الخميس، 24 سبتمبر 2009

تورتة الفراشه (فى عيد ميلاد احلى فراشه حنين القلب )










التورته دي خصيصا مخصوصا عشان حبيبة قلبي حنين القلب


الى عيد ميلادها النهارده وانا اخترت لها تورته الفراشه الجميله دي عشان ان شاء الله تكون سنه الوانها مزهزه كده مع حنين الصغيره ان شاء الله


كل سنه وانتى طيبه يا حنين وعقبال ميت سنه سعاده وهنا يارب



يلا بقى عشان اعلمكم تعملوا التورتايه دي عشان كلكم تعملوها وتجبوها لحنين




اولا احنا هنحتاج لاثنين كيكه مدوره زي دي كده



ممكن نعمل كيــــك عــــادي من المقدار بتاعي الى عملناه قبل كده (المقدار الواحد هايعمل كيكتين )



وممكن نعمل كيك اسفنجي لكن انا مش باعمله كتير بصراحه بافضل الكيك العادي



هانجيب الكيك ونشق كل كيكه فيهم اثنين بالعرض بحيث تبقى طبعتين يعنى عشان تدينى تورتايه من اربع طبقات وممكن نسيبها من غير ما نشقها مش مشكله



هانجيب بقى الكريم شانتيه ونحط طبقه كيك وطبقه كريمه لحد ما يخلصوا الاربع طبقات بسلام



وبعدين نغطيها كلها بالكريم شانتيه



لحد لما تدينى تورتا يه مدوره متغطيه بالكريمه البيضا تماما

معلش نسيت اصور الخطوه دي

المهم بعد كده بقى هانعمل ايه

نقسم التوراتايه دي بالسكينه الكبيره نصين بالظبط

وبعدين نلف النصين بحيث ان حواف الصنيه الاثنين يكونوا للداخل ولامسين بعض

شوفوا كده الصوره دي عشان تتخيلوا الوضع



ايه الى فى النص ده

انا كنت عامله كيكه تانيه صغيره كده قطعت منها جزئين بيضاوين عشان اعمل منهم راس الفراشه وجسمها وحطيتها جمب الاجزاء الكبيره كده وغطيتها بالكريمه برضه

ينفع من غير كيك يعنى نعمل ده بفواكه مثلا هاتبقى حلوه برضه

بعد كده بقى هانبدأ اول حاجه بكيس الكريمه وقمع الورده نعمل حرف للكيكه عالي عشان نديها شكل الفراشه فعلا ونحدد الشكل بتاعها

ولو حبيتوا نبقى نخطي الجوانب قبل ده بمكسرات مجروشه او جوز الهند او مش مهم خالص

وبعد كده بقى انتى وزوقك وفنك كده وتعملي جناحين الفراشه متماثلين يعنى شبه بعض

وطبعا انا مزينه فوق بتفاح وخوخ ومشمش وده الى كان عندي يومها

وطبعا ممكن يكون فى فاكهه بالوان تانيه كتير تعمل اشكال مذهله يعنى

بس كده وتكون جاهزه

كل سنه وانتى طيبه يا حنين وياااااااارب دايما منوره البلوج كده وعقبال ما تقومي بالسلامه ونطمن عليكى

والى يجرب يفرج عليها حنين ويجبلي حته

ههههههههههههههه




هناك 12 تعليقًا:

kochia يقول...

كل سنة وانت طيبة
وكل سنة وهي طيبة
وتسلم ايديكي

عاشقه الرومانسيه يقول...

كل سنه وحنين طيبه
ورحمة كمان طيبه وبصحه وسلامه
تسلم ايدك
انتى بجد عقليه مطبخيه فذه
(:

صبرني يارب يقول...

كوشيا

وانتى طيبه يا جميل وتسلمى

صبرني يارب يقول...

عاشقه الرومانسيه

ايوه يا اختي عشان تعرفوا انى خساره فى البلد دي
هههههههههههههه

نكهة مغربية يقول...

كل سنة و انت و حنين طيبين و الله يجعل أيامك عيد في عيد
ربنا يفرح قلبك بيهم يا رب
ممموووححح

nour_elden_1 يقول...

هاتفيك جدا

http://noureldens.maktoobblog.com

nour_elden_1 يقول...

هاتفيك جدا

http://noureldens.maktoobblog.com

نكهة مغربية يقول...

أهلاااااااااااا يا قمر فيكل ده اليوم عيد علاشان زرتيني النهارده

المدونة نورت
يا عسل انت جربي أي حاجة و حتطلع تحفة على ضمنتي و الله
بس أنا عوزة أقول لك ان الايسكريم بيطلع جنان مع الكيك و هي مرشوشة بالقطر
ده اللي انا أعرم بس جربي و قولي لي
موووححح

نورة يقول...

اختي العزيزة بالنسبة للبسبوسة الاردنية اردت ان احضرها لكن عندما قرات المقادير لم اجد السكر فهل تصلح دون سكر بمعنى مذاقها لن يكون حلو بدون شربات ام انني استطيع ان اضيف الى المقادير كوب او نصف كوب سكر
من فضلك الرد
نورة ...مع تحياتي

صبرني يارب يقول...

نكهه يا قلبي متشكره خالص والله

انتى كلك ذوق يا قمر

والايس كريم انا جربته مع الكيك فعلا بيبقى احلى من البسكوت كتير بس ما جربتوش بالقطر هاجرب ان شاء الله واقوووولك

مووووووووووح يا جميل

صبرني يارب يقول...

نور الدين انت مستقصدنى على فكره فى كل مدوناتي

حاضر ياعم هانيجى ان شاء الله

صبرني يارب يقول...

نوره

بصي يا جميل هى اصلا بتتسقي شربات بعد كده فمش بتحتاج لسكر فى العجن بقى

لكن انا ساعات كنت احط ربع كوباية سكر كده مع البيض عشان وانتى بتخبزيها تطلع لونها وردي كده وحلو

فحطي ربع كوباية سكر ودي اختراع مني يعنى

اي خدمه يا جميل