الاثنين، 15 يونيو، 2009

المسقعه بالبشاميل




السلااام عليكم


المسقعه حياتي المسقعه باموت فيها امال احنا ا يه جايبنا ورا


الباذنجان الايام دي يا جماعه روعه باحب اكله جدا فى شهر خمسه وسته اول ما يدخل شهر سبعه انسوا مش بادوقه بيبقى مريع وبيعملى حموضه


فقلت الحق بقى اعملكم مسقعه بالبشاميل وفى طمان جاي قريب طاجن المسقعه كله جاهز والنبى

يلا ندخل على الشغل عشان مش فاضيالكم


هانحتاج حوالي كيلو باذنجان




ولحمه مفرومه عصاج يعنى للصنيه المتوسطه نحتاج حوالي نص كيلو او حسب ما نحب


وواحده فلفل اخضر رومي مقعه حلقات او قطع صغيره وينفع فلفل الوان وينفع فلفل بلدي مش هايقول لا يا جودعان


كله كده تمام

الى العمل


اول حاجه البتنجان هانقطعه انا عن نفسي باحب اقطعه بالطول لان والله اعلم بيقولوا كده بيشرب زيت اقل

الى فى الصوره ده متقطع بالعرض مش انا الى مقطعاه دي ماما


هانقطع البتنجان وغسله ونرش عليها ملح خفيف مش كتير اوي ونسيبه نص ساعه كده وبعدين نقليه


ونطلعه لونه فاتح على اد ما نقدر افتح من الى فى الصوره برضه مش انا الى قالياه دي ماما


المهم نجيب الصنيه


ونحط كوباية بشاميل تحت ونفردها وبعدين نرص البتنجان فوق البشاميل زي الصوره دي كده


وبعدين نفرد عليها العصاج زي الصوره دي


بس انا باحب فى العصاج بتاع البتنجان احط فص توم مع البصله وكمان ازود عليه 3 معالق كبار صلصه طماطم مركزه



بعد كده هانرص الفلفل الاخضر بس نسيت اصورها دي والمشروم ان وجد وزتون ما يقولش لا وبعدين نرص فوق الكل طبقة بتنجان تانيه زي الصوره دي كده





بعد كده نغطي الصنيه بالبشاميل الباقي تتغطى كويس زي كده


وندخلها فرن حامي 200 درجه وبتقعد فى الفرن حوالي ساعه الا ربع الو ما تتحمر بس لان هى كل حاجه مستويه اصلا

وممكن فى نهاية السوى نبقى نرش عليها من فوق جبنه رومي او موتزريلا


وبتطلع بالحلاوه دي يا جودعان وناكل ونتخن ونربرب وما حدش واخد منها حاجه





اه بالنوسبه لبتوع الرجيم ممكن تعملوا بشاميل من غير سمن الى هو بتدوبي الدقيق فى اللبن وبس على كده وتحطيه على نار هاديه وتقلبي لحد ما يربط

والبتنجان بعد ما تقليه تفرديه فى مصفاه وتصبي عليها مايه سخنه وتسبيه شويه هاينزل كل الزيت الى فيه


ولما تاكل من المسقعه دي ما تحفيش يعنى قطعه واحده بلاش طفاسه وفى الغدا مش فى العشا


ههههههههههههههههههه


يلا عايزه شغل يا حلوين


الى يجرب قوووووووولي والف هنا



‏هناك 18 تعليقًا:

نكهة مغربية يقول...

أول تعليق يا عم و الله دنا متربص في المدونة الجميلة دي
يا سلام عليك انشاء الله أجربها و أرد عليك
بحب جدا الصواني ده
و يا سلام لو كانت صواني مصرية و من اديك دي تحفه

خمسة فضفضة يقول...

السلام عليكم ورحمة الله وبركاته

ازيك يا صبصب

مش باحب المسقعه بالبشاميل باحب التانيه اكتر اللي بصلصة الطماطم واللحمة المفرومه

باحس اني دي تقييييييييله وعامله زي القنبله

اقولك علي تكه عشان الباذنجان مايبقاش تقيل عشان خاطر فاطيما والريجيم
قطعي الباذنجان ورصيه في صينية فرن مدهونه خفيف بالزيت وبعدين امسحي وشه كمان بشويه زيت صغيرين ويُفضل طبعا زيت الزيتون بس كده دخليه فرن حرارته عاليه والشوايه كمان مفتوحه مافيش ربع ساعه هايبقي زي المقلي بالظبط وخفيف جدا جدا

اصل بصراحه مابلعتش انا موضوع غسله تحت الميه ده لان كده فيتاميناته هاتروح خالص
خصوصا ان اهم حاجه في الباذنجان هو الحديد اللي سهل جدا انه يتأكسد
اه ونسيت اقولك المفروض كمان ماتقطعيهوش وتركنيه اشتغلي فيه علي طول قبل مايسود
انا بارش عليه شوية ملح واسيبه في مصفي بس مسافة الزيت ما يقدح واكون جايبه حتة قماش جيل نضيفه احتط الباذنجان بينها واتك عليه كده مش بيشرب زيت خالص
فيه ناس بتسيبه فتره او بتنقعه فميه وملح وده غلط جدا لانك بكده مش هاتخجي اي فوايد من اللي في الباذنجان

سلام ياقمر

صبرني يارب يقول...

نكهه

منوره دايما يا قمر


وماشي هاستنى نتيجة التجارب يا جميل

صبرني يارب يقول...

خمسه فضفضه

ايوه تمام انا مش باسيبه كتير برضه

بالكتير نص ساعه بس يشرب ملحه عشان انا مش باملحه زي م انتى شايفه

والميه مش بتلحق تاخد حاجه
ده الميه بتنزل بسرعه جدا وبتاخد الزيت الى على وش البتنجان بس

بس طريقة الفرن دي حلوه برضه انا جربتها يوما


بس بينى وبينك الصنيه دي بتبقى تقيله فعلا بس انا باحبها بقى
ههههههههههههه

نورتي يا جميل

دعاء يقول...

بنت حلال والله
بابايا بقاله كام يوم يقولى نفسي في المسقعة بس ماما مبتعملش وبتقول تقيلة وتعالى انتى اعمليها.
إن شاء الله فى أقرب فرصه هعملها واقولك رأيه ايه
بس اعملى حسابك لو معجبتوش انا ماليش دعوة هقوله صبرني يا رب هى الى عاملاها وتتضربى انتى بقى
ههههههههه
لا بحد شكلها حلوة و انا برده من محبى الباذنجان والمسقعة بجد تقيلة بس أهو مره كل فين وفين ناكلها
تسلم ايديكي

عاشقه الرومانسيه يقول...

انا جعااااااااااااااااانه
عااااااااااا

بس تعرفى؟
انا اكيد هاعمل المدونه دى مرجع لايا بعد الجواز
اصل اختك خيبه وماليش فى المطبخ قد كده
الا لو ليا مزاج وده كمان نااااااادر
مش بقولك خيبه

صبرني يارب يقول...

دعاء

يا قلبي لو طلعت وحشه انا ولا اعرفك
ههههههههههههه

ده فيها ضرب يا معلم
هههههههههههه

نورتي يا جميل

صبرني يارب يقول...

عاشقه

لا يا اختي اتعلمي هو الواد هياخد مقلب من كله
هع هع هع
نيهاهاها ها

كلام على بلاطة يقول...

كلى الم وضيق لعدم وجود الانسان لمخاص الصديق
وان اوجدنه فبشروط مجحفة اكثر الما واكثر ضيق
ولا اغرف سببا لهذا الامر السىء والحظ الصفيق
وحظى معاهم ما تقولش ...اقلهم تخصص حريق
بوجه ناعم الملمس ثعبانى وانعم من فينو الدقيــــق
ومخالب نمر شرس وعقل وفكر خاين زنديـــــــق
واعتقاد بصواب عمله وفى ضلاله مستمر ولا يفيق
برغم اشارات الله له ولكنه كمن دفن نفسه فى ابريق
==============
ناجح يوسف فهمى

نكهة مغربية يقول...

حبيبتي يا صبرني انت فينك ؟؟؟
مدة مدخلتيش ان شاء الله المانع خير

mony يقول...

تسلم ايدك يا جميل

اعذريني علي التأخير

تقلت بأه و الحر مخليني مش طايقة نفسي ولا طايقة اعمل اي حاجة

ادعيلي يا اختشي ربنا ينتعني بالسلامة
:)

ঔღঔ نـــوارة ঔღঔ يقول...

ممممممممممم

انا بعشق المسقعة والباذنجان بالاخص

لكن مليش اي تجارب مع خلطة البشاميل مع انها سهلة

تسلم اييييدك ياقمر

وحشاني مووت والله

امووووووووواه

صبرني يارب يقول...

كلام على بلاطه

نورت

صبرني يارب يقول...

نكهه

معلش والله عندي ضيوف اليومين دول

بس انا جيت وزورتك يا قمر

صبرني يارب يقول...

موني

ربنا يقومك بالسلامه يا جميل ونطمن عليكى

انا اجي انا ازورك واجيبلك المدونه والاكل كمان معايا
هههههههههههههه

نورتي

صبرني يارب يقول...

نواره


لا لا لازم تجربيها بقى بطريقتى عندك الطريقه بقى جربي وقوليلي يا جميل

حلم بيعافر يقول...

ايه ده؟
انا اول مرة اعرف المسقعة بالشكل ده
ههههههههه
والله بحبها وباكلها كتير بس اول مرة اشوفها بالشكل ده

صبرني يارب يقول...

حلم بيعافر

طيب نبعتلك صنيه يا باشا اي خدمه

نووووووورت