السبت، 6 ديسمبر 2008

البيتى فور

طبعا انا عارفه انى اتأخرت عليكم اوي بس والله غصب عني اولا كنت مستنيه عشان انزله بالصور وكمان طبعا انا مشغوله حبتين عشان العيد وكده

المهم



المقادير



واحد كيلو دقيق ابيض ( سبع أكواب )



3/4كيلو زبدة بقري (3 كوب) طبعا ممكن جموسي وطبعا ممكن سمن لكن احلى نتيجه بتيجى من الزبده البقري الصفراء.



ربع كيلو سكر (كوب سكر) او كوب ونصف حسب الرغبه فى طعم الحلو



4 بيضات + فانيليا



كيس بكنج بودر أو 2 ملعقه كبيره بكنج بودر



********************************************************************************************************************



خلاص كده كل حاجه جاهزه



نبدا اولا نجهز الدقيق ننخله ونحط عليها البكنج بودر ونقلبه كويس ونحطه على جنب



بعد كده نحط السمن فى حاجه غويطه وكبيره تكفي العجين كله فى الاخر وبعدين نحط عليها السكر ويفضل يكون سكر مطحون او على الاقل ناعم



ونخفقها كويس بالمضرب الكهربائي أو باي مضرب سلك يدويا بس هاتطول شويه في البدايه بيكون شكله كده

ونستمر فى الخفق لحد لما تبقى لونها افتح وتبقى عاملة زي الكريمه

وبعد كده نحط البيض فى وعاء تاني وعليه الفانيليا ونخفقه الاول كويس وبعدين نضيفه للسمن على السكر ونخفق تاني لحد ما يختلط ببعضه تماما ويبقى برضه زي الكريمه برضه .



وبتكون تقريبا شكلها كده زي الى في الصوره دي ملاحظين فرق اللون عن الصوره الى فوق ؟؟
وبعد كده نضيف الدقيق المنخول والمضاف عليه البكنج بودر ونضيفه للعجين شويه شويه ونقلب دايره ونص قطر زي ما اتفقنا


حاولت اصورها ما عرفتش بقى المهم نفضل نقلب على اد ما نقدر بالمعلقه لحد ما العجينه تتقل هانضطر اننا نقلب بادينا بس نقلب برفق عشان الهوا الى دخلناه ما يخرجش تاني



ولحد ما ننتهي من الدقيق كله والعجينه تبقى طريقه لكن فى نفس الوقت ما تكونش لازقه فى ادينا ولا فى الوعاء الى بنعجن فيه وبتكون فى النهايه شكلها زي كده بالظبط

بعد كده نبدأ نشكلها بالقمع او بالماكينه المخصصه للبيتى فور



أنا عن نفسي بحب القمع وباستريح فيه وبالنسبالي اسرع من اي ماكينه واستعماله سهل جدا

ونخلي ايدنا عموديه لو كنا عايزين البيتي فور يطلع على شكل ورده مدوره زي الصوره الى فاتت دي بالظبط
ويطلع كده
ولو حابين نعملها طويله شويه نميل ادينا ونسحبها بالطول شويه يطلع طويل زي الصوره دي

ما صورتش عمايله عشان كان رضا مشي ههههههههههههههههههههه
المهم بعد كده نكون مجهزين الفرن شغال وسخن حوالي 200 درجه



وما ننساش الصنيه فى الفرن ونحرقها زي ما انا عملت عشان كنت باقرا البوست بتاع عمرو فى حبشتكنات فلسفيه هههههههههههههههههههه



لا على طول نطلعها اول ما تصفر



بتاخد لو كان الفرن حامي اقل من ربع ساعه ولما يسخن اوي عشر دقايق بالظبط وبتطلع



وبيكون شكلها كده




بعد كده ولما نخلص الموضوع كله نقدر نزينه بقى زي ما نحب ممكن نزقه بمربى او عسل ابيض او شيكولاته وبعدين نغمس طرفه فيها ويكون كده







وممكن كمان نطلعه من الشيكولاته ننزله فى جوز هند او فستق مطحون او لوز او بندق او فول سوداني



المهم يعنى يبقى باي شكل تحبوه



وتاكلوه بس مش كله تسيبوا حبه للناس الى هاتزوركم فى العيد



وألف هنا يارب وكل سنه وانتم طيبين

هناك 17 تعليقًا:

Kiara يقول...

والله برافوا ياصبصبتي وكمان مدعماه بالصور

عيد سعيد عليكي ياقمر

Mony يقول...

انا هجربه يا ام مريم

بس علي ضمنتك انت:)


اصل انا اخر مرة عملته مش عارفه ايه اللي حصل
سااااح مني خاااالص

و معرفتش اللمه

حتي جدتي قالتلي عمرها في حاياتها ما شافت بتيفور بالمنظر ده

لا و الجديد في الموضوع... كان طعمه مااالح

مع اني و الله ما جيت جنب الملح خالص
ههههههههههههههه


يالا اتحسدت بأه يا اختشي
ههههههههههههه

بس علي مين اكلتهولهم كله وحياتك
عقابا ليهم علي تريقتهم علي


تسلم ايدك يا جميل

أحــوال الهـوي يقول...

تسلم الايادي
انا مدمن بتيفور
ممكن انزل الصور من ع النت و اكلها

كان الاولي تعمللي فته بالخل و الثوم و هبر اللحمة و تصوريها علشان الواحد يفطر عليها النهاردة و الحلو البتيفور

كل سنة و انت طيبة

تحياتي

أميرة يقول...

انا مستنية الحادق باه مليش دعوة :(

صبرني يارب يقول...

مولان

تسلمى يا جميل كل سنه وانتى طيبه
اها موضوع الصور اخيرا عملته

صبرني يارب يقول...

موني

انا ماليش دعوه يا ستى انتى شكلك بتحطي ملح بدل السكر

انا جربته قدامكم اهو الطعم بقى مستعدين نجيب لكم شهود عيان

وجربي وقوليلى برضه

صبرني يارب يقول...

احوال الهوى

عنينا لك يا فندم

والله مش باكل الفته دي يا استاذنا بس نبقى نعملها برضه عشان خاطركم

صبرني يارب يقول...

اليس

عنينا يا جميل نزل الحادق اهو يلا باسم الله

بنت الغربة يقول...

حبيبتى ياصبرنى تسلم ايديك انا باعمل البيتى فور تقريبا زيك بس باستعمل المكنه لان معنديش قمع بس انا هانزل بعد العيد وادور على قمع
وانا دايما بالزقه بالعسل لانه احلى من المربى - وباعمل العجينه اصلا نصين واحده بالفانيليا والتانيه بالشيكولاته والزق واحده كده وواحده كده - وبعدين اغمس الطرف فى مكسرات مطحونه -وبيبقى طعمها حلو قوى -مستنيه البريفترول ماشى.........-كل سنه وانت طيبه - داليا-

صبرني يارب يقول...

بنت الغربه

اها يا داليا كل ده تمام ما شاء الله انتى شاطره اهو

وبالنسبه للقمع ماشي هاتيه من هنا بس لو نزلتى ابوظبي فى محل قدام سوق الخضار والسمك القديم
اسمه المنتجات المصريه بيبقى عنده كل حاجه من الحاجات دي بس العيد الصغير بالذات

وسلميلى على الحاج عزت هناك
هههههههههههههههه

وبتاع الماكينه ما يقولش لا شغال يعني

نورتي يا جميل

غير معرف يقول...

القمع ده يتجاب منين ف مصر؟؟؟
فين الحلقات المصوره

غير معرف يقول...

عايزين طبق جديد
طبق بعد العيد يساعد على الهضم

صبرني يارب يقول...

بيبرس

القمع ده موجود عند بتوع لوازم الحلوانيه

او حتى بتوع الادوات المنزليه

وفى ماكينة بيتى فور حلوه برضه بتمشي

وماعدش خلص بعد العيد مافيش بيتى فور

صبرني يارب يقول...

الغير معرف الاخير ده انا مش عارفه هو كاتب ايه

فياريت لو هو كلامه مقري له هو يعرف ان انا ما قريتش تعليقه وما اعرفش قال ايه

ولو ممكن يكتب بالانجلش لو العربي بتاعه مش واصل لنا مافيش مشكله

نكهة مغربية يقول...

أنا يا عسل جربت القطايف جنااااانننن
شكرا يا عسل أنا حشيتهم كريمة حليب و نشا
جنننناااانننن و الله تحفة مرسي
http://www.0zz0.com/index.php?sid=ce3c7f2625bc5ef9bae774d5008b0b00

http://www.0zz0.com/index.php?sid=d99f7fd1464eeab76d613e7903817f0d

http://www.0zz0.com/index.php?sid=f8b5757d67ef4938b1cd8839691a16fb

و دي روابط الصور

نكهة مغربية يقول...

http://www5.0zz0.com/2009/09/12/12/640372042.jpg

نكهة مغربية يقول...

http://www5.0zz0.com/2009/09/12/12/640372042.jpg

http://www5.0zz0.com/2009/09/12/12/967451377.jpg

http://www5.0zz0.com/2009/09/12/12/819255092.jpg