الثلاثاء، 15 ديسمبر 2009

الكيك بالشيكولاته



السلام عليكم


ازيكم يا بشر وحشتوني والله


واندا انا كنت قلتلك هاعمل ام علي بس افتكرت انى كنت وعدت البنات الى كانوا معايا فى اللقاء انى اعملهم كيك ولقيت الصور بتاعته جاهزه قلت نشوف الكيك الاول بقى


وادي يا بنوتاتي الحلوين الكيك بالشيكولاته زي الى كان فى اللقاء بالظبط اهو مش حارمااااااكوا من حاجه والى مش هاتعمله ويطلع حلو هاتضرب



يلا على المطبخ


المقادير :




  • طبعا المقادير دي عشان نعمل قالب كيك واحد او صنيه متوسطه



  • كوب ونصف دقيق (طحين ) حلويات



  • كوب قشطه (وممكن نص كوباية سمن بلدي بس نبقى نزود معيار اللبن الحليب شويه)



  • 3/4 كوب زيت ذره (وممكن سمن أو زبده ) بس الزيت ميزته انه لو الكيكه اتحطت فى التلاجه او كان الجو برد تفضل الكيكه بتلمع ومش جامده اوي

والطعم بقى القشطه بتظبط العمليه كلها


وعموما موضوع الماده الدهنيه ده تقدري تحطي اي حاجه تحبيها زبده او زيت او قشطه او سمن بلدي او خليط من كل ده

المهم تظبطيها ان المقدار ده بياخد حوالي كوبايه سمن

بس القشطه بتدي للكيكه طراوه خطيره




  • حوالي كوب لبن حليب


  • كيس بكنج بودر (او حوالي 3 معالق صغيره )


  • 3 بيضات


  • فانليا


  • 3/4 كوب كاكاو خام ( ده تجبيه من عند بتوع لوازم الحلوانيه او العطارين وخدي بالك بيكون طعمه مر جدا ) بس هو ده الى بيدى اللون الغامق ده انا جربت كل الانواع الي فى السوبر ماركت مافيش فايده الكاكاو الخام هو احسن حاجه بس تجبيه من مكان نضيف عشان فى ناس بتغشه برضه



  • ونصف سكر بودره او ناعم على الاقل


الطريقه




  • اول حاجه احنا دايما فى الكيكه هانخلط الخامات السائله لواحدها والجافه لواحدها وبعدين نحطهم على بعض


اولا الخامات السائل او الطريه


الى هى القشطه والزيت او السمن نحط عليهم السكر ونضربهم بالمضرب الكهربائي لحد ما تبقى عامله زي الكريمه زي دي كده



طبعا ما تركزوش فى الكميات الى فى الصور عشان مش هى نفس كميات المقدار


بعد كده هانجيب البيض ونحط عليه الفانيليا ونخفقه بره الاول وبعد كده نضيفه للخليط السابق ونخلط تاني بالمضرب لحد ما يبقى الخليط متجانس وبعدين نزود اللبن الحليب ونخفق برضه


وهايبقى شكلها كده


بعد كده نروح على المواد الجافه



الى هى الدقيق والكاكاو والبكنج بودر ونلخبطهم على بعض كويس وبعدين ننخلهم عشان ما يبقاش فيهم تجمعات (كلاكيع يعنى) زي الى فى الصوره دي


بعد ما ننخلهم نبدأ نرجع للخليط السابق ونزد عليه شويه شويه ونقلب يستحسن نقلب بالمعلقه على طريقة دائره ونصف قطر وبالرااااااحه عشان الهوا ما يخرجش منها


بس لو عامله كميه زيي انا كده ممكن تستخدمي المضرب بس على الهادي جدا

وبعد الخلط هايكون ان شاء الله شكلها كده


لاحظي شكل العجينه وسمكها عشان تطلع معاكي كده




بعد كده هانولع الفرن ونعمله على درجة حراره من 170 الى 200 ونسيبه يسخن ونروح بقى نجيب الصنيه


ونبطنها (ندهنا سمن خفيف اوي ونرش عليها دقيق خفيف وبعدين نقلب الدقيق الباقي ونصب الخليط فى الصنيه الوسط دي ونفرد فيها العجين بالراااااااااحه يعنى نميلها يمين وشمال لحد ما تتفرد (عشان ما نطلعش منها الهوا)




وممكن نعملها فى قالب كب كيك زي ده كده




بس ما حدش يشتري النوع الى زي القالب بتاعي عشان انا اتخميت فيه وطلع مش حلو



بعد ما نسيبها فى الصنيه حوالي عشر دقايق يكون الفرن سخن وبقى تمام


نحطها فى الفرن واوعى واياك وهاتضربي لو فتحتي الفرن عليها فى اول عشر دقايق ويا حبذا ربع ساعه


بعد عشر دقايق بتهدي الفرن ل 150 درجه وتسبيها كمان حوالي ربع ساعه وبعدين تطلعيها


يا اما بسكينه نضيفه وتحطيها فى قلبها لو طلعت من غير عجين تبقى كده استوت


يا اما بايدك وفى وسط الكيك واتكي عليها لو ردت لفوق تاني تبقى استوت كويس لوما ردتش وصوابعك علمت لتحت يبقى لسه شويه



ولما تستوي تطلعيها وتسبيها فى القالب او الصنيه ربع ساعه تستهدى وبعدين تقلبيها وتقطعيها او تزوقيها لو هاتعملي تورته او اي حاجه تحبيها


ويطلع بقى زي الى في الصوره الى فووووووق دي


والف هنا والى هاتالف من عندها اي حاااااااجه هاتضرب اعملوها زي ما انا قلت بالظبط من غير اي فزاليك وهاتطلع حلوه


والى يجرب يقولي يا بنات


والى تعرف فيكم موقع تمبت حلو تقولي عليه عشان عايزه اعمل نيو لوك للمطبخ
















هناك 33 تعليقًا:

سواحة يقول...

ايوة كده يا رافعة من معنوياتى الغذائية :-))

و الله لا اجربها بس اوصل لمرات اخويا و نشوف
بس حتتة السمن و اللبن و القشدةو ظبطتهم شكلها صعبة بس برضة و لو حنجرب فى اخويا و ماله :-))

تسلم ايدك

صبرني يارب يقول...

ولا يهمك السمنه الطبيعى الافرنجي تمشي برضه
ههههههههههههههههه

وبعدين مش صعبه ولا حاجه انا بس فى الشرح باطول شويه

انما انا باعمل الكيكه فى المطبخ اسهم ما انا عملتها هنا يا اختي واسرع

دي اسهل حاجه فى الحياه اسهل من الطبيخ

بس يلا بسرعه جربي وقوليليييييي

احساس طفلة محبة للرومانسية بس واقعية يقول...

ياااااااااااااااااااااااااااااا
عملتها يا صبرنى عملتها :)
بس مش بسمنه ولا دقيق
وبيكيبنج بودر وكل الكلام دا
هى بتتباع جاهزة مخلوطة شيكولاتة ودقيق وكل المكونات النشفة وانا بحط معلقتين زبدة وبيضة على كل كيس طبعا مكونات قلية على حسب حجم الكيس بس شغالة يعنى لغاية لما ارجع بقى واشوف الكلام الكبير اللى انتى بتقولية دا وننفذ بجد

واقولك على فكرة بقى تجنن جربتها مؤخرا قبل ما تحطى الكيكة فى الصنية اللى هتدخل الفرن كسرى فيها شيكولاتة
وكمان يبقى تحفة لو على الوش ورستيهم بشكل ظريف
اولا لما بتتاكل وهى سخنة بيبقى طعمها حلو ولو بردت بتدى شكل وكمان طعم ممتع دا لعشاق الشيكولاتة زى حالاتى اللى بيدخلوها فى اى حاجة ينفع تدخل فيها

شكرا يا صبصب
دمتى بكل خير
تقبلى مرورى

نكهة مغربية يقول...

يا حلوة ده كلو غياب ايه كنت فين؟؟؟؟؟ الخروف شغلك ده كلو و لا ايييههه
حراااام ده أنتي وحشتينا موووتتت

صبرني يارب يقول...

احساس طفله

ايوووووووه هو ده عشمي فى الحريم الشلت

علب جاهزه واقلب
ههههههههههههههههههههه

البت اختي كانت عاملاها امبارح العلب دي يا اختي والنبى

بس بتاعتي احلى على فكره والله مش عشان هى كيكتي يعنى

بس شعب مصر كله قالي الى باعملها بتكون اطرى واحلى طبعا والسمنه البلدي بتشتغل بقى


وبالنسبه لموضوع الشيكولاته ايوووووووه فعلا انا جربتها

بس وهى سخنه وفيها قطع شيكولاته كده انتى عايزاني اكل الصنيه كلها لوحدي
هههههههههههههه

طبعا انا من المدمنين على الشكيولاته وخلي بالك اتعالجت منها كتير ومافيش فايده بارجع تاني يا اختي الكيف بيذل

نورتي يا جميل

صبرني يارب يقول...

نكهه

لا والله يا حبيبتى بس العيد على شوية تعب على شوية مزاج مش حلو

وانتى عارفه الطبخ عايز مزاج رايق

نورتي يا جميل ووحشاني

Abu ShoSho يقول...

ألهمك الله الصبر أم مريم
جزاكِ الله خيرا على البرشام المنقذ في امتحان المطبخ.
لي طلب عند سيادتك و هو الكيك بدون دسم (سمن أو زبد) لأن الوالدة مريضة بالمرارة و ممنوعة من الدهون.
لقد حاولت عدة وصفات و دائما ما أفشل و تهبط الكيك.
شكرا جزيلا مقدما

أبو شوشو

غير معرف يقول...

مرحبا :)
أنا جربتها...والنتيجة طلعت أحلى من رائعة... بجديات تسلم ايديك على الطريقة البسيطة..الكيكة طلعت خفيفة وطعمتها ولا أروع...وأحسن حاجة أن نسبة الحلاوة مش كتيرة..يعني ممكن ناخدو راحتنا في التزيين من غير ما تكون النتيجة حلوة "سكر" زيادة على اللزوم
انا درتها Cupcake وتقريباً مش فاضل الا اتنين أو ثلاثة بس..الهجوم كان ساحق من الجميع ههههههه ممكن تشوفي تجربتي بالصور في مدونتي :)

على فكرة مدونتك جميلة جداً ...أكيد حانجرب أكثر من وصفة من عندك، ومتاكدة إن النتيجة حاتكون ناجحة زي ما كانت تجربتي اليوم

تحياتي ليك

ليبية

صبرني يارب يقول...

أبو شوشو

الله يخليك يارب انا عنيه لك يا فندم

بص هو الكيك من غير سمن الى هو الكيك الاسفنجي

بس بيكون فيه بيض كتير اوي والبيض برضه فيه دهون

وما بيكونش حلو انه يتاكل لواحده كده الكيك الاسنفجي


فانا رايي تجرب المقدار بتاعي بالقشطه بس من غير الزيت لكن تزود الحليب شويه هو يمكن يطلع شويه ناشف بس جرب

وقول لوالدتك لو كان عندها حصوه فى المراره تشيلها وتخلص منها هاتبقى كويسه ان شاء الله

انا شلتها ولله الحمد ما استحملتش المجتمع اكتر من كده
هههههههههههههههه

ولو انا جربت مقدار كيك قليل الدسم هاقولك


اه انا شوفت فى السوق علب كيك جاهز مكتوب عليه قليل الدسم

يعنى بتزود عليها البيض بس تقريبا

ممكن تبقى تسأل عليه

صبرني يارب يقول...

ليبيه
يا فرحة قلبي اد ايه بافرح لما حد يجرب ويقولي

والف الف هنا يا جميل لكم واكيد انتى شاطره عشان كده طلعت معاكي حلوه


تسلم اديكى وكل ما تجربي حاجه قوليلي عشان بازقطط انا

نورتي يا جميل وحالا هاروح اتفرج طبعا

Abu ShoSho يقول...

ألهمك الله الصبر أم مريم
جزاكِ الله خيرا على تفاعلك و أدام عليك هذه الروح الإيجابية و وفاك أجرك مع الصابرين.
شكرا على النصيحة و لكن أكل من الشارع في بيت أمي!!!!!!

متعك الله بالصحة و بالزوج الصالح و الأبناء البررة.

أبو شوشو

بنت الغربة يقول...

ايه ياصبرنى ياحبيبتى؟؟؟
انا جيت اعلق هنا لما لقيتك قافله التعليقات هناك...؟؟
ايه اللى حصل وزعلك قوى كده ..؟؟؟؟
ده انتى دايما اللى بتقولى لى ان الواحد لازم ياخد الدنيا بهدووووء..
تقومى تتخنقى قوى كده...
ماتزعليش نفسك انا هابعتلك بطاقتى كلها والرقم القومى كمان ياستى علشان تتاكدى انى داليا...
وانى حاليا مخنوقه فى مصر...
تحياتى ياعسل..
وبلاش زعل
.......وسيبينى بقه اروح اعمل الكيكه..
تحياتى

Mony يقول...

تسلم ايد يا صبصب


بقالي كتير ماجتليكيش علشان الست خفاش بنتي

بس الحمد لله علمتها قعدة النت دلؤتي و هنرجع نتابع كل حبايبنا من تاني ان شاء الله

الكيك شكله تحفة
لازم اجربه ان شاء الله
خصوصا ده بالسمن البلدي و القشطة يعني عشقي


ربنا يكرمك يا صبصب
سلميلي عليكي اوي و علي الاولاد

Mony يقول...

صحيح
خدي الموقع دهفي تامبليتس حلوة
http://www.finalsense.com/services/blog_templates/

ده فيه تامبليتس خاصة بالاكل و المطبخ


لو عايزة اشكال مافيهاش طبخ قوليلي و انا تحت امرك يا جميل
:)

صبرني يارب يقول...

ابو شوشو

لا انت فهمتنى غلط

مش كيك جاهز

هو عباره عن خلطه كده جافه دقيق ومواد رافعه ومواد دهنيه وبتتعمل منها الكيكه

ومكتوب عليها انها بدسم اقل للرجيم

يعنى هاتتعمل فى البيت برضه

ربنا يخليلك ماما يا باشا

صبرني يارب يقول...

بنت الغربه

منوره البلوجر يا جميله ما تغبيش ت اني علينا

وعدت الحمد لله ما تقلقيش

ويلا اعملي الكيك وورينى

صبرني يارب يقول...

موني

معلش يا جميل كل الامور هاتتظبط معاكي ان شاء الله ما تقلقيش

والكيكه يلا اعمليها بقى عشان انا لسه قايله لجوزك انك هاتعمليها شكله عينه فى الكيكه بتاعة اللقاء
ههههههههههههههههه

منوره يا جميل وشكرا على التمبلتس اول لما افضى هاقعد بقى اروق عليها

سواحة يقول...

صبرنى
و الله كان نفسنى اقولك انى عملتها مع مرات اخويا بس
الرجيم يا اختى الرجيم
مرات اخويا عمله رجيم و محرجة علينا الحلويات لحد ما تنزل ال10 كيلو بتوع الحمل و الولادة :-((
المهم برضة حجربها لما ارجع لحياتى و المطبخ الى بلعب بيه برحتى :-))

بمناسبة بكرة عاشوراء
متدينا وصفة عاشوراء اه نقنعها انه عيد و مفروض نعمله :-))

kochia يقول...

تسلم ايدك
وحشني الاكل من هنا

صبرني يارب يقول...

واندا حاضر عنيه

بصي عشان انا ما عملتهاش والله بس فكره كويسه هاقوم اعملها بس مش هالحق انزل الصور جايز

هاقولك الطريقه دلوقتي على السريع

انتى تنقعي القمح

ويستحسن يكون قمح بقشره مش بالقش بتاعه لا
فى قمح مقشور وفى قمح مش مقشور

المهم هاتنقعيه ساعتين كده وبعدين تطبخيه تحطي عليه مايه وتسبيه على النار لما يغلي تهدي النار
وتسبيه بقى حسب نوع القمح ما يستوي تلاقي الحبايه فتحت كده تبقى استوت

هايكون بقى متبقي عليها شويه مايه كده مش كتير اوي يادوب متغطيه كده مايه

تزوديها بقى حليب زي ما تحبي وتزودي عليها السكر ووالفانيليا وجوز الهند ومكسرات لو حبيتى وايتها حاجه تحبيها

وتسبيها تغلي

وبعدين تقدري كده اللبن الى موجود كام كوبايه وتحطي لكل كبايه معلقة نشا كبيره

تدوبي النشا طبعا بره فى ربع كوباية حليب دافي وبعين تزوديها على القمح وهو بيغلي وتقلبي كويس

وتغرفيها زي المهلبيه كده

هاقولك انا هاقوم انقع القمح واحاول انزلكم المقادير والصور النهارده

سي يو

صبرني يارب يقول...

كوشيا

انتى كمان وحشاني والله
انتى فين يا بنتى

سواحة يقول...

مرسى يا صبرنى
حاحول اقنعها انه مفيد للرجيم نعمله
:-)
و كل سنة و انت طيبة

صبرني يارب يقول...

ماشي يا واندا
والله عملتها بس العيال ما رضيوش بالعشورا يا اختي قالوا عايزينها بليله

مشيناها بليله بقى وبصراحه تعبانه مش قادره اصور واقعد اكتب

ادعيلى ظهري يبقى كويس

وسلميلى على مرات اخوكي وقوليلها قلبي معاااااااااكي

سواحة يقول...

عملناها يا صيرنى
طلعت حلوة
شكرا على الطريقة
بليلة تبقى بنت عم العشوراء
النظرية سايبة و لا ماسكة نفسها :-) كله بيمشى المسائل و هى دى الفايدة :-))

تسلمى ايديك

walaa tulip rose يقول...

الله الله الله
والله نفسي في الكيك جداااااااااااا
وصفتك ممتازة وهاعملها باسرع وقت
انا دايما كانت بتطلع معايا ناشفة مش عارفة ليه
انما هاجرب طريقتك وادعيلي تطلع حلوة
تحياتي

نكهة مغربية يقول...

نورتيني يا عسل بس بلاش تغيبي علينا ده كلو
بتوحشينا جداااا

هناء محمود يقول...

ايه المطبخ ده

مكونتش واخدة بالى منه

أنا معاكم أنا معاكم ....... ماشى

صبرني يارب يقول...

واندا

تمام بالهنا يا جميل

كل سنه وانتم طيبين

صبرني يارب يقول...

ولاء تيوليب روز

اولا اسجل اعجابي بالاسم عشان انا باحب شكل التيوليب اوي حتى المدونه الرئيسيه عندي عليها تيوليب وروز برضه

ثانيا

لا المقدار ده مش ناشف خالص مالص ده بيطلع طري وجميل اوي بس جربي وقوليلي
ولو طلعت العجينه جامده عن الى فى الصوره دي زودي عليها شوية حليب

صبرني يارب يقول...

نكهه

والله يا جميل انتى كمان بتوحشينى وانتى النور كله

صبرني يارب يقول...

ام بوبه

هاو كام

البت شيماء ما جابتكيش ليه هاضربهالك

منوره معانا يا جميل

غير معرف يقول...

أهلا وسهلا يسعدني التعرف على مدونتكم الجميلة جدا ومفيدة ويشرفني أن أكون عضوة فيها للاستفادة منها

غير معرف يقول...

أهلا وسهلا يسعدني التعرف على مدونتكم الجميلة جدا ومفيدة ويشرفني أن أكون عضوة فيها للاستفادة منها