اكلير بالشيكولاته

الاكلير بالشيكولاته

طبعا انا باموت فيه يا جماعه الاكلير ده واكيد اكيد انتم كمان بتحبوه

وفى ميت حد طالبه مني عشان كده تلاقوني عماله اعمل بوستات ورا بعض

هو مشكلته انه موال شويه من حيث انك بتعملي ميت حاجه معاه عشان يكتمل

هانحتاج هنا عشان نعمله الآآآآتي

مقدار من عجينة الشو

مقدار من الكريم باتسيير

مقدار من صوص الشيكولاته

من النوع الاولاني الجامد

نبدأ الشغل بقى

احنا بعد ما جهزنا العجينه زي كده بالظبط

هانجيب العجينه دي او جزء منها ونحطه فى قمع الكريمه او حتى كيس بلاستيك عادي جدا ونعمل فاتحه فى الكورنر بتاعه من تحت

المهم اننا نشكل الاكليز زي الصوره دي مثلا

وده اكتر شكل انا باحبه وافضله مش عارفه ليه

وممكن كمان نعمله على شكل صوابع طويله او وردات او اي شكل تاني

المهم هانبطن الصنيه الاول زي ما انتم شايفين عشان ما يلزقش وبعد كده نشكله زي ماهو فوق كده

ونحطه فى فرن حامي حوالي 200 درجه وبتقعد حوالي 20 دقيقه المهم نبص عليها بعد ربع ساعه كده ونستنى لما يبقى لونها دهبي زي كده

وطبعا لاااازما ولا بد تنتفخ زي الصوره دي بالظبط كده والا تبقى العجينه بتاعتكم مش مظبوطه

بعد كده هانجيب مقدار من الكريم الباتسيير وطبعا انا عملته بالشيكولاته هنا اهو عشان يبقى لايق على القاعده المشكلته دي .

وعلى فكره يفنع كاستر برضه بالشيكولاته مش هايقول لا

وينفع كريم شانتيه والله مش هايقول لا برضه زي ما تحبوا

هانحط الكريم باتسيير بقى فى قمع الكريمه برضه او قرطاس الكريمه ونحط القمع الى مافيش فيه نقشه وله بوز رفيع نسيت اصوره معلش

وبعدين نمسك الاكليره ونعمل فيها فتحه من تحت زي الصوره دي بالظبط وممكن نعمل الفاتحه من الجنب برضه عادي

وبالقمع ونحشيها بالكريم باتسيير نملاها به

وبعد ما نخلص الكميه دي

نجيب صوص الشيكولاته الى احنا عاملينه قبل كده ومجهزينه ودافي عشان يبقى سايح ونمسك الاكليره ونحط وشها فى الصوص ونطلعها ونرص على صنيه كده

ولما تبرد الشيكولاته عليه وتجمد نبدأ نشيله واحده واحده بمقصوصه او حاجه عشان الشيكولاته هاتكون لازقه فى الصنيه وبعدين نرصها فى طبق زي كده

اه وطبعا ممكن نعمله بالشيكولاته البيضا او نعمله شويه كده وشويه كده يبقى زي الصوره الى فوق خالص دي بيبقى مالوش حل بشكله فى الطبق

وبالهنا والشفا

اه بالنسبه لمقدار عجية الاكلير الى عملناه تحت ده يعمل حوالي 3 اطباق من الى في الصوره ده وجايز اكتر كمان

وممنوع اي افتكاسات وحد يقولي احط بكنج بورد عشان ترتفع اكتر لا البكنج بودر هايخليه يفرش البيض هايعمل كل حاجه ما تقلقوش

وطبعا طبعا الى يجرب يقولي

ومافيش مانع يدوقني يا بت يا هبه يا مصوره خايبه ومساعده عبيطه

عجينة الشو

عجينه الشو طبعا مهمه اوي فى عالم الحلويات وبيتعمل منها اصناف كتير جدا جدا

غربي زي الاكلير مثلا وغربي زي بلح الشام

فانا قلت اعملها فى بوست لواحدها عشان هانستخدمها كتير لسه

قدامي على المطبخ

المقادير :

كوب ونصف دقيق

كوب ماء

نصف كوب زيت على سمن

من 8 الى 10 بيضات + فانيليا

الطريقه :

اول حاجه بنعملها بنحط كوباية المايه على النار ومعاها الزيت والسمن وعلى فكره انا جربت اعملها زيت بس طلعت ناشفه جدا وبتلزق فى الصنيه وجربتها سمن بس او زبده بس وبتطلع طريه اوي زياده عن اللزوم لكن لما جربتها الاثنين على بعض طلعت ناجحه جدا

المهم حطيناهم على النار ا هو

ولما يغلوا بس ما نسبهومش على النار يغلوا لحد ما ينشفوا هههههههههههههههه

لما يغلوا على طول نضيف الدقيق المنخول مره واحده ونقلب بسرعه جدا هانلاقي على طول طلعت عجينه زي الى فى الصوره دي واتكورت حوالين المعلقه

بعد كده هانسبها تبرد شويه وما نسيبهاش كتير عشان ما تنشفش وتعذبنا لما نيجى نضيف البيض

ولما تبرد شويه نبدأ نضيف البيض واحده واحده وبعد كل بيضه نقلب بالمعلقه لحد ما البيضه تختفي مع العجينه

والمقدار ده بياخد حوالي من 8 الى 10 بيضات حسب الدقيق بقى والحركات دي

وطبعا مع البيض نحط الفانليا

المهم يطلع العجين فى الاخر زي الصوره دي كده تمام
عجينه طريقه جدا وناعمه .

اقولكم خليكم فى النص وحطوا 9 بيضات ههههههههههههههههههه عارفه انا الامخاخ بتاعة وانا اعرف منين

المهم كده عجينة الشو جاهزه بقى نقدر نعمل بها شغل جامد جدا

وان شاء الله اول حاجه هانعملها النهارده اكلير الشيكوللااااااته عشان فى ناس مصدعينى عليه وكتبته فى ورق يجى عشر مرات وبيضيعوا الورق وما شوفتش منهم ولا اكليرايه واحده ستاااااات شلت .

اه ومعلش التصوير مش اد كده عشان المساعد بتاعي كان سكه جدا واي كلام
سامعه يا بت يا هبه ؟؟؟ ساااااااااااااااكه انتى مساعد ساكه

صوص الشيكولاتة

طبعا صوص الشيكولاته ده مهم اوي اوي فى الحلويات الغربي
هانستعمله كتير

انا عن نفسي باعمله بطريقتين

الاول : وبيكون جامد وباستعمله مع البيتى فور او الاكلير وبيكون نص كيليوا شيكولاته عليه حوالي 200 جرام زبده حوالي كوبايه الا ربع زبده مش سمنه ونحطه فى حمام ميه سخنه ولما تسيح نقلبها كويس معلقه بس مش كتير اوي عشان ما تبوظش

وبتكون شكلها كده تقريبا




والتاني: وهو بيكون طري وعامل زي الكريمه شويه لكن لما بيتحط فى التلاجه بيجمد لكن مش بيبقى جامد اوي وده في رايي بيبقى احلى فى تغطية التورتات خصوصا لو الجو برد عشان بتكون الجامده دي صعبه فى التقطيع ولو اتحطت فى التلاجه بتبقى مش حلوه مع الكيك والكريمه وكده

ومقاديرها بتكون نص كيلو شيكولاته و200 جرام زبده برضه وعليها كمان حوالي نصف كوب حليب وبنحطها فى حمام ميه سخنه زي كده

ولما تسيح نخفقها كويس بالمضرب هنلاقيها لفت وبقت زي الكريمه كده شويه وكده تبقى جاهزه خلاص للشغل وطبعا ممكن نعمل بالظبط كده مع الشيكولاته البيضا زي كده

وطبعا احنا عملانها النهارده بالذات عشان نعمل مع بعض اكلير بالشيكولاته عشان الجماهير طالباه

الكوسه بالبشاميل

الكوسه يا حلوين اهو ما تقولوش حرماكم من حاجه عشان انا فى حد استعجلني فيها مش فاكره مين معلش السن بقى يا اخوانا احمدوا ربنا

المهم

المقادير بقى

حوالي كيلو كوسه او خضار مشكل كوسه وبسله وجزر وطبعا مقشرين ومقطعين زي الكوسه الى فى الصوره دي كده قطع طوليه

و3 كوبايت صلصة بشاميل

وحوالي نص كيلو لحمه عصاج

الطريقه بقى يا حلوين

مافيش اسهل من كده صور على فكره واااااااضحه جدا سقفولي عليها من فضلكم

الاول بنجيب صنيه ونحط فيها نص معلقة سمنه بلدي ولما تسخن نحط الكوسه ونشوحها لحد لماااااااا تنشف من الميه خالص مهم اوي حكايه تنشف دي بس ما تتحرقش من فضلكم

زي الصوره دي كده بالظبط

ولو عايزين نعملها خضار مشكل نزود عليها خضار مشكل برضه ونشوحها لحد ما تنشف زي الصوره دي كده برضه

بعد كده نروح على الصنيه او القالب الى هانعمل فيه ونحط بقى اول حاجه اربع معالق كبار تقريبا بشاميل زي كده


بعد كده نرص الكوسه تماااام زي كده واحده جنب اختها زي الصور دي كده وبعدين نحط عليها حوالي نص كوباية بشاميل او يعنى لحد لما نغطي الكوسه

وبعد ما نرص الكوسه ممكن بعد كده نحطط الخضار الباقي بس نخلي الكوسه تحت عشان تمسك الخرطه لما نيجى نقطع يعنى

وبعد كده نفرد اللحمه العصاج على الخضار زي كده بالظبط

وبعدين نرجع نرص الكوسه برضه بس المره دي لو حاطين خضار نحطه قبل الكوسه يعنى الكوسه تبقى على الوش زي الصوره كده تمام وبرضه واحده جنب اختها وبعدين ننحط بقى باقي البشاميل كله عليها من فوق زي الصوره دي كده بس نساويه وما نخليش الكوسه باينه خالص

وده قطاع طولي للصنيه ههههههههههههههههه صوره بالجنب يعنى عشان تشوفوا الطبقات وترتيبها قبل ما تدخل الفرن

وده شكلها بعد ما طلعت من الفرن وانا جوعت لا سيما انا شامه ريحه العصاج الى انا باعمله على النار اصلا

وده قطاع طولي برضه للصنيه بعد ما طلعت ملاحظين اللون والطبقات وكده يعنى ولا ايه

مصوره كبيره انا والله

وبعد ما تبرد بقى يا قطاقيط شويه نقطعها ونطلعها بالراحه كده تتقدم زي ما انتم شايفنها كده

اكله جميله جدا جدا وانا بامووووووت فيها وبتبقى حلوه فى العزايم كصنف خضار غير تقليدى يعنى وممكن تقدموها عادي مع عيش وسلطه خضرا او كول سلو تبقى برضه ما لهاش حل

والف هنا والي يجرب يقولي والى مش فاااااااااااهم ......... لا يقولي برضه زي بعضه

صلصة البشاميل

البشاميل طبعا من اهم الحجات الى بنستخدمها فى اكلات كتيره جدا وعشان كده انا هاعمله معاكم قبل مانبدأ نعمل منه اكلات
وطبعا فى اكياس بشاميل جاهزه بس الحقيقه انا بالاقيها بتاخد وقت ومجهود زي العادي تمام وكمان ما تاكلش معايا الاكياس دي نظرا للكميات الرقيقه الى انا باعملها ولا سيما فى المناسبات افراح وخلاف
وكمان انا باحب طعم البشاميل البيتى لما يطلع مظبوط

انا صورتلكم كده صورتي بس بصراحه تعبانين يعنى اي كلام التصوير بتاع الموبايل ده المهم يعنى نحاول نفهم بقى منهم مع كلامي

الاول هانعمل مقدار يعمل تقريبا صنية مكرونه صغيره

والى عايز يزود بقى يزود

المقادير

خمس ملاعق كبيره دقيق ابيض + اربع كوب لبن + 3 ملعقه سمن + 2 بيضات

الطريقه

اول حاجه نجيب السمن ونحطه على النار لحد لما يقدح او يسخن اوي يعنى وبعدين نحط الدقيق على مره واحده ونكون جاهزين بالمعلقه نقلب كويس جدا وبسرعه لحد ما الدقيق يتشرب السمن كويس وبعدين على نار هاديه شويه ونقلب بقى على طول ممكن نريح فى النص لمدة نص دقيقه ونرجع نقلب تاني عشان الدقيق ما يتحروقش ولما الدقيق لونه يبدأ يتغير ويبقى اصفر شويه زي الصوره دي كده بعدها هانلاقيه كمان بدأ يبقى متوحد مع السمنه كده وبيسيح وبيغلي فى السمنه كده يبقى تمام جاهز

فى اثناء ما احنا بنعمل الدقيق فى السمن نكون حاطين اللبن على النار يسخن جامد وبعدين لما الدقيق يحمر نبدأ نزود الحليب الاول نحط كوبايه واحده ونقلب جامد جدا جدا لحد ما تختفي وهاتختفي فى ثانيه من سخونيه الدقيق والسمن

وبعد كده نرفعها من على النار ونزود باقي الحليب ونضرب بقى بالمضرب الكهربا بس خلي بالك عشان المضرب ما يبوظش منك ونضرب كويس بالمضرب لحد ما تبقى عامله زي الكريمه وتختفي الكلاكيع بتاعة الدقيق وكله يبقى تمام
نرجعها تاني على النار الهاديه اوي ونقلب حوالي خمس دقايق كده ونطفي ونسبها لحد لما تبرد تبقى دافيه كده

ونكون جاهزين بالبيض بقى نزود عليها البيض ونرجع نضرب بالمضرب تاني ونزود بقى الملح والفلفل الابيض على حسب ما نحب وممكن فلفل اسود مش هايعيط
وبيكون شكلها زي كده

بس ما تركزوش اوي فى الكميات الى في الصور عشان ما تهيسوش معايا لانها اكتر من الكميات الى فى المقدار بكثير اه ده كنا فى العيد يا بطاطا

والى عايز يعمل اكياس بقى من الجاهزه يعمل بقى ما يصدعناش هههههههههههههههه والطريقه على الكيس عشان انا عارفه ان نص الستات لا كلهم بقوا شلت دلوقتي مش عايزين يتعبوا نفسهم

المهم ان شاء الله بعد شويه هاتنزل الكوسه بالبشاميل بناءا على رغبة الجماهير

الكنافه بالقشطه او المكسرات

الكنافه يا حلوين عنينا لكم يا جودعان والله

طبعا احنا هانعمل صنيه كنافه صغيره زي الى في الصوره الي تحت دي

يلا بسرعه هاتوا الكنافه وولعوا الفرن وقدامي على المطبخ

المقادير

نص كيلوا كنافه شعر ناعمه

كوب ونص سمن او زبده (أنا عن نفسي باحب احط سمنه بلدي لكن باحط جزء من الكوبايتين زيت دره عشان ما تتحروقش السمنه )

ربع كوب سكر بدره

وللحشو

كوبايتين كريم باتسيير او كاستر او مهلبيه عاديه او ممكن نعملها بمكسرات مهروسه ومضاف عليها سكر خفيف وجوز هند وزبيب وكده يعنى

وكوبايتين شربات او شيره (الشربات معروفه يعنى كوباتين سكر وكوبايتين ميه ولمونه على النار لحد ما يتقل )

بس الكنافه لازم الشربات يكون تقيل شويه

يعنى شايفيين الالوان دي كده ؟؟ دي درجات الشربات ممكن نعمل للكنافه اول لون من اليمين

طبعا كل ما نسيبه على النار لونه يغمق اكتر

الطريقه

اول حاجه بنجيب الكنافه ونقطعها حتت صغيره اوي

انا عشان تتفرم سهل اوي بابيتها فى الفريزر وبعدين افركها وهى متجمده

بتكون اسهل وتطلع مفرومه اكتر

بعد كده بنرش عليها السكر البودره ونقلبه فيها كويس اوي وبيكون شكلها كده

وبعد كده بنكون حطينا السمن على النار تسخن شويه مش اوي اوي

وبعدين نرشها على الكنافه ونوزعها كويس ونفرك الكنافه بادينا لحد لما يبقى شكلها كده

وطبعا ممكن الكنافه تاخد سمن اكتر من كده ونعرف منين انها استكفت سمن

لما ناخد حبه في ادينا ونضغط عليها بادينا لو طلعت سمن زي كده تبقى تمام

ولما نفتح ادينا نلاقيها اشتكلت كده على بعضها كده تبقى السمن تمام لو ما عملتش كده نبقى زود ربع كوبايه سمن كمان

بعد كده ناخد نص الكنافه وفردها فى صنيه ونضغط عليها جامد اوي ويستحسن بعد ما نوزعها نضغط عليها بصنيه تانيه مقاسها اصغر من صنية الكنافه

وبعد كده نفرد عليها الحشو

لو كان كريمه زي كده

او مكسرات او حشو مشكله زي كده

بعد كده بنجيب باقي الكنافه ونفردها على وش الصنيه بالراااااااحه اوي خصوصا لو كان الحشو كريمه ونوزعها كويس بحيث نخطي الحشو كويس اوي

وبعد كده نضغط عليه بالرااااااااحه اوي لو كانت الحشوه كريمه او حاجه طريه

ولو كنت مكسرات نضغط اوي بقى مش مشكله ونتك على الجوانب كويس عشان تقفل على الحشو

ونجيب الصنيه الاصغر منها

ونضغط بها بالراحه برضه للكريمه وجامد للتانيه ونساوي بها وش الصنيه كويس اوي وبعدين نسيبها فوقيها ويا ريت كمان نحط فى الصنيه حاجه تقيله شويه كيس سكر كيلو مثلا لمده خمس دقايق كده

وهايبقى شكلها كده

بعد كده التسويه بقى طبعا احناعايزنها تطلع من فوق زي من تحت

فى طريقتين يا فندم

الاول انك تسويها لحد لما تحمر من تحت وبعدين تقلبيها فى صنيه تانيه قدها بالتام وممكن تقلبيها الاول على حاجه مسطحه وبعدين تزحلقيها كده فى نفس الصنيه بتاعتها ودي طريقه احسن عشان بتطلع حمرا ومساويه من فوق ومن تحت والمشكله ان الحكايه دي بتبقى صعبه شويه فى الكريمه بالذات

والطريقه التانيه بقى انك تحطي على وشها من فوق الصنيه الىكنا بنساوي بها الوش وتسبيها معاها فى الفرن كده وهى هاتحمر الوش برضه بس مش هايبقى نفس الدرجه بتاعة تحت يعنى

المهم بعد ما تطلع احنا نسقيها الشربات الى عملنا قبل كده وبرد وبعدين هايبقى شكلها بالظبط زي الصوره دي تماما

ودي الكنافه بالمكسرات المهروسه بس هى طلعت غامقه شويه مني معلش يا حلوين

ودي الكنافه بالقشطه

اه وبالمناسبه بالش فزلكه زياده من حضاراتكم

السكر البودره ما تلغيهوش وتقولي ماهو فى شربات لان السكر البودره هو الى بيخلي الكنافه تمسك فى بعضها

وكمان الشربات لازم يكون تقيل عشان برضه تمسك فى بعضها

والسمنه لو كانت قليل هاتطلع الكنافه ناشفه ومش لونها احمر وحلو

اه وعلى فكره فى كنافه فى السوبر ماركت بتكون مفرومه ومفروكه بالسمن احيانا كمان لكن انا باحب اجيب الطازه من المخبز راسا الينا

لكن طبعا المجمده تمشي برضه ما تقولش لا

بس خلي بالك لو كانت مفروكه بالسمن ابقى حطي سمن قليل بقى يعنى نص الكميه ولا حاجه

والشربات لوخفيف الكنافه هاتطلع طريه وبايشه ومش مقرمشه

واي اسأله يا ستاتيت يا حلوين او يا رجاله برضه انا تحت امركم

والى يجرب يقووووووووولي

كريم باتسيير

كريم الباتسيير يا جماعه من الكريمات المهمه اوي والى بنستعملها فى حاجات كتير اوي وخصوصا الحشو سواء حشو الاكلير او الملفي او التورتات كمان

شوفوا هى قريبه من الكاستر اوي يعنى ساعات باطنش واعمل مكانها كاستر انما هى احلى من الكاستر بكتير

المقادير

2 كوب حليب

ربع كوب سكر

4 بيضات

فانيليا

3 ملاعق كبيره دقيق

ممكن نزود معلقه كبيره نشا كمان

الطريقه

اول حاجه نحط على النار الحليب وعليه الفانليا يسخن

بعدين نروح بقى على البيض نضربه كويس اوي بالمضرب ومعاه السكر ونخفق كويس اوي لحد ما يتقل وبعدين نضيف الدقيق

زي كده

بعد كده نروح على الحليب قبل ما يغلي على طول وبعدين نصب عليه الخليط بتاع البيض والسكر والدقيق مره واحده ونقلب جامد اوي اوي

وبعدين نهدي النار اوووووي ونقلب على طول

وبيبقى شكلها كده

وناخد بالنا عشان ما تتحرقش ونفضل نقلب لحد ما تتخن كتير وتبقى شكلها كده

وطبعا ممكن نعملها بالشيكولاته يعنى نحط شيكولاته او كاكاو مع الحليب

وممكن فراوله لو حطينا عليها بعد ما تبرد صوص فراوله هانبقى نعمله مع بعض بعدين

اما الى احنا عاملينها فوق دي بالفانليا بس

وطبعا انا منزلاها عشان هانعمل بها كنااااااافه ان شاء ا لله