الاثنين، 16 مارس 2009

كفتة البطاطس والخضروات

حبايبى الحلوين المطبخيين اصدقائي
الايام دي البطاطس فى السوق حلوه وكتيره ما شاء الله وعشان كده قلت نستغل الفرصه دي ونعمل منها حاجات كتير
وانا احب لما تكون الحاجه فى موسمها انى استعملها كتير لانها اكيد خلقت فى هذا الوقت لحكمه منه عز وجل
عشان كده انا باغرقهم بطاطس فى موسم البطاطس
ندخل على الشغل بقى
هانحتاج حوالي خمس بطاطسات مسلوقين ومقشرين ومهروسين طبعا(أو 3 بطاطس متوسطه و2 جزر ه)
وبصله متوسطه مفرومه
بيضه
وحوالي نص كوبايه فول صويا مطحون ولو ما عندناش ممكن نحط بداله بقسماط نو بروبلم
ملح وفلفل وبهارات
(ولو حد بيحب طعم الخضره ممكن نزود كمان 3 معالق كسبره على شبت على بقدونس مفرومين )
وبقسماط على دقيق + بيضه للتحمير
الطريقه
هانحط كل المكونات دي على بعضها كده فى الفود بروسيسر او الكبه او وات ايفر مش مشكلتي هههههههههههههههههههههههههه
ونخلطهم كويس لحد ما يطلعوا شكلهم عامل كده

وبعد كده نشكلها صوابع زي الصوره الى فوق دي وبعدين ننزلها فى الدقيق وبعدين البيض وبعدين البقسماط ولو هى ماسكه نفسها يعنى ممكن نخلط البقسماط على الدقيق ونحط فى البيض ونطلع عليهم وبعدين نسقطها فى الزيت وهو سخن وبتاخد تحمير مافيش 4 دقايق وطبعا ما نعليش عليها اوي عشان ما تتحرقش .
وممكن نعملها مدوره زي الصوره دي كده ودى بتنفعني لو العيش بتاع السندوتشات مدور بيبقى ده انسب



وطبعا دي بجد لذيذه اوي ومفيده اوي لو هانحط عليها جزر وصويا بترفع قيمتها الغذائيه
والعيال عندي حبوها جدا
مريم جت من المدرسه قالتلى ماما حلو البانيه الى كنتى عاملاه فى السندوتشات ده
ههههههههههههههههههههههههه
باقول لرضا بنتك بتقولي على البطاطس بتاعة الصبح حلو البانيه ده
قالي بطاطس ؟؟؟
بطاطس ايه ؟؟؟ هو كان فى بطاطس ؟؟ دى كانت طعميه باين ؟؟؟!!!
ناس فله الصراحه هههههههههههههههه
بس بجد بطلع حلوه اوي جربوها وعلى ضمانتي
ولو طلعت منكم فاكه شويه زودوها شويه فول صويا مطحون او شوية بقسماط لحد ما تمسك نفسها
وبالراحه وانتم بتقلوها لانها بتكون طريه اوي عن كوفتة اللحمه طبعا
والف هنا
والى يجرب يقولي

هناك 20 تعليقًا:

Mony يقول...

انا اول واحدة اجرب ان شاء الله

اصل الواد ابني مش بياكل خضراوات خااالص

بس مش ممكن يقفش البطاطس يا ام مريم؟؟


اصله بيعشق اللحمة و بياكلها حاف
عايز ليل و نهار ياكل لحمة
و طبعا مِسلوَع علشان مش بيرضي ياكل نشويات
لحد ما تعب و الدكتور عمله تحاليل و قاله ان كده بقي عنده بداية نقرص
(اللي بيجي للكبار)



و لو اكتشف انها مش لحمة الخمس بطاطسيات المهروسين هيقعدوا في ارابيزي

خمسة فضفضة يقول...

السلام عليكم ورحمة الله وبركاته

ماشاء الله يا صبصب جميله


انا باعملها بس باحشيها لحمه معصجه ، باعملها زي الكُبيبه الشامي من بره بطاطس ومن جوه اللحمه وبازود علي الخلطه معلقتين او تلاته جبنه موزاريلا او رومي مبشوره بس مش باحط فول صويا(صرتحه اول مره اسمع انه ممكن يستخدم كده )

صحيح انتي بتجيبيه منين في المنصوره اصله مش موجود عندناوكنت عاوزه اجربه علي خلطة الهامبورجر لانهم بيقولوا انه بيديها طعم مميز زي الجاهز


سلام

صبرني يارب يقول...

موني

هههههههههههههههههههههه ظريف ابنك ده

انا عندي واحده العكس بقى عايزه تعيش مع البطاطس وسندوتشات وكده

واللحمه والخضار دي اخر تفكيراتها

وبعدين جربي بطاطستين الاول وان شاء الله تطلع حلوه يا ستى وتاكليها انتى كمان

وخدي بالك عليه اغصبي عليه شويه فى اكل الخضار احسن بجد موضوع مهم اوي

الف سلامه عليه يا جميل

صبرني يارب يقول...

فضفضه

الصويا لعلمك انا باحطه فى كل حاجه عادي

وهو موجود هنا عند بتوع الحبوب عادي واخر واحد اشتريت منه كان عنده منه مطحون زي الدقيق كده

ومنه حب شبه الفول المدمس بس صغير ومدور

وكان قبل كده باجيبه اه محطحون بس عباره عن كتل كده وناشف لازم تنقعيه فى مايه الاول ربع ساعه قبل ما تشتغله به بصراحه كان رخم وكان بيفكلي الكفته احيانا وكنت بطلت استعمله

انما انا بعد كده لما لقيته مطحون وعامل زي الدقيق كده جبته بصراحه رااااائع

فعلا على الهمبورجر حلو جدا جدا

وكمان على الكوفته دي

ومش هاتصدقي على الطعميه كمان والله
مسكها وخلاها جميله فعلا

ويا موني ممكن تستعمليه فى انك تعملي لابنك همبورجر نصه لحمه ونصه صويا هاتخفف المواضيع شويه

وعلى فكره انا كمان مره خلط على خلطة البطاطس دي حته لحمه مفرومه صغيره كده (نيه يعنى )

اعطته طعم اللحمه بقى وكانت حلوه اوي برضه

اسالي عليه يا فضفضه عن العطارين الكبار وبتوع الحبوب الكبار برضه

ولو حد عنده لوازم حلوانيه ومطاعم هاتلاقيه برضه

ابعتلك يا باشا على عنيه والله

نورتي يا فضفضه

خمسة فضفضة يقول...

السلام عليكم ورحمة الله وبركاته

شكرا يا ام خالد

ان شاء الله اسأل عندنا عند العطارين او بتوع الحبوب انا عارفه شكله اللي هو زي حباية الفول بس علي صغير غامق شويه

ولو جبته حبوب اطحنه علي طول بالمطحنه ولا انقعه لحد ما يطري وبعدين اهرسه في الفود بروسيسور ؟؟

ياريت تقوليلي علي اسم العطار اللي بتشتريه منه في المنصوره وانا ان شاء الله اوصله

وهل ممكن الاقيه في الوكاله ولا مترو ؟؟

انا جمبكوا خالص تلت ساعه بالعربيه


حاجه كمان معلش ، كان فيه خلطه كده للهامبورجر اسمها ميزو شفتها مره في الوكاله هي معطم تركيبتها فول صويا وبتتنقع في ميه وبعدين تتحط علي اد حجمها من اللحم المفرومه ياتري جربتيها وهل حلوه ولا وحشه ؟؟

--------------

حاجه طبيه علي جمب ، بالنسبه لنسبه اليوريك اسيد في الدم اللي بتعلي بسبب اللحمه برضو هاتعلي بسبب البقوليات وطبعا فول الصويا من البقوليات و البقوليات بتعلي النسبه اكبر من اللحمه يعني موني ماينفعش كعلاج لابنها انها تقلل اللحمه وتحط فول صويا هاتبقي نفس المشكله هي هياها

المفروض تحاول تستبدل اللحمه بالفراخ او الارانب او السمك وده الافضل


سلام

صبرني يارب يقول...

فضفضه

يا حياتي ما كنتش اعرف انك بتنزلي المنصوره وعايزه محلات

بصي يا ستى ده الموضوع سهل جدا

بالنسبه للفول الصويا انا بصراحه ما اشترتوش حبوب قبل كده ومش عارفه هاينفع يتطحن فى البيت ولا ايه

انا ما شوفتش المطحون زي الدقيق ده الا عند ابوليله فى شارع الشيخه عيشه من ميدان الطميهى

وده محل عطاره جمله بس عنده حاجات كتير اوي مهمه وحلوه وممكن تطلبي منه توابل للهمبورجر كمان هايديهالك وحلوه انا جربتها


وفى مكان محلات النقيطى برضه دول عندهم كل حاجه تخطر على بالك

واعرف لهم فرعين واحد فى العباسي وواحد فى المجزر

وبالنسبه للخلطه الى فى الوكاله انا فاكره ان كان اسمها ايزي الذيذي وهى فعلا حلوه اوي
وسهله وسريعه وعليها توابلها والعيال عندي حبوها اكتر من الخلطه بتاعة العطار
بس انا باطنشها لانها شكلها فى الوان لان لونها احمر شويه كده

ومش عارفه هاتلاقي فول صويا بقى فى الوكاله ومترو ولا لاء ما سألتش عليه هناك قبل كده

ولو ما عرفتيش توصلي لاي محل من دول قوليلى وانا جيبلك والله وتبقى فرصه نتشرف بك يا جميل


وبالنسبه لموضوع اليوريك اسيد

تصوري فاتت عليا دي

مع انا كان عندي يوريك اسيد زمان وكنت حافظه الممنوعات وطبعا البقول من الممنوعات

كويس انك قولتليى هاكد على موني الموضوع ده

منوراني يا جميل

خمسة فضفضة يقول...

السلام عليكم ورحمة الله وبركاته

متشكرين يا ام خال يا جميله ربنا يخليكي يا قمر

ايوه انا بانزل المنصوره كتير وان شاء الله تيجي الفرصه ونتقابل يا قمر

عارفه انا ميدان الطميهي هاسال هناك علي شارع الشيخه عيشه ده وان شاء الله اوصل

كمان عارفه النقيطي اللي في العباسي دا كده العمليه بقت سهله اوي

وايوه الخلطه كان اسمها ايزي اللذيذي بس انا اختلطت عليا الاسامي بصراحه جوزي جابهالي مره من فتره بس خفت استخدمها حسيت ان فيها كميات كبيره من المنكهات والمواد الحافظه والملونه فاخفت استخدمها جدا وفضلت عندي اطلهعها وادخلها لحد ما تاريخها عدي ورميتها بس لو طعمها حلو اجربها واهو لو هاتستخدم علي فترات بعيده مش هايبقي فيه مشكله

سلام

صبرني يارب يقول...

تسلمى يا فضفضه ونورتي

وعلى فكره المحل بتاعنا فى شارع الشيخه عيشه ده

من الطميهي تاني عماره على اليمين

الخولي للتجاره ادوات كتابيه وهدايا روحي هناك اشربي شاي ونوري المحل يا جميل وصفريلى وانا اجيلك ههههههههههههههههههه

عمرو يقول...

و الله شكلخا كده مفيده و صحيه و مش بتحتوى على سعرات حراريه كتيره
يعنى يدوبك كده كفتايتين و طبق سلاطه خضرا و من غير عيش لأن البطاطس ما ينفعش يتاكل معاها عيش و تبقى وجبه معقوله و مغذيه
الله ينور عليكى و تسلم اٍيدك
مش تقولى لى زبده بلدى و سمنه فلاحى و مورته و حاجات رهيبه من دى :))

بنت مصر يقول...

ولادي بيحبو البطاطس دي جدااااا بس مكنتش بعملها بالجزر ولا الخضرة

حعملها النهارده ان شاء الله زي ماكتبتيها بالظبط وربنا يستر :)

مدونتك جميله ومفيده

كل يوم حدخل اشوف طابخة ايه النهارده لأني بحب التغيير والتنويع في الأكل علشان ولادي مايزهقووووووش

تسلم الايادي

غير معرف يقول...

رضا عنده حق شكلها طعميه خالص ف الصوره

صبرني يارب يقول...

عمرو

مالها بس الزبده الفلااااااحي

ارجع بقى للتعليقات وشوف تعليق الدكتوره فضفضه عليها وشوف بتقول ايه على التعليق وانت تصدقنى انها احسن من الزيوت والسمنه النباتي الى عامله زي زيت العربيات

امال بس يا استاذ عمرو الناس زمان كانت صحتها بمب ليه

وفعلا هى عايزه كده البطاطس دي كام واحده مع طبق سلطه وتبقى فل الفل

الف هنا يا استاذنا

صبرني يارب يقول...

بنت مصر

ياااارب تعجبهم وما تقوليش صبرني منها لله
ههههههههههههههههههه

نورتي يا حبيبتى وتشرفينا والله

صبرني يارب يقول...

بيبرس
هههههههههههههههههههههههههه
ايوه بس طعمها مش طعميه والله

بنت الغربة يقول...

حبيبتى ياصبرنى
انا قلت اجربها الاول وبعدين ااقولك
طلعت حلوة قوى بس انا زودتها كزبرة خضراا وبقدونس
وبصلايه صغيرة كده وحطيت بقسماط وطلعت حلوة جدا جدا ...
والاولاد حبوها ...وتخيلى عملت الخلطه دى مع اللحمه المفروومه من غير بطاطس طبعا ...وطلعت روعه...
جربيها لان الاولاد عندى حبوها جدا وبقت عندهم احسن من الهمبرجر..لانى عملتها نفس حجم البرجر بالظبط..وحطيتها لهم ساندوتشات على العشاا وحبوها جدا..
اه بالنسبه للبريقترول الباشا بيشكر صاحبتى اللى علمتنى طريقته لانها زى طريقة مامى بالظبط (على كلامه يعنى )
فادعيتلك والله فى تلك اللحظه الفريده من رضا الباشا..
تحياتى ياقمر
وحشتينى
معلش عندنا امتحانات الترم التانى دلوقتى واختك مشغووله قوى مع العيال
احنا عندنا هنا 3 ترمات مش زى مصر ترمين بس..
ده غير ان اخو الباشا جه معاه من مصر هو ومراته علشان يتفسحوا كام يوم...؟؟؟ تخيلى ؟؟؟وفى عز الامتحانات
والله مش عارفه اعمل ايه فى الراجل ده
فعلا صبرتى يارب

صبرني يارب يقول...

يا ضنايا يا اختي

عارفه حاسه بيكى مجربه هذه المهازل الانسانيه

وبالنسبه للكوفته طيب ماهو الكفته الايراني بتتعمل كده مش عارفه انتى جربتيها ولا لا بس انا برضه باحبا لكفته ا لى فيها خضره جدا حتى فى الشوي على الفحم

انا كنت باخاف اكل احط خضره على كوفتة الفحم وبعدين كلتها مره فى مطعم الشوكه الذهبيه حتى كنا فى الشارقه يومها وتوهنا ما لقيناش ا لا ا لمطعم ده
المهم بعد كده جربتها طلعت حلوه جدا

وقولي للباشا اي خدمه ا فتكر ا لجمايل ههههههههههههههههه

الف هنا لكم يا جميل

نكهة مغربية يقول...

ماشاء الله وصفاتك رائعة

sandy يقول...

والله انتي هايلة وشرحك جميل بس انتي غايبه فين ، ليه مبقيتيش تدخلي
طمنينا عليكي يا قمره

صبرني يارب يقول...

La cuisine du monde à la marocaine

مرسيه يا جميل ونورتي

صبرني يارب يقول...

ساندي

متشكره اوي يا حبيبتى
وانا مش متوقفه بس انا عزلت مدونه تانيه

ومتشكره على سؤالك