انزلهالكم قريب كبيبه
عامله زي كفتة الرز بس مش باعمله في صلصه

دي برضه لازم المفرمه دي بتنفع فى الكبه بس بتغلبني


والطعميه فعلا الى بتتعمل بره بتبقى سايبه كده ورخمه

مستنيه بقى بتاعة مامتك اصل انا مامتي موظفه يا اختي عايزه حد يعملها
ههههههههههههههه

صبرني يارب يقول...

نكهه مغربيه

يا قلبي لو اعرف كنت نزلتها من زمان دي انا مصوراها من زمان هى وطاجن سمان بالفريك برضه تحفه

بس مين الى ضحك عليكى وقالك انها مكلفه
ههههههههههههه

الفريك رخيص زيه زي اي حاجه حبوب يعنى مش غالي

والفراخ اجدع فرخه بتقطع عشرين جنيه يا معلم

ابعتلك فرختين ؟
هههههههههههههههههههه

ان شاء الله بكره انزل الموضوع لما اصورلك الفريك لواحده بقى وكده

انت تأمر يا باشا احلامك اوااااااامر

هههههههههههههه

باحبك يا جميل انت

نكهة مغربية يقول...

ربنا اليخليكي يا صبرني و الله أحرجتيني
ممممممممموووووووووححححححححح
انا كنت ديما بفتح بقي لما أشوفو في التلفزيون و أعقد قدمهم زي الهبلو و الممتلنين عملين يحشو في وشهم و لا معبرين انو فيه ناس معرفاش ايه الفريك أساسا

المهم أنت الجبت المفيد تسلميلي يا غاليا
مممممممممموووووووح كمان مرة
يا خواتي دي عسل

نكهة مغربية يقول...

أههه يا حبيبتي ابعتي و بلاش تضحكي علية انت و تتبعتيهم بريشهم لالالالالالالا ابعتيهم بفريكهم

و الله بحبك جدا في الله

صبرني يارب يقول...

نكهه

يا حياتي عنيه ليكى


بكره يا حبي اول ما اخلع من العيال ربع ساعه بس انزلك الفراخ بالفريك


باحبك يا جميل والله

ELMASRYA - SHAMLOOLA HANEM يقول...

يا حبيبتي يا صبصب

فكرتيني بأمي الحبيبة عليها رحمة الله

العمر الطويل ليكي يارب بصحة وسلامة

والله يا صابرينا نفس اللي قلتيه بالظبط كانت بتعمله في البيت

وعلى مفرمة كانت عندنا بتفرم فيها اللحمة بتاعة العصاج وبتعمل بيها عجينة الطعمية دي وكنت بحس إن إيديها بتتعوج بعد كل مرة تستخدمها فيها علشان كانت جامدة قوي وكانت بتربطها على رخامة المطبخ وتشتغل بقى وتطلع منها أحلى أكل

عمرنا مااشترينا من بره نهائي

حتى أنا كنت بشتاق أجرب طعمية بره وكنت بعتبرها حلم بعيد المنال

وكنت بنتظر نزولنا اسكندرية في الصيف لأني وقتها كنت من قاطنات القاهرة العامرة

وكانت اسكندرية تاكلي فيها أحلى عيش فينو وطعمية

بالنسبة لموضوع الحمص إخواننا الشوام بيعملوها كلها بالحمص بدون فول نهااااائي

وبتبقى حلوة برضه بس سيبك انتي الفول برضه ليه شمخة ونكهة وطعم تاني

كنت باكلها في الخليج مصنوعة من الحمص فقط وياما اشتهيت طعميتنا اللذيذة

مش بعرف من طرق الطعمية غير اللي بتتعمل بالبيض قرص كبير وبتتقطع بعد كده أو أقراص متعددة بتبقى تححفة

يااااه يا صابرينا فكرتيني بالذي مضى

تعرفي وانتي بتقولي بحط سمسم على الطعميايه افتكرت شكل ماما الله يرحمها وكأنها قدامي وافتكرت مطبخنا وكل التفاصيل

ربنا يخليكي ليا وتأكليني أحلى الأكلات من إيديكي الحلوين

أحبك في الله قوي قوي

صبرني يارب يقول...

شملوله حياتي

تعيشى وتفتكري

يعني الست مقطعه نفسها عشان تاكلكم اكل نضيف ومافيش فايده فيكم نفسكم راحه للعك الى بره
هههههههههههههههههههه

زي ولادي وربنا بالظبط

لو لقوا كلب مقلي بره يعتبروه حاجه كويسه عادي
ههههههههههه

وانا برضه عارفه الطعميه الى بالبيض دي والحقيقه مش باعملها كتير عشان ما حدش عندي بياكلها اوي

بس البت اختي قالتلى بتعمل طعميه بالسوسيس بس انا ما باجبش خنازير الايام دي
ههههههههههههههههههههه

عموما هانشوف نعمل فيكم ايه بالطعميه

وانا كمان باحبك والله

ويحبك ربنا يارب

mony يقول...

ماشاء الله يا صبصب

اغيب الاقيكي عاملة ابداع

لازم اجربها ان شاء الله


انا اساسا بموت في الطعمية
و اولادي كمان

انما جوزي نو نو نو

مش مشكلة هتطلع حلوة و مش هيقدر يمسك نفسه

طيب انا خالي في المانيا لو عايز يعمل الطعمية يستبدل الكرات بإييييه؟؟؟


تسلم ايدك يا جميل

صبرني يارب يقول...

موني

اعملي واكلي العيال عشان ما يطلعوش ما يحبوهاش زييه

وبالنسبه للكرات عادي انا ساعات باعمل من غيره

باكتر البصل شويه وساعات احط بصل اخضر

ومش مهم كرات والخضره بقى
الكسبره والبقدونس

كده يعنى
اي حاجه خضرا بتمشي


نورتي يا قمر

ام مريم موسى يقول...

تسلم ايدك يامونى وبعدين ايه حكايه صبرنى دى دا انتى عسل يصبرك عى ايه بس ومن ناحيه اطعميه احنا كمصريين مانبقاش حاسين بنفسنا و مكلناش فول او طعميه انا على فكره بعملها بنفس الطريقه بس مشكلتى فى الملح بحط بغباااااااااااااااااااااااااااااااء ربنا يسترها علينا

صبرني يارب يقول...

ام مريم تسلمي يا حبيبتى

بس انا مش اسمي موني انا اسمي شيماء
وصبرني يارب النك نيم بتاعي

عادي ربنا يصبرنا على كل حاجه هههههههههههههههه

بليز راسلينى على الميل ده

sbarny_yarb@yahoo.com

غير معرف يقول...

عيزه اعرف طريقه اطعميه اللي بنشتريها م بره لو سمحت

صبرني يارب يقول...

طب ما هى دي طريقة الطعميه الى من بره يا عزيزتي؟؟!!!!

albashk_2007 يقول...

انا عن نفسي الطعميه دي لونه اخضر غامق وزي المحروقه اللون الذهبي احلى واطيب اكيد انا شايف انو انتي مزوده الكزبره او الخضار اكتر من الازم عشان كده طلع لونها اخضر غامق

صبرني يارب يقول...

ايوه فعلا انا معاك يومها كانت الكسبره زياده

بس بالنسبه للصوره يعنى هى الكاميرا يومها كان فيها مشكله معايا وبعد ما صورت حاولت اظبط الوان الصوره على الكمبيوتر بوظتها الحقيقه

انا عادة باعملها افتح من كده فعلا

ونورتنا وشكرا على ملاحظاتك

AMOULA يقول...

والله العظيم انتى عسل
واحلى طعمية وياسلام لو مع رغفين فينو
او رغيف اسمر معمول فى البيت وشوية طحينة الله واكبر
والله خلتينى اشتاق للطعمية
بارك الله فيكى

Mony يقول...

يا شيخة عبريني بأه
وحشتيني بجد و مش عارفة الاقيقي فييييين
و بعتلك هنا و مسألتيش فيا:(

كده برضه يا أم مريم :(


طيب بس طمنيني عليكي يا ستى

صبرني يارب يقول...

اموله

تسلمى يا جميل ربنا يخليكى وانا اتفق معاكي فى كل الاضافات دي على السندوتش هههههههه

صبرني يارب يقول...

مووووووني

حبيبتى والله ما شوفت حاجه
انتى ما تعرفيش المدونه الجديده بتاعتي ولا ايه

طب انا هاجي ازورك انا ما اعرفش انك رجعتي تكتبي تاني الا قريب اختى الى قالتلى والله

هاجيلك يا جميل ومرسي على سؤالك يا قمر