السبت، 28 فبراير 2009

اكلير بالجبنه


ازيكم يا حلوين


النهارده ان شاء الله هانعمل حاجه تحفه باموت فيها برضه


الى هى اكلير بالجبنه


ايوه الى احنا عملناه قبل كده بالشيكولاته


النهارده هانعمله حادق ان شاء الله


وده تلبية لطلب اليس فى بلاد العجائب الى قالت عايزين مخبوزات حادقه بس مش بعجينة بف باستري


مش عارفه مالها البف باستري يا اختي والنبى ههههههههههههههههه


المهم


يلا على المطبخ


المقادير :


اول حاجه هانعمل مقدار من عجية الشو الى احنا عاملينها قبل كده مع بعض عاااادي جدا


ونسويها ونعملها طويله او مدوره زي ما نحب يعنى بنفس الطريقه الى عملناها فى اكلير الشيكولاته


وبعدين الحشوه بقى


نصف كوب زبده

نص كوب جبنه مثلثات اوجبنه تانيه نحبها تكون كريميه شويه

نص كوب مايونيز

وشوية زعتر او نعناع او حبة البركه

او اي نكهه تانيه تحبوها تمشي


وللتزيين والطعم برضه

هنحتاج نص كوباية مايونيز


وكمان معاها ممكن بقى نستخدم :


ترنشات سوسيس زي الى فى الصوره ده

او جبنه رومي مبشوره ومخلوط معاها مثلا مبقدونس مفروم

او بسطرمه مقطعه صغير اوي

او اي لحوم مدخنه بنحبها

أو زيتون اسود او اخضر


هانعمل الحشو الاول :


اول حاجه لازم تكون الزبده مش جامده اوي ولا سايله طبعا عشان نعرف نضربها بالمضرب هانضيف عليها المايونيز

ونضربها كويس لحد ما تبقى عامله زي الكريمه

وبعد كده نضيف الجنبه ونضرب تاااااني لحد ما تتخلط كلها وبعدين نضيف بقى الزعتر او النعناع او وات ايفر


وممكن نحطها فى التلاجه شويه على ماتجمد شويه عشان نعرف نستعملها


وبتكون عامله زي الكريمه كده بس طعمها مش مسكر ولا حادق اوي برضه حسب نوع الجبنه الى حطيتها وممكن نزود الخليط ده ملح لو نحب الحشوه تكون حادقه او نزودها اي نوع جبنه حادق انشاله جبنة مش

ههههههههههههههههههه للي بيحب المش يعنى


المهم كده جهزنا الحشو خلاص


وعندنا الاكلير برضه جاهز ومستوي


نحط بقى الحشو فى كيس الكريمه ونحشي كل اكليره من خلطة الجبنه دي


او لو نحب ممكن نقسم الاكليره نصين بالعرض يعنى زي السندوتش كده ونعمل ورده على النص الى تحت ونحط فوقه النص التاني بيبقى شكلها حلو اوي


معلش ما عنديش صور كتير للصنف ده لو عملته قريب هانزلكم صوره ان شاء الله


المهم بعد ما نحشيه كله


احنا كنا فى الاكلير بالشيكولاته بنغطس الاكليره فى شكيولاته من فوق

احنا هنا بقى هانغطسها فى المايونيز وبعدين بقى نحط السوسيس او البسطرمه او نحطها فى جبنه رومي مبشوره مع بدونس

او اي حاجه احنا نحبها


انا يومها ما كانش عندي الا السوسيس ده وكنت حاطه كمان جوا كل اكليره ورده كريمه ومعاها شريحه من السوسيس وفوق مايونيز وعليه شريحه سوسيس برضه


يعنى ممكن تعملي طبق واحد مشكل من كل الحاجات دي وبيبقى شكله تحفففففه لو عندك ضيوف وعايزه تقدمي صنف حادق جنب جاتوهات مثلا


او حتى فى فطار او عشاء خفيف برضه يمشي


وبيطلع شكله زي الى فى الصوره فوق كده


الى يجرب يقولي


ولازم ترجعوا للوصلات الى انا حاطاها فى الموضوع عشان العجينه وتسوية الاكلير نفسه



والى يجرب يقووووووووووولي

هناك 17 تعليقًا:

mostafa rayan يقول...

المرة دي بقي مش هتقدري تقولي حاجة انا اول تعليق
هي حلوة بس متهيالي بتاخد غلبة شوية
وعايزة صبر
بس طبعا تشكري عليها مليون شكرا
لك كل التحية والود

ملحوظة على جنب : لو تكرمتي يا صبرني عايزينك تظبطلنا حاجات سهلة وفي نفس الوقت لذيذة قصدي ماتكنش بتاخد غلبة وكدةعلشان لوحبيت اعملها امي ماتشدش شعرها مني وتتخانق معايا وتقولي حوار هتقلبلي المطبخ وكدة
معلش تعابينك معانا دايما
كل سنةو انتي طيبةويارب دايما بخير

صبرني يارب يقول...

مصطفى ريان

ايه النور ده
اها اول تعليق ميه ميه يا فندم منور والله

وهى مش صعبه والله ابدا ده سهله اوي خصوصا لو تعرف تطلع العجينه كويس

المهم

عنيه حاضر اشوفلك حجات من السهله
ربنا يسهل

Dr . Rosa يقول...

شكلها حلوه قوووى و لذيذه
بس انا خايفه من العجينه حاسه انها مش هتظبط معايا

بس على مين ...
هجربها يعنى هجربها

تسلم ايدك يا صبرنى

صبرني يارب يقول...

روزا

لا ما تخافيش دي العجينه اسهل ما يمكن

اهم حاجه تعملي نفس الخطوات والمقادير من غير اي افتكاسات

وما تخافيش منها لو طلعت سايله شويه هاتبقى حلوه برضه

تسلمي وتعيشي يارب ومستنيه النتيجه بتاعة التجربه

نورتي

welwel يقول...

السلام عليكم.. انا دخلت المدونة دى امبارح بس و النهارده عملت عجينة الشو لاول مرة فى حياتى وعملت منها حجم صغير علشان اعمله بالجبنه واحجام كبيرة هحشيها كاسترد وادهنها صوص شيكولاته وعملت شوية بلح الشام كلناهم واحنا فى المطبخ .. بس للاسف فيه صينيه منهم كان لازق في الارضيه ولما جيت اشيله طلع منغير قاعده :)..ليه كده ؟

welwel يقول...

عملت المايونيز على طريقتك وحطيت برطمان فى التلاجه ومنتظر النتيجه وسيبت شويه فى الخلاط حطيت عليهم جبنه فيتا وزعتر وزبدة وعملت صوص طعمه جميل اوى اشتغلت به زى الشيكولاته البيضا..وصورتها لو تحبى ابعتلك الصور تشوفى النتيجه بنفسك ؟؟؟

صبرني يارب يقول...

wel wel

وعليكم السلام يا فندم حضرتك نورت المدونه

بالنسبه للاكلير لازم حضرت ما دهنتش الصنيه سمنه قبل ما تشتغل عليها

عشان كده لزق

وحضرتك لما تيجى تشيله تبقى تشيله بمقصوصه معدن رقيقه وبالراحه اوي لو كان لازق شويه


وبالنسبه للمايونيز ان شاء الله هايعجبك

ومش فاهمه انت استعملته زي الشيكولاته البيضا فى ايه ؟؟
في الاكلير بالجبنه يعنى ؟؟

طيب ما تمام كده

وبالنسبه للصوره يا ريت حضرتك ترفعها لنا على وصله عشان كل الناس يشوفوها معانا

وحضرتك نورت ومتشكره اوي لك

welwel يقول...

السلام عليكم ..اخيرا؟
كنت مستنى الرد :)
انا فعلا مدهنتش الصينيه سمنه بدليل الصينيه التانيه التيفال طلعت كويسة.
وانا فعلا بشيله بمقصوصه رقيقه جدا وحرص.
..بصى انا معرفش يعنى ايه ارفع صور ويعنى ايه وصلة ..انا دكتور فى السياسةوعندى 37 سنه وماليش فى شقاوة الكمبيوتر بتاعتكم دى :)
اعملى ايميل للمدونه علشان المبتدئين امثالى.
وميرسى على الرد.

صبرني يارب يقول...

ويل ويل

حضرتك شرفنا

وبالنسبه للصوره لا مش شقاوه ولا حاجه ده موضوه سهل اوي

انا هابقى اعطيلك موقع سهل ترفع من عليه اي صوره ويديلك وصله موضوع سهل اوي

كون حضرتك دكتور فى السياسه مش هاتعصي عليك بقى

اما بالنسبه لموضوع الاميل
فانا باعتذر ده مش هاينفع ومتشكره لحضرتك ونورتنا

welwel يقول...

بصى يا ستى دى بقى على قد معرفتى..اول 4 لينكات التحضير والاكلير بالجبنة...

http://rapidshare.com/files/204758970/1_.jpg.html

http://rapidshare.com/files/204758971/2_.jpg.html

http://rapidshare.com/files/204758971/3_.jpg.html

http://rapidshare.com/files/204758971/4_.jpg.html

والتلاته دول الاكلير بالشيكولاته علشان تعرفى انى تلميذ نجيب ومنتظر رأى حضرتك.


http://rapidshare.com/files/204758971/5_.jpg.html

http://rapidshare.com/files/204758971/6_.jpg.html

http://rapidshare.com/files/204758971/7_.jpg.html

صبرني يارب يقول...

استاذنا الفاضل

حضرتك اكيد ممتاز من غير مانشوف الصور

بس للاسف الوصلات دي ماا شتغلتش معايا

يا ريت يا جماعه الى اشتغلت معاه يقولي

وياريت حضرتك تبقى ترفع على الموقع ده
http://www.imeem.com/home/

بيرفع جميع انواع الملفات وبيديك وصلات تمام

دمت بكل ود يا فندم ونورت

بنت الغربة يقول...

حبيبتى ياصبرنى
دى شكلها روعه بصراحه نفسى اتفتحت على عمايلها
مع اختلافات بسيطه فى الحشو...علشان كده السعرات الحراريه فى السمااااا
انا ممكن اغير فى الحشو شويه بحيث مازعلش وانا باكلها ..
بس الفكرة فى حد ذاتها جميييييله جدا ومختلفه ..
وان شاء الله هاجربها النهارده
تحياتى ياقمر

صبرني يارب يقول...

تسلمى يا دولي

طيب يا جميل يلا وابقى قوليلى عملتى ايه

welwel يقول...

ادى اخر محاوله للصور بتاعت التجربة اللى بعتبرها ناجحة للاكلير بالجبنه و الشيكولاته..يا رب يفتح معاكى
واعملى ايميل خاص بالمدونه ومتتعبناش معاكى بليييز ..
مستنى رئيك

http://www.ziddu.com/download/3732121/6.JPG.html

http://www.ziddu.com/download/3732219/3.jpg.html

http://www.ziddu.com/download/3732219/2.jpg.html

http://www.ziddu.com/download/3732219/4.jpg.html
http://www.ziddu.com/download/3732219/1.jpg.html

صبرني يارب يقول...

ما شاء الله ايه الحاجات الجميله دي

معقوله كده

طيب حضرتك الى عملته بقى ولا كان فى مساعدات نسائيه

عموما انا شوفت نص الصور بس لان النت عندي سيء اوي

ومعلش اعذرني فى موضوع الميل ده مش هاينفع

واسفه لو باتعبكم وشكرا لك والف هنا يارب

بنت الغربة يقول...

صبرنى ياحبيبتى
انا جيت تانى اهو علشان ااقولك عملت ايه امبارح..
عملت عجينة الشو زى ماقلتى وعملت كور حلوة بس كبيرة شويه..
والخلطه بقى ياجميييل هى
1- 2 بيضه مسلوقين
2- 1/2قالب جبنه شيدر قليلة الدسم
3- 1/4 كوب حليب منزوع الدسم
4- شوية كزبرة خضرااا وبقدونس مفرومين كويس
وتضربى الحاجات دى كلها فى الفوود بروسسر...او فى الخلاط..
لغاية مايبقى طرى جدا زى الكريمه تقريبا..
وتحشى بيه عادى بطريقتك..
وبعدين نغطس الوش شويه فى مسطرده (اخف من المايونيز بكتييير)
وبعدين نرش شوية موتزاريلا على الوش ونحطها دقيقه فى الفرن من فوق..
طلعت تحفه ياصبرنى ..بجد جميله قوى..
جربيها ...

صبرني يارب يقول...

بنت الغربه

ايووووووووووه

هو ده الابداع بقى عايزين شغل يا جودعان
هههههههههههههههههه

تمام كده انا فعلا مره دخلته الفرن شويه بالشوايه بس كان طالع مالوش حل

والخلطه بتاعتك بتاعة الحشو جميله انا لعلمك ما عنديش لها اي قوانين المتوفر عندي باحطه فى الكبه على بعضه وهوووووووووب نحشي به على طوول

والمسطرده مالهمش تقل عليها هنا ما باستعملهاش كتير


براااااااااااافوا عليكي يا بطه والف هنا


ايوه كده بلا شغل يا اختي بلا تعب قلب هههههههههههههههه

نورتي يا جميل