الاثنين، 16 فبراير 2009

تورتة الفراوله

انا عارفه ان احنا عاملين المره الى فاتت حلو برضه بس بقى نعمل ايه عيد ميلاد المدونه وعيد ميلادي والحركات دي والشعب كله ينادي بطريقة توتره فقلت لازما بقى ولا بد نعمل تورته النهارده
طبعا عشان الاستعجال مش هانزل طريقة الكيك هانبقى نعمله مره تانيه مع بعض
طبعا احنا هانعمل كيكه مربعه زي الى في الصوره دي او مدوره زي ما تحبو
وهانقسمها نصين بالعرض عشان نحشيها
انا هنا حشيتها كريمه بصوص الفراوله
طبعا صوص الفراوله سهل اوي بنجيب فراوله ونقطعها ونكون مسخنين على النار شوية شربات معقود كويس اوي نسخنه ويا حبذا نضيف عليه معلقتين من محلول جيلاتين (جيلاتين مدوب فى مايه ) ونحط الفراوله ونسيبها على النار لحد ما تغلي كويس والصوص بتاعها يتقل وبعد كده نطفي ونسيبها تبرد
بنجيب مقدار من الكريم شانتيه حسب حجم الكيكه وحسب رغبتكم وممكن كمان نحشيها كريم باتسيير مش هاتقول لا
ونحط عليه صوص فراوله برضه حسب الرغبه وبعدين نفرده على نص الكيكه الى احنا عاملينها زي كده
وبعد كده نحط نص الكيكه التاني ونظبطها علىا لتانيه كويس وبعدين نغطيها كلها بالكريم شانتيه زي كده بالظبط


بعد كده نجيب قمع الكريمه و نعمل خطوط بالطول وخطوط بالعرض وبعين ناخد حافة الكيكه كلها بوردات او اي شكل يعمل لها حدود زي الصوره كده بالظبط

وبعد كده نكون مجهزين انصاف فراوله ازاااااي ؟؟ اننا ندهنها او نقلبها بشويش فى شويه من صوص الفراوله ولو خلص نعمل شويه شربات مع شويه جلي على النار ونسيبهم يبردوا وبعدين ندهن بهم الفراوله وده بيخلي شكلها لامع وما تدبلش لو سبناها شويه فى التلاجه وما تسردش ميه على التورته
وبعد كده تبقى جاهزه نزين بها زي ما نحب مثلا زي كده





وطبعا طبعا ينفع نعمل مع فواكهه تانيه كتير زي الموز والمشمش والتفاح والمانجه والاناناس ..........
وطبعا هما شمعتين لان انا خميتكم لان ده ما كانتش بتاعة النهارده دى كان يوم عيد ميلات البت نور بنت اختي
وكان عندها سنتين زي ما نتم شايفين الشمع كده
بعد شويه بقى تكون التورته بتاعتي خلصت لانى اخدت مقلب عجب فيها هاقولكم عليه هناك بقى



هناك 11 تعليقًا:

Mony يقول...

كل سنة و انت طيبة ليكي انت و المدونة و بنت اختك كمان

تهنئة ثلاثة في واحد


طيب ابعتيلي قطعة باه يا صبرني علشان انا كسولة
و ماعتقدش اني هعرف اعملها حلوة زيك كده

يالا مستنية نايبي بأه

حاجات جوايا يقول...

كل سنة وانتى طيبة يا جميلة وخالود طيب ومدونتك طيبة

بس ايه ده انتى هتدينا الطريقة واحنا نعمل التورتة ولا ايه ؟ ايه الكروتة دى
لاااا يا ماما انا عايزة حقى جاهز بقولك اهه هههههههه
هعمل كل دى ومين ياكلها .. دى التلاجة لسه مليانة كيك وتورتة وجاتوه من يوم عيد ميلاد دودو بتنادى على حد ياكلها مش لاقية ههههههههه


-------------
ياريت يا جميل تبدأى فى الحوادق بقى .. يعنى ساليزون .. جلوريا .. باتيه .. كده يعنى

وياريت ياريت المرة الجاية تكون طريقة السمن البلدى البيتى عشان انا كونت القشطة خلاص .. وعايزة اسأل سؤال .. ليه السمن اللى بيتعمل فى البيت بيبقى ابيض .. والسمن البلدى اللى بنشتريه بيبقى اصفر او لمونى كده ؟؟ايه الفرق ؟؟

كل سنةوانتى وخالد ومدونتك طيبين وبالف خير يارب

أميرة يقول...

ومش عارفة انا ايه الناس اللي بتجيب فراولة من برة دول .. يلا ما علينا

هي شكلها حلو .. بس لو كنا ندوق يعني كنا نعرف نحكم كويس :)

ال الكيكة بعدين علشان مش فاضية .. كل دااااااا ومش فاضية

انا من رأي سالي بردة

عايزة حوادق و يا حبذا لو كانت حاجات مش بالباف بيستري :)

مليش دعوة اتصرفي :)

ساره يقول...

يمي يمي يااااااااااااااااااااام

الفراوله شكلهاعلى التورته لذيذ

تسلم ايدك ياقمر

Kiara يقول...

وااااااااااااو

انا عاوزاها حقيقي بقي مليس دحوووووه

انتي اعزميني بقي عندك واعملهالي

الله بقي

******

كول سنه وانتي دايما من ربك قريبه ياحبيبه قلبي مقصصره معاكي بس مش تزحلي الشغل والله

صبرني يارب يقول...

موني

لا موووووني هنا مافيش كسل لازم تجربي الشغل ده

والله بيبقى جميل اوي

وعنيه ليكى التورته وصاحبتها

صبرني يارب يقول...

حاجات جوايا

مش عارفه يا اختي ايه الناس الى بتستهبل دي هههههههههههههههههههههههههههههههه

وبعدين لو كنتي جيتى وزعتي هنا الجاتو بتاع دودي كان زمانه خلص
هههههههههههههه

وبالنسبه للسمن البلدي

يا جميل السمنه البلدي الى فى علب دي بتبقى سمن بلدي بقري

وبتبقى ساكه خاااالص ومافيهاش ريحه سمنه بلدي اصلا

انما الى بنعملها فى البيت بتكون فى الغالب قشطه جاموسي لان الجاموسي فى السوق اكتر للشرب وكده

بس لو جبتى قشطه بقري وعملتيها هاتطلع برضه صفرا كده بس مش زي العلب برضه العلب دي بيضحكوا عليكوا يا امي
هههههههههههههههههههه

وعنيه حاضر نعمل السمنه البلدي

صبرني يارب يقول...

اليس

انتى يا بت بتنكشينى

هو احنا كنا شوفنا منك عنبايه ولا فراولايه حتى

ولا انتى بتشوفيهم هههههههههههههههههههههههههه

عنيه ليكوا حوادق حاضر
وليه مش بالباف بستري ؟؟؟

طب ده انا اخيرا مؤخرا عملت العجينه فى البيت بنجااااااااااح

وعموما انا مجهزلكم شويه حاجات الطبق الى فى المدونه التانيه دي

حوادق بس بالباف بستري بس بييييييتى

صبرني يارب يقول...

ساره

تسلمى يارب ونورتي يا جميل

صبرني يارب يقول...

كيارااااااا

ده انتى هاتتقطعي ههههههههههههههههه

اعزمك يا روحي والله

شكولاتة يقول...

مدونتك جميله جداااااااااااااااا

بجد روووووووووووعه
يعني الاكلات مهمه وطعمها يجنننن

انا بعد اذنك اضيفها لمدونتي عشان الناس تقراها وتسفيد منها

بجد روعه

ومستنين بقا طريق التورته عشا نعملها ونقولك بقا طعمها كان ايه

بجد طبخك جميل ويابخت رضا بيكي :)

الله يسعدك