الجمعة، 16 يناير 2009

الكنافه بالقشطه او المكسرات

الكنافه يا حلوين عنينا لكم يا جودعان والله
طبعا احنا هانعمل صنيه كنافه صغيره زي الى في الصوره الي تحت دي
يلا بسرعه هاتوا الكنافه وولعوا الفرن وقدامي على المطبخ
المقادير
نص كيلوا كنافه شعر ناعمه
كوب ونص سمن او زبده (أنا عن نفسي باحب احط سمنه بلدي لكن باحط جزء من الكوبايتين زيت دره عشان ما تتحروقش السمنه )
ربع كوب سكر بدره
وللحشو
كوبايتين كريم باتسيير او كاستر او مهلبيه عاديه او ممكن نعملها بمكسرات مهروسه ومضاف عليها سكر خفيف وجوز هند وزبيب وكده يعنى
وكوبايتين شربات او شيره (الشربات معروفه يعنى كوباتين سكر وكوبايتين ميه ولمونه على النار لحد ما يتقل )
بس الكنافه لازم الشربات يكون تقيل شويه
يعنى شايفيين الالوان دي كده ؟؟ دي درجات الشربات ممكن نعمل للكنافه اول لون من اليمين
طبعا كل ما نسيبه على النار لونه يغمق اكتر

الطريقه
اول حاجه بنجيب الكنافه ونقطعها حتت صغيره اوي
انا عشان تتفرم سهل اوي بابيتها فى الفريزر وبعدين افركها وهى متجمده
بتكون اسهل وتطلع مفرومه اكتر
بعد كده بنرش عليها السكر البودره ونقلبه فيها كويس اوي وبيكون شكلها كده
وبعد كده بنكون حطينا السمن على النار تسخن شويه مش اوي اوي
وبعدين نرشها على الكنافه ونوزعها كويس ونفرك الكنافه بادينا لحد لما يبقى شكلها كده
وطبعا ممكن الكنافه تاخد سمن اكتر من كده ونعرف منين انها استكفت سمن
لما ناخد حبه في ادينا ونضغط عليها بادينا لو طلعت سمن زي كده تبقى تمام
ولما نفتح ادينا نلاقيها اشتكلت كده على بعضها كده تبقى السمن تمام لو ما عملتش كده نبقى زود ربع كوبايه سمن كمان

بعد كده ناخد نص الكنافه وفردها فى صنيه ونضغط عليها جامد اوي ويستحسن بعد ما نوزعها نضغط عليها بصنيه تانيه مقاسها اصغر من صنية الكنافه
وبعد كده نفرد عليها الحشو
لو كان كريمه زي كده
او مكسرات او حشو مشكله زي كده
بعد كده بنجيب باقي الكنافه ونفردها على وش الصنيه بالراااااااحه اوي خصوصا لو كان الحشو كريمه ونوزعها كويس بحيث نخطي الحشو كويس اوي
وبعد كده نضغط عليه بالرااااااااحه اوي لو كانت الحشوه كريمه او حاجه طريه
ولو كنت مكسرات نضغط اوي بقى مش مشكله ونتك على الجوانب كويس عشان تقفل على الحشو
ونجيب الصنيه الاصغر منها
ونضغط بها بالراحه برضه للكريمه وجامد للتانيه ونساوي بها وش الصنيه كويس اوي وبعدين نسيبها فوقيها ويا ريت كمان نحط فى الصنيه حاجه تقيله شويه كيس سكر كيلو مثلا لمده خمس دقايق كده
وهايبقى شكلها كده
بعد كده التسويه بقى طبعا احناعايزنها تطلع من فوق زي من تحت
فى طريقتين يا فندم
الاول انك تسويها لحد لما تحمر من تحت وبعدين تقلبيها فى صنيه تانيه قدها بالتام وممكن تقلبيها الاول على حاجه مسطحه وبعدين تزحلقيها كده فى نفس الصنيه بتاعتها ودي طريقه احسن عشان بتطلع حمرا ومساويه من فوق ومن تحت والمشكله ان الحكايه دي بتبقى صعبه شويه فى الكريمه بالذات
والطريقه التانيه بقى انك تحطي على وشها من فوق الصنيه الىكنا بنساوي بها الوش وتسبيها معاها فى الفرن كده وهى هاتحمر الوش برضه بس مش هايبقى نفس الدرجه بتاعة تحت يعنى
المهم بعد ما تطلع احنا نسقيها الشربات الى عملنا قبل كده وبرد وبعدين هايبقى شكلها بالظبط زي الصوره دي تماما
ودي الكنافه بالمكسرات المهروسه بس هى طلعت غامقه شويه مني معلش يا حلوين
ودي الكنافه بالقشطه
اه وبالمناسبه بالش فزلكه زياده من حضاراتكم
السكر البودره ما تلغيهوش وتقولي ماهو فى شربات لان السكر البودره هو الى بيخلي الكنافه تمسك فى بعضها
وكمان الشربات لازم يكون تقيل عشان برضه تمسك فى بعضها
والسمنه لو كانت قليل هاتطلع الكنافه ناشفه ومش لونها احمر وحلو
اه وعلى فكره فى كنافه فى السوبر ماركت بتكون مفرومه ومفروكه بالسمن احيانا كمان لكن انا باحب اجيب الطازه من المخبز راسا الينا
لكن طبعا المجمده تمشي برضه ما تقولش لا
بس خلي بالك لو كانت مفروكه بالسمن ابقى حطي سمن قليل بقى يعنى نص الكميه ولا حاجه
والشربات لوخفيف الكنافه هاتطلع طريه وبايشه ومش مقرمشه
واي اسأله يا ستاتيت يا حلوين او يا رجاله برضه انا تحت امركم
والى يجرب يقووووووووولي





هناك 20 تعليقًا:

Lady E يقول...

بجد تسلم ايدك

اول مرة ازور المدونة وواضح اني هتعلم منها حاجات كتير

صبرني يارب يقول...

ليدى

حبيبتى نورتي ويارب دايمامنووووره

بنت الغربة يقول...

تسلم ايديك ياقمر
انا تقريبا بعملها زيك بس من غير سكر بودره
اول مره اعرف موضوع السكر ده...
بس انا هاجربه ان شاء الله..
والكنافه اللى عندى غالبا فروزن
بس فى رمضان بس المخابز بتعملها فريش
لكن دلوقتى كلها فروزن
وانت ممكن تقطعى الكنافه صغيره قوى
حطيها فى مفرمة البصل ..وهتتقطع احسن واسرع...
تحياتى ياقمر..

صبرني يارب يقول...

بنت ا لغربه

يا جميله انا باعملها فى المفرمه برضه بس لما تكون مش مجمده اما لما باجمدها بتبقى سهله بقى ومش محتاجه
المفرمه بتزهقني لانى اقل طالعه عندي كيلو كنافه يا دولي ههههههههههههههه

نورتي يا جميل

mostafarayan يقول...

فل يا صبرني
يعني انتي عملتي الكنافة ومارنتيش عليا ولا جبتي اي سيرة او خبر
رغم اني انااللي طالبها
ماشي على العموم حصل خير
ههههههههه
ربنا يكرمك ويجعله في ميزان حسناتك
( ممكن لما واحدة تعملها وتعجب جوزها وينبسط هي اكيد هتفرح وتبقي انتي كدة ادخلتي سرور على قلب اختك المسلمة ومعدة اخوكي المسلم)
والله دة كلام جد مش بهزر فيه
تحياتي لك ودمت بخير

صبرني يارب يقول...

مصطفى
هههههههههههههههههه

والله كنت ناويه اجي اقولك بس نسيت ههههههههههههههههههههههه

طيب لما واحد يعملها وياكلها هو زيك كده هاخد ثواب برضه ولا ايه

الحمد لله الاعمال بالنيات وانا دايما بانوي الثواب عشان كده باخده

ان شاء الله يعنى

تحياتي لك يا مصطفى ونورت ومبروووووووك الكتاب ما تنساش نسختي

غير معرف يقول...

خطيره خطيره بس انتى حرقتيها باين
الصوره مابتكدبش
الصينيه دى كانت مصيرها ايه

صبرني يارب يقول...

بيبرس

لا لا الصنيه دي كانت الى بالكريمه مااتحرقتش ولا حاجه هى كده لونها مظبوط اوي

انما الى بالمكسرات هى الى شويه اتحمرت
انما والله اتكلت لاخر فتفوته يا فندم عيييييييب هههههههههههههههههههههههههههه
نورت

أحمد (زوج مخنوق ). يقول...

اما بتتعمل زي ما انتي كاتبة كده يا امريم بيبقى برضه طعمها مختلف عن اللي بتتجاب جاهزة
التانية باحس اكن الكريمة بتاعتها قشدة بس
انما دي باحس ان طعم الكريم بتاعها مش مضبوط تحسي انه سايط
يسترك ربنا ما تعرفيش السبب؟؟

صبرني يارب يقول...

والله يا احمد انا هحاول اساعدك لو انت ساعدتني يا اخويا وقلتلي يعنى ايه سايط
هههههههههههههههههههه

والكريم الى بتتعمل فى الجاهزه طبعا هما مش بيتعبوا نفسهم ويعملوا كريم باتسيير خااااالص كلهم بيعملوا مهلبيه

لو عايز طريقة المهلبيه نقولك يا فندم انما انا باحب الباتسيير اكتر لانها ما بتكونش نشا اوي بتكون ما بين الكاستر والكريم كرامل حاجه ملظلظه كده ههههههههههههههه

يعنى بقى سايط ؟؟؟

خمسة فضفضة يقول...

السلام عليكم ورحمة الله وبركاته

تسلم اديك يا صبصب

باعملها تقريبا زيك بالظبط ، وحكاية انها تبات في الفريزر دي كمان باعملها برضو عشان الكيتشن ماشيين بتزهقني لما اجي افرمها وهي طازه

بس مش باحط سكر بودره ، وباخلي الكنافه مع السمنه السايحه علي النار شويه واقلبها لحد ما تتشرب السمنه وبعد كده ارصها في الصينيه

وباعمل مهلبيه مش كريم باتسيير



تسلم ادك كمان مره والمفروض بقي علي المعرض الجاي تكوني نزلتي كتاب طابخين ايه النهارده اللي هايكون منافس خطير جدا وهايهز عرش كتاب ابله نظيره

ههههه



------------

مصطفي ريان
البروفايل بتاعك مافيهوش لينك المدونه ليه ؟؟

سلام

صبرني يارب يقول...

فضفضه
السكر ده عشان يخليها تمسك فى بعضها كويس

والكتاب ايوه هانقعد ابله نظيره فى بيتها يا اختي
ههههههههههههههههههههه

hasona يقول...

السلام عليكم
ايه الحلويات دي


كنافة وكمان بالسمن البلدي- أحمدك يا رب

فكرة جميلة قوي

بالتوفيق دايما

تحياتي

صبرني يارب يقول...

حسونه
الله يكرمك يارب بس تقصد ايه فكره جميله الكنافه ولا السمنه ولا المدونه ههههههههههههههه

نورت يا استاذنا

ام مريم موسى يقول...

تسلم ايدك ياام مريم بجد تحفه بس حلوه فكره السكر البودره ده هجربها واقولك بس انتى مصممه تبوزى الرجيم اللى انا مش ماشيه عليه اصلا

غير معرف يقول...

انا اول مرة اكتشف مدونتك دى وبجد شدتنى وبقى لى ساعة مش قادرة اغير المحطة من دمك الشربات فى طريقة كلامك وكمان وصفاتك قريبة من وصفاتى يعنى مش فيها حاجات غريبة زى اللى بنشوفه فى برامج الطبخ اللى مش واقعية
بجد استفادت منك ومجهود كبير جدا منك يارب يقدرك وتستمرى تفيدينا والاجر والثواب على الله وذنب الناس اللى هتتخن بسببك فى رقبتك :)

غير معرف يقول...

صبرنى ياجميلة ..من فضلك عاوزة اعرف الجبنة اللى بنحشى بيها الكنافة اسمها ايه وهل هى تباع فى مصر ؟

صبرني يارب يقول...

ام مريم موسى

يا سيتى قلنا اعملوها فى اليوم الفري بقى ههههههههه
نورتي يا قمر

صبرني يارب يقول...

غير معرفه القبل الاخير ههههههههه حبيبتى اتخني براحتك التخن للجدعان هههههههه مرسي خالص على كلامك الجميل ومتشكره ليكى اوي

صبرني يارب يقول...

الغير معرفه الاخيره

امممممممم فكرتينى كنت باحبها موووووت الكنافه بالجبنه دي

الحقيقه انا مش عارفه هى موجوده فى مصر ولا لا بس اسالي عليها بقى

هى نوع جبنه شامي اسمه جبنه عكاوي
وساعات بيقولوا عليها عكاوي بيضا حلوه

اي لونها ابيض ومافيهاش ملح

امممممممممممم جريتى ريقنا بقى هههههههههههه
اسمعي لو لقتي الجبنه دي بجد قوليل منين عشان انا برضه هاموت عليها