تورتة الفراشه (فى عيد ميلاد احلى فراشه حنين القلب )

التورته دي خصيصا مخصوصا عشان حبيبة قلبي حنين القلب

الى عيد ميلادها النهارده وانا اخترت لها تورته الفراشه الجميله دي عشان ان شاء الله تكون سنه الوانها مزهزه كده مع حنين الصغيره ان شاء الله

كل سنه وانتى طيبه يا حنين وعقبال ميت سنه سعاده وهنا يارب

يلا بقى عشان اعلمكم تعملوا التورتايه دي عشان كلكم تعملوها وتجبوها لحنين

اولا احنا هنحتاج لاثنين كيكه مدوره زي دي كده

ممكن نعمل كيــــك عــــادي من المقدار بتاعي الى عملناه قبل كده (المقدار الواحد هايعمل كيكتين )



وممكن نعمل كيك اسفنجي لكن انا مش باعمله كتير بصراحه بافضل الكيك العادي



هانجيب الكيك ونشق كل كيكه فيهم اثنين بالعرض بحيث تبقى طبعتين يعنى عشان تدينى تورتايه من اربع طبقات وممكن نسيبها من غير ما نشقها مش مشكله



هانجيب بقى الكريم شانتيه ونحط طبقه كيك وطبقه كريمه لحد ما يخلصوا الاربع طبقات بسلام



وبعدين نغطيها كلها بالكريم شانتيه



لحد لما تدينى تورتا يه مدوره متغطيه بالكريمه البيضا تماما

معلش نسيت اصور الخطوه دي

المهم بعد كده بقى هانعمل ايه

نقسم التوراتايه دي بالسكينه الكبيره نصين بالظبط

وبعدين نلف النصين بحيث ان حواف الصنيه الاثنين يكونوا للداخل ولامسين بعض

شوفوا كده الصوره دي عشان تتخيلوا الوضع

ايه الى فى النص ده
انا كنت عامله كيكه تانيه صغيره كده قطعت منها جزئين بيضاوين عشان اعمل منهم راس الفراشه وجسمها وحطيتها جمب الاجزاء الكبيره كده وغطيتها بالكريمه برضه

ينفع من غير كيك يعنى نعمل ده بفواكه مثلا هاتبقى حلوه برضه

بعد كده بقى هانبدأ اول حاجه بكيس الكريمه وقمع الورده نعمل حرف للكيكه عالي عشان نديها شكل الفراشه فعلا ونحدد الشكل بتاعها

ولو حبيتوا نبقى نخطي الجوانب قبل ده بمكسرات مجروشه او جوز الهند او مش مهم خالص

وبعد كده بقى انتى وزوقك وفنك كده وتعملي جناحين الفراشه متماثلين يعنى شبه بعض

وطبعا انا مزينه فوق بتفاح وخوخ ومشمش وده الى كان عندي يومها

وطبعا ممكن يكون فى فاكهه بالوان تانيه كتير تعمل اشكال مذهله يعنى

بس كده وتكون جاهزه

كل سنه وانتى طيبه يا حنين وياااااااارب دايما منوره البلوج كده وعقبال ما تقومي بالسلامه ونطمن عليكى

والى يجرب يفرج عليها حنين ويجبلي حته

ههههههههههههههه

الغريبه

احلامك اومر يا ريم

الى المطبخ بقى بدون رغي عشان انا بانضف الشقه مش فاضيالكم

وفاضل ستاره واحده فيكم تكون طويله تيجى تعلقها عشان انا ايدى واجعتنى بقى

المهم

المقادير

كوبايتين سمنه بلدي جاموسي (لونها ابيض يعنى) = نصف كيلو سمن

كوباية واحده سكر بودره ابيض برضه

والدقيق بقى حسب ما تاخد هو المقدار ده ياخد حوالي 3 كوبايات دقيق

وبياض بيضتين

طبعا ممكن نستعمل اي سمن بس الغريبه بالذااااات لو ما اتعملتش بسمنه بلدي بتبقى طعمها مش حلو

وكمان السمنه الى لونها اصفر بتخليها تطلع صفرا فمش بتكون زي الغريبه الى فى المحلات بس عادي هايطلع طعمها حلو

الطريقه

السمنه البلدي بقى تكون جامده شويه بس مش اوي اوي يعنى ممكن نحطها فى التلاجه ربع ساعه قبل ما نشتغل لو بقت جامده اوي نسيبها تسيح شويه

هانحط عليها السكر البودره ونضربها بالمضرب لحد ما تبقى شكلها زي الكريمه

ونكون مجهزين بياض بيضتين نضربهم بالمضرب كويس وبعدين نضيفهم على السمنه والسكر الى فاتوا دول

ونضربهم برضه هاتبقى زي الكريمه برضه بس خفيفه اكتر

زي الصوره دي كده وتدينا برضه علامة المنقار

بعد كده نبدا بقى نزود الدقيق شويه شويه ونقلب باطراف صوابعنا كده

يااااادوب العجينه تمسك نفسها وتسيب جدار الطبق الى بنعجن فيه عشان تبقى دايبه ونغنيلها ونقولها يا حلوه يا ناعمه يا غريبه

وتبقى عجينه لونها فاتح وطريه ز الى فى الصوره دي

بعد كده نعملها كور

ما نبططهاش هى هاتفرد لواحدها احنا نعملها كوره كاملة الاستداره ونرصها فى الصنيه وبعدين نزينها من فوق بقى يا اما باي نوع مكسرات (لوز مقشر بندق مقشر )

ونحط اللوزه مثلا نضغط ضغطه خفيفه علشان تمسك فى الغريبايه وكمان الغريبايه تتبطط سنه كده

وممكن من غير مكسرات مش هاتقول لا يعنى

معلش نسيت اصورها قبل ما تتخبز

هانحطها بقى فى الفرن الى حرارته حوالي 170 درجه

ومش بتقعد كتير يادوب عشر دقايق ويادوووب نلاقي حروفها بدأت تلون خفيف اوي نكون شلناها عشان احنا عايزنها تفضل بيضاء زي ما هى

ونسيبها فى الصنيه بس تبرد خمس دقايق

وبعد كده نشيلها فى علبه ونقفل عليها لحد ما نيجى نقدمها زي الطبق الى فووووووق ده

بس خلاص

قوموا بقى اشتغلوا ما تفرسونيش

والستاره اهي مش عاملاها الا لما حد فيكم يجى يعملها

بسكويت النشادر

سلام عليكم

شلت شلت شلت

ولا واحده فيكم عملت حاجه

وجت قالت انا عملت حاجه وتفرحنياخس عليكم يا وحشين

ايه العيال المحبطه دولطب بلاش الحريم يأسنا منهم

حد من الرجاله طيب جرب

طب بلاش حد من الرجاله خد الطريقه اداها للمدام عملتها هى افتحوا نفسي يا رخمييييييييين

ما علينا

قدامي بقى على الشغل يا رخمين برضه

هانعمل النهارده بسكويت النشادروالى مش عارفه اشمعن هو بالذات الى بيعملوه فى العيد بصراحه ما البسكويتات كتيره اشمعن ده

يلا بلاش رغي

المقادير

1 كيلو دقيق

كوب وربع زبده او سمن

كوبايه ونص سكر بودره

4بيضات +الفانليا

معلقه كبيره نشادر

معلقه صغيره بكنج بودر

الطريقه

اولا: الزبده لازم تكون بدرجة حراره الغرفه يعنى تكون طريه مش جامده

هانحط الزبده فى الطبق الكبير الى هانشتغل فيه وعليه السكر البودره زي كده

ونضربهم بالمضرب لحد لما تبقى عامله زي الكريمه زي كده

ولما نشيل منها المعلقه تكون العجينه طالعه كده شكل المنقار (هىاسمها علامة المنقار )

ونكون مجهزين البيض ضربنا كويس بالمضرب فى وعاء تاني ومعاه الفانيليا ونصبه على العجينه الي فاتت دي ونضرب تاني بالمضرب

لحد برضه ما هاتدينى عجينه شبه الكريمه بس طريه شويه عن الى فاتت

وبعد كده نكون مجهزين الدقيق منخول وضفنا عليه البكنج بودر والنشادر وخلطناهم كويس

ونضيف الدقيق شويه شويه لان ممكن العجينه ما تاخدش الدقيق كله هانفضل نزود الدقيق ونقلب العجينه بالرااااااااحه حتى لو بايدينا بس تبقى باطراف صوابعنا بس علشان ما نكتمش العجينه

لازم العجينه تجمد وتتجمع على بعضها وتسيب جدار الطبق معلش نسيت اصور العجينه بعد ما خلصت

نيجى بقى بعد كده لتشكيل العجينه

المحلات بيعملوه احيانا بقمع مخصوص للبسكويست الحقيقه انا ما لقتوش السنه دي بس الراجل قالي انه كان عنده وخلص يعنى فى امل اجيبه ان شاء الله يوما ما

الطريقه التقليديه هى المفرمه اليدوي دي القديييييييييمه دي لها اشكال بتركب عليها وبتطلع البسكويست عامل زي الى فى الصوره الى فوق دي

انا كان عندي قطع زمان على مفرتي المولنكس بتعمل برضه نفس شكل البسكويت ده ممكن تستخدميها لو عند

وممكن تشكليه باي شكل تحبيه وباي قطاعه تحبيها

بس اعرفوا ان العجينه بتكون ناعمه وطريه جدا وصعبه النقل بعد التشكيل

ده شكل البسكويت بعد ما شكلناه ورصناه فى صنية الفرن

وهانحطه فى فرن حامي يعنى حوالي 200 درجه

وبياخد تقريبا عشر دقايق الصنيه الواحده لاننا مش عايزينه يحمر اوي يادووووب نتفخ وياخد لون فاتح

ويكون زي ده كده

والف هنا ليكم وكل سنه وانتم طيبين

اه كل ما تطلعي صنيه طبعا تسبيها خمس دقايق وبعدين تطلعي البسكويت بالمقصوصه كده بالراحه وتكونى مجهزه علبه كبيره او حله كبيره بس جواها كيس بلاستك وترصي البسكوت بالراحه لحد ما تخلصي الكميه بتاعتك كلها وتسبيه ساعه او ساعتين لحد ما يبرد وبعدين تربطي عليه الكيس او تقفلي العلبه البلاستيك كويس اوي

لانه لو فضل فى الهوا هايرطب ويقطم وما يبقاش مقرمش

والبيتى فور برضه كده

بكره انشاء الله الغريبيه ربنا يسهل

اتحركوا بقى خنقتوني على فكره

كحك العيد

اسفه اسفه اسفه يا بنات

والله النت قاطع من اول امبارح قاصدنها معايا

انا عملت الكحك من اول امبارح عشان الحقكم والله

وعموما انا جاهزه اهو يلا على الشغل

وعايزه كل واحده فيكم بجد تجرب السنه دي تعمل كيلو واحد كحك مش هاتخسروا حاجه والله بالعكس وهايطلع ان شاء الله احسن من الجاهز واجمل وكفايه انه من صنع ايدك ومش بياخد مجهود والله باعكس ده سهل جدا

يلا نشتغل

المقادير

كيلو دقيق ابيض (7 كوب )

نصف كيلو سمن (2 كوب )

ملعقه صغيره خميره (فوريه او عاديه )

كوب حليب تقريبا

حوالي 3 معالق كبيره سمسم محمص

بنحط روائح بقى ممكن فانيليا وفى حاجه عندنا فى مصر بنجيبها من عند العطار اسمها رائحة الكحك عباره عن بودر كده

دى الى انا باستعملها

وفى ناس بتحط حاجه اسمها رائحة الموز انا مش باحبها

المهم

الطريقه بقى

بسم الله

اولا هانجهز الدقيق هاننخله وبعدين نحط عليه رائحة الكحك والسمسم زي الصوره دي كده

ونخلطهم كويس ويكونوا كده ونعمل فى النص حفره كده عشان هانسقط فيها السمنه

هانكون جهزنا السمنه بقى قبلها على النار وخليناها لحد ما سخت اوي لا انا محتاجه العجينه بتاعتي تفضل دافيه لحد لما اشكلها واخلصها عشان ما تبقاش العجينه ناشفه

هانجيب السمنه وفى الحفره الى فى النص ونسمى باسم الله كده ونحط السمنه وبالراحه بمعلقه كبيره ونقعد نقلبها كتير لحد لما يختفي الدقيق كله فى السمنه وتكون السمنه بردت شويه يعنى ادينها تستحملها ونبدا نفرك العجين عشان نتأكد ان مافيش اي تجمعات دقيق ونضمن ان الدقيق يتشرب السمنه

دى بنقول عليها نبس العجين هانبس العجين او نفركه لحد ما يبقى شكله كده

اهو في تجمعات بس تجمعات هشه وعباره عن دقيق مخلوط فعلا مع السمن

هانجيب الخميره الى دوبناها فى ربع كوباية حليب وربع معلقة سكر ونسمي باسم الله كده شطاااااااار

ونحطها على العجين ونعجن ونبدأ نزود الحليب شويه شويه ونعجن(والحليب يكون دافي )

هانعجن ازاي باطراف صوابعنا كده عشان ما نكتمش العجينه وونفضل نحط الحليب لحد لما العجينه تتكور على بعضها تبقى عجينه ياااااادوب

ممكن نحتاج اكتر من كوبايه وممكن نحتاج اقل من كوبايه

المهم تعطينى فى الاخر عجينه طريه لكن متماسكه وسخنه كمان وهانجمع العجينه مع بعضها كده ونحطها فى طب صغير على ادها ونغطيها ببلاستيك ونسيبها ترتاح عشر دقايق

بعد كده بقى يا حلوين نبدأ نقعد نشتغل ناخد جزء من العجين وهو متغطي ما تكشفيش العجين عشان ما يبردش وينشف بالراحه تمدي ايدك تاخدي حته وتكوريها وبعدين تفرديها دايره وتحطي فى قلبها الحشو زي كده

الحشو ده بقى ممكن يكون ملبن او مكسرات او الاثنين معا او بلح او عجميه الى كانت تيته الله يرحمها بتعملها

وبعدين نرجع نقفلها على الحشو ونكورها كده

وبعدين نشكلها من فوق انا باحب اوي اعملها بالمنقاش التقليدى القديم ده مافيش احلى منه لا من نقشتي يا ولاد يا حلاوتها والنبى


لكن طبعا ممكن تعمليها انتى بالختامه او باي شكل تحبيه

وهانرص الى نعمله فى صنيه ويبقى جاهز لحد ما يجى وقت الخبز

بس خدي بالك لو انتى هاتنقشي او بطيئه او كده يعنى خلي حد يكون معاكي ساعة التشكيل بس لان لو سبتي العجينه تبرد هاتنشف ومش هاتعرفيها تشكليها كويس

افضل نتيجه للنقش تيجى لما تشتغلي والعجينه لسه دافيه عشان كده هانشتغل بسرعه وياريت يكون فى حد مثلا انتى تقطعي وتحشي وهو ينقش

شغلي جوزك معاكي بقى

امال هياكلوا على الجاهز ولا ايه

بس خلاص هانسيبه بقى يخمر حوالي ساعه او ساعتين حسب الجو وحسب الخميره الى انتى مستعملاها فوريه ولا عاديه

هو مش هايتضاعف زي العيش يعنى لانه دايب فيه سمن لكن انتى هاتلاحظي انه انتفخ شويه

نسخن الفرن كويس اوي حوالي 200 درجه مئويه

ونحطه فى الفرن الصنيه هتاخد بالظبط ربع ساعه تقريبا وتطلع لونها وردي فاتح وجميل كده

بعد كده اول لما يطلع نشيله من الصاج ونسيبه شويه لما يبقى دافي ونرشه بعد كده بالسكر وهو دافي كده عشان السكر يثبت عليه

لكن لوهانسيبه فتره طويله يستحسن نسيبه من غير سكر عشان السكر بيشرب سمنته

المقدرا الى احنا عملناه ده يطلع حوالي 2 كيلو كحك معمول وبدون سكر السكر زودي ربع كيلو كمان

احسبى بقى تكاليف كيلو الكحك عندك فى البيت كام حسب المكونات الى هاتستخدميها لو سمنه بلدي ولا لمكسرات ولا من غير ده

وصدقينى مافيش انضف ولا اجمل من الى هاتعمليه بايدك

يلا عايزه تجارب ونتايج وعايزه شغل شغل شغل بلاااااش الشلت دلوقتي والنبى

البيتى فور

معلش يا جماعه انا هابدا اهو شغل فى الكحك ولسه طبعا ما عنديش صور

ومؤقتا كده لحد ما ابدأ شغل

انا كنت نزلت البيتي فور قبل كده

فياريت تشفوه بقى بصوره وكده وتعملوه على ما اعمل الكحك ان شاء الله على بكره ربنا يسهل

البيتى فووور

عايزه بقى الناس تعمل وتقوووووووولي ايه الاخبار

بس تنفذوا بالظبط مش عايزين فضايح

ممنوع الافتكاسات

قطايف بالشيكولاته

اخر حاجه بقى فى مهرجان القطايف يا جماعه

لعشاق الشيكولاته الى زي حلاتي كده هانعملها قطايف بالشيكولاته

انا عندي ابن اختي طالعلي كده بيموت فى الشيكولاته وانا كنت عازماهم وقالي انا عايز حاجه بالشيكولاته قعدت افكر اعمل ايه يكون رمضاني وبالشيكولاته واخترعت هذا الموضوع وطلع ناجح جدا جدا الحمد لله

طبعا هانحتاج مقدار عجينة قطايف

وهانعمل مقدار من كريمة الباتسيرر بالشيكولاته او كاستر عادي بالشيكولاته يمشي برضه

هاتلاقوا الكريمه بتاعتي لونها غامق اوي ده لانى باستعمل كاكاو خام مش كاكاو عادي

باجيبه من عند بتوع لوازم الحلوانيه

ينفع نعلها على شكل قرطاس برضه زي القطايف بالكريمه

انما انا لقيت انسب شكل له الى هو القطايف المربعه الى بيكون شكلها كده لقيت شكلها اوضع فى الصوره دي عن صورة الشيكولاته

طبعا هانقفلها وبعدين نقليها وبعدين نطلعها نصفي زيتها ونسقطها فى الشربات بس مش هانسيبه كتير يادوب كده تنزل وتطلع

لان احنا هانحط عليها شيكولاته فمش عايزنهاتبقى مسكره اوي

بعد كده هانحط الكريم باتسيير او الكاستر فى قرطاس الكريمه ونعمل داخل كل واحده ورده زي الى فى الصوره ده

وبعد كده يكون عندنا صوص شيكولاته جاهز نحد على وش كل واحده معلقه صوص شيكولاته زي الكام واحده الي فى النص دول كده

ممكن نستغنى عن صوص الشيكولاته برضه عادي وممكن نرش مكسرات مثلا

انما الحقيقه صوص الشيكولاته بيبقى جامد جدا

وبعدين نسيبها بقى فى التلاجه وناكل بقى بالف هنا

خلاااااااااص كده حلويات رمضان قفلنا علينا مع انى كنت مجهزه شوية جلاش ما لهمش حل

بس خلاص ما عادش وقت بقى عايزين نتكلم عن الكحك ان شاء الله اول لما اعمل هاجيب لكم الصور ونشتغل سوا

يلا نشوفكم على خير

كل سنه وانتم طيبين

قطايف بالمكسرات

حلو مهرجان القطايف الى احنا عاملينه ده يا جماعه

نكهه حبيبتى طلبت مني القطايف بالمكسرات او الشكل التقليدى للقطايف



فمعلش بقى ناجل القطايف بالشيكولاته ونعمل المكسرات النهارده



طبعا هانحتاج مقدار عجينة قطايف وممكن نعمل نصه بس عادي حسب الكميه بقى

بالنسبه للحريم الشلت يقدروا يشتروها جاهزه العجينه

وبالنسبه للحريم الى شلت اكتر من كده لا ما يشتروش من بره معموله جاهزه يقوموا بقى يعملوا معانا بدل ما اضربهم

وهانحتاج مكسرات مفرومه او مجروشه او سليمه زي ما هى زي ما تحبوا



انا باحب افرمها واخلطها مع جوز هند وفانيليا وسكر ناعم وزبيب



اي نوع مكسرات تحبيه وممكن تنوعي يعنى كل واحده نوع اي حاجه



المهم هانمسك القطايف على ايدنا كده ونحط فيها معلقه من الخلطه او وات ايفر



زي الصوره دي كده



وبعدين نطويها ونضغط على الحروف كويس لحد ما تلزق فى بعضها زي الصوره دي كده



وطبعا لما تكون القطايف طازه وطريه هاتلزق على طول



بعد كده نسقطها فى زيت سخن وعميق زي الصوره دي كده لحد لما تتحمر



وبعد كده باطلعها على ورق كلينكس دقيقتين بس تصفي زيتها وبعدين اسقطها فى الشربات او الشيره او القطر ونسيبها دقيقه واحده بس عان ما تشربش سكر اوي



ونرضها بقى ونقدمها بالهنا والشفا



نكهه يلا بقى رمضان قرب يخلص اعملي وورينى

قطايف بالكريمه

جيت جيت جيت

جايبالكم شوية قطايف بقى يا قوم حاجه لا تقاوم بجد

عايزه اقولكم ان اي كمية باعملها من القطايق بتتمسح مسح عن آآآآآآخرها

الاول هنحتاج مقدار من القطايف الى احنا عملناها امبارح عجينة قطايف

وقولنا المقدار بتاعنا ده هايعمل لنا كميه اد الى فى الصوره الى فوق دي بالظبط

نروح على الشغل بقى

الاول هانعمل القطايف بالكريمه

ممكن نستعمل كريم بتاسيير الى عملنا مع بعض قبل كده

وممكن نستعمل الكاستر العادي او المهلبيه كمان ما تقولش لا

طبعا هانعمل الكاستر ونسيبه يبرد ونعبيه فى كيس الكريمه ولو مش عندك ممكن فى كيس بلاستك المهم حاجه نضخ بيها داخل القطايف

نروح بقى على القطايف نعملها زي ما نيجى نعمل قرطاس بالظبط

اهو شايفيين الصوره دي

ونضغط عليها كويس لحد ما تلزق فى بعضها والكلام ده اول لما تتعمل على طول او بعدها بشويه بس نكون مغطينها كويس عشان ما تنشفش ولما بتخلص الكميه بيكون شكلها كده

بعد كده بنحمرها فى زيت عميق زي كده

ونطلعها على كلينكس ويكون شكلها كده ان شاء الله

بعد ما تنزل الزيت الزياده نكون مجهزين شربات حلويات (شيره او قطر ) ونسقطها فيها ونسيبها دقيقه واحده بس وبعدين نطلعها عشان ما تشربش سكر كتير اوي

بعد كده بكيس الكريمه بقى نحشيها كاستر ونزينها بالمكسرات او فواكهه جافه او كمبود اي حاجه الى تحبيه وبتكون شكلها كده

ونرصها بقى زي ما تحبي حاجه زي كده مثلا

ممكن كمان تعمليها على الشكله ده انك تقفلي القطايف من الجنبين بس فبتكون زي المركب كده ركزي كده فى الصوره دي

او تقفليها من الاربع نواحي وتبقى مربعه كده بتكون جميله اوي اوي وبتاخد حشو كتير

واتمنى تكون عجبتكم ان شاء الله

واستنوا المفجأه الكبيييييييييييره بقى لعشاق الشيكولاته عاملاكم قطايف بالشيكولات الى كلوها عندي اغمى عليهم يومين بعدها

هههههههههههههههههههههههههه

الى يجرب يقولي يا ولاد بسررررررررررعه رمضان هايخلص وانتم بتدلعوا على فكره

عجينة القطايف

السلام عليكم

معلش يا جماعه والله باتاخر عليكم انا عارفه

اجدع سلام لزمايل البت اختي الى مستنيين عجينة القطايف يا قوم

المهم ندخل على الشغل بسرعه بقى

هانعمل عجينة القطايف فى البيت بدل ما نشتريها من بره

سامعه واحده من الحريم الشلت اياهم بتقول وليه وجع القلب ده ماهو على اول كل شارع فى واحد بيعمل كنافه وقطايف

الحقيقه انا كنت باشتريها برضه بس القطايف دي لها مشاكل كتير

اولا الى انا باعملها ما شوفتش زيها فى اي مكان يا اما تجيلى معجنه او ناشفه ولا بايته او تطلع غريبه جدا وبعد ما اقليها تبقى زي الحطبه ما تنفعش تتاكل اصلا ده غير بقى النضافه فى البيت

ثانيا القطايف لازم تكون طازه يعنى لازم تجبيها وقت ما هاتعمليها بالظبط او على الاقل فى نفس اليوم

ثالثا انى باقدر اعملها اصناف بقى صغير وكبير وحركات كتير بقى

خلاص اي واحده من الحريم الشلت بقى تسمع وهى ساكته

العجينه سهله جدا جدا

هاتروحي وتحطي الاول 2 كوب ماء وكوب حليب (وممكن 3 كوبايات ماء بس عاااادي بتمشي ) وتحطي معاهم معلقة خميره فوريه او خميره عاديه وتضربيها فى الخلاط عشات تدوب وبعد كده تحطي 3 كوبايات دقيق وتضربي فى الخلاط

مافيش دقيقتين بتكون اتخلطت وبقت تمام التمام تتاكدي بس ان مافيش دقيق لازق على جدار الخلاط وكده وبعدين تحطيها فى دورق تاني وتبسبيها بقى تخمر لو كانت خميره عاديه ساعه على الاقل لو كان الجو حر

الخميره الفوريه بالكتير نص ساعه تكون بقت تمام التمام وعشان تعرفي انه خمرت وتنفع للشغل تكون فيها فقاقيع زي الصوره دي كده

كده خلصنا العجينه نروح بقى على البوتجاز ونحط صنيه اي صنيه انا فضلت التيفال عشان ما تلزقش وتدهنيها زيت بالفرشه حاجه خفيف اوي اوي

ولما تسخن وتبقى تمام تبدأي تصبي العجينه بالدورق زي كده

ركزوا كده وشوفوا قوام العجينه ازاي وبتصبيها وهي بتفرد وتديكى الحجم الى انتى عايزاه

ومش بتاخد الا دقيقه واحده على لنار وبتشليها اول بس ما تجمد

لاحظي كده الاثنين الى تحت خلاص جمدوا واستوو والاثنين الى فوق لسه عليهم ثواني

وتطلعها وطبعا تفرديها على صنيه كده عشان ما تلزقش فى بعضها وده شكلها من فوق والاحمر ده من تحت طبعا

وبتكون جاهزه على طول على الشغل يعنى ابدأي شغل فيها حتى وهى لسه دافيه بتكون سهله جدا فى التطبيق وهانعمل منها اصناف كتير اوي اوي اوي والكميه الى انا عملتها دي تعمل وليمة قطايف زي الى فى الصوره دي

عايزه حد يجرب ويتكسف ويقول انه جرب بلاش رخامه بقى

وبالنسبه للقطايف الى فى الصوره دي احنا كلناها عشان لو حد حب يحط عينه فيها يعرف انها خلاص اتاكلت من كام يوم

هههههههههههههههههههه

انشاء الله اول ما اقدر هانزلكم طريقة الاصناف الى فوق دي مع بعضها

وعملت امبارح قطايف بالشيكولاته ما لهااااااااااش حل برضه هاقولكم عليها


كل الشلت يقوموا من هنا يشتغلوا يلاااااااا