السبت، 7 مارس 2009

بروفترول




السلام عليكم يا حلوين






يعنى استكمالا لموضوعات الاكلير وتلبية لطلب حبيبتى المخنوقه دايما بنت الغربه




وعشان نلحقها لانها الايام دي فاضيه وكمان عشان نتعاون جميعا على فرغ حجج الباشا الى مش عاجبه الا بروفترول مامته ولو ما عجبوش البروفترول بتاعي انا الى هاروح اخلص عليه تخليصا .




يلا نبدأ شغل بقى




طبعا احنا هانستخدم الاكلير المدور الى احنا عملنها فى الاكلير بالشيكولاته




بس مش مهم نعمله شيكولاته من فوق احنا بس هانحشيه وكده يبقى جاهز للشغل




هنحتاج لكل طبق زي الطبق الى فوق ده حوالي 4 وحدات اكلير متوسطين الحجم




يعنى نقول احنا هانعمل اربع اطباق هانحتاج من 15 الى عشرين واحدة اكلير




هانحتاج للاربع اطباع كوبايتين كريم باتسيير بالشيكولاته او كاستر برضه بالشيكولاته ما يقولش لا




وكوباية كريم شانتيه




وكوباية صوص شيكولاته من النوع التاني (فاكرين احنا عملنا نوعين ) هانستخدم هنا النوع التاني الى هو طري






الطريقه :




انا كنت باكل البروفترول ده بره واقول هو ايه البتاع الى حاطين فيه الاكير ده يا ولاد لا منه باتسييرولا منه كريم شانتيه


عامل زي الموس كده بس برضه مش موس شيكولاته اتقل منه شويه


المهم طبعا عشان انا ما اقبلش حاجه تعدي من تحت ضرسي كده واقول ما باعرفش قعدت اعمل تجارب ما اقلكوش الى عملته فيهم بس الحمد لله استقريت على الطريقه دي




هانعمل الكريم شانتيه ويا ريت يكون بالشيكولاته ولو كان ابيض نزود عليه شوية من صوص الشيكولاته بس يكون بارد


او ندوب شويه نسكويك فى معلتين مايه ونزوده على الكريمه




المهم يعنى يكون لونها شيكولاته




ونحط الكريم شانتيه على الكريم باتسيير او الكاستر الى برضه بالشيكولاته وشيكولاته تقيله كمان ونضربهم مع بعض بالمضرب لحد لما يتخلطوا تماما




وبعد كده نوزعهم على الاربع اطباق يعنى نملى نص الطبق تقريبا




ونجيب الاكلير ونرصه فوقيهم ونزله لتحت شويه كده يعنى يادوب تبقى ثلث الاكليره بس هو الى باين وبعدين نحط معلقتين او ثلاثه كبار صوص الشيكولاته يعنى لحد ما نغطي الطبق ونزينها من فوق بقى




في الصوره الى فوق دي انا حاطه اكليره جاهز متغطيه بالشيكولاته ونعمل وردات او اي شكل من الكريم شانتيه على الوش وبشر الشيكولاته




فى الصيف بقى باحب احط فوق كده بدل الاكليره دي بولة ايس كريم بتبقى روووووووعه ـوممكن ما نحطش خالص مش هانقولكم حاجه يعنى ـ المهم علىالوش شوية كريم شانتيه برضه وفوقيهم صوص الشيكولاته


من الاخر يعنى هو البروفترول ده عباره عن حلة شيكولاته ونقع فيها




ومعلش الخطوات كلها مش متصوره مش عارفه نسيت ازاي اصور




أنا فى الغالب باعمل البلفترول ده لما يكون عندي اكلير مثلا من امبارح اقوم ا عمله شوية الحبشتكنات دي فيطلع بروفترول




وجربوا وقولولي النتيجه بسرعه يا حلوين


بنت الغربه قوليلي ا لطريقه دي زي الى انتى عارفاها ولا ايه ؟؟

هناك 11 تعليقًا:

Mony يقول...

ايه الجمال ده يا ام مريم

ربنا يباركلك شطورة


كمان شوية كده ممكن اجرب

اصل انا اليومين دول طالبه معاي حوادق علي الاخر

بس لا تقلقي بموووت في البروفترول
و الشيكولاته


تسلم ايدك يا جميل

صبرني يارب يقول...

موني

تسلمى يارب


والصنف الجاي حادق ان شاء الله

بس لو ما رجعتيش المدونه بتاعتك انا هاعمل هنا انقلاب

ومظاهره ونقف قدام باب بيتكم ونقول

عودي يااااااااهامييييييس

خمسة فضفضة يقول...

السلام عليكم ورحمة الله وبركاته

ماشاء الله يا صبصب ايه الجمال ده

ماعملتوش قبل كده لاني مش بحب الشيكولاته اللي زياده عن اللزوم دي بتجزعني علي الآخر احب آكلها كده ناشفه انما في الحلويات زي البروفيترول وجاتوه او تورته الشيكولاته بتجزعني

عموما ماقدرش اقول الا تسلم الايادي

سبتلك تعليق في بوست السمنه ابقي شوفيه

معلش بقي والله تقريبا ماباقتش اقعد علي النت الا وانا باحط بوست جديد وبرضو بيبقي كل فين وفين

ادعيلي ان اليوم يبقي 72 ساعه عشان يكفي


سلام

خمسة فضفضة يقول...

صحيح يا موني انت قفلتي مدوناتك ليه صحيح انا عمري ماعلقت عندك بس كنت متابعاكي

دا حتي مين 3 ايام حاولت اشوف البوست بتاع الرز بالخلطه اصلك عاملاه بطريقه غير اللي انا متعوده عليها وقلت اجربها المره دي لقيت المدونه مقفوله ايه يا قمر ناكل احنا ايه دلوقتي يرضيكي كده

عوووودي يا موني

صبرني يارب يقول...

فضفضه

يا جميل ربنا يكون فى عونك بس والنبى بلاش يبقى اليوم 72 ساعه كفايه 24 ساعه اصل نخلص فى اديهم


وانتى نورتي يا قمر وانا دايما احب الاختراعات ياريت تجربي البروفترول بصوص الفراوله مثلا

او بصوص القرفه او اي نكهه تحبيها ولاجل عيونك يا جميل انا هاحاول اعمله وانزلهولك هنا كمان

نورتي يا قمر وهاروح اشوف السمنه

صبرني يارب يقول...

اه وموني ان شاء الله هانجيبها من تلابيبها تفتح المدونات بتاعتها تاني

kochia يقول...

انا بقيت شاطرة من متابعتك علي فكرة

اشكرك

تحياتي

صبرني يارب يقول...

كوشيا

يا حياتي انتى شاطره دايما

نورتي يا قمر

بنت الغربة يقول...

صبرنى ياحبيبتى
ربنا يخليكى لى ومايحرمنيش منك ابدااا
الطريقه دى غير اللى انا باعملها خااالص....
انا باعمل الاكلير عادى وباحشيه كريم باتسيير
وبعد كده باعمل كريم شانتيه بالشيكولاته...وباحط الاكلير فيه وعليه صوص شيكولاته وخلااااص...
واحيانا باحط الايس كريم زيك كده ...
بس انى اخلط الكريم باتسيير مع الكريم شانتيه دى ماعملتهاش خااالص...يمكن علشان كده طعمه مختلف بالنسبه للباشا...
انا هاعملها بكرة بأذن الله بطريقتك وهادوقها له ..
ولو ماعجبتوش...انا بقه اللى هاخلص عليه تخليصا....
تحياتى ياقمر
وربنا يخليكى لي يااارب

بنت الغربة يقول...

على فكرة اتا اتاخرت عليكى فترة 3 ايام كده علشان العيال بوظوا الكمبيوتر وبقى مليان فيروسات..وعقبال مانظفته وغسلته ..وفرمته...ورجعت الداتا عليه تانى ..اخد منى وقت..
مش تزعلى ..اعمل ايه فى العيال...كلهم بيقعدوا على النت...
وبنتخانق مين اللى يقعد الاول...
والوقت الوحيد الرايق بالنسبه لى هو الصبح بدرى بس بتكونى نايمه..
لكن لما يرجعوا من المدرسه ..مش بالاحق على طلباتهم...وخناقتهم علشان الكمبيوتر...لأن أحيانا الهوم وورك بيكون على النت...
خصوصا الكبير..ربنا يهديهم..ويخليلك ولادك يارب ...
بس انا مصرة انى اكلمك ...وقومى بدرى ياستى بلاش النوم للظهر ده ..
تحياتى ياقمر

صبرني يارب يقول...

بنت الغربه

ياااااااريت يا جميل

والله نفسي انام بدري واقوم بدري زي زمان

بس رضا بيجي الساعه 12 فى المتوسط يعنى

وكمان خالد باشا بيسهر
يادوب انام ساعتين قبل الفجر واقوم اصلي واخرج العيال وقدامي للساعه 8 على ما انام تاني

انام بقى واصحى حسب الظروف

اكيد هالتكعبل فيكى يوما

ولما تعملي البلفترول قوليلي يا بطه

ونورتي يا جميل وما اقدرش ازعل منك ابدا