![](https://blogger.googleusercontent.com/img/b/R29vZ2xl/AVvXsEiYxdvfKrWgUGLHOYzkNw_5VGmoKfegVgZ0WHLFKjkq449mqHJz8TrpUj_kefQP6KkL0eAiUUMoj5mCV1TvUpJwnGaZfBdgOxVpwNI-ZDNxft_ts7OkrBPmSlL4_Fk6J9v5rPYiU3HUW4Q/s320/IMG0814A.jpg)
كل سنه وانتم طيبين يا حلوين
واول يوم اكتب فى رمضان وادعولي اعرف اكتب بعد كده
النهادره هانعمل حاجه خفيفه كده سريعه تنفع جنب الاكل خصوصا فى رمضان
احيانا باكون عامله اكل ناشف وعايزه جمبه نوع شوربه خصوصا فى الصيام
والشوربه دي كانت جدتى الله يرحمها الى معلمهالي وكانت بتعملها حلوووه اوي
انا باعملها زيها لكن برضه مش باحس انها زي بتاعة تيته
الله يرحمها يارب ويقابلنا فيها فى الجنه ان شاء الله
انا باحب اعمل الشوربه دي بالكبده وخصوصا كبدة الدجاج
لكن ممكن تتعمل طبعا بكبدة البقر او حتى تتعمل بلحمه مقطعه صغير اوي
او قلب برضه يمشي
انا هنا جبت كبد وقوانص الفراخ ونضفتهم كويس طبعا وبعدين فى حله تحطي معلقة سمنه ولما تسخن تحطي الكبده وتقلبيها وتحطي عليها فلفل اسمر ومستكه واي بهارات تحبيها للحوم عموما وممكن عصير بصل او حتى بصل مفروم
وتغطي عليها وتسبيها لحد ما تنزل مايتها وتبدأ مايتها تنشف وممكن نزودها نص كوباية مايه تستوي فيها ويبقى شكلها كده
المهم لما تبدأ تستوي الكبده نبدا احنا نجهز الشوربه بقى
هانجيب حله ونحطها على النار ونحط فيها معلقتين سمن بلدي ولما تسخن نحط معلقتين دقيق ونحمرهم كويس لحد ما يبقى لونهم بنى فاتح زي كده
![](https://blogger.googleusercontent.com/img/b/R29vZ2xl/AVvXsEic2sy02BLEykT5DeJ0mJkn2i9-RS9rZtPWoQFfAgJbRM5Py33u4fgHyIe34Wvd2sa1BkuFBJtHh1VwEWz5lEVuUel4sIagb4DiND3P9-tpOfOEJ0MWbOTw5dWUmaPmntETI4bjRo5l7SQ/s320/IMG0813A.jpg)
ولما يبقى لونه كده نحط عليه شوربه سخنه شويه شويه حوالي لتر شوربه ولو مافيش شوربه نحط مايه حتى عادي
ولما نقلبها كويس وما يبقاش فيها كرات دقيق ولا حاجه نزود عليها الكبده بالصوص الى نازل منها بكله كله ونقلب كويس
ونسيبها تغلي دقيقتين ثلاثه كده وطبعا نظبط ملحها وبس كده تبقى جاهزه
ساعة التقديم ممكن نزود عليها شويه كريمه لباني ونقلبها لكن انا مش باحب احط حاجه فى حليب مع الكبده واللحمه عشان الكالسيوم بيمنع امتصاص الجسم من امتصاص الحديد
وممكن نحط على الوش شوية بقدونس وبالهنا والشفا
وطبعا الى يجرب يقولي
والمناسبه السعيده دي ان احنا فى رمضان يعنى
الى عايز اي صنف يقوله وانا اعمله ان شاء الله لو كان هاينفع
هناك 6 تعليقات:
شوربة جديدة وغريبة عليي
تسلم ايدك ياحبيبتي
رمضان كريم عليكي
وربنا يديكي الصحة
أهلا يا قمر
حبيبتي شوربتك دي باين انها لديدة موت
أنا أول مرة أشوف شوربة بالكبد و القناصي كده
بس باين أنها تحفة شكرا جداااا على الحجات الحلوة دي
مممووووححح
نواره
جربيها بس يا جميل هاتعجبك ان شاء الله انا بحبها اوووي
كل سنه وانتى طيبه
نكهه
تسلمي يا جميل جربيها بس وقوليل عملتي ايه
منوره
تسلم ايديكى يا قمر اول مرة اسمع بيها بس اجربها ان شاء الله
تحياتى
مي
تسلمى يارب ونورتي يا جميل
إرسال تعليق