الخميس، 17 سبتمبر 2009

الغريبه


احلامك اومر يا ريم


الى المطبخ بقى بدون رغي عشان انا بانضف الشقه مش فاضيالكم


وفاضل ستاره واحده فيكم تكون طويله تيجى تعلقها عشان انا ايدى واجعتنى بقى


المهم


المقادير


كوبايتين سمنه بلدي جاموسي (لونها ابيض يعنى) = نصف كيلو سمن


كوباية واحده سكر بودره ابيض برضه


والدقيق بقى حسب ما تاخد هو المقدار ده ياخد حوالي 3 كوبايات دقيق


وبياض بيضتين


طبعا ممكن نستعمل اي سمن بس الغريبه بالذااااات لو ما اتعملتش بسمنه بلدي بتبقى طعمها مش حلو

وكمان السمنه الى لونها اصفر بتخليها تطلع صفرا فمش بتكون زي الغريبه الى فى المحلات بس عادي هايطلع طعمها حلو


الطريقه


السمنه البلدي بقى تكون جامده شويه بس مش اوي اوي يعنى ممكن نحطها فى التلاجه ربع ساعه قبل ما نشتغل لو بقت جامده اوي نسيبها تسيح شويه


هانحط عليها السكر البودره ونضربها بالمضرب لحد ما تبقى شكلها زي الكريمه
ونكون مجهزين بياض بيضتين نضربهم بالمضرب كويس وبعدين نضيفهم على السمنه والسكر الى فاتوا دول
ونضربهم برضه هاتبقى زي الكريمه برضه بس خفيفه اكتر
زي الصوره دي كده وتدينا برضه علامة المنقار


بعد كده نبدا بقى نزود الدقيق شويه شويه ونقلب باطراف صوابعنا كده


يااااادوب العجينه تمسك نفسها وتسيب جدار الطبق الى بنعجن فيه عشان تبقى دايبه ونغنيلها ونقولها يا حلوه يا ناعمه يا غريبه


وتبقى عجينه لونها فاتح وطريه ز الى فى الصوره دي




بعد كده نعملها كور


ما نبططهاش هى هاتفرد لواحدها احنا نعملها كوره كاملة الاستداره ونرصها فى الصنيه وبعدين نزينها من فوق بقى يا اما باي نوع مكسرات (لوز مقشر بندق مقشر )

ونحط اللوزه مثلا نضغط ضغطه خفيفه علشان تمسك فى الغريبايه وكمان الغريبايه تتبطط سنه كده


وممكن من غير مكسرات مش هاتقول لا يعنى


معلش نسيت اصورها قبل ما تتخبز


هانحطها بقى فى الفرن الى حرارته حوالي 170 درجه

ومش بتقعد كتير يادوب عشر دقايق ويادوووب نلاقي حروفها بدأت تلون خفيف اوي نكون شلناها عشان احنا عايزنها تفضل بيضاء زي ما هى


ونسيبها فى الصنيه بس تبرد خمس دقايق


وبعد كده نشيلها فى علبه ونقفل عليها لحد ما نيجى نقدمها زي الطبق الى فووووووق ده


بس خلاص


قوموا بقى اشتغلوا ما تفرسونيش


والستاره اهي مش عاملاها الا لما حد فيكم يجى يعملها





هناك 13 تعليقًا:

Zianour يقول...

الله يصلح حالك

ادي الستات فعلا بجد يعني

والله انا بادعيلك اصاي هنا في الغربة بقى ومحتاسة والعيال وابوهم عايزين يحسوا بالعيد لذلك يا فندم هاخطف كام وصفة كده عشان اعملهم


لا بجد اتربيت اصلي كنت من الشلت ولا باعمل حاجة دلوقتي لازمن بقى نحس بمصر

كل سنة وانتي طيبة وبالف صحة وخير

بالنسبة للستارة اتعلقت ولا لسه محدش جه؟؟

:))

Zianour يقول...

على فكرة انا برضه من المنصورة

وانا باقول برضه ان بتوع المنصورة متميزين في كل حاجة..

صباحك ياسمين

:))

احساس طفلة محبة للرومانسية بس واقعية يقول...

مش هعرف اعملها عشان السمنة البلدى او الجاموسى دى انا اخرى زبدة ذرة :)
بس هى سهلة اوى ان شاء الله فى المستقبل
بس اللى عملتة بقى القطايف
جربتها ونفعت يا صبصب وكنت عمالة الف فى البت واقول عملت قطايف عملت قطايف :)
هنا مفيش على اول الشارع ولا غيرة هنا الاعتماد على النفس واجب

شكرا يا صبرنى تسلمى وتسلم ايدك
تقبلى مرورى

Remas يقول...

ياقمر ربنا يخليكى

وكمان بتحققى لى احلامى وبسرعة اوى كدا

انتى عسولة والله

وتسلم ايديكى ياتوتة شكلها فعلا حلوة

ان شاء الله هاعملها الصبح وهاقولك على النتائج مباشرة

ولو الستارة لسا مش اتعلقت اجى اعلقها انا طويلة مش تقلقي

كل سنة وانتى طيبة يا صبصوبة ويارب دايما في صحة وسعادة انتى واسرتك ياقمر

غير معرف يقول...

لذييييذة موووت

لسه عملاها من كام يوم

تسلم ايدك ياقمرررررر

ربنا يعطيكي الف عافيي ويديكي الصحة يارب

صبرني يارب يقول...

زيانور

ربنا يكرمك انتى الى ست الستات

اه ماهو لازم وانتى بره تعملي فعلا والا مش هاتحسي بالعيد

انا كمان كنت بره بس كان فى كحك والله جاهز
بس انا كنت باعمل برضه وما كانش لسه عندي عيال

بس كنت باعمل برضه
غاويه تعب
ههههههههههههه

كل سنه وانتى طيبه

تصدقي بالله والله لسه ما اتعلقتش
عارفه ليه عشان الستاره دي الوحيده مش باطولها
باستنى جوزي يقف على السلم ويعملها انا ما باعرفش اقف على السلم
او قولي باخاف
ههههههههههههههههه

نورتي يا جميل وكل سنه وانتى طيبه وبخير

صبرني يارب يقول...

احساس طفله

تصدق بالله يا طفله انا وانا باعمل القطايف على المدونه انتى جيتى فى بالي

لان عارفه مشكلة القطايف دي فى الى مسافرين بره

والله بجد انتى جيتى فى بالي

واقول البت المسكينه الى قاعده فى بلاد الاكواوا دي زمانها مش لاقيه حاجه من دي

والف هنا ليكى يا جميله

وبالنسبه لزبدة الذره دي يا اختي مش عارفه والنبى تعملي فيها ايه
ههههههههههههه

صبرني يارب يقول...

رييييم

ماشي يا جميل انا مستنيه النتيجه

والستاره لا يا ريم انا وانتى ما ننفعش
عايزه سلم اصلها عاليه اوي مش عارفه ايه العذاب ده

كل سنه وانتي طيبه يا قمر

صبرني يارب يقول...

نواره

تسلمى يا نواره وتسلم اديكى

كل سنه وانتى طيبه يا جميل

Abu ShoSho يقول...

ألهمك الله الصبر أم مريم
و كل عام و حضرتك و العائلة الصغيرة و الكبيرة بخير
لي سؤال
حضرتك ذكرتي بياض بيضتين في المكونات و لم توضحي كيف نستعملهما

أبو شوشو

صبرني يارب يقول...

ابو شوشو

اسفه والله خالص ماشوفتش ردك الا دلوقتي حالا

وفعلا انا نسيت اذكر بياض البيض فى الطريقه

والبنات يا اخويا الى قروا وعملوا دول ما حدش قالي عيال رخمه والله

حقك عليا يا باشا انا زودتها خلاص

وبياض البيض بيتحط قبل الدقيق

متشكره اوي وانت نورت يا ابو شوشو

kochia يقول...

عملتها
طلع طعمها جميل بس مشققة شوية
تفتكري ليه ؟

صبرني يارب يقول...

مشققه يبقى سبتي العجينه تنشف يا جميل

اعتقد كده يعنى

او الفرن كان بارد عليها

انتى حطيتى بكنج بودر ولا حاجه ؟؟؟

انا مره شققت معايا بس كنت حاطه بكنج بودر

بس ما كانتش مشققه اوي يعنى

يا ولاد يا ولاد كوشيا عملت غريبه