الخميس، 29 يناير 2009

صلصة البشاميل

البشاميل طبعا من اهم الحجات الى بنستخدمها فى اكلات كتيره جدا وعشان كده انا هاعمله معاكم قبل مانبدأ نعمل منه اكلات
وطبعا فى اكياس بشاميل جاهزه بس الحقيقه انا بالاقيها بتاخد وقت ومجهود زي العادي تمام وكمان ما تاكلش معايا الاكياس دي نظرا للكميات الرقيقه الى انا باعملها ولا سيما فى المناسبات افراح وخلاف
وكمان انا باحب طعم البشاميل البيتى لما يطلع مظبوط

انا صورتلكم كده صورتي بس بصراحه تعبانين يعنى اي كلام التصوير بتاع الموبايل ده المهم يعنى نحاول نفهم بقى منهم مع كلامي

الاول هانعمل مقدار يعمل تقريبا صنية مكرونه صغيره

والى عايز يزود بقى يزود

المقادير

خمس ملاعق كبيره دقيق ابيض + اربع كوب لبن + 3 ملعقه سمن + 2 بيضات

الطريقه

اول حاجه نجيب السمن ونحطه على النار لحد لما يقدح او يسخن اوي يعنى وبعدين نحط الدقيق على مره واحده ونكون جاهزين بالمعلقه نقلب كويس جدا وبسرعه لحد ما الدقيق يتشرب السمن كويس وبعدين على نار هاديه شويه ونقلب بقى على طول ممكن نريح فى النص لمدة نص دقيقه ونرجع نقلب تاني عشان الدقيق ما يتحروقش ولما الدقيق لونه يبدأ يتغير ويبقى اصفر شويه زي الصوره دي كده بعدها هانلاقيه كمان بدأ يبقى متوحد مع السمنه كده وبيسيح وبيغلي فى السمنه كده يبقى تمام جاهز
فى اثناء ما احنا بنعمل الدقيق فى السمن نكون حاطين اللبن على النار يسخن جامد وبعدين لما الدقيق يحمر نبدأ نزود الحليب الاول نحط كوبايه واحده ونقلب جامد جدا جدا لحد ما تختفي وهاتختفي فى ثانيه من سخونيه الدقيق والسمن

وبعد كده نرفعها من على النار ونزود باقي الحليب ونضرب بقى بالمضرب الكهربا بس خلي بالك عشان المضرب ما يبوظش منك ونضرب كويس بالمضرب لحد ما تبقى عامله زي الكريمه وتختفي الكلاكيع بتاعة الدقيق وكله يبقى تمام
نرجعها تاني على النار الهاديه اوي ونقلب حوالي خمس دقايق كده ونطفي ونسبها لحد لما تبرد تبقى دافيه كده

ونكون جاهزين بالبيض بقى نزود عليها البيض ونرجع نضرب بالمضرب تاني ونزود بقى الملح والفلفل الابيض على حسب ما نحب وممكن فلفل اسود مش هايعيط
وبيكون شكلها زي كده



بس ما تركزوش اوي فى الكميات الى في الصور عشان ما تهيسوش معايا لانها اكتر من الكميات الى فى المقدار بكثير اه ده كنا فى العيد يا بطاطا
والى عايز يعمل اكياس بقى من الجاهزه يعمل بقى ما يصدعناش هههههههههههههههه والطريقه على الكيس عشان انا عارفه ان نص الستات لا كلهم بقوا شلت دلوقتي مش عايزين يتعبوا نفسهم
المهم ان شاء الله بعد شويه هاتنزل الكوسه بالبشاميل بناءا على رغبة الجماهير

هناك 7 تعليقات:

Lady E يقول...

بجد بجد تسلم ايدك

بس ليا استفسار انا بعمل صوص البشاميل بشوربة ولبن ؟؟ مش بلبن بس
يعني كوبيتين لبن وكوبيتين شوربة ايه رأيك

صبرني يارب يقول...

ليدى

تماااااام بالظبط كده ممكن تحطي شوربه مع لبن عادي ينفع وحياتك ولما الحكايه تأزم معايا واتزنق بقى وانا باعمل وطالع معايا تقيل باسخن شويه مايه وبتمشي الحكايه ما تزعليش نفسك

تسلمي يا قمر حالا نازل الكوسه على فكره ان شاء الله

الفقيرة إلى الله أم البنات يقول...

تسلم الايادى
بجد توحفه
ان شاء الله متابعين ومنفذين
ومن المطبخ مستجيرين

صبرني يارب يقول...

ام البنات

تسلمى يا رب ربنا يكرمك يارب يلا شوفي الكوسه وقوليلي رايك

Mony يقول...

تسلم ايدك يا جميل

كنت لسة بفكر اكتب عنه

كده ممكن استني شوي لما الموضوع يهدي


بس انا ماليش في وجع الدماغ ده خالص يا صبصب

هخليهولك مفاجئة بأه لما اكتبه ابقي تعالي شرفينا و شوفيه

صبرني يارب يقول...

اوك يا موني نشوف ان شاء الله عادي براحتك نزليه فى اي وقت

هدى يقول...

شكرا كثير حلو بس شو معنى هيل