الجمعة، 2 يناير 2009

فراخ من واحده مفروسه



فى يوم من ذات ا لايام

كنت قاعده كده محتاره اطبخ ايه وكنت بارغي مع واحده مفروسه على النت قلتلها انا مطلعه فراخ بس مش عارفه اعملها ايه


قالتلى على طريقة فراخ طلعت حلوه اوي وطبعا صورتها عشان ما اقدرش اكل حاجه من غيركم تسلم اديها مفروسه


يلا بسرعه قدامي على المطبخ كفايه تأخير كده

المقادير

فرخه مقطع الى 8 اجزاء (ومفروسه قالتلى انها بتعملها بصدور مخليه وبتبقى حلوه اوي )

ومعلقتين خل

4 فصوص توم مقشرين ومقطعين حلقات رفيعه

ملح وفلفل وتوابل زي ما تحبي



الطريقه

الاول هانجيب طاسه كبيره تنفع صنيه ما تقولش لا ونسخنها على النار ومعلقتين زيت زتون او سمن او اي حاجه

ولما يسخنوا تحطي الثوم وبعديه على طول الفراخ جنب بعضها وتقلبي الفراخ من جنب للتاني فى الزيت والتوم وترشي عليها كمان الملح والتوابل وكل تقريبا 3 دقايق تقلبيها على الوش التاني لحد لما يبقى لونها دهبي زي كده



وبعد كده نحط معلقتين الخل عليها ونقلب برضه على الجنبين خمس دقايق كده وبعد كده نزودها كوباية ميه وبغطيها ونهدي عليها النهار ونسيبها بقى مع نفسها نص ساعه كده تقريبا لحد ما تستوي


بس ناخد بالنا لو نشفت الميه قبل ما تستوي الفراخ نبقى نزود الميه ونقلب الفراخ على الجنب التاني لحد لما تستوي وتتحمر تبقى شكلها زي الصوره الي فوق دي بالظببببببط

والف هنا والى يعملها يقولي ويدعي لمفروسه

هناك 32 تعليقًا:

Kiara يقول...

وااااااااااااو


هجربها دي فراخ ياناس مش اي كلام

صبرني يارب يقول...

كوكي

اي خدمه ما تقوليش حرماكي من حاجه بقى هههههههههههههههه

غير معرف يقول...

مجوعانا دايما يا ام مريم
فيه صدور مخليه بتتباع كده هى دي ولا حاجه تانيه؟؟؟
ربنا يخليك للجوعى يا رب

بنت الغربة يقول...

حبيبتى ياصبرنى
تسلم ايديك على الفراخ وطبعا ايد مفروسه
انا ان شاء الله هاعملها النهارده
على فكرة الكولسلو طلع حلو قوى وخلص طبعا يوم العزومه
وبيبه بتقولك تسلم ايديك
بس انا حبيت انبه لحاجه وهى ان زيت الزيتون مايتحطش ابدا بتاتا البته على النار
لانه بيبقى مسرطن اول مابيسخن من النار -حقيقه علميه -
وممكن تحطيه عادى على اى حاجه وهو فى درجة حرارته العاديه لانه مفيد جدا
المعلومه دى مهمه قوى لانى عرفتها السنة دى بس وكنت دايما باستخدمه فى الاكل وعلى النار عادى يعنى
بس لما عرفت و أتأكدت من المعلومه قلت لكل اصحابى لان معظمهم بيستخدموه على النار عادى
تحياتى ليك ياقمر

صبرني يارب يقول...

بيبرس

ايوووه هى دي الصدور الى بتتباع

وبعدين اجوعكم ازاي بقى ده انا باشبعكم على الريحه قصدي على الصوره هههههههههه
نورت

صبرني يارب يقول...

بنت الغربه

الف هنا يارب وقوليلى عملتيها وطلعت ايه معاكي

والكول سلو الف هنا يا جميل انتى وضيوفك وسلميلى على بيبه


وبالنسبه لزيت الزتون والله الى انا اعرفه ان كل الزيوت اصلااااا كده ولا سيما الزيوت الخفيفه منها

كل الزيوت لكن طبعا احنا مضطرين نقلي يعنى هانعمل ايه

انا عن نفسي باتجنب استخدام الزيت على اد ما اقدر وباستخدم سمنه بلدي طبيعيه من صنع اديا وحياة عنيه طبعا دي افضل من اي زيوت مهدرجه ومسخنه

وعموما اهو الحرص واجب ونورتينا يا جميل وشكرا على المعلومه

mostafa rayan يقول...

سؤال
بالنسبة للثوم هنفرمه ولانقطعه ترنشات ولا ايه
لك كل التحية

mostafa rayan يقول...

معلش يا صبرني
في سؤال
احنا دلوقتي بعد مانحمر الفراخ في الزيت مع الثوم
ازاي نحط عليها المياه بعد ماتكون اتحمرت
لوسمحتي بس فهميني النقطة دي
ولك كل التحية

صبرني يارب يقول...

مصطفى ريان

ايوه بنقطع التوم حلقات رقيقة

وايوه هانحط الميه بعد ما تتحمر ايه لمشكله ؟

بس الاول نحط الخل

اعمل بس كده بس وعلى مسؤليتى

mostafa rayan يقول...

صبرني العزيزة
انا قصدي انها كدة بعد ماتتحمر ونحط مياه عليها هتفقد طعهما المتحمر
متهيالي هتكون شبه الفراخ المسلوقة
ولا ايه ؟

mostafa rayan يقول...

صبرني لوسمحتي اناعايز الكنافة ام قشطة
ياريت تخليها التدوينة الجاية
وليكي مني كل التحية

أحــوال الهـوي يقول...

تصوري افتكرت العنوان فراخ مهروسه

بس و صفه سهلة دي وصفه هايله

تحياتي

صبرني يارب يقول...

مصطفى ريان

لا ماهو انت مش هاتحط عليها دورق ميه يا مصطفى ركز

انت هاتحط بس كوباية ميه وتحطها على النار لحد ما تنشف ميتها تاني وتبقى متحمره وهاتطلع زي الى فى الصوره دي بالظبط شكلها ايه حضرتك مسلوقه ولا ايه ؟

اي خدمه يا مصطفى

وبالنسبه للكنافه والله انا كنت ناويه ااجلها لحد رمضان بقى وخلاص

بس عشان خاطرك عنيه هانزله المره الجايه ان شاء الله

صبرني يارب يقول...

أحوال الهوى

هههههههههههههههههههه لا هى مفروسه مش مهروسه بس لو حبيت نهرس مفروسه ماشي نفكر هههههههههههههه

ولما تجرب ا لوصفه قولي
نورت والله

mostafa rayan يقول...

عزيوتي صبرني
اشكرك على التوضيح
وان شاء الله هبقي اعملها انا واقولك رأيي
وكمان متشكر قوي على استجابتك لطلبي في الكنافة ام قشطة
- بس ياصبرني الفراخ دي هنعمل جنبها ايه
- ممكن كمان تقوللنا ازاي نعمل كاتشب في البيت
- معلش انا بتقل عليكي بس انا شكلي هبقي زبون دائم في مدونتك دي واسيب مدوناتك التانية
عارفة ياصبرني بجد انا لو ماكانش ليا في الادب والقصص وكتابةالسيناريو والمواضيع دي اناكنت بقيت طباخ بريمو
اخوكي الحمد لله بيعرف يعمل اكل حلو
منتظر ردك ولك كل التحية
وارجو انك ماتكونيش متضايقة من زيارتي واسئلتي

mostafa rayan يقول...

-صبرني معلشي سؤال تاني
هو ماينفعش نعملها بفراخ مسلوقة على اساس نعمل على الفراخ شوربة الأول
ونستفيد منها وبعدين نستني لما تبرد ونحطلها الزيت والثوم والخل والطريقة اللي قولتي عليها دي
- اشكرك مرة تانية
ولك مني كل التقدير والتحية

صبرني يارب يقول...

مصطفى

ابدا يا سيدى ده انت على راسنا

بخت كل بوست انزله كده هنا الاقي حد يناقشني ويسأل كنت اعملكم فرح على فكره

هههههههههههههههههه
انا باحب كده

طيب يا مصطفى تعالى نعمل مطعم شركه ههههههههههههههههه

المهم بالنسبه للفراخ اساسا شوربة الفراخ البيضا اجارك الله يا اخويا ما تتشربش انا مش باعملها بشوربه بتاتا البته

اما لو حبكت معاك شوربه بقى تقدر تبقى تعمل زي ماانت بتقول كده هاتبقى فراخ برضه ماشي بس هايبقى التتبيل بتاعها قليل شويه لان الفراخ لما بتستوي صعب تاخد طعم التتبيل بس هاتبقى فراخ محمره يعنى

أه وانا عايزه دروس فى السيناريو عشان عندي موضوع عايزه اكتبه محتاج شوية سيناريو بجد

وبالنسبه للكاتشب بصراحه ما جربتش اعمله بس جت على بالي كتير على فكره اوعدك اعمل تجارب عمليه معمليه ونشوف هانوصل لحاجه ولا لا

ويلا بقى اعمل الفراخ ياعم انت ههههههههههههههههههه

mostafa rayan يقول...

اختي الفاضلة صبرني
اشكرك على اهتمامك
ولو انك ماقولتيش نعمل جنبهاايه
بصي بالنسبة لدروس السينما
مكن تتدخلي على اللينك دة
www.arabfilmtvschool.edu.eg
دة لينك مدرسة تعليم السينما على الأنترنت والتي تشرف عليها د. منى الصبان
استاذ المونتاج بالعهد العالي للسينما
فيها كل شيئ عن فنون السينما من سيناريو واخراج وتصوير ومونتاج تتقدري تتعلمي سينما وانتي قاعدة في بيتك قدام جهاز الكمبيوتر الخاص بك
اعملي عليها حساب وان شاءالله ممكن تبقي سيناريست محترف كمان
- وانا والله بجد فرحان انك مرحبة باسئلتي وبتواجدي معاكي في المدونة الطبيخية دي
ربنا يكرمك يا صبرني وييسر لك كل الخير

غير معرف يقول...

قشطه يا مان
سينما كمان دي هاتبقي تحفه
نجمه السينما و المسرح صبرنى
بس هيا كان نفسها تعمل برنامج طبيخ بس كنت هاخرجه انا
سؤال كمان يا صبرنى هى لو فراخ قعدت على النار كتير تتحرق؟؟؟

لؤلؤة يقول...

بصي بقى يا صبرني
انا أصلا سجلت هنا عشان عجبني اسلوبك أوي و كمان حسيت من الطرق اللي بتعمليها ان أكلك حلو ..... كمان دمك خفيف بجد......

نيجي بقى للمهم .... يعني مش هعدي من غير ما أسأل

دلوقتي بالنسبة للزبادي أنا هنا في الامارات مافيش لبن بالكيلو بس فيه نوعين من اللبن لبن زي علب جهينة بتاعت مصر و لبن في أزايز مكتوب عليه لبن طازج و ما بيقعدش أكتر من اربع أيام سواء فتحت الازازة أو لأ ( طبعا في التلاجة ) اللبن ده ممكن أعمل بيه الزبادي ؟؟؟؟؟

و انا كمان نفسي تشرحي طريقة الكنافة و لو تعرفي انواع ليها تانية غير بتاعت القشطة يا ريت لحسن انا مش عارفة أظبطها يمكن مرتين او تلاتة اللي ظبطت

و متشكرين أوي أوي على شوربة السي فود اللي عرفتني بالمدونة الحلوة دي ...
معلش عارفة اني رغاية

صبرني يارب يقول...

مصطفى

ايه ده كل ده عشان اكتب قصه ههههههههههههههههه

لا ياعم انا هاجرب الاوي بالفطره كده وبعدين نبقى نشوف الموضوع ده لما نحب نحترف

وبالنسبه للفراخ

معلش نسيت السؤال ده

ممكن تعمل معاها مكرونه ويا حبذا لوطبق سلطة كول سلو ويا حبذا كمان لو معاها طبق خضار سوتيه تبقى حاجه زي الفل

وأي خدمه يا باشا انت بس تأمر

صبرني يارب يقول...

بيبرس

لا لا نجمة سينما ومسرح ايه

لا لا مش فىمصر
انا هاطلع علىالعالميه على طووووووول
ههههههههههههههههههههه

وبالنسبه للفراخ حضرتك بالذات لازم تسيبها على النار خمس ساعات

وبعدين المدام هاتقوم بالواجب
هههههههههههههه

غير معرف يقول...

ليه انا بطبخ جمل؟؟؟؟

صبرني يارب يقول...

لؤلؤه ياحبيبتى نورتي

ونورتي البلوج كله

بصي يا جميل بالنسبه للزبادي لو هو لبن مبستر مش هاينفع فى الزبادي

شوفي مكتوب عليه ايه

وبعدين ياستى ابقى جربي فى كوباية لبن واحده وحطلها معلقة زبادي

وابقى قوليلى عملتى ايه

وقوليلي كمان اسم اللبن الطازج ده ايه عشان لو حد سألنى الامارات اقوله انه ينفع للزبادي
ما كانش على ايامي ياا ختي هناك ههههههههههههه


وبالنسبه للكنافه عنيه حاضر هانزل الاول الى بالقشطه وجربيها هاتلاقيها تحفه ان شاء الله

والف هناالسي فود يا جميل اي خدمه

بس ابقى اعملي حسابي المره الجايه ههههههههههههههههههههه

نورتي يا قمر

غير معرف يقول...

اشتروا الزبادى جاهزه احسن
لانها فشلت معايا

بنت الغربة يقول...

حبيبتى ياصبرنى
اولا وحشتينى جدا جدا
تانيا الفراخ طلعت حلوة قوى والعيال نسفوها هم وابوهم
تالتا بالنسبه للاخت لؤلؤة
فيه فرق بين اللبن والحليب فى الامارات......
اللبن يعنى الرايب عندنا فى مصر
والحليب هو اللى احنا بنقول عليه لبن فى مصر
والاتنين الموجودين فى الامارات كلها
مبسترين
وده لانى سألت كتير عن حليب مش مبستر علشان اعمل زبادى ومالقتش حاجه
تحياتى لمفروسه قوى علشان الفراخ وليك انت ياقمر
داليا

صبرني يارب يقول...

بنت الغربه

والله يا دولي انا قلت جايز فى حاجه جديده انا ما اعرفهاش

انما لو هى تقصد على الى مكتوب عليه لبن فعلا يبقى تقصد الروب

يمكن هى فى اماره مختلفه يا داليا انا كان فى واحده صاحبتي فى عجمان بتجيب حليب سايب بالكيلو من ناس مربيين غنم وبقر

والف هنا يا جميل الفراخ يارب يخليكى

وما تسمعوش كلام بيبرس عشان هو مش بيعرف يعمل شاي حتى ههههههههههههههههه

صبرني يارب يقول...

بيبرس

مش عشان انت مش بتعرف تعمل حاجه وبوظت الزبادي قوم تثبط همم البنات كده

هما الستات عندهم ملكه خاصه مالكش انت دعوه بالزبادي ما بيربطش معاك انت بس هههههههههههههههههه

لؤلؤة يقول...

ربنا يخليكي يا صبرني على الرد

أنا في عجمان فعلا و هل فعلا فيه ناس بتبيع لبن بالكيلو لو تعرفيهم فين قوليلي انا بقالي سنتين و نص في عجمان بس مش عارفة أوي ممكن أجيب الحاجات دي منين

و ميرسي أوي يا بنت الغربة على التوضيح أنا في الأول اول ما جيت كنت فاكراهم هما الاتنين لبن بس بعد ما جربت عرفت ان البن عندهم يعني رايب

و الفراخ هجربها قريب ان شاء الله اصل زوجوجي مابيحبش غير الفراخ المسلوقة اللي بتتحمر عادي دي يا رب دي تعجبوا

الف شكر ليكوا

صبرني يارب يقول...

لؤلؤه

والله مش عارفه فين يا لؤلؤه الكلام ده كان من زماااااان ست سبع سنين ولا اعرف تليفون صاحبتي هناك ايه دلوقتي

بس لما تيجى فة الاجازه ابقى اسألهاك بقى هى لما بتنزل بتيجيلي ان شاء الله

وبالنسبه للفراخ قوليله المسلوقه المحمره دي هناك فى بلدكم الفراخ البلدي الجميله دي
انما البيضه دي ما لهاش شوربه خالص
ههههههههههههههههههههه

نورتي يا جميل

zainab يقول...

عزيزتى صبرنى

أول زيارة ليا هنا و ان شاءالله مش تكون اخر زياره

جيتى على نقطة ضعفى

بموت فى الفراخخخخخخخخخخخخخخ و اللحمه

اجربها بس يارب تطلع حلوة اصل لو طلعت معايا مش حلوه هزعل

تحياتى

صبرني يارب يقول...

زينب يا حبيبتى نورتي

والله انا عن نفسي مش بانزل حاجه على المدونه الا اكون عملتها فعلا واكتر من مره وعجبتني زي ما انتى شايفه انا باصور الاكل من مطبخي والله حتى مش بالحق ازوق ولا اشيك فيه للاسف مافيش عندي فسحه من الوقت

وعموما لو عملتي الفراخ زي ما انا قلت تمام ان شاء الله هاتطلع حلوه

ونورتينى ويارب دايما تنوري