الخميس، 29 يناير 2009

الكوسه بالبشاميل

الكوسه يا حلوين اهو ما تقولوش حرماكم من حاجه عشان انا فى حد استعجلني فيها مش فاكره مين معلش السن بقى يا اخوانا احمدوا ربنا
المهم
المقادير بقى
حوالي كيلو كوسه او خضار مشكل كوسه وبسله وجزر وطبعا مقشرين ومقطعين زي الكوسه الى فى الصوره دي كده قطع طوليه
و3 كوبايت صلصة بشاميل
وحوالي نص كيلو لحمه عصاج
الطريقه بقى يا حلوين
مافيش اسهل من كده صور على فكره واااااااضحه جدا سقفولي عليها من فضلكم
الاول بنجيب صنيه ونحط فيها نص معلقة سمنه بلدي ولما تسخن نحط الكوسه ونشوحها لحد لماااااااا تنشف من الميه خالص مهم اوي حكايه تنشف دي بس ما تتحرقش من فضلكم
زي الصوره دي كده بالظبط
ولو عايزين نعملها خضار مشكل نزود عليها خضار مشكل برضه ونشوحها لحد ما تنشف زي الصوره دي كده برضه

بعد كده نروح على الصنيه او القالب الى هانعمل فيه ونحط بقى اول حاجه اربع معالق كبار تقريبا بشاميل زي كده



بعد كده نرص الكوسه تماااام زي كده واحده جنب اختها زي الصور دي كده وبعدين نحط عليها حوالي نص كوباية بشاميل او يعنى لحد لما نغطي الكوسه




وبعد ما نرص الكوسه ممكن بعد كده نحطط الخضار الباقي بس نخلي الكوسه تحت عشان تمسك الخرطه لما نيجى نقطع ارتباطيعنى
وبعد كده نفرد اللحمه العصاج على الخضار زي كده بالظبط



وبعدين نرجع نرص الكوسه برضه بس المره دي لو حاطين خضار نحطه قبل الكوسه يعنى الكوسه تبقى على الوش زي الصوره كده تمام وبرضه واحده جنب اختها وبعدين ننحط بقى باقي البشاميل كله عليها من فوق زي الصوره دي كده بس نساويه وما نخليش الكوسه باينه خالص






وده قطاع طولي للصنيه ههههههههههههههههه صوره بالجنب يعنى عشان تشوفوا الطبقات وترتيبها قبل ما تدخل الفرن




وده شكلها بعد ما طلعت من الفرن وانا جوعت لا سيما انا شامه ريحه العصاج الى انا باعمله على النار اصلا


وده قطاع طولي برضه للصنيه بعد ما طلعت ملاحظين اللون والطبقات وكده يعنى ولا ايه

مصوره كبيره انا والله





وبعد ما تبرد بقى يا قطاقيط شويه نقطعها ونطلعها بالراحه كده تتقدم زي ما انتم شايفنها كده





اكله جميله جدا جدا وانا بامووووووت فيها وبتبقى حلوه فى العزايم كصنف خضار غير تقليدى يعنى وممكن تقدموها عادي مع عيش وسلطه خضرا او كول سلو تبقى برضه ما لهاش حل
والف هنا والي يجرب يقولي والى مش فاااااااااااهم ......... لا يقولي برضه زي بعضه








هناك 21 تعليقًا:

Mony يقول...

تسلم ايدك يا ام مريم

انا بعملها كده برضه


بس بعملها بس
ماباكولهاش
اصلي مابحبش الكوسة


تسلم ايدك يا قمر

صبرني يارب يقول...

تسلمى وتعيشي يا موني وتسلم اديكى

اه عادي ما احنا بنعمل الى على مزاج الناس الى هتاكل هو احنا يعنى بناكل كل الى بنطبخه ههههههههههههههه

نورتي ياجميل

kochia يقول...

حلوة بجد تسلم ايديكي

انا بحشيها بالعصاج وبحط فوقها البشاميل بس مش بتكون خرطة دة علي بعضها
ومرة عملناها قوارب يعني حشيناها زي القوارب باللحمة ثم البشاميل برده علي الوش

صبرني يارب يقول...

كوشيها

نورتي يا جميل

اه مش بتطلع خرطه على بعضها عشان مش بتنشفي الكوسه كويس قبل ما تحطيها فى الصنيه

والقوارب اه دي عارفاها برضه بتبقى حلوه نورتي يا جميل

Lady E يقول...

كالعادة بتجيبلنا اكلات بجد جميلة يا صبرني وان شاء الله هجرب الكوسة بالباشميل بس على ضمانتك لأني جربت البامية بالبشاميل وطلعت اعوذ بالله من الشيطان الرجيم وكان مصيرها وحش عااااا

وبالنسبة للبشاميل فانا بحط شوربة مع اللبن علشان النكهه بتاعت الشوربة مش اكتر (مش توفير في اللبن يعني)
ولأن بيتهيئلي لو عملت بشاميل باللبن بس طعمه هيبقى زي المهلبيه بس على حادق
افيديني ربنا يكرمك ويجعله في ميزان حسناتك

صبرني يارب يقول...

ليدى

ايوه يا جميل ماما بتحب اوي تعمل البشاميل بشوربه فعلا وهو فعلا بيبقى حلو عادي الحاجات دي ما بتفرقش معايا اوي هههههههههههههههههه

اعمليه زي ما بتعمليه بالظبط بس حتى الى باللبن ما بيبقاش وحش برضه

وما تقلقيش من الكوسه خااااالص

باميا ايه يا امي الى عاملاها بشاميل دي هههههههههههههه

مش عارفه ما جربتهاش

Lady E يقول...

هههههههههه اوعي تجربيها

اصل انا كنت بتفرج على مسلسل راجل وست ستات لقيت رانيا بتقول لعادل انا عملالك بامية بالباشميل فقولت اكله جديده لما اجربها :) وعينك ما تشوف الا النور

الباميه بالباشميل بااااااطل

أحــوال الهـوي يقول...

صبرني يارب علي الطبق الشهي الجميل ده

تسلم ايدين جنابك


تحياتي

الفقيرة إلى الله أم البنات يقول...

تسلم إيدك
بصراحه انا بحب الكوسه قوى فى أى شكل من الأشكال
كمان عملت افتكاسه كوسه بالهوت دوج او السوسيس والبصل والجنبه الموتزريلا كانت توحفه
بس للى بيحب الكوسه

دام مطبخك عامر وفى ميزان حسناتك

صبرني يارب يقول...

ليدى

ولا يهمك ماهو احنا لازم نجرب عشان نتعلم مش عايزه اقولك ابو رياض حصله ايه ههههههههههههههه ياما شرب مني

صبرني يارب يقول...

احوال الهوى

تسلم وتعيش يا استاذنا

صبرني يارب يقول...

الفقيره

لو تحبي يا جميل تكتبي الوصفه بتاعة الكوسه دي وتبعتهالي انشرها على المدونه هنا باسمك ياريت يبقى من حظنا يا جميل

وتسلمى يارب ونورتي

خمسة فضفضة يقول...

السلام عليكم ورحمة الله وبركاته

تسلم ايدك يا صبصب

بس انا مش بحبها خالص خالص ، احب اكتر الكوسه المحشيه او المعموله صينيه بالطماطم ( زي البطاطس كده ) وعلي وشها عصاج

سلام

صبرني يارب يقول...

فضفضه

لولا اختلاف الاذواق لبارت السلع بس انا باموت فيها خضار مشكل زي الى فى الصوره دي

والكوسه بصلصه برضه عادي كله شغال هههههههههههه

نورتي يا جميل

بنت الغربة يقول...

ازيك ياصبرنى ياحبيبتى
انا عمرى ماعملت الكوسه كده
بس هاجربها وااقولك..
انا جربت الكنافه وطلعت حلوة قوى
انا زودت عليها سكر البدره
انا لى طلب
لو تعرفى طريقة عمل الشريك ياريت تقوليلى
معلش مخنوقه وباخنقك
تحياتى ياقمر

صبرني يارب يقول...

بنت الغربه

ايه الشيريك ده يا داليا مش عارفه

والف هناا لكنافه


مش عارفه ايه الى انتى طالباه ده فسريها كويش
هههههههههههههههههههه

وعلى فكره انا صورت خلاص البلفترووول اخيرا
وهانزله بقى بعد الاكلير ان شاء الله

الشريف / احمد عبد السميع الجارحى يقول...

عاشق تراب مصر الأول يرجو ان يساعده حسني مبارك ! كتبهـا : نور حمود - بتــاريخ : 6/6/2009 7:28:47 PM, التعليقــات : 0 وصلت المدونة استغاثة من مواطن مصري ننشرها لاطلاع المسؤولين في مصر عليها لتحقيق رغبته الخيرة: نفسى أساهم فى برنامج الرئيس الانتخابى الداعى لبناء الف مدرسة جديدة عـاشـق تـراب مـصـر الأول . نفسىـ أساهم فى برنامج الرئيس الانتخابى الداعى لبناء ألف مدرسة جديدة . نـداء من عاشـق تراب مصر الأول الشريف / احمـد عبد السميع الجارحى انا مواطن مصرى بيحب مصر بجد وبأعشق كل ذرة تراب من ترابها بحب خدمة الوطن والمواطنين وهذا الحب سبب لى مشاكل كثيرة كلها تهون فى حب مصر والمصريين وعشق تراب مصر انادى جميع عشاق مصر وترابها مساعدتى فى خدمة معشوقتى مصر . الموضوع باختصار شديد لأنى لو هأفتح فى الكتابة هياخد من وقتكم الثمين الكثير لأنه موضوع عمره أكثر من سبع سنوات عجاف الموضوع هو المساهمة فى بناء مدرسة من الألف مدرسة الجديدة المزمع بناؤها حسب برنامج فخامة الرئيس حسنى مبارك الانتخابى . باختصار ( بناء مدرسة احمد عبد السميع الجارحى الثانوية بقرية الخواجات مركز يوسف الصديق محافظة الفيوم ) لقد طلب منى أهالى قرية الخواجات التبرع بقطعة ارض مساحتها لاتقل عن 2000 متر مربع وهذا التبرع مخصص لبناء مدرسة لأهالى القرية والقرى والعز ب المحيطة بالقرية وذلك لعدم وجود مدرسة قريبة واقرب مدرسة تبعد 12 كيلو . وفعلا لبيت ونفذت أمرهم لى وأنا البى نداء كل مصرى ولاأخذل أحد بعون الله وتوفيقه وأى مصرى عايش على ترابها أنا خادمه . لأننى عاشق تراب مصر والمصريين الأول . وأذوب فى معشوقتى مصر. خلاصة القول . فى يوم الخميس الموافق التاسع من أغسطس عام الفان وواحد قمت بالتبرع بقطعة أرض مساحتها 2100 الفان ومائة متر مربع وهذا التبرع لصالح هيئة الأبنية التعليمية بمحافظة الفيوم مخصص لبناء مدرسة احمد عبد السميع الجارحى الثانوية بالخواجات ومنذ عام الفان وواحد وحتى الأن ورغم مرور أكثر من سبع سنوات عجاف على تاريخ التبرع لم يتم فعل اى شىء من قبل الوحدة المحلية بالشواشنة التابعة لها القرية أو من قبل هيئة الأبنية التعليمية بمحافظة الفيوم حتى مجرد قبول أو رفض التبرع لم يبلغونى به وكأننى ارتكبت معصية أو خيانة عظمى أو يمكن أعتبرونى فى عداد الأموات حتى لوكانت وافتنى المنية كانوا بلغوا الورثة انما ولاردوا ولاصدوا ياعاشقين ترابها مثلى حتى مجرد استلام الأرض من قبل الهيئة لم يتم ولست أقول بناء المدرسة وفى خلال هذه السنوات السبع العجاف تقدمت وتقدم أهالى القرية بالعديد من الشكاوى للسادة المسؤلين والسادة الصحفيين فى غالبية الصحف المصرية ولا شىء يتم أى شىء مجرد قبول أو رفض التبرع لم يتم . وكأن الأرض نجسة لايجوز شرعا بناء مدرسة عليها.أو تتخذها شياطين الجان سكنا لها . لا قبول ولا رفض ولا أعلم لماذا . والله العظيم هى أرض طيبة قطعة من مصر التى أعشقها مهما فعلت بى فلم ولن تثنينى عن عشقها وعشق ترابها حتى مماتى . ولكن هذا الكم من الشكاوى لم يحرك ساكنا . وكأننا نؤذن فى مالطة ومن ضمن ألاف الشكاوى استغاثة بفخامة الرئيس حسنى مبارك شخصيا .وكتبت عن هذا الموضوع العديد من الصحف المصرية ولا مجيب . أريد ويريد معى أهالى القرية سرعة استلام الأرض و سرعة بناء المدرسة ومعاقبة المخطئين . اذا كان يوجد مخطئين يعرقلون تنفيذ برنامج الرئيس الانتخابى . أرجو سرعة الحسم فى هذا الموضوع . وذلك لرفع المعاناة عن طلاب العلم من أهالى القرية وأهالى أكثر من ثلاثون قرية وعزبة محيطة بقرية الخواجات محرومين من أى نوع من أنواع التعليم الثانوى . سواء ثانوى عام أو تجارى أو زراعى أو صناعى أو أزهرى أقرب مدرسة ثانوية تبعد 12 كيلو . أرجو من السادة المسئولين فى الوحدة المحلية بالشواشنة مركز يوسف الصديق التابعة لها قرية الخواجات والسادة المسئولين فى هيئة الأبنية التعليمية بمحافظة الفيوم . افادتى بخطاب رسمى بقبول التبرع أو رفض التبرع واذا كان الجواب رفض التبرع يذكر فيه أسباب الرفض . أرجو من عشاق تراب مصر مساعدتى فى تقديم هذه الأرض الطاهرة وهى شىء بسيط هدية منى لمصر ولأبناء مصر المخلصين . ومساهمة بسيطة جدا فى برنامج فخامة الرئيس حسنى مبارك الانتخابى . للتواصل ت 0112218560 / 0105526640 وشكرا جزيلا نناشد فخامة الرئيس محمد حسنى مبارك معاقبة من يعرقلون برنامجه الانتخابى وسرعةبناء المدرسة وشكرا جزيلا لفخامتكم عاشق تراب مصر الأول الشريف / احمد عبد السميع الجارحى www.elgarhy.ahlablog.com

wesam يقول...

تسلم الايادى على الاكلات الجامدة دى بس ممكن تقوللى ازاى اعمل الارز البسمتى لان ما ليش حظ فية ابدا وكل ما اعملة يطلع بايظ وشكرا ليكى

صبرني يارب يقول...

وسام
الف شكر اولا

ثانيا بالنسبه للرز البسمتى هو بياخد مايه زياده عن الرز المصري

يعنى كوباية رز تاخد كوبايتين مايه

وطبعا انت بتغسل الرز وتحط عليه المايه وتحطه على النار لحد ما يغلي ويبدأ يتشرب المايه بتاعته بتحط الزيت او السمنه وتقلبه بالراحه وترجع تساويه فى الحله تاني و بتهدي النار عليه خالص وتسيبه حوالي 20 دقيقه وهايكون استوى ان شاء الله

ده لو هاتعمله رز ابيض

لو هاتضيف توابل ممكن تضيفها مع المايه عادي

لو هاتعمله ببصل وكده زي الكابسه بتصفر البصل الاول وبعدين تضيف التوابل وبعدين الشوربه برضه ضعف الرز وبعدين تضيف الرز
وتكمل عادي

اي خدمه

ام مريم موسى يقول...

تسلم ايدك ياام مريم هو اسم ام مريم ده مش بيخيب كلهم قطاقيط وعساسيل وشطار بجد تحففففففففففففففففففففففففففه بس ممكن تعمليلى شوريه المشروم عشان انا جوزى زهقنى عمال يقولى اعمليهالى ومشكورين ياست الكل

صبرني يارب يقول...

ام مريم حبيبتى ربنا يخليكى يارب

نورتينى يا حبيبتى بس معلش انا نقلت المدونه

ياريت تراسلينى على الميل ده واديلك المدونه الجديده
sbarny_yarb@yahoo.com
وان شاء الله ارجع اشتغل فيها