الاثنين، 13 أكتوبر 2008

افتتاحيه

السلام عليكم ورحمة الله وبركاته
النهارده يا جماعه يوم عظيم فى تاريخ البشريه
ايوه عشان انا بقالي كام شهر عايزه اعمل المدونه دي ومش فاضيه اعملها واخيرااااااا خدت اول خطوه فى الموضوع انى انشيء المدونه اصلا
والمدونه زي ما انت شايفين اسمها ايه ؟؟
اه اسمها طابخين ايه النهارده ؟؟
اه ليه بقى انا سمتها كده
لان كل ما حد يشوفني سواء على النت او فى الواقع يسألنى السؤال ده .
طابخه ايه النهارده يا صبرني ؟
حقيقي مش عارفه ليه
قلت اجاوب بقى على السؤال ده برابط المدونه دي
ده غير ان انا على فكره من هواة المطابخ جدا
باحب اطبخ واعمل حلويات وافنن واتعلم الجديد
ياما لبخت عادي بالذات وانا بنت
بس الحمد لله حصل خير بابا استحملنا ياماااااااا
صحيح اول ما بدأ اخواتي يدخلوا فى الدور ويطبخوا هما كمان
الراجل جاله انهيار عصبي وكانت حياته الزوجيه هاتنتهي
بس الحمد لله ربنا ستر
اما الآن فهو جوزني لرضا عشان اجرب فيه
ههههههههههههههههههههههههههه
فى الحقيقه عشان الواحد يتعلم لازم يغلط
بس يعنى غلط عن غلط يفرق
المهم بقى انا هابدأ اكتب ان شاء الله من النهارده فى المدونه دي
واي خدمه حضراتكم
الى نفسه فى اكله معينه يقولي بس وانا تحت امركم
لو اعرفها هاكتبها ولو ماا عرفهاش هادور
عليها ونتعلمها سوا
لكن ان شاء الله انا ليا منهج فى الموضوع ده
اولا انا باحب الاكل البيتى والحاجات القديمه الى الستات بطلوا يعملوها
وكمان ان شاء ا لله مش هانزل اكله الا لماا كون جربتها بنفسي
وكان نفسي بصراحه انزل الموضوعات بالصور
بس الكاميرا بتاعتي بايظه ادعولي تتصلح وانا اهيصكم صور
تحياتي لكم جميعا

هناك 6 تعليقات:

saragebaly يقول...

صبرني

من حسن حظي اني افتتح المدونة واقص الشريط

بس مش عارفة المق معصلج ليه كدة صبرك عليا يا صبرني
هههههههههه

بجد فكرة المدونة حلوة اوي وكمان هتساعد اللي مش بيعرفو يطبخوا على التعليم

مبروك عليكي المدونة وربنا يباركلك فيها يارب

سارة

صبرني يارب يقول...

اهلا اهلا اهلا

ده الافتاتحيه المباركه دي

تخيلى يا ساره انا لسه والله ما خلصتش شغل على التمبلت وكده وماا علنتش عنها انتى لقيتنى ازاي

بس نورتي يا جميل والله وان شاء الله نشوف ايه الى معصلك ونصلحه تحياتي لكى

حاسوباتيه يقول...

الف مبروك على المدونه الجديده وانا داخله على جواز وفاشله موت في المطبخ ومش بحب اطبخ اصلا بس بعد كده هاخد على نفوخي وهطبخ غصب عني طبعا ياريت تفدينا بخبراتك

صبرني يارب يقول...

حاسوباتيه

نورتي يا جميل

وعنيه ليكى يا قمر تابعينى بجد واسألي فى اي حاجه وانا هاحاول ارد على كل الاساله

اقصوصه يقول...

فكرة المدونه جميله جدا

وجديده من نوعها بالنسبه لي

الله يوفقك ان شاالله

وتتحفينا بما لذ وطاب من الوصفات

howyda يقول...

ما شاء الله عليكي بصراحه انتي سكر