الأربعاء، 15 أكتوبر 2008

شوربة سي فود








سلام عليكم يا جماعه


نحدثكم من مطبخنا التدوينى الجديد


وانا بصراحه فكرت كتير كتير هانعمل ايه فى اول بوست بعدين قلت بقى انا لازم ابدأ باكتر حاجه باحب اعملها وباحبها جدا جدا


وهى شوربة السي فود او فواكه البحر



يلا قدامي على المطبخ




المقادير :


بصله كبيره مقطعه جوانح -- 3 فصوص ثوم كبير -- فلفل رومي الوان مقطع مكعبات -- 2 طماطم متوسطه مقطعه مكعبات برضه .



نص كيلوا جمبري مقشر ــ نص كيلوا كاليماري (حبار) مقشر ــ كيلوا كابوريا ــ كيلو بكلويز


نص كوب لبن ــ 2 ملعقه دقيق ــ ملح وبهارات سمك


====================



تجهيز المكونات


طبعا البصل والتوم والفلفل والطماطم قطعناهم فوق اهو


السي فود بقى


الجمبري ممكن تشتريه اصلا متقشر أو تجبيه فريش وتقشريه وتغسليه كويس ولو كان كبير شويه افتحي ضهره


الكلماري برضه نفس الموضوع فى منه مقشر جاهز فلبينى وصينى وفيتنامي مالي السوق ب 13 جنيه كيلوا صافي


الكابوريا نقشرها برضه نشيل الادين كلها ونفتحها ونقسم قلبها اثنين ونغسلها كويس وده الى هانستعمله

وممكن ناخد كمان شوية ادين كده تكون كبيره وسليمه وشكلها حلو بتعمل طعم للشوربه وشكل حلو للطبق


البكلويز بقى ده نجيبه ننقعه حوالي ساعتين لحد لما يفتح وتمسكيه تغسليه واحده واحده تحت الميه عشان تتأكدي انه مافيش فيه رمل من جوه والى ما تعرفيش تفتحيها ارميها عشان ممكن تكون وحشه او مليانه رمل



الطريقه :


شوفوا هى اهم حاجه فى الطريقه بقى بعد كده الترتيب


الاول هانضيف البصل والخضار بالترتيب ده وبين كل واحد والتاني دقيقتين تقريبا


البصل ـــ الفلفل ــــ الثوم ــــ الطماطم


باحب اسيب شوية فلفل وطماطم ابقى اضيفهم فى الاخر بيدوا شكل وطعم حلو اوي



بعد كده بقى نبدأ نضيف المكونات الاساسيه للشوربه الى هى السي فود :

برضه بالترتيب ده وبين كل واحد والتاني 3 دقائق وكل ما نضيف مكون نقلبه مع الى قبله بس مش بالمعلقه عشان ما تتهريش الحاجه نسمك الحله كده ونطقها


الكلماري ـــ الكابوريا ـــ البكلويز ـــ الجمبري


ونضيف الملح والتوابل


بعد كده نحط ميه نغطي بها المكونات كلها ونسيبها تغلي


وعلى ماتغلي نجيب نص كوباية اللبن الى فوق دي وندوب فيها معلقتين دقيق وممكن نخليها معلقه دقيق ومعلقه نشا


وبعدين لما يغلي الخليط نصب اللبن مع الدقيق عليها من خلال مصفاه صغيره عشان ما ناخدش كلاكيع دقيق ونقلب كويس واحنا بنصبها عشان ما تكلعكعش برضه .


وبعدين نضيف شوية الفلفل والطمطام الى كنا سايبنهم فوق ونقلب كويس ونظبط الملح ونسيبها تغلي 3 دقايق كده لحد ما الشوربه تتخن شوي


ونطفي عليها ونغرفها فى سلطنيات ونزين وشها بشوية كسبره او بقدونس وزي ما تحبي


ونقدم معاها نص لمونه

وممكن نقدم معاها أرز ابيض وتبقى وجبه كامله


وكلوا وادعولي بقى


ملحوظات :

ـــ ممكن بدل الدقيق والنشا نستخدم اكياس شوربه جاهزه فى مخصوص للسي فود لكن المنتشر اكتر اكياس شوربة الدجاج والمشروم وكله ماشي يعنى مافيش مشكله


ـــ ممكن نضيف مكعبات سمك بس دي بتكون اخر حاجه خالص قبل ما نحط اللبن بالدقيق على طول عشان ما بياخدش سوا خالص


ـــ ممكن نعمل الشوربه بمكونات عددها اهل من كده طبعا الى متوفر فى السوق ساعتها لانها اغلبها لها مواسم معينه

لكن المجمد بيحل المشاكل كلها دلوقتي


ـــ يفضل انها تتاكل على طول بمجرد الانتهاء من طبخها بتكون احلى بكتير


ـــ ما تسويهاش كتير كل السي فود لو استوى كتير بيبقى مش حلو خالص


ـــ الكميه الى انا عاملاها دي كتير على فكره تكفي مثلا 6 اشخاص


وبس كده وابقوا قوليلى رايكم

وعلى فكره الصوره الى فوق دي انا جايباها من النت على ما ربنا يسهل والكاميرا بتاعتي تشتغل


تحياتي لكم


هناك 28 تعليقًا:

Sweet Violet يقول...

نبارك هنا بقى

الف مبروك المدونه الجديده

و بالف هنا للى هايعمل الاكله بتاعتك

لكن اعترض بقى لانى مابحبهاش

اعملى اكلات انا بحبها بقى

عااااااااااااااااااااااااااااااااااااااااااااااااااااا

صبرني يارب يقول...

الله يبارك فيكي يا جميل

ما بتحبيهاااااااااش
فى حد ما بيحبش السي فود

طب جربي بتاعتي مش زي الى فى المطاعم والله
انا كلتها في مطاعم كتير جدا مش حلوه زي الى في البيت ابداااا

وعنيه ليكى قولي بتحبي ايه ويكون عندك على طول يا جميل

نورتي

Miss. Sosa يقول...

ماشاء الله شكلها ممتازة بس ماعندكيش شوربة فراخ .. طيب شوربة جناح :((

صبرني يارب يقول...

مس سوسا

كله موجود ما تقلقيش

شوربة اجنحه كانت عاملاها منى الى هي مذكرات زوجه شابه
فى مدونتها التانيه مدام سلاموني

Mony يقول...

مبروووووووووك


مبروك المدونة الجديدة يا ام مريم


و انا اللي كنت قاعدة مستنياكي علشان تيجي معايا



بس شوربة السي فود ممتازة

هي ديه اللي بالكريمة يا صبرني؟؟؟

انا كنت عايزة اتعلمها من زمان

بس ايه اخبار الزفارة فيها؟؟

اصلكلتها من محل هنا فيكبريالقبة و كانت اعوذ بالله

canary يقول...

لا بجد دى كدة التوب

انتى كدة اخترعتى أفتكاسه جديدة خااالص

بس تحفه فعلا ومش عاوزة اقولك انى معظم ساعات اليوم بقعد فى المطبخ وتقريبا من هنا ورايح هقعد قدهم فى مدونتك دى
أما بقى بالنسبه للتعليق على البوست فا أطعمه البحر غير متوافرة على الاطلاق فى بلدنا بصعيد مصر واخرنا هنا السمك البلطى ومن فضلك والنبى يا أبلتى نظيرة عاوزة طريقه عمل الجلاش باللحمه المفرومه عشان اخر مرة أتعجن منى

صبرني يارب يقول...

موووووووني

والله العظيم خفت اظلمك لو اشتركت معاكي
اصل انا بصي ساعات فاضيه وساعات لا
وممكن انقطع عنك شهر مثلا
لما تيجى فى مدونتي مش مشكله
انما كنت زعلانه اوي لما عملت كده وانا فى الضاحكون وكنا كتير ويمكن ما حدش لاحظ اختفائي

وعموما انا عنيه ليكى
لو تحبي انزل مواضيع عندك كمان والله مافيش مشكله
نخلي هنا للطبيخ القديم والوصفات البيتى
وعندك للحجات الىمش طبيخ الى تامر بيحبها
هههههههههههههههههههه

وايوه دي شوربة السي فود بالكريمه فعلا

ومش زفره خاااااالص
والى فى المطاعم فعلا فعلا بتبقى زفره جدا
عشان كده انا قررت اعملها فى البيت ودورت على الطريقه وجبت اكتر من طريقه وجربتهم ودى بقى كوكتيل منهم كلهم وعليه لمساتي

وهاتعجبك اوي
بس ما تحطيش مكعبات سمك لانها هى الى بتزفرها كده

هما طبعا فىا لمطاعم بيحطوا سمك عشان يخفضوا التكاليف

تحياتي لك يا موني

صبرني يارب يقول...

كناري يا حبيبتى

اجيبلك لحد عندك يا جميل والله

وعلى فكره انتى ممكن تشوفي سوبر ماركت كبير شويه

وانتى هاتلاقي فيه الحاجات دي مجمده
حاليا فى فى السوق جمبري مقشر اماراتي الكيلوا صافي ب 25 جنيه جميل جدا

وفى كالماري برضه مقشر فيتنامي وصينى الكيلو ب 13 جنيه جميل جدا

والكابوريا فى منها برضه ادين كابوريا مخليه او مش مهم انا عملتها قبل كده بكلماري وجمبري بس على فكره وكانت حلوه برضه

والجلاش عنيه يا جميل هاعلمك تعملي احلى جلاش على الاطلاق

وما يطلعش معجن ولا ناشف ان شاء الله

تحياتي لكي ونورتي وتنوري دايما ان شاء الله

كـــيــــــــارا يقول...

مبرووووووووووووووك علي المدونه الجديده

بس اعملي اكل لذيذ بقي

عندك الفراخ بقي ظبطينا

موناليزا يقول...

مبروك على انشاء هذا المطبخ التدوينى
ويارب دايما تفيدينا على طول بالاكلات الجديدة
انا هبقى اجربها لانى معملتهاش قبل كده
=============
ممكن تشيلى تاكيد الكلمة حين ارسال التعليق

حسن حنفى يقول...

طب انا بقي اعمل ايه
انا ببارك بس علي المدونه الجديده

صبرني يارب يقول...

كيارا

حبيبتى عنيه فراخ ولحمه وكل حاجه

صبرني يارب يقول...

موناليزا

الله يبارك فيكى يا جميل
جربيها وقوليلى رايك

وتأكيد الكلمه حاضر المدونه كلها لسه والله باظبط فيها

صبرني يارب يقول...

حسن حنفي

ايه تاكل بس دي
لا ياعم احنا هنا كل واحد لازم يبقى له شغلانه

اتفضل خد البصل والفلفل والطماطم قطعه مكعبااااات

تاكل على الجاهز ايه مش كفايه الى عندنا بياكلوا على الجاهز
هههههههههههههههه
نورت ياحسن

romansy يقول...

انا جاى ابارك
وكمان ادوق فى الاخر واكيد هيطلع حلو
بالهنا والشفا

صبرني يارب يقول...

رومانسي

الله يهنيك يا اخي ويكرمك
ونورت

خمسة فضفضة يقول...

السلام عليكم ورحمة الله وبركاته

الف مبروك المدونه وتسلم اديكِ علي الشوربه

تقريبا باعملها بنفس الطريقه وبعدين اصفي الشوربه لوحدا
واحمر ملعقتين الدقيق تحمير خفيف وبعدين احط عليهم الشوربه اللي صفيتها طبعا مع التقليب وبعد كده نص كوباية اللبن واسيبها تغلي 5 دقايق لحد ما تتخن شوية وبعدين اضيف السي فوود

ومش باحط لا ثوم ولا فلفل
(اول مره اسمع كده بس هاجربها واقولك رايي )، بصل وبس وساعات اقطع عليها بعد ما تخلص عود كرفس او بقدونس


اما بالنسبة للسبيط المجمد بصراحه ماحبيتوش خالص وحسيت انه عامل زي الكاويتش مافيش احسن من الطازه
وكمان الجمبري تحسي ان التلج هاريه ومالوش طعم

ولا ايه رايك ؟؟؟

صبرني يارب يقول...

فضفضه

شوفي انا من المنصوره
البحريات هنا الفريش مش موجوده على طول
الكلماري الى هو الحبار الابيض الى الحبر بتاعه لونه اسود
ده نادرا لما الاقيه طازه
وفى الاغلب بقى بيكون مجمد وفاكينه ومستهبلنا
الى بيكون هنا موجود طازه احيانا فى مواسم معينه زي الايام دي يمكن الحبار الاحمر
وده بيبقى رقيق جدا وجربته فى الشوربه بصراحه ما عجبنيش اوي

ده غير ان تنضيفه زفتتتتتتته طلع روحي لانى كان بابا الله يصلح حاله جايبلي 5 كيلوا

بس حشيته طلع جميل اوي على فكره

اما الجمبري فعلا عندك حق بيبقى مهري من الثلج
بس انا جربت كل الانواع الاماراتي الوحيد الى بيبقى محترم شويه ومش مهري فعلا
لكن طبعا لا يعلى على الطازه خصوصا لو انتى من بلد فيها بحر
انا كنت عايشه فى ابو ظبي مش عايزه اقولك كنت خلصه على الخليج والى بيطلع منه وانا هناك

ومش بس كده
انا كنت باصطاد
احلى سمك وكابوريا كلتهم فى حياتي الى اصطادتهم بايدى

هابقى احكيلكم على حكايتي مع الصيد وجريي ورا الكابوريا على الشط ان شاء الله

بس الزنقات بقى حضرتك بتخلينى ساعات اجري على المجمدات دي

تحياتي لكي ونورتي جدااااااا

وبصراحه يا بنااااااات
نون النسوه تا تاعيش

بنت الغربة يقول...

حبيبتى اكلتك عجبتنى قوى بس انا دايما باعمله بس باضيف لها شوية زنجبيل مع التوم والبصل ده بيديها ريحه حلوه قوى-داليا من دبى

أنا حر يقول...

مبروك كتير على المدونة الجامدة دي اللي هتنفع العزاب في ممارسة حياتهم المطبخية بشكل اكتر من ممتاز
على فكرة انا بحب السي فود جدا بس مكنتش بعرف ازاي بتتعمل بس كده انا هجرب وربنا يستر
:)
في انتظار بقيت الوجبات
تحياتي

صبرني يارب يقول...

بنت الغربه

داليا انا باحط توابل سمك مشكله وهى فيها جنزبيل فعلا

تسلمي يا قمر ونورتي

صبرني يارب يقول...

أنا حر

احنا تحت امرك يا فندم الى انت عايز تتعلمه قووووول بس

وربنا يردك من غربتك على خير

اقصوصه يقول...

احب المـأكولات البحريه جدا :)

أميرة يقول...

عجبتني دي و بحبها بس يا شاطرة نسيتي تقولي البصل اللي في الاول دا حطيتيه ف ايه يعني مجبتيش سيرة لا زيت و لا زبدة ولا سمن :(

كله شغال و تمام ما عدا الحتة الاولانية دي

وتسلم ايديكي علي الوصفة:)

صبرني يارب يقول...

اقصوصه

الف هنا يارب

صبرني يارب يقول...

اليس

يا شييييييخه قلت باين
على فكره مش مهم ممكن ما تحطيهوش مش هايحصل حاجه

Marwa Eldawy يقول...

طبعا شكل الأكلة بتاعتك دي بقى لك مدة طويلة حاطاها هنا (٣ سنين زي ماهو باين).. أنا جربتها النهاردة وأحب أقول لك عظمة على عظمة على عظمة يا ست
بجد شوربة السي فود دي طلعت جميلة جدا جدا جدا أجمل مما كنت أتخيل
وخلي بالك أنا اسكندرانية يعني .. فشهادتي دي مش أي شهادة
تسلم الأيادي وربنا يجعله في ميزان حسناتك

صبرني يارب يقول...

لا دي شهادة تتبروز بقى
يا حبيبتى الف هنا وربنا يكرمك انتى كلك ذوق
ايوه فعلا دي اول صنف نزلته على المدونه دي لانى بامووووت فيها فعلا

وانا عامله متابعه للمدونه اي تعليق تحطيه على اي صنف بيجينى على الاميل ان شاء الله

نورتي يا حبيبتى