الاثنين، 18 مايو 2009

محشي كرنب (ملفوف)

تحديييييييييث هام جدا


الجميله الشاطره نكهه مغربيه عملت المحشي واهووووووو طالع زي الفل من ايديها
تسقيفه كبيره بقى















بناءا على طلب الجماهير المغربيه الى هي نكهه مغربيه حبيبتى


هاعملها النهارده محشي كرنب وفى اقوال اخرى ملفوف




صحيح هو مش موسم ا لكرنب فى مصر دلوقتي


لكن فى كرنب فى السوق كتير




والى مش عاجبه يعمل ورق عنب بقى




المهم


اول حاجه هانعملها نجهز الخلطه


الاول هاقولكم الطريقه التقليديه المسبكه




هانعمل كميات تعمل حلة محشي وسط كده مش زي الحله الى في الصوره خالص


نقول هانحتاج كيلو طماطم حمرا


ولو مش حمرا اخلطوا عليها صلصلة علب




و3 بصلات كبار كده وحلوين




وحوالي كوبايتين خضره مفرومه او مقطعه صغير اوي




الخضره بقى حماتي بتحط شبت وكسبره وتقول لا بقدونس يع


امي بتحط شب وبقدونس وبتقولك كسبره يع




انا بقى باحط الا الاقيه وان كان عاجبهم




فطبعا حطوا الى يعجبكوا بقى بس لازم لازم شبت




هانعمل ايه بقى




الاول هانفرم البصل


وفى معلقتين سمنه كده حلوين ومربربين هانحمره لحد لما يبقى لونه اصفر مش احمر اوي


وبعدين نحط عليه عصير الطماطم ونسيبه يغلي لما يعيط من كتر الغليه يتسبك يعنى




يبقى تقيل جدا على اد ما نقدر




وبعدين فى الاخر بقى نزود عليه الخضره والملح والفلفل وبهارات زي ما نحب


انا باجيب خلطه من عند العطار بهارات محشي (لكن فى العادي للكرنب باحط فلفل وكمون )


ونسيبها بقى تغلي مع الخضره 3 دقايق بس مش كتير عشان التقليه ما تبهتش


امي بتقول كده ماليش دعوه


وهايكون ده شكل التقليه






ندخل على الورق


الكرنب طبعا كلنا عارفين بنسلقه ازاي


بتخلعي الورق ورقه ورقه بالرااحه وتنزليها فى مايه بتغلي يعنى من دقيقتين الى ثلاثه بالكتير


وتطلعيه وتحطيه فى مصفاه وتحطيه تحت الحنفيه بسرعه عشان ما يتهارش من الحراره العاليه


ولما نخلص ويبرد


نقطع الورق بقى بالسكينه بحيث يبقى مستطيلات زي الصوره دي كده










وطبعا نكون جهزنا الرز هانحتاج حوالي كيلو رز


نغسله ونصفيه كويس ونسيبه على جنب


وبعدين لما نخلص التقليه والورق وكله تمام


نحط الرز فى التقليه ونقلبه كويس اوي


ونبدأ نحشي بقى




اه وانتى بتقطعي الورق هايبقى فى حتت صغيره وكده ما ترميهاش دي بقى تجيبى الحله الى هاتحشي فيها وتحطي فيها معلقتين زيت وبعدين تفرشي الورق المقطع ده تحت كده عشان المحشي الى تحت ما يتلسعش ويتحروق من النار




وبعدين انا باحب بقى الارضيه دي واكلها


ههههههههههههههههههههههههههههههههههههه






شوفوا انا مصوره المراحل بتاعة لف المحشي بس طبعا انا كنت باصور نفسي يعنى الصور طالعه مش اد كده


بس يعنى جايز تفهموا حاجه




احنا الاول هانفرد الورقه على ايدنا ونحط رز قليل عشان ما تطلعش طخينه يادوب نص معلقه رز


نحط الرز على اول الورقه من فوق


زي كده








بعد كده نطويها بقى بايدنا التانيه زي كده





ونلفها كمان على بعضها كده
بس ونكمل لف لحد ما تبقى شكلها كده










ونرص المحشي جنب بعضه فى الحله بنظااااااام يا دواير يا خطوط زي الحله دي كده






وده شكل الحله الى الواحد بعد ما يخلصها يتشاهد على روحه ويكون جاله شبه كساح فى العمود الفقري


ويقول فى عقل باله بالذمه مش انا عقلي تعبان عشان باعمل محشي اصلا









بعد كده بقى نسويها


ممكن نسويها بشوربه (مرقه) والى ما عندوش شوربه يسويه بمايه مش هايقول لا


هحنتاج حوالي 3 كوبايات شوربه وطبعا عليهم معلقة ملح


لان الرز فى المحشي هايكون متشرب من التقليه وكده يعنى




هانحط كمان معلقة سمنه على وش الحله خصوصا لو مش عاملينه بشوربه




ونغطي عليه بطبق استانلس كده صغنون الاول يكون لازق في وش الحله عشان الفقاعات بتاعة الغليه ما تفتحش المحشي




وبعدين نغطي الحله بقى بالغطى بتاعها العادي


ونرفعها على نار عاليه نسبيا




ونسيبها لحد ما تغلي نوطي النار




وبعدين لما المايه تبدأ الرز يتشربها وتنشف نوطي النار اوي او نحط شياطه




ونسيبه بقى حوالي نص ساعه بعد كده




وقت السوى كله بيبقى حوالي ساعه




وده شكله بعد ما استوى










ما لحقتش اصور فى اطباق بقى عشان بمجرد غرفه كان فى ناس بتاكل وكده يعنى


هههههههههههههههههههه




يارب يكون الوصف سهل وفهمتوا حاجه مني








بالنسبه للدايت بقى


تعالى يا فاتيما




انا يا اختي ما باحرمش نفسي باكل محشي برضه




بس مش باعمله تقليه زي كده




لا ابسولتلي




انا باعمل عصير الطمام وافرم البصل وادعك البصل بالملح والفلفل كويس وبعدين احطه على الطماطم واسيبهم يتسبكوا من غير سمن خالص


وبعدين اكمل بقى الى فات ده كله عااااادي




وكمان باكتر اوي البصر ويا حبذا لو جبت شويه ورق كرنب لسه ما اتسلقش (قلب الكرنبه ) وافرمها واحطها كمان فى التقليه




كل دي محاولات لتقليل كمية الرز فى المحشي




بعد كده ممكن استخدم رز بسمتي


صحيح بيغير طعم المحشي شويه


بس طبعاااااااااااااااا حيث اننا جعانين وغلبانين


بنرضى باي حاجه يعنى احسن من مافيش




وممكن كمان تسلقي الرز المصري عادي وترمي مايته وبعدين تحطيه فى التقليه وعادي بس بقى تسعين فى الميه بيطلع معجن الموضوع ده لان الرز المسلوق عايز عنايه خاص فى السوا




وكمان فارسه ماله البسمتى يعنى




المهم وتسويه عادي خالص




تقدري تاكلي من المحشي ده خماشر محشيايه ما حدش يقولك حاجه يا فاتيما




واي خدمه والله مش عارفه من غيرى كنتم هاتعملوا ايه




اي استفسار انا جاهزه


وفضفضه راجعي عليا بقى لو انا ناسيه حاجه




الى يفهم حاجه يقولي


ههههههههههههههههههههههههههههه








هناك 47 تعليقًا:

دعاء يقول...

طريقتك نفس طريقتي بالظبط ونفس الخلطةوحتى نفس الكلام اللى بقوله لما أخلص انا ايه اللى يخلينى اعمل محشى.
ههههههههههههه
بس انا بحط بدل الشوربة أو الماء طماطم معصورة.
بس من الآخر دى من أكلاتى المفضلة جدا و بجد تستاهل التعب.
شكرا للمشاركة

ELMASRYA - SHAMLOOLA HANEM يقول...

يسلموا إيديكي يا صوصو

والله وصف رااااائع

كفيتي ووفيتي

بس عايزة أسأل سؤال

الميه اللي بتحطيها على المحشي علشان يستوي بتبقى مغطياه ولا لنص الحلة ولا إيه أصله لما بغطيه بالميه بيعجن

وان جيتي للحق بطلت اعمله وفيه واحده بتطبخه ليا مخصوص

أفيدونا أفادكم الله

نكهة مغربية يقول...

و اله عنية دمعت لما قريت المقدمة
و قلبي كان حيسكت من الفرحة
ربنا يخليكي لية و ميحرمناش من حنانك و عطفك على الغلابة زينا

و الله بكرا حعمل انشاءالله و نزلك الصورة علاشان تشوفي الشطارة
بس يا روحى ممكن أحط اللحم المفرومة و هي نية و لا مطبوخة و لا محطهاش ؟؟؟؟؟؟؟؟
جوبيني يا قمورة علاشان أنزل اللحمة من الفريزر

نكهة مغربية يقول...

بالمنسبة للارز ممكن تاحط اللي حبتو طويلة و صفرة ؟؟؟؟؟؟؟؟؟
زي اللي عندي في الصور بتعتي مع الفلفل و جمبري فكراه؟؟؟؟؟؟؟؟؟؟؟؟
أحطو من غير صلق ؟؟؟؟؟؟؟؟؟؟؟؟؟ظظظ
معلش استحمليني هو ديما كده الاول صعب
هههههههههههه

بنت مصر يقول...

تسلم الايادي يا قمرة

انا بأه مشكلتي مع الكرنب في تقطيعه في البداية لأني مش بعرف اقطعه خالص

والمرة اللي جيت قطعته فيها كان صغير ولما جيت أسلقه هريته فطبعا معرفتش احشيه
:(

ومن ساعتها محاولتش اجربه تاني وخلاص لما بنزل القاهرة بناكل الكرنب المحشي عند حماتي أو مامتي لأنهم عارفين اللي فيها

صبرني يارب يقول...

نكهه

هارد على نكهه الاول والله لسه شايفه التعليق معلش


اللحمه المفرومه حطيها مع التقليه تستوي وتسرد مايتها الاول

ولو هى متعصجه ضفيها عادي على الرز مع التقليه

وبالنسبه للرز

شوفي المحشي ما يبقاش محشي مصري صح الا بالرز المصري

فانتى حاولي تلاقيه

لان الرز التاني بيفرط الى بيبقى حبته طويله

يبقى مفرفر اوي

انما الرز المصري لو فكيتى من عليه الورق بعد ما يستوي تلاقي الرز ماسك فى بعضه زي صباع كده


ماشي يا قمر
انا معاكي اهو جووووووو اون


ويا حبيبى ما ليش بركه الا انتى

صبرني يارب يقول...

دعاء

اه يا حبيتى فى ناس بتحط الطماطم فعلا

بس عارفه مع الكرنب بالذات بتخليه مش عارفه يبقى ورق الكرنب جامد ومجلد كده

انا باعمل كده مع محشي الكوسه اكتر عشان يطلع احمر وجميل


بس كله حلو يعنى

نورتي

صبرني يارب يقول...

شملوله

يا لهوووووووي مصريه وشملوله وبتخلي حد يعملك المحشي

يادي الجرسه ام حناجل

ههههههههههههههه

لا بصي يا قمر انتى عشان بقى بيعجن منك

لازم تعايري الرز الى هاتستعمليه ماشيه

وتحطي المايه بالعيار برضه

يعنى لو استعملتي 4 كوبايت رز كيلو يعنى

تحطي بقى 3 كوبايات شوربه

لان الرز اصلا بيكون متشرب من التقليه ووالطماطم والورق كمان مش كل ده فى مايه ؟


وبالنسبه لمحشي الكوسه ده بقى يعنى بابقى مش عايزه حتى احطله مايه

لانى فى الغالب باحط فيه مع الرز لحمه مفرومه والكوسه بتسرد مايه كتير جدا

يعنى باحط على الصنيه كلها نص كوباية مايه

فانتى جربي كده بالعيار والحكايه هاتمش معاكي

فى الكرنب يااااااادوب المايه تكون مغطياه

يعنى يادوب كده تلمحي المايه طلعت

جربي كده وقولي لي

صبرني يارب يقول...

بنت مصر

عاااااااااادي

هو مين ما هراش كرنب وبوظه يعنى

انا اول ما عملت محشي لوحدي كنت فى ابو ظبي ولوحدي لوحدي يعنى

طبعا هاريتلي بتاع اربع خمس ست كرنبات كده ههههههههههههههه

بس كان الكرنب هناك تخين شويه وبيستحمل يعنى فكنت باعمل بقى المحشي اي كلام كده ومبهدل واتهم فى الكرنب واقول وووووووحش الكرنب الى هنا ده
ههههههههههههههههه


بس اتعلمت بقى

مش هانفضل ناكل عند ماما وحماتي

امال العيال يا بطه تاكليهم ازاي

اعملي واغلطي واتعلمي
ولو جوزك ما اكلش اكلك البايظ اطبخيه هو شخصيا
ههههههههههههههههههههه

نورتي يا قمر

نكهة مغربية يقول...

حبوبتي الارز المصري هو الي بنعمل منو رز بلبن؟؟؟؟؟؟؟؟؟؟ظظظ
هو حبة مدورة و بيضة و بينضج بسرعة
مش كده هو الارز المطلوب؟؟؟؟؟؟

نكهة مغربية يقول...

http://www.riz-camargue.com/phot06-05/rizrond.jpg


شوفي الصورة دي

مسدس صغير يقول...

خلااااااااااااص
معدتش قادر
انا لازم اكل محشى حالا
ومش عاوز اعرف طريقة طبيخه
المهم اكل
هههههههههه
جميلة اوى المدونة دى
ولذيذة كمان.
احييكى على المحشى

صبرني يارب يقول...

نكهه

هو الصوره يا جميل مش شكله مش رز مصري لكن هو شبهه اوي

ده الى فى الصوره دي رز مصري

http://img504.imageshack.us/img504/3357/12jf7.png


لكن لو انتى بتعملى به رز باللبن يبقى ينفع للمحشي فعلا

جربي ياعم هاتخسري ايه
ههههههههههه

هى الكرنبه بس ابقوا كلوا بالمعلقه بقى
هههههههههههه

يلا بقى عايزه اتفرج على الشغل

صبرني يارب يقول...

مسدس صغير

ايه ده ايه ده

انت داخل على طمع كده على طول

وبعدين انت تعرف انت المحشي بيعمل ازاي ليه

انت بتاكل على الجاهز يا معلم

اخبار الطوباره ايه ؟؟

نكهة مغربية يقول...

شكرا يا قمورة و الله لفرجك على شغل جامد

هههههههههههه
أنا دلوقتي فهمت انت ليه سميتي نفسك صبرني يا رب هههههههههههههههه
علاشان كنت عارفة حتلاقي بلوة زي هههههههه

ELMASRYA - SHAMLOOLA HANEM يقول...

يا صوصو أنا مش عايزة أقولك الكبيرة بقى

في أول جوازي عم العيال جابلنا كرنبة ماعرفش ليه

اتدبست وحاولت

بس وانا بحشي بقى زهقت قوي بعد اتنين تلاته كده

رحت عاملة اخترع تحححححححححفه

ماهي الحاجة أم الإختراع

حطيت طبقة ورق كرنب وطبقة خلطة حشو وهكذا بالتبادل

وريحة البيت بقى بقت تجنن

محشي كرنب بقى

ولما جوزي جه من الشغل شم الريحة واتبسط خالص

على السفرة إتصدم وبعدين أنا كنت لابسه وش العبيط سألته إيه رأيك في الطعم ( خدي بالك الطعم مش الشكل )

ابتسم ابتسامة صفرا وقاللي حلو جدا بس هو مش بيبقى صوابع

رحت لابسه بسرعه الوش الجبس وقلتله وهو يعني هينزل في بطتك صوابع مانت هتمضغه

قاللي كويس بس بلاش تعمليه تاني

ودي كانت نهاية فرقة عكاشة المسرحية

أي محاولات بعد كده كان بيعجن واخبيه واكله أنا والولاد

بس عجبني حكاية اقل من عدد كبايات الرز بكباية دي

تسلميلي يا صبصب

نكهة مغربية يقول...

و الله يا جميل المحشي على النار
لما يستوي حرد عليكي

موووووووححححححححح

Mony يقول...

تسلم ايديكي يا صبصب

انا برضه تقريبا بعمله كده


بس طبعا كنت بهري كرنب في الاول بالعبيييييييييط
ابقي جابة كرنباية كبييييرة و يطلع منها يادوب حلة صغيرة ماكنتش بتكفيني انا و جوزي سوا
غشيمة بأه

اما بالنسبة للخلطة فانا بضرب الطماطم و البصل في الخلاط و و احط عليهم الملح و الفلفل و كمون و كسبرة
سر نجاح المحشي بتاعي الكسبرة
بحط كسبرة ناشفة كتيييير
بس طبعا مطحونة جدا
و احطهم علي النار لغاية ما يتسبكوا و يبقي لونهم يفرح كده و بحط زيت علي الخلطة ديه علشان تكون خفيفة

و الخضرة جدتي كانت بتقول زي حماتك
شبت و كسبرة اما بقدونس يع
بس انا عرفت ان ربطة الكسبرة فيها 3 اضعاف الكلسيوم اللي في كوب اللبن فقلت يع يع بس مفيد و هو اساسا مالوش ريحة خالص في الاكل

و بحط الخلطة علي الرز و اقلب كويس و استني لما يبردوا تماما و احط الخضرة علي الحاجة و هي باردة
علشان تفضل محتفظة بريحتها الطازة و هي علي النار هتشمي ريحة الخضرة جميلة مووووت و المحشي بيستوي

و عند التسوية
بصراحة كده بيني و بينك انا ماليش في الشربة خالص
يعني مش شريبة شربة من الاخر فمبعملش المحشي بالشربة
بعمله بحاجة كده جدتي كانت بتسميها (عقد)بكسر العين
ماية علي ملح و كمون علي نصف ملعقة صلصة من بتاعة التسبيكة يادوب تدي لون و احطهم علي النار و لما يغلوا احطهم علي حلة المحشي و اسبها تستوي براحتها

في الأخر لما بتوطي علي الحلة لما تبدأ تتشرب بحط معلقتين كبار سمن بلدي علي وش الحلة و طبعا بتتشرب مع الماية لحد قعر الحلة
الله الله علي الريحة
انا شماها دلؤتي و الله
كل اللي ياكل عندي مش مصدق ازاي ريحة السمن البلدي ده و خفيف
لما بقول اني عملت التسبيكة بالزيت مش بيصدقوا
فبطلت اقول
و الناس فاكرة اني بعمله بالسمن البلدي من A to Z

انا لازم اعمل محشي بكرة علي كده
ريقي سال من دلؤتي
ربنا يصبرني و يحينا لحد بكرة


ربنا يكرمك يا جميل و تسلم ايدك

غير معرف يقول...

هو انا داخلة غلط ولا حاجة

هو شكل الملفوف غريب كدا ليه

ليه الورقة رقيقة اوي كدا ؟؟؟(وش عبيط)

http://www.qaseemy.net/vb/imgcache/16073.imgcache

http://www7.0zz0.com/2008/11/20/21/410089672.jpg

الاكل المصري مختلف جدااا عن اكلنا

ربي يعطيكي الف عافيي عالمحشي

المحشي متعب جدااا وكل مرة بندم اني عملته هههههههههههه

انا بكره عاملة محشي كوسا انا بحب المحاشي كها وجوزي كمان

تسلم ايدك ياقمر

^ـ^

صبرني يارب يقول...

نكهه مغربيه

يا لهوي يا قمر ما تقوليش كده ابدا ابدا والله

ما تقلقيش انا قابلت ناس حالتهم اكتر منك بكتييييييييير
ههههههههههههههههههههه



ايه ده كمان على النار ده انتى بجد شاطره اهو

يلا طمنينى بقى

صبرني يارب يقول...

شملوووووووله


حرام عليكى فطستينى من الضحك


على فكره تيته الله يرحمها كانت تحكيلى انها كان زمان

طبعا طبعا كان العدد خرافي الى هى مسؤله عن اطعامه

كان المحشي ده بيتعمل بالخمس كرنبات

شوره طين يعنى

كانت الورق الى طالع بقى من تقطيع الورق تاخده تحطه مع الخلطه الباقيه وتطبخه للعيال بالليل ماهو طبعا كانوا بيحشوا من على بيات
هههههههههههههه

كله على بعضه كده مش لف ولا حاجه بقى كانت بتقول عليه محشي كداب

وعلى فكره قولي لجوزك بقى ان قريب جه شيف فى التلفزيون
وعمله طبقت زي بتاعك كده بس طلعه خرط بقى عمله تورته يعنى
ههههههههههههههه

جربي بقى بالعيار وقوليلي يا بطه

صبرني يارب يقول...

موني

ايوه السمنه البلدي برضه انا باحطها لما يكون مش عاملاها بشوربه سمينه

بس مش باكتر اوي يا اختي مش ناقصين سمنه

ههههههههههههه

والتقليه برضه انا باقلي بسمنه بلدي

انا مش باستعمل الا السمنه البلدي فقط


جدتى انا بقى كانت بتقول عليه القعد

وكانت برضه بتعمله كده زي ما انتى بتقولي بس الكرنب ما كانتش بتحطله طماطم الى بعد ما يغلي ويستوى الورق شويه عشان ما يجلدش

دى كانت وجهة نظرها يعنى

هههههههه

نورتي يا جميل انت باشا انت ياعم

صبرني يارب يقول...

نواره

اه يا حبيبتى ده كرنب مصري

عندنا بنقول عليه بلدي

فى كرنب بقى زي الى انتى جبتيه ده اسمه افرنجي

بيكون ورقه تخين كده

استعملته انا ايام ما كنت فى الامارات

بس بتاعنا احلى يا اختي
ههههههههههههههههه

نورتي يا نواره

نكهة مغربية يقول...

و الله يا صبرني أنا انبارح أكلت أحلى أكل مصري ممممممممممممممممممم
مقلكش يا حبيبتي حبناه قدي ايه
مممممممم
و الله خلاص أنا جوزي حندمن عليه انشاء الله و الله يجنن انا عملتو بشوووويى لحمة مفرومة ممممممممممممممممممممم
و الله لحطلك الصورة بس استني شوية أنا ليسة حاطة الدجاج بالمشمش
بالمنسبة سيبك من شملولة و نوااارة دول ميعجبهمش العجب دول بهدلوني على الطبق اللي أنا حطيتو لازم تدخلو تشفيه
دو خلاص بقلهم شوية و يرجو
بريييييييه منهم بريييييهههه


ههههههههههههههههه

و الله طلع المحشي تحفة
على فكرة احنا مكناش بناكل الكرنب غير في الكسكسي
كن ضيعين يعني هههههههههههه
دلوقتي خلاص فيه محشيي

صبرني يارب يقول...

نكههه


حلووووووووووووووووووو

شايفين الستات يا ولااااااااد
مش تقوليلي عجن يا شملوله

ههههههههههههههههه

يلا يا بنتى هاتي الصور عشان نغيظهم

الف هنا يا جميل والله فرحااااااااانه جداااااااااااااا

وتسلم اديكى انتى شاطره والله

نكهة مغربية يقول...

أنا حطيت الموضوع يا قمر يلى خشي بقى و قليلي تديني كام من 10

صبرني يارب يقول...

اديكى عشره من عشره يا جميللللللللل

اخر حلاوه انتي والله

شايفين يا بنات الشطاااااااااره

قوموا يلى اعملوا محشي

غير معرف يقول...

مش قادرة اصبر
المحشى بعد ماستوى منظره تحفة
اصل بحب محشى الكرنب قوى
وانا بعمله بنفس طريقتك بس طول عمرى بحب اكله يكون حد عامله
بس مش اى حد
تسلم ايدك ياقمر وفى انتظار المزيد
تحباتى

صبرني يارب يقول...

ام مالك

تسلمى ياااااارب

ونورتي عنينا لكيى طبق مخصوص هنا يا ابنى لام مالك

kochia يقول...

تسلم الايادي

خمسة فضفضة يقول...

السلام عليكم ورحمة الله وبركاته

تسلم ايدك يا صبصب

شوفي المفغروض ماتغليش الخضره مع التسبيكه عشان اولا ما تبقاش باهته زي ما مامتك بتقول وكمان عشان ريحتها ماتروحش

انا بحط التلات اصناف شبت وكسبره وبقدونس ولازم تبقي كتير
وبعدين يا بنتي فين الثوم اهم حاجه في الموضوع ويبقي كتير

شوفي خدي الرابط ده انا هنا حطه طريقتي في عمل المحشي بالتفصيل وبالصور كمان

دوقي يوووووه قصدي شوفي وقوليلي رايك

( ملحوظه انا امة الخالق دي مش حد تاني ههههههههه)

http://forum.hawaaworld.com/showthread.php?t=1672729

صبرني يارب يقول...

كوشيا

تسملى يا جميل

صبرني يارب يقول...

فضفضه

لا لا توم لااااااا مش باحبه فى المحشي اطلاقا


ماليش دعوه ياعم

وبالنسبه للخضره انا مش باغليها دول بس دقيقتين يادوب تدبل الخضره

وطبعا هاشوف الفيدو حالا فورام

صبرني يارب يقول...

شوفت الرابط يا فضفضه

جميل اوي ما شاء الله عليكى


بس بصراحه انا ما بابحبش اعمل المحشي مشكل فى حله واحده بيغير طعم بعضه

وكمان التقليه بتاعتك بيضا شويه انا باعملها حمرا عن كده اوي


بس تسلم اديكى والصور حلوه اوي

خصوصا ورق العنب انا هاستاذنك اخد طريقة اللف بقى لانى مش عارفه اصورها عايزه حد يصورلي وانا باشتغل يا اختي ماتعرفيش حد
هههههههههههههه

خمسة فضفضة يقول...

السلام عليكم ورحمة الله وبركاته

ولا يهمك يا صبصب خدي اللي انتي عاوزاه

اجي اصورلك انا ياستي ولا تزعلي

بالنسبه للتقليه هي الطماطم كتير بس باينه فاتحه لاني باحط كمية بصل كتيره جدا بيخلي طعمها احلي وكمان بيقلل من كمية الرز دا غير ان الطماطم دي متصوره وهي طالعه من التلاجه عشان كده تحسيها فاتحه

بالنسبه للتشكيله احنا متعودين علي كده وكمان لاني مش باعمل المحشي الا كل فين وفين عشان الغلبه بتاعه فابخلص نفسي واعمل من كل فيلم اغنيه عشان مايبقاش في نفس اللي بياكل حاجه
او حد تسوله نفسه انه يطلب محشي كذا او كذا ويخليني ارجع اعمل تاني
يابنتي دا انا باعمله علي 3 ايام مره تحضير الخلطه ومره تنقية الرز وغسيل الخضره واخر حاجه حفر الكوسه والحاجات التانيه وبعدين الحشي وباقوم ضهري هايتقتم
واللي يغيظك بقي ان عندنا يوم الاربع هو السوق زي سوق الجمعه كده وبيبقي الكرنب ده في الموسم مالي السوق تبصي تلاقي الناس شايلين بالتلات او اربع كرنبات ومعدين قدامي في الصيدليه علي الساعه 10 كده وعلي الساعه 12 تشمي الشارع كله ريحته محشي عملوا كل ده امتي ماتعرفيش ههههههه

مش عرفه مين الرايقه اللي اخترعت الاكله دي اكيد واحده ضهرها سليم منها لله بقي هههههههههههههههههه

غير معرف يقول...

الله ينور عليكى ويا بخت جوزك بيكى .. اصل انا بعيد عنك متجوز اجنبية بعد ما اسلمت وعايش وبشتغل فى اوكرانيا وهى لا تفقه شييى عن الاكل المصرى المتسبك الجميل بتاعنا..اه ه ..فينك يا ماما ... فبدائت انا اطبخ بئة بنفسى ...حعمل ايه اخش على النت واعمل الخطوات.. يا ريت المرة اللى جاية منبى تعمليلنا الكسكسى البيتى بالسكر او بالشربة .. انا مش عارف امى كانت بتعمله ازاى .. وشكرا للمنتدى الجميل ده وشكرا ليكى.

صبرني يارب يقول...

غير معرف
معلش اسفه خالص

انا ما شوفتش تعليقك الا دلوقتي

وادي جزاة الى ما يسمعش كلمه ماما تقولها

يعنى تسيب البنات تعنس هنا وتروحوا تتجوزوا برضه

طب خلصوا على الى جوا الاول
ههههههههههههههههههه

المهم

الكسكسي ده والله انا مش باعمله يعنى ما كلتوش قبل كده

بس ندور عليه ونعمله لكم مخصوص ان شاء الله

ودايما منورنا يارب

lamya يقول...

اولا: يا صبرنى عايزة اقولك انك جميله جدااااااااااااااااااا
واسلوبك حلو اوى ماشاء الله عليكى ودمك خفيف مووت
وبجد انتى تنفعى ف تقديم البرامج حلو اوى
ثانيا: انا كان ليا سؤال هل ينفع انى احشى محشى الكرنب واشيله ف الفريزر محشى ف اطباق بلاستيك؟؟؟ هل ينفع اعمل كده ولا طعمه هيغير ؟؟؟
بليز عايزة رد ضروروى جداااا

صبرني يارب يقول...

لمياء متشكره خالص ربنا يكرمك

وبالنسبه للكرنب بصي هو انا ما جربتوش بس شوفت فى السوبر ماركت عاملينه كده فممكن تجربي

ولو انى اعتقد ان ممكن الرز يبقى مش تمام

لكن لو حصل وطلعتيه من الفريزر تستنى لما التلج يفك كويس

وهاقولك على حاجه جربي فى كميه صغيره وشوفي

وبصي لو لقيته مش حلو جربي تحطيه فى الفريزر مستوي اصلا وتطلعيه تسخنيه

جربي كده وقوليلى يا جميل حصل ايه
ومرسي ونورتينى

ام ساره يقول...

انتي عسوله قوي وشطوره جدا وانا كبيره واولادي وجوزي بيحبو طبيخي قوي بس برده باخد منك حاجات كتيره بتسهليها في الطريقه شكرا

صبرني يارب يقول...

ام ساره
ربنا يخليكى يارب متشكره يا جميل والله انتى اكيد اكلك جميل زيك وانتى نورتينى

غير معرف يقول...

يعطيك العافيه بس حبه اسلك سۉال فيه ملفوف مسلو ق وجاهز بسوق

Unknown يقول...




thx

شركة تنظيف بالرياض




thank you

حراج السيارات


thank you



احلى سينما

غير معرف يقول...

لو سمحتي انا عندي عزومه بكره ان شاء الله وعملت محشي كرونب بس العقد عندي مشكله دايما بيكون من النص مستواش اعمل ايه عايز مقدار الشوربه بالضبط كوبابه من بتاع العصير ولا الشاي

Unknown يقول...

لو سمحتي انا ام عبد الرحمن وبعمل المحشي بنفس طريقتك بالظبط بس في نص الحله مش بيستوي والجناب بتتهري ايه السبب
انا من عشاق المحشي جدا وبطلت اعمله بسبب انه بيفضل نيي من النص ارجو الرد

koky يقول...

هو انا لو ضفت ثوم على الصلصه بتاع المحشي هيبان ف طعمها او هيفرق

Unknown يقول...

لو سمحت انا عملت محشي الكرنب وغليته غلوتين وطفيت عليه ينفع اكملو بكره ولا مينفعش كدا